للاستماع للحلقة:
السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي ويا تجربتي الكاملة للعبة Prince of Persia: The Lost Crown. الريبوت الجديد حق سلسلة أمير بلاد فارس على تصنيف ألعاب البلاتفورمينق الاستكشافية. اذا تسمعون حلقات البودكاست باستمرار فأكيد سمعتوني أتكلم عن الريبوت السابق للسلسلة في 2008، والي ماعجبني بنفس درجة اعجابي بالثلاثية الي نزلت على PS2، أو حتى اللعبة الي نزلت بنفس وقت الفيلم الي كانت The Forgotten Sands. فكشخص لعب تقريباً كل أجزاء السلسلة، بما في ذلك اللعبة الـ 2D الأصلية على Super Nintendo، فشنو رأيي في The Lost Crown كلعبة تنضم لهذه السلسلة العريقة؟
التوجه الجديد كلعبة Metroidvania عجبني من أول عرض عنها ولما بدأت يوبي سوفت تنشر تفاصيل عن طريقة القيمبلاي. فبحكم اني احب هذه النوعية من الألعاب، فبسرعة انجذبت إلى The Lost Crown لكن بتحفظ على بعض الأشياء الي ذكرتها في حلقة منفصلة من البودكاست. وحتى بخلي كلامي اليوم عن اللعبة موجه كإجابة للتساؤلات للبعض الي ما يحب ألعاب الـ 2D نهائياً ويشوف انها رخيصة، لأني تفاجأت ببعض التعليقات الي حكمت على اللعبة فقط على أساس هذا المنظور المختلف.
الي تسويه The Lost Crown انها كمشروع أصغر من يوبي سوفت، تقدر تحس بطعم الحرية الإبداعية الي حصلها فريق التطوير في بناء هذه اللعبة، من خلال دمج أصل Prince of Persia كلعبة Platforming ثنائية أبعاد سينمائية، ويا أفكار الألغاز وطريقة اللعب الي ميز ثلاثية الـ PS2، بالإضافة إلى أفكار مستوحاة من المنتشر في ألعاب الـ Metroidvania، وبعد توجهات جديدة. فشخصياً أحس ان وصف The Lost Crown كعودة لجذور السلسلة، مو قاعد يعطيها حقها باللي تسويه، لأنها أكثر من مجرد عودة للأصول. بل فيها من تاريخ السلسلة بكل ألعابها، ويا إضافات جديدة خصوصاً في العالم والشخصيات، تخليها ريبوت محترم.
وعشاني ما بتطرق بتفاصيل في القصة تجنباً للحرق، وأبيكم تلعبون اللعبة وتستمتعون بالأحداث. بكتفي بذكر الأشياء المتعلقة بالعالم، والميثولوجيا الي تغيرت بالكامل عن ألعاب السلسلة. The Lost Crown تأخذ اسم السلسلة وترفعه بالأهمية، لأنه ريبوت ويا أجواء حضارة فارسية بتفاصيل من كل الجوانب، أكثر من الألعاب السابقة الي كانت في أجواء شرق أوسطية عامة بدون هوية محددة. ففي The Lost Crown تحس بالحضارة الي تتبى منها السلسلة أسمها، وبتلاحظ هالشيء من أول مقطع سينمائي يفتتح اللعبة. فاللعبة مو بس أحداثها في امبراطورية فارس القديمة، وانما شخصياتها لها علاقة بآساطير فارسية، وحتى انها محددة في مكان معين الي هو بيرسبوليس أو تخت جمشيد، وشلون أعرف الاسم بالفارسي؟ لأن الاهتمام بهالتفاصيل يوصل حتى في إعدادات اللعبة الي تخليك تختار اللغة الفارسية كصوت للحوارات. يعني بالنسبة لي أحب أجرب الألعاب بلغات مختلفة على أساس شنو المكان الي تكون فيه الأحداث، فالألعاب اليابانية أحب ألعبها بالياباني، و Assassin’s Creed السراب، استمتعت جداً وأنا ألعبها بالصوت العربي. فأكيد قررت اني اختار الصوت الفارسي ويا ترجمة عربية لما شفت هالخيار متوفر. وحتى أتوقع ان يمكن هذه أول لعبة تخلي اللغة الفارسية كصوت دبلجة بشكل رسمي. والصراحة انصحكم تلعبون بالصوت الفارسي، لأن بعد ما جربته وقارنته ويا الدبلجة الإنكليزية، حسيت طريقة الكلام وان كانت غير مفهومة بدون ترجمة، أفضل من الدبلجة الإنكليزية.
فأي يعني بالنسبة لعالم اللعبة، أحسه تحول كبير في التوجه بأنهم يعطونها هوية فارسية كاملة بشكل أعمق. فالتماثيل الي تشوفها في المناطق، أو العملات الي تحصلها، أو الـ Collectables بالكتابة المسمارية. زائد بعض الوحوش الي تقاتلهم والي تحس انها مأخوذة من اساطير هذه الإمبراطورية القديمة، بس عندي انتقاد انهم ما ضافوا متصفح للوحوش داخل اللعبة ويا معلومات إضافية مكتوبة عنهم، أحس هذا كان شيء ضروري لأن هذه حضارة أول مرة يتعمقون فيها بهذا الشكل، فبكون حلو لو انهم كتبوا لك تفاصيل مأخوذة من كتابات تاريخية عن هذه الاساطير. ما أعتقدت اني بهتم، أو حتى ما كنت أحس بافتقاد الحضارة من الألعاب السابقة في السلسلة، بس فعلاً يعني ويا الي شفته في The Lost Crown عطاني إحساس ان Prince of Persia السابقة كانت تفتقد من ناحية البيئة والعالم. ما كانت فعلاً سوى بنايات ووحوش شرق أوسطية على طريقة حكايات ألف ليلة وليلة بدون تفاصيل تربطها بحضارة معينة بشكل دقيق. والحين ويا هذا الريبوت، Persia الي محطوطة في الاسم صارت بقدر أعلى من الأهمية داخل اللعبة. وهذا الشي يخلي الاستكشاف في اللعبة له عمق من ناحية ثانية يخليك تهتم بالمناطق والبيئة من حولك.
وعلى طاري الاستكشاف، فنحول الكلام للقيمبلاي، واخليكم تستكشفون الحضارة ويا القصة وانتوا تلعبون.
كلعبة من تصنيف الـ Metroidvania، ففي جوانب مهمة لازم تطبقها هالنوعية من الألعاب، قبل ما تبدأ تحس ان في شيء مفقود من ناحية التصميم. وعشان أسوي دعاية لحلقة ثانية من البودكاست، في الحلقة عن لعبة Project MARS 2120 كنت أحلل نقاط تصميم هذا التصنيف من الألعاب، وتطرقت للي يخلي ذيك التجربة سيئة بالنسبة لي لأنها تفشل في جوانب مهمة متعلقة بفكرة التصميم في هذه الألعاب. فعشان أريحكم من البداية Prince of Persia The Lost Crown تنجح وبشكل مبهر من هالناحية. يعني بالنسبة لي أبهرتني التجربة، وصارت من الألعاب الي لما ابدأ ألعبها، ما أحس بالوقت وأواصل ألعب، لدرجة انه أكثر من مرة بند علي الكونترولر لأن الجارج خلص بدون ما انتبه. بالنسبة لي على الأقل هالشي قليل يصير. بس ما أبالغ اذا أقول لكم اني انجذبت في اللعب، واروح من منطقة لثانية، وتجربة جانبية فجأة تتحول لمغامرة كاملة وأنسى الي كنت اسويه في المنطقة الي طافت. ولما اقرر أرجع للمنطقة السابقة، وفي الوسط يشد انتباهي شي ثالث وأحول اللعب لهناك وتروح ساعة على هالشي الجانبي.
ربط الخريطة ببعضها وايد ممتاز، واختلاف المناطق واضح من الناحية الشكلية وتصاميم الأعداء الي تحصلهم فيها. والألغاز مصممة بطريقة مو بس تناسب تحديات المنصات الي تشوفها في ألعاب الـ Metroidvania، بل أفكار بتذكرك انك قاعد تلعب Prince of Persia، وهني تجي الألغاز الي ذكرتني وايد بالثلاثية على PS2. من ناحية الأفخاخ الي لازم تتفاداها، أو القفز بين الجدران المطلوب منك عشان توصل لمناطق جديدة، أو العوائق الي لازم تحركها بطريقة معينة ويختلف من خلالها طريقك في المرحلة. وبعدين ويا اكتسابك لمهارات جديدة، فتنضاف ألغاز التحكم بالوقت، واستخدام مكان شخصيتك بزمن محدد وسوالف الـ Time Manipulation، الي تحسسك انك عبقري لما تنجزها. فيعني حتى اذا برجع لأكبر انتقاد بالنسبة لي ويا الريبوت في 2008 كان ان العالم المفتوح يخليك تسوي نفس الألغاز أكثر من مرة لأنك ترجع لنفس المناطق بسبب طبيعة العالم المفتوح… والمفروض ان هالانتقاد يكون موجود في The Lost Crown بالنسبة لي، لكن الصراحة ما حسيت وايد بثقل الـ Backtracking في هاللعبة. لأن الوقت الي اقضيه في المناطق الجديدة كان أكثر بوايد من الوقت الي اقضيه في الـ Backtracking.. فويا كل طاقة جديدة تفتح لك طريقة تنقل أو عبور لأجزاء ماكنت تقدر توصل لها، تنفتح أماكن وايد تقدر تستكشفها قبل ماتحتاج قدرة تنقل جديدة، وهني أحس الفرق بين اللعبتين.
تعرفون بشنو ذكرتني The Lost Crown؟ بنفس شعور الرضا بالنفس الي تعطيك اياه Metroid Dread ككُل، والأجزاء الي حبيتها من Hollow Knight. وهذا يمكن أكبر مدح أقدر أعطيه The Lost Crown لأن Metroid Dread اسطورية بالنسبة لي. فأي جانب الاستكشاف مضبوط، ويعني أحس يوبي سوفت قادرة انها تعطي فرقها مشاريع صغيرة يبدعون فيها بهذه الطريقة، The Lost Crown مو لعبة صغيرة، بتاخذ منك ساعات ومناطقها واسعة وكبيرة. لكن مقارنة بألعابهم العملاقة، فمن رأيي هذه أفضل بوايد باللي توفره. شي محسوس بالنسبة لي ان هذه التجربة توفر متعة أكبر باللعب بدون ما تحس بتضخم باقي الأشياء وتتملل منها.
ومن ناحية القتال، فالحال متشابه ويا باقي جوانب اللعبة. نظام مصقول وممتع، وما تشعر بنقص باللي يوفره. وحتى سينمائيات القتال الي تكون بوسط المعركة كأنها قتالات أنمي وتعطي شعور تفنن أحلى باللي تسويه. التركيز في القتال بالكامل على الـ Parry و التفادي. يعني مافي صد في اللعبة نهائياً… الي أقصده انك ماتقدر تظل ضاغط على زر واحد وشخصيتك تصد.. عندك خيارين، يا انك تصد بالوقت المطلوب عشان تسوي الـ Parry. أو انك تتدحرج وتتفادى الضربات. في البداية كان القتال صعب شوي لأن كنت متوقع يكون في صد في اللعبة، وماكانت سرعة استجابتي للضربات بالسرعة المطلوبة وكنت انضرب وايد. وحتى ويا استمرار اللعبة للحين كنت أعاني شوي من الـ Parrying ويا الأعداء السريعين، لكن بنيت الي يناسبني من بين التفادي ضد الأعداء السريعين، و Parry حق الأعداء الي أقدر على سرعتهم. وكل نظام له ايجابياته طبعاً عشان يخليك تستخدمه. فشخصيتك تقدر تلبس قلادات تطور او تعزز من شخصيتك من نواحي مختلفة. وفي قلادة تخليك تسترجع جزء من الصحة لما تسوي Parrying لهجمات الأعداء، ففي حافز قوي انك تتعلم هالنظام وتستخدمه، لأن بتحصل مقابل ممتاز يليق بالمخاطرة الي تاخذها. وهالفكرة في الاختيار بين المخاطرة و النتيجة، موجودة في كل صغيرة وكبيرة من القتال، حتى في بعض الأحيان مو بالضروري تلاحظها، لكن بتحس بوجودها. يعني هالتفاصيل الصغيرة الي مو الكل بلاحظها، تضيف وايد للأحساس بالانجاز داخل القتال، وتضيف للمتعة بدون ماتنتبه لها.
وحتى القدرات للتنقل واستخدام الوقت تقدر تستخدمها خلال القتال، وتعطي لضرباتك استراتيجية مختلفة تناسب الأعداء الي تواجههم. وخصوصاً ضد الزعماء المنتشرين داخل العالم، سواءً في الطريق الرئيسي، أو المناطق الجانبية الي تزورها عشان تحصل كنوز وأغراض ثمينة تساعدك في لعبك.
فإذا لحد الحين تحسوني وايد إيجابي بكلامي عن Prince of Persia: The Lost Crown، فأي، مافي شي غريب بالموضوع، لأني فعلاً إيجابي من التجربة الي مريت فيها باللعبة، فماعندي فعلياً شيء سلبي خرب مزاجي أو عكر تجربتي. أنا أشوف هاللعبة ممتازة من البداية للنهاية وما بختلق سلبيات سطحية بس عشان أقول ان هذه من مشاكلها. وبنفس الوقت، هل أحس ان الكل بينعجب في اللعبة وبيعتبرها من أفضل التجارب؟ أكيد لا. وبقولكم السبب. The Lost Crown قاعدة تجذبني من وايد نواحي، كشخص عاشق لسلسلة Prince of Persia من جانب، وكلاعب تعجبه تجارب الـ Metroidvania كـ Top 5 لتصنيفات الألعاب الي احبها وانجذب لها من جانب ثاني. فوِصلت لتوقعاتي من ناحية الجودة والمحتوى، وعطتني أكثر من الي كنت اطلبه في بعض النواحي، فطَلعت من التجربة بانطباع إيجابي على اللعبة كلها، أكيد ما يعكس تجربة كل الأشخاص ويا اللعبة. بس الي أقدر أقوله، وبقنعكم فيه، انها لعبة تستاهل ومبنية بامتياز بترضي عشاق Prince of Persia… عطوها فرصة حتى لو كنتوا تبون السلسلة ترجع بلعبة 3D بتصنيف أكشن ومغامرة وألغاز مثل ألعاب PS2، وهذه ماكانت اللعبة الي كنتوا منتظرينها… لكن عطوها فرصة ومتأكد بتعجبكم، لأن الي موجود مقارنة بألعاب بنفس التوجه والتصنيف فـ The Lost Crown تتفوق. فحلو ان في ديمو مجاني تقدرون تجربونه، وأنا مالعبته وما أعرف محتواه، بس أتمنى انه يعكس ويختصر الأشياء المميزة من اللعبة الكاملة ويعطيها حقها للأشخاص الي على الحافة بين انهم يلعبونها أو لا.
وبالنسبة لمستقبل السلسلة، حتى أنا انتظر لعبة Prince of Persia ثلاثية أبعاد. وهذا الي ابي أشوفه من بعد The Lost Crown. اذا بتسألوني فبحب لو ان السلسلة تنقسم لطريقتين، هذا الفريق يشتغل على ألعاب Metroidvania، وفريق ثاني يعطينا لعبة الأكشن والمغامرة… وحتى الي أبيه انهم يواصلون السلسلة في هذا العالم الجديد الي بنوه، حتى حق لعبة الـ 3D. لأن الاهتمام بالحضارة وطريقة ربطها بالعالم عجبتني مثل ماوصفت لكم، وابيه يكون العالم الرئيسي للسلسلة… الشي الوحيد الي ما ابيه، ان الصراحة ماعجبني تصميم الشخصية الرئيسية الجديد، متقبلنه بنسبة 40% يمكن إذا مو أقل، فإذا يغيرونه للعبة الـ3D يكون أحسن.
أتمنى ان قدرت أوصل لكم شعوري بالتجربة ككُل، Prince of Persia: The Lost Crown، مو بس عجبتني، إلا حمستني حق مستقبل السلسلة… وأتمنى ان محد يفكر اني أقول كل هالكلام لأن يوبي سوفت الشرق الأوسط وفروا كود للعبة، ولعبتها مجانية ومن هالكلام. فاذا انت تسمع وتحس هالشي، فمادري شنو أقول… غير اني إيجابي لأني حبيت اللي لعبته، وكل الي وصفته انعكاس لتجربتي لشي أحبه وقدم الي أكثر من الي كنت انتظره منه.
وبس هذ كانت تجربتي ويا اللعبة ونهاية الحلقة. كان وياكم علي الساهي ومع السلامة.
