أرجع لكم مرة ثانية بلعبة Skating جديدة. لكن هالمرة ويا لعبة Session الي تركيزها أكثر أنها تكون محاكاة للتزلج بدل من تبني الأسلوب الآركيدي والسريع والمليان بالنقاط الموجود في ألعاب Tony Hawk’s Pro Skater، بل على أسلوب المحاكاة أقرب للي شفناه سابقاً في سلسلة Skate من EA. لعبة Session: Skate Sim من تطوير استوديو مستقل مكون من مجموعة من المتزلجين والهواة لهذه الرياضة الي كان هدفهم ابرازه في اللعبة هو الطريقة الحقيقية لأداء الحركات على لوح التزلج. كنت أنتظر اللعبة لفترة طويلة بعد ما كانت في الـ Early Access، وأخيراً نزلت ولعبتها على PS5 وبشاركم تجربتي عنها كشخص يحب ألعاب الـ Skating.
النظرة الأولى يمكن ماتكون إيجابية اتجاه اللعبة أول ما تشغلها. لأن أول شي تشوفه هو نظام اختيار الشخصية الي بتلعب فيها. لكن مافي Character Creator فماتقدر حتى تغير ملامح الوجه أو أي شيء ثاني يتعلق بتفاصيل الشخصية. كل الي تقدر تسويه أنك تختار من بين 8 أشكال محددة مسبقاً. النظام بدائي جداً فيعطيك نظرة أولى سلبية شوي اتجاه اللعبة. لكن مع اللعب تقدر تشتري ملابس جديدة وتعدل على لوح التزلج، الي له تأثير على اللعب لأن في ألواح بحجم 8 انش ونص، وفي ألواح أكبر وأصغر بالحجم وحتى بالنسبة للإطارات. فالتغييرات ما تكون شكلية بس، بل تأثر على طريقة الحركات.
وبالكلام عن الحركات فهني جوهر اللعبة الأساسي. اللعبة تركيزها على المحاكاة بدرجة أكبر من حتى سلسلة Skate من EA. والازرار الي تستخدمها تحتاج تعود، لأنك تستخدم عصا الانالوق اليمين واليسار وهم مربوطين برجلك. وإذا تبغي تتحرك لليمين او لليسار تستخدم R2 و L2. فنظام التحكم كلش مو اعتيادي وصعب بالبداية. لكن إذا تعلمت ليش هذه الازرار هي الي يستخدمونها، بتتعود عليها اسرع. وبالنسبة لي خلال أول 15 دقيقة تعودت عليه. كلامي كله في هذه الحلقة بكون على مستوى الصعوبة الافتراضي الي هو الثالث من ناحية الصعوبة، ففي Easy الي يكون أسهل والـAssisted أسهلهم أو انك تختار Hardcore اذا تبغي تجربة أصعب. هذه الصعوبات تقلل من سقوطك وتساعدك بأنها تسوي لك الحركات بدون اتقان في التوقيت، واللعبة فيها خيارات وايد تعدل عليها عشان تصنع التجربة المناسبة لك، فتقدر تغيير على اعدادات مثل مستوى الجاذبية، وسرعة انعطاف اللوح، ومقدار القفز، وسرعة دوران الجسم، وقوة الدفع بالقدم. فتقدر تخليها لعبة آركيدية بالكامل اذا تبغي. لكن بركز على جانب المحاكاة بالخيارات الافتراضية في هذه الحلقة.
التحكم في Session يركز على الرجل الامامية والخلفية، الي يتغير الزر لها بحسب طريقة ركوبك على لوح التزلج، لكنه ثابت بالنسبة لقدمك اليمين واليسار. إذا كنت تستخدم اللوح بالطريقة العادية فتكون رجلك اليسار هي الامامية ورجلك اليمين هي الخلفية. أما إذا تركب اللوح بطريقة Switch فتنعكس تصير رجلك اليمين هي الي بالأمام واليسار بالخلف. هذا الشي مهم تعرفه من البداية، لان الحركات تعتمد تأديتها على موضع القدم، يعني مثلاً اذا بتسوي Kickflip ماتقدر تقول ان عشان تسوي Kickflip تحرك العصا اليمين لتحت والعصا اليسار لاتجاه اليسار. لأن هذه الازرار بتكون صحيحة لما تكون راكب اللوح بالطريقة العادية فقط، لكن لما يتغير مكان قدمك على اللوح تنعكس الحركة بأنك لازم تحرك العصا اليسار لتحت والعصا اليمين باتجاه اليمين. فالأسهل إنك تعرف أن عشان تسوي Kickflip لازم تضغط برجلك الخلفية بقوة على لوح التزلج الي بدوره ينقل وزن جسمك على الجزء الخلفي من اللوح، وبعدها تحرك رجلك الأمامية باتجاه بعيد عن اللوح. فبالوصف الثاني الي هو أكثر تعقيد؛ لكن بتكون عارف على حسب موضع القدم اليمين او اليسار، طريقة التصرف بشكل أفضل بأداء الحركات، بدل ما تركز على حفظ اتجاهات عصا التحكم.
هذا الشرح يعطيك فكرة بأن التحكم صعب ومعقد، لأنه فعلاً التركيز على المحاكاة. تبغي اللعبة تعلمك ان وزن مكان القدم هو الي يأثر على بدء الحركة بدل من انك تتعلم أزرار وتعيدها عشان تسوي نفس الحركات. وهذا كله بالنسبة للحركات الأساسية مثل الـ Ollie و kickflip و heelflip. ولما تبغي تسوي احتكاك او Grinding على الرصيف مثلاً، لازم تبدأ الـ Ollie بمكان صح ويكون توقيتك مع السرعة صح، وبعدها أول ما تقترب من الرصيف وقبل ما تنزل باللوح؛ لازم تحرك قدمك اليمين واليسار للمكان الي تبغيه عشان تحرك اللوح بالضبط للحركة الي تبغي تسويها. فإذا كانت 50-50 تاخذ الرجل اليمين باتجاه واليسار باتجاه معاكس. وإذا تبغي تسوي Nosegrind تاخذ رجلك الي بالأمام للأسفل وترفع رجلك الي بالخلف لفوق. وصف طريقة التحكم صعب بمقدار تعلمه لأول مرة، لكن اذا كنت تحب التزلج كرياضة أو انت استخدمت لوح تزلج سابقاً بتعرف ان هذه طريقة مشابهة لأداء الحركات في الواقع، ومن رأيي أن اللعبة تنجح تقدمها بهذا الأسلوب بربطها مع عصا التحكم في الكونترولر، وتعلمك بنفس الوقت شلون نقل الوزن يأثر على الحركات. مثل ما قلت بالبداية، الشيء المهم الي لازم تعرفه عن Session هو بأنها تحاول تكون محاكاة، وهدفها بعيد نهائياً عن تقديم لعبة تزلج آركيدية. طبعاً إلا إذا اخترت أسهل مستوى صعوبة وغيرت نظام التحكم وعدلت على الإعدادات الافتراضية، لكن كلامي اليوم مثل ما قلت بأنه للإعدادات الافتراضية.
بعد ما عرفت طريقة اللعب، كان في مهمات أقدر أروح لها مباشرة، بس أول شيء سويته قعدت اتزلج في المنطقة الي انا فيها وأحاول أسوي حركات على الأشياء الي أشوفها قدامي. وطبعا كنت أفشل وأطيح أكثر من أني اتقن الحركة من أول مرة. لكن هذا الشيء خلاني ادخل بعقلية المتزلج الي يحاول في نفس المكان لمرات ورى مرات قبل ما يتقن خط حركة متكامل من البداية الى النهاية. وهذا الشي اعجبني بشكل كبير لأني أشوفها تجربة افتقدناها في ألعاب التزلج من بعد غياب سلسلة Skate لأكثر من 12 سنة. تكلمت وايد قبل عن ألعاب التزلج، ومعلومة اضافية عني، أني اتابع فيديوات على يوتيوب للـ Skaters لأني أحب أشوف هذه الرياضة الي للأسف ما أقدر أجربها على أرض الواقع. إذا تعرفون قناة Braille Skateboarding فأنا متابع لها من فترة طويلة، وهذه اللعبة ذكرتني بفيديواتهم الي يروحون فيها للـSkate Park ويحاولون يحطون لنفسهم وغيرهم تحدي ويفشلون أكثر من مرة قبل لا يتقنونه. دائما يجي وصف الواقعية مع ألعاب المحاكاة لأنه أسهل وصف ممكن تقوله، لكن Session بالنسبة لي مو بس واقعية لمحاكاة التزلج، هي محاكاة للمتزلج نفسه وعقليته.
اللعبة تقنية بدرجة كبيرة ومصممة عشان تستهوي محبين التزلج التقنيين أكثر من الي يحبون ألعاب التزلج من Tony Hawk… او حتى Skate. لأن لعبة Skate كانت تقنية بطريقة استخدام عصا التحكم ومحاكاتها للوزن، لكنها مقارنة بـSession كانت أسهل، أو بالأحرى كانت تقدر تجذب اللاعب بشكل أسرع لنظامها. فاذا أبغي اوصي بهذه اللعبة بسألك أسئلة قبل ما أقول لك إذا Session تناسب طريقة لعبك أو لا. اذا كنت تحب سلسلة Tony Hawk’s Pro Skater ومالعبت Skate او ما جربتها لأنها صعبة أو لأن تحكمها كان مختلف، فما اعتقد ان Session مناسبة لك. اما إذا لعبت Skate وشفتها صعبة لكن حبيت التحدي فيها، فتجربة Session يمكن تليق بأسلوب لعبك أكثر، لكن حط في بالك انها تحتاج تركيز أكبر. وبداية لعبك لـ Session راح تطيح وايد وبتكرر نفس الأخطاء وبتفشل، لأنها لعبة تحتاج لعب بطيء أكثر من انها تكون تجربة عالسريع. والصراحة أنها أحياناً تحتاج صبر، لأنك لما تفشل في حركة معينة ماتقدر تلوم اللعبة، اللوم أكثر اني انا ما أتقنت أسوي الحركة بالتوقيت الصح، أو أنا اسأت التقدير بالنسبة للمسافة، أو ماكانت عندي السرعة الكافية. واللعبة ما تمسك ايدك وتقولك مو مشكلة هالمرة انت كنت قريب فبعطيك نتيجة إيجابية، مثل ما تسوي Skate احياناً، لا، في Session بتفشل وبتطيح على الأرض. قبل ما تبدأ تتزلج بمنطقة معينة تقدر تحدد Checkpoint بالنسبة للمكان، تضغط زر السهم تحت عشان تحفظ المكان، وبعدها كل ما تطيح وتبغي تعيد من نفس المكان تضغط على السهم فوق يرجعك للمكان الي حفظته. هذه الخاصية بتستخدمها وايد، لأن مثل ماقلت راح تطيح لمرات قبل ما تنجح، إلا اذا كنت فنان وتقدر تتقن كل شيء من البداية.
اللعبة فيها عالم كبير ومليان عواقب عشان تتزلج عليها، سواءً أرصفة خرسانية، أو أعمدة حديدية، أو أسطح رخامية. وكل هذه الأسطح يعتمد درجة الانزلاق عليها بحسب المادة، فاذا بتسوي Grinding على الخرسانة يكون أصعب من إنك تسوي Grinding على الرخام الي يكون أملس بطبيعته. العالم نفسه فاضي جداً من ناحية الناس، كأنك طالع تتزلج بفترة حظر التجول أيام كورونا، ويخوف أحياناً خصوصاً لما يصير ليل كأنك في لعبة رعب. عندك اعدادات تجريبية تقدر تضيف فيها الناس للعالم، لكن يعيقون حركتك لأنك راح تصدم فيهم ويطيحونك من اللوح. العالم فيه مناطق وايد تزورها وأكثر من الي توقعته، فيها 3 مدن: نيو يورك، فليدالفيا، وسان فرانسسكو، كلها مناطق كبيرة ومفتوحة. وبالإضافة للمناطق نفسها تقدر تشتري عقبات وتحطها في أي مكان في العالم، مثل الـ Ramps والأعمدة وغيرها.
تصميم المهمات يمكن مايكون كافي وكان يحتاج تطوير أكثر من الي شفته لحد الحين، لان اللعبة تعتمد عليك انك انت تدور في الاماكن وتحدد لروحك المكان المناسب للتزلج. الحلو ان العالم مليان عواقب تقدر تتزلج عليها، لكن السيء ان المهمات نفسها ماتعطيك هذه الأماكن وشنو تؤدي عليها من حركات، فأنت تصنع لنفسك المهمات بأنك تقول ان على هذا السطح الرخامي ببدأ بـ kickflip واواصل بـ Front side manual, ولما انتهي اطلع بـ 360 Hardflip. فلهذا السبب يخليني أقول ان تصميم المهمات يحتاج لاضافات أكثر حق اللاعبين الي يبغون تحدي تحدده اللعبة لهم. موجودة هذه التحديات مو انها معدومة نهائياً، بس قصدي أنها تكون أكثر بكل مناطق العالم عشان تستغل الاماكن الموجودة الي طوروها تحديداً لتأدية حركات معينة. فمن ناحية المحتوى للمهمات أقدر اقول انه بين المقبول والجيد وهو أكثر نقطة في اللعبة تمنيت انها تكون أفضل. لأن على هذا الحال تكون التجربة عبارة عن Sandbox او منطقة لعب انت تصنع فيه لعبك بدل ما تكون لعبة تعطيك تحديات وتكافئك عليها. Session لعبة تحدد لاعبينها بنفسها بسبب قابلية اللعب والتحكم والمحاكاة، هي لعبة تعرف نفسها موجهة لمن وما تحاول انها تخدعك عشان تلعبها. فإذا حسيت ان التجربة هذه بتعجبك من وصفي لها، وانت مهتم بألعاب التزلج فأنصحك تجرب Session لأنها شيء مختلف عن الباقي وتوفر وقت ممتع.
إذا مهتمين بألعاب التزلج نفسي، تكلمت في حلقة سابقة عن Airblade لعبة من Criterion مطورين نيد فور سبيد و باتلفيلد، والي كانت لعبة تزلج بقصة وأسلوب لعب مغامرات، أسمعوا الحلقة عشان تعرفون تجربتي وياها. واذا تبغون مقالات أكثر عن ألعاب التزلج، كتبت عن لعبة Grind Session الي كانت حصرية سوني الي تنافس فيها Tony Hawk’s Pro Skater في أيام PS1، وأجريت مقابلة ويا مُنتج اللعبة الي جاوب على اسئلتي حولها. وكتبت مقال ثاني عن المتعة الي قدمها ريماستر THPS 1+2. وأخيراً في حلقة 313 من بودكاست جرعة إضافية تكلمت عن لعبة Olli Olli World الي تاخذ فكرة التزلج في اتجاه ثاني وبأسلوب 2D حلو. عندكم محتويات وايد تختارون منها اذا كنتوا تحبون الـSkating.
