للاستماع للحلقة
السلام عليكم وياهلا فيكم بحلقة جديدة من بودكاست خفايف ألعاب. وياكم علي الساهي، وبكلمكم عن لعبة Alien Crush على جهاز TurboGrafx 16 او PC Engine. طبعاً الجهاز قديم من شركة NEC ونزل بنفس جيل كمبيوتر العائلة، وكان أقوى تقنياً بالمقارنة. وجهاز كان له احترام في اليابان بس ما لاقى نفس شهرة نينتيندو في باقي الدول.
شخصياً مالعبت وايد من ألعاب الجهاز، غير تجارب بسيطة خلال السنوات ويا Bonk و Splatterhouse وكم لعبة غيرها على السريع. بس الصراحة ما قعدت ولعبت لعبة من البداية للنهاية على الـ PC Engine. فناوي ان شاء الله أجرب مجموعة من الألعاب الي كانت عليه هذه السنة. بدايةً ويا Alien Crush الي شفتها في فيديو يتكلم عن ألعاب الـpinball وشدت انتباهي برسوماتها، او بالأحرى بتصميمها البصري. وهي من أشهر ألعاب الجهاز، وفي سلسلة ألعاب من نفس المطور، حتى انها انتقلت لأجهزة سوبر نينتيندو و سيجا جينيسس.
تصميم شكل ساحة أو طاولة اللعب أشبه برسومات H.R. Giger، واذا ما مر عليكم الاسم من قبل، فيمكن تعرفون تصميم الوحوش من فلم Alien الي هو صمم شكل الـ Alien نفسه. او تصميم لعبة الرعب Scorn فشي مشابه. Alien Crush تستلهم من طريقة الرسم هذه بشكل كبير، ولما شفت لمحات عنها، على طول قلت ابي اجربها حتى وانا مالي في العاب البينبول وايد.
بس كلعبة pinball فهي ما تاخذ فكرة تصميم طاولة حقيقة وتتبناها على شكل لعبة فيديو، بل انها تصمم طاولة تصلح أكثر للعبة وفيها أشياء مو ممكنة على طاولة حقيقة. مثلاً في طاولات الـpinball يكون في تحديات او ألغاز تفَعِلها على حسب وين تضرب بالكرة، فتفتح ممر سري يوديك لمنطقة مقفولة من الطاولة. او تضرب الكرة في اماكن معينة وتحصل bonus او multiplier للنقاط. في Alien Crush ماخذين هذه الفكرة من طاولات الـpinball لكن ضايفين عليها عناصر من ألعاب الفيديو ومو ممكنة إلا في ألعاب الفيديو، مثل قتال الوحوش والزعماء، الي يتحركون على مدار الطاولة. فالحين فكرة انك تفتح ممر سري، مو مربوطة بتصميم الطاولة الحقيقي. ففي اللعبة هذا الممر السري يوديك لمرحلة جديدة في كل مرة حلى حسب الـ bonus الي فّعلته، فلما تدخل الممر تروح تواجه زعيم يشبه الثعبان وجسمه مقسم لأجزاء ويظل يتحرك على الشاشة، ولازم تستخدم الكرة عشان تضربه اكثر من مرة وتتخلص منه. وهذه الضربات والاجزاء الي تخلصت منها تنحسب لك كنقاط اضافية. وفي مكان ثاني تروح له، فلازم تستخدم الكرة عشان تضرب 9 ازرار مختلفة، وطبعاً مو بسهولة لأن في Bumpers يغيرون اتجاه كرتك بسرعة، بس لما تضغط الازرار و تفتح الانوار كلها فيعطونك bonus كبير.
فهذا جانب من المراحل أو الشاشات أو الطاولة الجانبية، لكن حتى الطاولة الرئيسية نفسها ممتعة وايد، ولاحظت وانا ألعب انها مو بصعوبة باقي الالعاب الي بسرعة تخسر فيها الكرة. طبعاً فكرة التصميم الي يخليك تخسر الكرة جاي من عقلية بناء طاولات البينبال الحقيقية في الآركيد، لانهم يبونك تخسر الكرات عشان تحط فلوس اكثر في الطاولة. لكن هني بما انها لعبة فيديو فأتوقع مسهلينها من هذه الناحية ويخلونك تستمتع أكثر بتصميم الطاولة نفسها. فهي مقسمة لجزئين، شاشة علوية وشاشة سفلية. وفي طريقة سهلة انك تودي الكرة للجزء العلوي من الطاولة. ما اعرف اوصف شنو الي يخلي تصميم منطقة اللعب جيدة، لاني مثل ماقلت ما ألعب Pinball بكثرة وماعندي اهتمام بتصميم الطاولات فيها، فما اقدر اقولكم جودة تصميمها بالمقارنة ويا شخص يهتم بهذه الألعاب ويفهم تصميمها. لكن بشكل تقريبي، مثل شنو الي يخلي لعبة منصات 2D مختلفة بين Mario Wonder ولعبة ايندي اقل منها مستوى، فبقدر اعرف طبيعة التصميم للمراحل الي تخلي لعبة أفضل من الثانية، لكن ما اعرف اقولكم نفس الكلام عن البينبال، بس من لعبي حسيت ان التصميم ممتع وما يقهر. وجهي للمقارنة هو لعبة البينبال الي كانت في Windows XP اذا تتذكرونها، وبوكيمون Pinball على الـ Gameboy Color، الي على فكرة الشريط فيه Rumble أو جهاز اهتزاز عشان تشعر بالكرة وانت تلعب. وبعد مجموعة طاولات Marvel الي سووها Zen Studios على PS4، هذه بعد كانت حلوة لكن مربوطة بالواقع فماتسوي الاشياء الي تسويها Alien Crush من ناحية المراحل الجانبية والألغاز وغيرها.
و اكثر شي عجبني في اللعبة، انها تكافئك بالنقاط الاضافية الي تحصلها من طرق مختلفة على الطاولة. وتخليك تستمر اكثر واكثر وتحافظ على ان الكرة تظل على الطاولة وماتخسرها عشان تقعد تجمع في الbonus وتزيد نسبة ال multiplier. فلما تطوف المليون نقطة، تحس انك توصل لمليونين بوقت اقصر بوايد من لما وصلت المليون. ولما توصل العشرة مليون، تبي انك توصل للعشرين مليون. وكل ما زادت ضخامة الأرقام تحس اللعبة نفسها تزيد بالمكافأة وتبي انك تواصل تلعبها وماتخسر الكرة. فهذا الاحساس الي تعطيك اياه نقاط اللعبة شعور ما ينوصف، وعشان جذي أبيكم تجربون اللعبة ومتأكد انكم بتحصلون طريقة تلعبونها، وبحط لكم على تويتر واحد من الـhighscores الي وصلتها، وبحطها كتحدي انكم توصلون لرقم أعلى، لأن ابي أوصل لكم من تجربة الاحساس في اللعبة نفسها تفهمون كل الكلام الي اقوله في هذه الحلقة. فأتوقع الـ Highscore الي وصلت له حالياً هو 21 مليون، فحطوا لي أرقامكم بصور على تويتر. وطبعاً العبوا بدون Save States أو غش اذا بتستخدمون محاكي. وأبي اسمع رايكم من تجربة اللعبة وشلون حسيتونها.
وهذه حلقة اليوم أخف عن العادة، بس حبيت اني أشارككم بهذه اللعبة الي تستحق التجربة. وإذا كانت هذه الحلقة كلش قصيرة، فأسمعوا الحلقات القديمة الي فاتتكم للبودكاست. كان وياكم علي الساهي، ومع السلامة.
