للاستماع للحلقة:
السلام عليكم ويا هلا فيكم بحلقة جديدة من بودكاست خفايف ألعاب، وياكم علي الساهي وحلقة ثانية عن الـ Speedrunning بكلمكم عن فيلم وثائقي اسمه Running with Speed شفته هالفترة. الي صار بالصدفة ومالاحظته إلا وأنا بدأت أجهز للحلقة، أن هذه أول حلقة بتنزل في 2024، وبالصدفة كانت أول حلقة من 2023 عن الـ Speedrunning لما تكلمت عن Games Done Quick… وأعتقد مو كلش صدفة، لأن بالي في بداية السنة دائماً يكون ويا GDQ بما انه حدث يقام في يناير. فيلا نبدأ سنة جديدة بالكلام عن الألعاب السريعة.
Running with Speed نزل السنة الماضية أعتقد بيونيو أو مايو. مو متأكد بالضبط، بس تقدرون تحصلونه رقمياً على أمازون و Google Play. طبعاً بما انه يتكلم عن الـ Speedrunning فكنت مخطط أشوفه، بس تكاسلت اني ابدأه أكثر من مرة لأني كنت أشوف مدته ساعتين ونص. بس على اقتراب حدث AGDQ الي بيبدأ في 14 يناير، قلت بقعد وأتابع الوثائقي عشان أدخل في جو GDQ. واساساً في 2023 تابعت مارثونات سرعة أكثر من أي سنة قبلها، فغير عن GDQ و ESA الي تعودت عليهم، تابعت حدث اسمه BSG في أغسطس، وكنت أول مرة أسمع عنه، ومن اسمه Benelux Speedrunner Gathering فهو تجمع حق اللاعبين من بلجيكا، هولندا، ولوكسمبرق. فمن الجانب الأوروبي للسبيدرن. وبعد مثل GDQ ففكرته ماراثون لاستعراض الألعاب بسرعة، وتجميع تبرعات حق جمعيات خيرية. وحتى ESA بدأوا بحدث جديد اسمه ESA Legends كان في ديسمبر والتركيز على ألعاب Final Fantasy والـ JRPG، فحتى هذا تابعت منه شوي. فحلو اننا بدأنا نشوف هالماراثونات تتوسع وتزيد، والأهم بالنسبة لي أنها كلها تنجح، لأن بالنسبة لمتابع ومهتم بهالأحداث، فحلو انه يكون في خيارات بأوقات مختلفة من السنة، واستعراض لأشخاص ودول أكثر. وان شاء الله يكون في مجتمع سبيدرنر عربي، وبيوم من الأيام نشوف مارثون سرعة يقام عندنا بمستوى تنظيم وتقديم عالي. واذا صار هالحدث، لا تنسون ترسلون لي دعوة.
فالمهم، نرجع للوثائقي. Running with Speed مثل ماقلت فيلم مدته ساعتين ونص، ويغطي الـ Speedrunning من جانب عام، فيعني مصمم بطريقة يشرح للمُشاهد شنو هذا التصنيف الي يندرج تحت هواية الألعاب الالكترونية. ويركز على مجموعة أشخاص من الـ Runners الي لهم سمعة وحطموا الرقم القياسي، أو بالأحرى كان لهم صوت انهم يوصلون اللعبة الي هم يلعبونها الى جمهور أكبر، وانهم جذبوا ناس أكثر حتى يسوون الي هم كانوا يسوونه. فويا بداية الوثائقي أحسه مناسب انك تشوفه ويا أشخاص يعرفون عن ألعاب الفيديو، بس ما يدرون ان حتى هذه الهواية فيها عمق من ناحية الأنشطة الي تندرج تحتها. فمثلاً يمكن الأغلب يعرف عن الرياضة الالكترونية والمنافسات والبطولات، بس مو الكل يعرف عن الـ Speedrunning، حتى من الأشخاص الي مهتمين في الألعاب. فبداية الوثائقي يشرح بشكل حلو المفهوم العام للـ Speedrun، ويركز بالشرح على سلسلة ماريو كمثال لأن الأغلب يعرف هالألعاب. وبعد يشرحون ليش الألعاب الكلاسيكية هي الي بدأ الـ Speedrunners ينجذبون لها، ويشرح الأفكار بطريقة بصرية حلوة حق ليش اتقان هذه الحركات الي يؤديها الـ Speedrunner اصعب من مجرد انك تلعب اللعبة بسرعة. فالجابتر الأول من الوثائقي، يشرح الفكرة والأساسيات بطريقة كلش مفهومة، وتجذب المشاهد بقصة حقيقية تتعلق بالـ Runners حق ألعاب ماريو من الأولى و 2 و3 و World وبعدها تروح لجانب الـ Rom Hacks وتشرح فكرة ألعاب الـ Kaizo. وصح يمكن كان المفروض أقول من البداية، بس الراوي للوثائقي اهو Summoning Salt، شخص فيديواته على يوتيوب توصل ملايين المشاهدات وهو يشرح عن الـ Speedruns، وهو من ضمن الي كتبوا الوثائقي، فكلش ما استغرب من جودة المعلومات في هالفلم.
فالجابتر الأول يتكلم عن Andrew G وتاريخه ويا ماريو الأولى، و Mitch flower power ويا ماريو 3، و Grand poo bear ويا ألعاب الكايزو. ويدخل شوي في علاقة البث على تويتش كجزء من حياة السبيدرنر ووظيفتهم الرئيسية الي يعتمدون عليها، ويعطي تفاصيل على المجتمعات الي بنوها هالأشخاص. فمثلاً Grand Poo Bear الي اهو كان رياضي محترف ويا Red Bull بس تعرض لحادث تزلج، وخلال هالفترة الي كان يتعافى منها من الاصابة بدأ بالـ Speedrunning وبنى مجتمع حول هالهواية. وهو يعتبر من القليلين الي يدعمونه شركة كبيرة مثل Red Bull. يعني مقارنة بألعاب القتال مثلاً، مافي وايد Sponsors في مجتمع السبيدرن. وبعد يتطرق الوثائقي لشلون هالشخص قاعد يقدم لمجتمع السبيدرن ويقيم فعاليات من جهته عشان يساعد بتوسيع هالهواية والتعريف عنها. ونفس الشي بالنسبة للـ Runners الثانيين الي هم جزء من مجتمعهم الخاص. وبعدها بطريقة حلوة يربط الوثائقي هالأحداث ويا Games Done Quick في الجابتر الثاني وشلون هالحدث بدأ بمجموعة صغيرة من اللاعبين المهتمين بنفس الهواية الي ما كان في منها عائد مالي وكانوا يسوونه لمجرد حبهم لهذا الشي. وشلون كبر هالحدث وصار يشارك فيه الـ Runners مثل GPB و Mitch Flower Power، وشلون بعد بدأ الحدث يساعد يسلط الضوء على Runners جدد انجذبوا لهذه الهواية من وهم يتابعون GDQ نفسه، وبعضهم صارت هذه حياتهم ووظيفتهم على Twitch.
فـ GDQ يعبر عن جانب الشغف والهواية ومساعدة المجتمع، ولكن بعد في جزء صغير من الوثائقي يركز على جانب المنافسة، ففي فعاليات تنافس السرعة الي في عليها جوائز مالية. وهالجانب مربوط ويا لعبة Super Mario 64 في الوثائقي، ويركز على Runners مختلفين. و يمكن هذا جانب كنت أبغي أشوف منه أكثر في الوثائقي وأحسه كان قليل. ان جانب المنافسة الاحترافية شنو مكانها داخل مجتمع الـسبيدرن؟ لأن يتكلم الوثائقي عن المنافسة بين أشخاص على أسرع وقت في الـ Leaderboards، لكن مايتطرق للبطولات، او بسميها الرياضة الالكترونية في عالم السبيدرن. لأن الصراحة أنا شخصياً مو مألوف بهذا الجانب وأبي أعرف أكثر عنه.
وحتى من الأشياء الي أحس الوثائقي يمر عليها بسرعة، هو المجهود والقدرات المطلوبة من الـ Runner عشان يتقن أي لعبة. فكان في جانب لما يتكلم احدهم عن Super Metroid، يقول الـ Runner انه بالراحة لعب أكثر من 10 آلاف ساعة في اللعبة عشان يوصل للمرحلة الي هو فيها من الاتقان. بس أحس الوثائقي ما يبين هالشي للمُشاهد، انه شكثر وقت ومجهود تحتاج عشان تحقق الـ World Record. بس من ناحية ثانية حلو ان الوثائقي يعامل الهواية انها شي الكل يقدر يسويه ويستمتع ويبني مجتمع حوله حتى لو ماكان هو الرقم 1 على العالم، بس حتى هذا الجانب تطرقوا له عالسريع وكنت أتمنى وقت أكثر عليه. بس بعدين يمكن يصير الوثائقي 4 ساعات أو أكثر.
بس عموماً وايد عجبني المحتوى الي قدموه والمعلومات الي ركزوا عليها في وثائقي موجه للجمهور العام. أحس لو انك شخص مو مهتم ولاتعرف أي شي عن الـ Speedrunning فاذا تشوف هالوثائقي بتكون عندك فكرة عامة ويمكن حتى اهتمام وفضول انك تفصل أكثر وتبحث عن معلومات أكثر في الجانب الي شد انتباهك. فأكيد عشان هالسبب بقول ان Running with Speed يستحق المشاهدة وخصوصاً حق الي مهتمين في الألعاب لكن مو بالضرورة مهتمين بالـ Speedrunning، فهالوثائقي بيعطيكم نظرة على جانب يمكن ما تدرون عنه، أو ما تعرفون شوي عنه.
فهذا باختصار وثائقي Running with Speed، وبعد تقدرون تسمعون حلقتي السابقة عن موضوع السبيدرن إذا تبون معلومات أكثر عن مجتمع السبيدرن، واذا تسمعون الحلقة أول ما تنزل، فباقي 10 أيام على حدث AGDQ 2024، وبيكون لمدة سبعة أيام متواصلة و24 ساعة في اليوم على تويتش تقدرون تشوفون استعراض متنوع لوايد ألعاب قديمة وجديدة.
وبس هذه حلقة اليوم. كان وياكم علي الساهي ومع السلامة.
