للاستماع للحلقة
السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي، وهالحلقة نرجع لجهاز الـ Gameboy Color عشان نتكلم عن المحقق كونان. خلال السنوات الماضية نزلت أخيراً ترجمة هواة إنكليزية كاملة لأحد ألعاب المحقق الكونان الي نزلت على الـ Gameboy Color، وقعدت هالفترة ولعبتها على Analogue Pocket. من زمان وانا ودي ان ألعاب المحقق كونان يترجمونها، لأني أتذكر كان عندي لعبتين على بلايستيشن للمحقق الكونان وكانوا بالياباني وماكنت أعرف ألعبهم لما كنت صغير، لكن كنت دائماً أشغلهم وأضغط على الحوارات عشوائياً عشان أشوف اذا في أي شيء يصير، وكانت تعجبني الرسومات والأنيميشن. فحتى لما ماكنت أعرف شنو الي قاعد يصير، كنت استانس باللي على الشاشة. والحين بعد مادري يمكن 20 سنة وأكثر، وللحين مافي ترجمة لهالألعاب. بس الي نزلوا له ترجمة هو لعبة الـ Gameboy Color الي اسمها Meitantei Konan: Karakuri Jiin Satsujin Jiken… أو بالانكليزي The Mechanical Temple murder case. واصلاً احس الاسم حرق حق طريقة الجريمة… بس يلا هم الي سموها بهالأسم أنا مالي شغل.
فهاللعبة عبارة عن Visual Novel على إمكانيات جهاز الـ Gameboy Color، ولعبة تحقيق تدور فيها على الأدلة، وتستجوب الأشخاص عشان تحصل معلومات، وتربطها ببعضها عشان توصل للمشهد الي بعده. فمن هالجانب فيها أكثر من مجرد انك تشوف صور متتالية وتختار بين الحوارات، فتقدر تمشي وتستكشف المكان على طريقة ألعاب الـ JRPG شكلياً. وتقدر تسوي هالشي بأكثر من شخصية، لأن في بعض الأدلة وبعض الاستجوابات ما تنفع إلا بشخصية معينة. فتلعب بـ كونان، وموري، و هيجي هاتوري، و ران.
بحاول اني ما أعطي تفاصيل وايد عن القضية نفسها اذا كنتوا مهتمين تلعبونها بروحكم وتكتشفون الحل، بس يمكن في بعض الجوانب تكون حرق للأحداث. فعلى كيفكم إذا تبون تكملون تسمعون الحلقة أو انكم تفكرون تلعبونها. فالمهم، مثل أي حلقة من مسلسل كونان، فتصير أحداث عشوائية بالبداية، وصديقة ران من المدرسة تقول ان اختها مفقودة بعد ما سافرت بروحها، فكانت تخطط تكلم موري عشان يحقق في أمرها. وفي بداية اللعبة تعلمك اللعبة على ميكانيكياتها، لأنك في بيت صغير فيه غرفتين، فتستخدم كونان وتتحرك على الأشياء الي تشد انتباهك وتشوف اذا تحصل أدلة. طبعاً اللعبة ما تخلي لك الأشياء تلمع عشان تعرف شنو تضغط عليه، لكنها مو مبهمة، فبتعرف شنو تضغط عليه اذا تطبق أي منطق للحوار فبتعرف وين تدور الأشياء. فهذا الجزء الأول من اللعبة، انك تتحرك في المكان وتحصل أدلة. أما ثاني جزء من القميبلاي، انك تروح تكلم الأشخاص الموجودين عشان توسع على نطاق بحثك. ففي البداية يمكن تبحث في الغرف وتحصل دليل واحد، أو تحصل شيء يشد انتباهك بس ماتعتبره دليل. لكن لما تكلم الشخص فيعيطيك كلام يخليك ترجع للشيء الي حصلته وهالمرة يكون دليل. وثالث جزء من القيمبلاي، انك تربط الأدلة الي حصلتها ويا كلام الأشخاص، فاذا جمعت 3 أدلة مثلاً لها علاقة بالموضوع الي تكلمت عنه ويا الشخص، فهالمرة اذا رجعت تكلمه فتفتح حوار جديد يوصلك لمعلومات أكثر… وهذا الـ Gameplay Loop.
قضية الاختفاء هذه مجرد مقدمة عشان توصلك لمكان ثاني، والي هو تصير فيه أحداث هذه اللعبة، أو الجريمة الأصلية الي تحتاج تحقيق. فمن اسم اللعبة، بتروحون لمعبد في الجبال لأنكم تعتقدون ان الأخت المختفية راحت هناك لسبب ما. وعلى أسلوب كونان، لما توصلون هناك تتعرفون على مجموعة جديدة من الأشخاص، وبعد فترة تصير جريمة قتل ويبدأ التحقيق. هني في المعبد تطبق كل الأساسيات الي كنت تستخدمها في بداية اللعبة لكن على نطاق أوسع. لأن المعبد كبير، يمكن حجمه 20 شاشة، وفيه غرف وفيه مناطق خارجية. فهني بعد ينضاف جانب جديد انك لازم تستخدم الشخصيات الثانية. فعشان كونان طفل مثلاً ما بيقدر يستجوب الشهود والمشتبه بهم، فلازم يستخدم موري، لكن موري مخرخش ومو دائماً يوصل لنتيجة منطقية.. فتستخدم ران.. أو هيجي هاتوري.. ليش هيجي موجود وياهم؟؟ مادري؟ هو كان رايح يزور ران وكونان في المقهى ببداية اللعبة، لكن ليش.. ما أعرف.. مو شي منطقي بس يلا نمشيها عشان القيمبلاي.
فعجبني القيمبلاي، وما كان بالبساطة الي كنت متخيلها. وحتى انه خلاني أقعد وأفكر منطقياً بالأشياء. فمن هذه الناحية كانت القضية نفسها مكتوبة بطريقة جيدة وماكانت أي كلام… بس في أجزاء بنهاية القضية لما حصلت كل الأدلة، تحولت اللعبة اني أغير لكل الشخصيات وأخليهم يجيكون كل الأدلة لأن يمكن شخص منهم يكتشف شي، أما الشخص الثاني مايكتشفه. يعني ببداية التحقيق كنت أعرف ان هني بستخدم كونان وهني بستخدم هيجي. بس على النهاية صرت أغير واضغط على كل شي بكل الشخصيات لأن يمكن الحوار الجديد يطلع.
اللعبة أخذت مني 3 ساعات، وكانت التجربة ممتعة، ومثل ماقلت ان القضية نفسها وحتى طريقة ارتكاب الجرمية عجبوني. واستمتعت وانا أربط الأدلة في مخي قبل ما أفكر في حل اللعبة نفسها، وفعلاً كانت النتيجة ان الي توصلت له كان منطقي ويا الي كانت اللعبة تبي توصله. أما دافع الجرمية والشخصيات نفسهم فهالجانب ما كان للدرجة المطلوبة، بس بمشيها بما أن الجريمة كانت حلوة.
والشي الي سووه انه بنهاية هذه القضية، يشوقون مباشرة للعبة الي نزلت بعدها على الـ Gameboy Color. وهاللعبة الثانية للحين مافي لها ترجمة كاملة بس صار خاطري أني ألعبها. فيعني جانب انك تدور الأخت انتهى بنهاية هاللعبة، لكن له تكملة لأنهم يكتشفون شي له علاقة بعائلتها، وبتكون في رحلة عشان يحققون في هالشيء. فأي صار خاطري ألعبها.
يعني اذا كنت متابع لأنمي المحقق كونان، فهالألعاب فيها قضايا جديدة مكتوبة خصوصاً للألعاب. وفي الـ Credits مكتوب انها بكتابة قوشو اوياما، بس مادري اذا فعلاً هو الي كتب هالقضايا، ولا مجرد Credit كونه مبتكر الشخصية والسلسلة. فيعني القضايا على مستوى حلقات الفلر لكن بمدة فيلم. أو يمكن أنا كنت بطيء في لعبي وتقدرون تكملونها بوقت أسرع، لكن عموماً التجربة حلوة.
وهذه حلقة اليوم. كان وياكم علي الساهي ومع السلامة.
