السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي بعد ما خلصت من تعديل الدريمكاست الي كنت شغال عليه، فهذه الحلقة لأول شيء ألعبه على الجهاز. بس قبل ما أتكلم عن Jet Set Radio، اذا مهتمين بجهاز السيقا دريمكاست وما سمعتوا الحلقة الي تكلمت فيها عن تصليحه واكسسواراته الجديدة فاسمعوها، ومثل ما قلت في ذيك الحلقة اني ابي اركب GDemu، وهذا الي سويته. واذا تبوني اتكلم في حلقة مستقبلية عن تجربتي ويا الـ GDemu من ناحية التركيب والملفات وتجربة الألعاب عموماً فخبروني على تويتر. والحين خلونا ندخل في موضوع الحلقة ونتكلم عن Jet Set Radio او Jet Grind Radio بالنسخة الأمريكية.
كان ممكن ألعب هاللعبة على وايد أجهزة موجودة عندي لأنها نزلت في وايد أماكن، بس مادري ليش قررت أجربها على دريمكاست… وبقولكم من الحين، احس أفضل اني لعبتها على الدريمكاست ويا الكونترولر حقه. حسيت اللعبة وايد مناسبة عليه، حتى اني جربت ألعب بكونترولر PS5 بقطعة البلوتوث الي تكلمت عنها في حلقة اكسسوارات الدريمكاست، بس كلش ماعجبني التحكم. صعب أوصف شعور ايدي ومسكة كونترولر الدريمكاست ويا اللعبة، لكنها مريحة وتحس كل شي مضبوط من هالناحية. ما بكذب عليكم اني قبل ما استخدم كونترولر الدريمكاست كنت حاط في بالي انه مُتعب وكبير في الايد، لكن تصميم مسكته ويا الاستخدام وايد أفضل من شكله. مادري ليش تحول الكلام عن الكونترولر، بس الصراحة الكلام لازم ينقال ويا هاللعبة… وبنجي لموضوع التحكم بعدين، لأن صح مسكة الكونترولر مناسبة ويا اللعبة، بس ما يعني ان التحكم داخل اللعبة مثالي ومافيه اخطاء، بس خلوها لبعدين.
شنو تسوي في Jet Set Radio؟ انت تتحكم بشخصية في عصابة، او بسميهم جماعة اسمها GG في طوكيو-تو، وهم متزلجين لكن مو Skaters. إما Inline skaters. وشنو الـ inline skating؟ اذا كنتوا في نفس عمري فبتتذكرون الأحذية الي تحتها عجلات والي كنا نبيها، وأول ما لبسناها طحنا مباشرة…. اي خلوا الفضايح مخشوشة. بس صدق، ما عمري لبست هالاحذية مع ان كان خاطري فيها. فالمهم، الشخصيات الي تتحكم فيها في Jet Set Radio يستخدمون هالاحذية عشان يتزلجون في المراحل، وهدفك انك تجمع علب بخاخ ألوان أو الـ Spray Cans، وتروح لمكان الـ Graffiti وتلون الجدران او السيارات بشعار الجماعة لحد تلون كل الأماكن. مافي فعلياً الزامية حق تسوي حركات وانت تتزلج مثل في ألعاب Tony Hawk مثلاً (لكن تحصل منها نقاط). اللعبة تعطيك أماكن الـ Graffiti الي لازم تسوي لهم Tag ويجي قلب اللعبة بالتحدي في التنقل داخل هذه المنطقة. فيجي الـ Grinding على الاسطح، والقفز من منصة إلى ثانية أو رصيف إلى ثاني، لكن يكون غرضها عشان التنقل بدل من الاستعراض والتفنن. يعني الغرض الأول انك توصل للمكان المطلوب للـ Graffiti، واحياناً بتضطر انك تستخدم الحركات والـ Tricks والـ Grinding في طريقك للمنطقة، بدل من ان يكون هدفك زيادة نقاطك… وفي نقاط عليها مو ان مافي، بس مو هي هدفك الرئيسي، وهذا الي يخلي Jet Set Radio مختلفة بطريقة اللعب عن Aggressive Inline مثلاً. وعلى طاري Aggressive Inline فشريتها قبل فترة على PS2 وناوي ألعبها لما يكون المزاج موجود حق ألعاب التزلج.
أي صح، الـ Tagging يقدم نوع مختلف من القيمبلاي، فلما تجمع الـ Spray Cans فيكون عندك عدد محدود منهم، واذا وصلت للـ Graffiti فتبدأ Mini-game تستخدم عصا الآنالوق وتحركها بالاتجاهات والدوائر الي تطلع على الشاشة ولازم تضبطها صح عشان ترسم الـ Graffiti، وتقدر تفشل أكثر من مرة وتعيد، لكن على حسب علب البخاخ الي جمعتها، فاذا انتهت فما تقدر تواصل الرسم ولازم ترجع وتجمع علب أكثر. وهذه العلب ترجع لنفس مكانها في المرحلة مع الوقت، ومو محدودة من ناحية العدد كأنها Collectable لازم تجمعها، لا.. مجرد شي تشيله ويرجع بعد فترة اذا انتظرت لمدة معينة.
وهذا باختصار طبيعة اللعبة من ناحية المهمات، تدخل المرحلة، وتجمع الـ Spray Cans وتروح للمكان الي تسوي فيه Tagging، وفي وسطها تكون الحركة موجودة بالقفز وغيره. وبعض الأحيان يطلع لك منافس ويتحداك انك تقلد حركاته، وهني يتحول نوع المهمة إلى لعبة SKATE، ما أقصد لعبة Skating، أقصد اللعبة SKATE.. أو لا ما أقصد اللعبة SKATE من EA، أقصد اللعبة الي يلعبونها الـ Skaters انه واحد منهم يبدأ بحركة والثاني لازم يقلده بنفس الحركة، واذا ما سواها فيحصل الحرف S، ويواصلون لحد ما يحصل واحد منهم أحرف SKATE كلها ويخسر المبارزة. أوكي.. صعب انك توصف أشياء لما كلها تكون بنفس الاسم. فالمهم، ان هذا المنافس يبدأ في المرحلة ويتزلج على رصيف معين وبعدها يقفز لقوائم بجانب الدرج ويحتك عليها ويكمل لجهة اليمين مثلاً، وانت لازم تشوف شنو سوى وتسوي مثل حركته بالضبط. واذا كملت 3 تحديات فهذا المنافس ينضم وياك للجماعة.
بعد ما ينضم الشخص الجديد للجماعة فبتقدر تختاره من بين الشخصيات قبل ما تبدأ كل مرحلة، وكل شخصية عندها Stats معينة، فوحدة تكون أسرع بالـ Tagging أو الـ Graffiti، وواحد عنده Technique أفضل لما يسوي Grinding. بس لحد الحين ما لاحظت فرق أو اختلاف كبير بين الشخصيات الي اخترتها لأن الـ Stats قريبة من بعض.
للأسف… ويا اللعب تبين علامات العمر ويا التحكم. ففي أشياء مو مضبوطة أو متقنة 100% بالتحكم. فلما تقفز من حديدة إلى ثانية وانت ضاغط على الآنالوق باتجاه الحديدة الثانية، لكن الشخصية تروح شوي لليمين أو اليسار، فبدل ماتواصل الـ Grinding بعد ما تقفز فبتشوف الشخصية نزلت للأرض وخربت عليك الي انت كن مخطط له. ما احب اني دائماً أقارن أي لعبة تزلج ويا Tony Hawk بس أحسه ضروري. يعني في Tony Hawk في مجال للخطأ ويا الـ Grinding، فحتى لو الشخصية كانت شوي بعيدة عن الحديد الي تسوي عليه Grinding، فاللعبة تساعدك كنوع من الـ Aim-assist خلنا نسميها، أو Auto-adjust حق مكانك بقربك من الحديدة. فتخلي شخصيتك تكمل الـ Grind حتى لو كنت بعيد شوي ومو دقيق بحركتك للعصا. في Jet Set Radio تعتمد اللعبة على ان حركتك للآنالوق تكون 1 إلى 1 مع الشخصية في اللعبة، فاذا كنت شوي على جهة اليمين زيادة عن اللزوم فبتفشل… أو على الأقل هذا الي أنا لاحظته وأنا ألعب. واحياناً الكاميرا تكون عدوك في المناطق الضيقة في حارات Tokyo-to، فتبدأ الكاميرا تخرف شوي وما تقدر تشوف شنو الي قدامك، وطبعاً مافي آنالوق ثاني للكاميرا على دريمكاست، فاعتمادك كلي على الكاميرا الآلية أو انك تضغط L عشان تحرك الكاميرا لخلف الشخصية مباشرة. يمكن لو اني لاعب نسخ اللعبة على أجهزة ثانية ماتكون هذه المشكلة موجودة، بس ماعرف. وهذه الصعوبة في التحكم والكاميرا تظهر أكثر شي لما تحاول تهرب من الشرطة، وصح… في شرطة في اللعبة لأنك قاعد تسوي شي مخالف للقانون، فبعد فترة ينزلون الشرطة عشان يمسكون الشخصية. وانت قاعد تهرب وكنت في مكان ضيق وماتعرف وين تروح فسهل ان الشرطة تمسكك ولازم تسرع في الـ Skating عشان تتخلص منهم… لكن اذا تقعد تصدم في الجدار فتصير أصعب. وبعدها لما يجون قوات يرمون قذائف الغاز المسيل للدموع فتصير على أقل خطأ تنضرب بالقذيفة او تكون بوسط الغاز وتنقص صحتك. ولما تخلص صحتك فما في طريقة ترجع فيها الصحة بانك تشيل Pick-ups مثلاً، فلازم تعيد المرحلة.
وبنهاية المرحلة يعطونك تقييم على عدد النقاط الي تحصلها من الـ Tagging، ومن الحركات الفنية بالتزلج، ومن مستوى صحتك والوقت المتبقي من المرحلة. وتفتح مناطق جديدة في Tokyo-to، وكل منطقة في عصابة منافسة تتحكم فيها، وتختلف فيها أشكالهم وهويتهم، ففي الي يحبون التكنولوجيا مثلاً، والمناطق تعبر عن هذه الجماعة بتصميمها. Style اللعبة هو أكثر شي يجذب أكيد. والحين وانت تلعبها ترجعك لبداية الألفين وبصورة حلوة، يعني تلاحظها في تصميم الشخصيات ومناطق اللعبة وثياب الشخصيات واكسسواراتهم… لازم تكون عايش في ذيك الفترة عشان تعرف، بس وأنا ألعبها تذكرني بالأفاتارات على الانترنت، والرسومات الموجودة، والألوان كلها ترجعني لبداية الألفين، وحتى نوعية الموسيقى مع اني مو شخص موسيقي. وكفاية انها تعتبر من أوائل الألعاب الي تستخدم الـ Cel-shading في طريقة التصميم البصري للعبة، ومازال هذا الأسلوب جميل حتى وانت تلعبها على جهاز عمره أكثر من 23 سنة.
Jet Set Radio لعبة ممتعة، وفنية وجميلة شكلياً. بس مافيها شي في القيمبلاي يصرخ بالتميز، وهذا شيء عادي. يمكن اذا لعبتها أول مانزلت بتكون فكرتي عن هالشي مختلفة، بس ما أقدر أرجع وأحذف ذاكرتي لسنوات من ألعاب التزلج الي نزلت بعدها عشان أقدر أحكم على لعبة عمرها 23 سنة بحيادية. بس الحلو فيها، انها تذكرك بأنها لعبة SEGA وانت تلعبها، وتذكرك بألعابهم الآركيدية الي التركيز فيها على Gameplay Loop معين وممتع حتى وان كررته لعشرين مرة ورى بعض. فأصنف Jet Set Radio بنفس تصنيف Crazy Taxi، انها لعبة وانت توصفها ما بتحس بتميزها، لكن وانت تلعبها، في إحساس صعب ينوصف وهو متعة اللعب نفسها. يمكن تكون عادية، وفكرتها غريبة، لكن تطبيقها ما ينمل في اللعب نفسه، وهذا المهم. انه حتى بعد 23 سنة، ما تحس بالقِدِم في التصميم، وحتى وان نزلت ألعاب تزلج وايد من بعدها، لكن مافي شي بالضبط مثل Jet Set Radio. إلا اذا بنتكلم عن Bomb Rush Cyberfunk الي نزلت هالسنة، والي مالعبتها فما أقدر أقول شي عنها، بس تظل فكرتي نفسها. هذه أول مرة ألعب فيها Jet Set Radio لفترة طويلة، فهالشعور بالمتعة مو جاي من Nostalgia أو ذكريات للماضي، هالشعور جاي من شخص لعبها في 2023، وللحين يقدر يلمس متعتها.
ووصلنا لنهاية الحلقة، كان وياكم علي الساهي ومع السلامة.
