للاستماع للحلقة
السلام عليكم ويا هلا فيكم بحلقة إضافية هالأسبوع من بودكاست خفايف ألعاب. وياكم علي الساهي وبكلمكم عالسريع عن انطباعاتي لديمو لعبة Contra: Operation Galuga. إذا ما جربتوها للحين، فهي متوفرة على كل الأجهزة وأنا جربتها على بلايستيشن 5. طبعاً كنت متحمس للعبة من قبل وكنت انتظر فرصة أجربها فحلو انهم حطوا لنا ديمو، مع انه وايد قصير بس فيه معلومات نقدر نعرفها منه، وهذه هي الأشياء الي بكلمكم عنها.
الي مستلم هالريميك أو الريبوت هم WayForward، أو قبل كل شي، الي مايعرف كونترا فهي لعبة من كونامي كانت من ألعاب الطفولة على الفاميكوم، ومن ألعاب الأكشن الصعبة وكان أحلى شي فيها بالنسبة لي الأسلحة. فكانت لعبة مسدسات مختلفة عن باقي الألعاب الي كنا نلعبها على فاميكوم فكنا نحبها، وكنت ألعبها ويا أخوي بما انها تسمح بلاعبين بنفس الوقت. فـ Way Forward الي استلموا مهمة تطوير هاللعبة الجديدة معروفين أكثر شي لسلسلة Shantae الي اهي من ألعاب البلاتفورمينق الحلوة بأي جزء تلعبه منها، لكنهم بعد اشتغلوا على Double Dragon Neon الي احسها أقرب مشروع مقارب لـ Contra: Operation Galuga، اذا مو طبعاً Contra 4 للـ DS الي بعد هم اشتغلوا عليها.
فالمهم ان الديمو عجبني وبنفس الوقت يعرض التعديلات والاختلافات الي ضافوها Way Forward لهذا الريميك أو الريبوت. أولها انك تقدر تحتفظ بسلاحين بنفس الوقت مثل نسخة Rebirth الي نزلت على الـ Wii. فتقدر تأخذ سلاح الليزر وسلاح الـ Spread وتبدل بينهم في أي وقت. طبعاً هالشي ماكان ممكن في الأجزاء القديمة الي اتذكرها وخصوصاً اللعبة الأولى. كنت لما تشيل سلاح فيتبدل السلاح القديم الي عندك.. وهني بعد في تغيير جديد حلو، ان الحين اذا شلت سلاح سواءً بالخطأ أو كنت متعمد عشان تجرب السلاح وماعجبك، فالسلاح القديم يطيح على الأرض قريب منك فتقدر ترجع له، ويظل فترة قبل ما يختفي. وبعد شي ثالث متعلق بالأسلحة انك اذا تشيل 2 من نفس السلاح مثلاً Spread فيتطور المسدس حق لفل 2 وتزيد طاقة أو عدد الطلقات من السلاح نفسه. فعموماً كل التغييرات والإضافات لنظام الأسلحة يخليها محدثة من هذه الناحية، بشكل أفضل ماتخلي اللاعب ينقهر، وتخليك تجرب أسلحة متنوعة خلال اللعب، لأن في أسلحة أفضل ضد زعماء معينين في اللعبة الأصلية بس ما كنت تستخدم هالأسلحة لأن طريقتهم خلال المرحلة ما كانت مناسبة فالأغلب كان يستخدم الـ Spared ويترك باقي الأسلحة. فيعني في Balancing أفضل من هذه الناحية في اللعبة من الي شفته في الديمو طبعاً.
من الأشياء الي لاحظتها بعد ان الشخصيات في الطور الآركيدي عندهم Perks يستخدمونها، وخانتين عشان تثبت فيها هالـ Perks وهذه تحسن من طريقة اللعب. فمثلاً عندك Perk يخليك تحتفظ بالسلاح لما تموت… والي يعرف اللعبة الأصلية يعرف انك تموت بضربة، ولما ترجع تخسر السلاح الي عندك وترجع لمسدس الطلقة الوحدة. فهالـ Perk يساعد من هالناحية، وفي Perk ثاني يخليك تحافظ على مستوى المسدس اذا وصلت لفل 2، فبعد ما تموت ما يرجع للفل 1. وحتى ان في بيركات بحسب الشخصية الي تلعب فيها. مثلاً لما تختار طور اللعب الي عندك عداد صحة، فتضيف عداد رابع للشخصية. وشخصية ثانية عندها Perk لما تسوي Dash (وأي صح الـ Dash إضافة جديدة) فلما تسويها ويا البيرك تكون Invincible فما تصيدك الرصاصات خلالها. فهذه احسها تضيف تنوع أكثر لطريقة اللعب وتختلف بين الشخصيات شوي عشان لا يكونون مجرد شكل مختلف، بل في لهم خصائص مختلفة.
اللعبة نفسها فيها اختيار مستوى صعوبة بين Easy و Normal و Hard. لكن بعد فيها اختيار انك تموت بضربة وحدة 1-Hit Kill مثل اللعبة الأصلية أو انه يكون عندك عداد صحة عبارة عن 3 ضربات قبل ماتموت. وفي خيار للتصويب بين انك تصوب في 8 اتجاهات أو 360 درجة. وخلال اللعب في زر عشان توقف بمكانك وتصوب، في البداية ما لاحظته وكنت أقول انه ضروري في مثل هالألعاب، بس بعدين شفته انك تضغط R2 وتصوب بدون ما الشخصية تتحرك ويكون مفيد عند الـ Bosses. واخيراً في طورين لعب، الآركيدي الي تختار بين 5 شخصيات وتختار الـ Perks وهالسوالف، وطور القصة الي من الي حطوه في الديمو فيختلف شوي عن الآركيدي بداخل المراحل انه في شخصيات تطلع وتساعدك، وفي حوارات طبعاً، وقصة للجزيرة وليش الأعداء موجودين، فمسوين أكثر من الي توقعته واعتبره إضافة حلوة.
النقطة الأخيرة الي بتكلم عنها هي الرسومات. الي يتابعني من فترة يعرف اني ما أهتم وايد بالرسومات ، بس الصراحة متردد من الي شفته في الديمو بالتوجه الفني الي اختاروه… فصاير بين وبين. يعني من جانب ما امانعه، لكن من جانب ثاني فهو أسلوب 3D بسيط على نفس ستايل Double Dragon Neon. يمكن ماكنت بمانعه أكثر لولا اني اعرف مستوى Way Forward بانتاجهم لألعاب البكسل آرت وأعرف انهم يقدرون يقدمونها بطريقة أفضل من الـ 3D. ففي جانب مني يتمنى لو انها كانت Pixel Art بتفاصيل عالية مثل الي يخلونها في ألعابهم الثانية.
فانطباعي عن اللعبة وتوجهها وأفكارها من الديمو إيجابي. وأحسن بوايد من Rouge Corps الي شريتها وشغلتها 10 دقايق وماتحملت أكمل، على الأقل هذه رجعة أفضل للسلسلة بأنك تأخذ الجزء الأول الي الكل يتذكره وتغيره بطريقة مُحدثة وبأفكار جديدة بعضها مأخوذة من ألعاب السلسلة الي مو الكل يتذكرها. عموماً أتوقع في وايد نفسي يحبون الجزء الأول ويتذكرونه، بس بعدين ما واصلوا ويا السلسلة. يعني ألعاب كونترا الي لعبتها هي الأولى و Super C الي كانت أصعب. وبعدها كان في لعبتين على بلايستيشن 1 ما أتذكر منهم شي سوى ان وحدة منها كانت جيدة والثانية كلش ماحبيتها… بس ما أتذكر أي تفاصيل بالضبط لأن هالكلام من سنين ومارجع لهالألعاب. ولعبت كونترا على القيمبوي كانت أفضل من كاسلفانيا الي نزلت على القيمبوي، وكانت تحاكي اللعبة الأصلية بشكل أفضل. فأي ما بطول عليكم، حبيت توجه كونامي ويا ألعابهم الكلاسيكية هالفترة… يرجعون نسخ تشتغل بالمحاكاة لبعض الألعاب مثل حزمة سلاحف النينجا والي شفناه من إعلانات Felix the Cat و Rocket Knight… وبعض السلاسل يعطونها لمطورين مختلفين مهتمين انهم يشتغلون على السلسلة، منها كونترا طبعاً ولكن بعد Getsu Fumaden الي اعتقد بدأت هذه الخطوات الجديدة لكونامي… أو على الأقل بالنسبة لي هي اللعبة الي احسها بدأت هالتوجه، انهم رجعوا لعبة قديمة محد سمع عنها بأسلوب وأفكار جديدة. فجربوا الديمو حده وبيعطيكم فكرة عن اللعبة.
وبس كانت هذه حلقة اليوم. كان وياكم علي الساهي ومع السلامة.
