السلام عليكم ويا هلا فيكم بحلقة جديدة من بودكاست خفايف ألعاب. من بعد الحلقة الماضية لما تكلمت عن Jet Set Radio وأنا ألعبها، صار خاطري اني أجرب Bomb Rush Cyberfunk وأشوف شنو تقدمه هاللعبة بالمقارنة، وبما اني حبيت متعة اللعب في اللعبة الماضية فكنت حاط في بالي انها بتعطيني نفس التجربة. وشكثر كنت غلطان… الي يقول ان Bomb Rush Cyberfunk مجرد لعبة Jet Set Radio فهو غلطان.. لأنها تأخذ كل شي تسويه Jet Set Radio وتضاعفه مرات بالاتقان والمتعة والـ Vibe بشكل عام، وتضيف فوقه أشياء مأخوذة من ألعاب ثانية ومعدلة عشان تشتغل في هاللعبة، وتخلي فكرة Bomb Rush Cyberfunk كأنها الناتج النهائي الي كانوا فريق Jet Set Radio يطمحون يوصلون له. وكلها مقدمة بشكل ممتاز ومتقن بالنسبة لطبيعة اللعبة. فخلونا نتعمق أكثر وأقولكم ليش ان Bomb Rush Cyberfunk تستاهل تكون في قائمة أفضل ألعاب 2023… اذا كنت مُحب لهالنوع من الألعاب.
الفكرة العامة من اللعبة مألوفة، لأنها تخليك تتحكم بشخصية تنضم لجماعة وهدفهم انهم يتحكمون بالمناطق الي في مدينة New Amsterdam. وشلون يتحكمون بهالمناطق؟ انهم يسوون Tag بالـ Graffiti على جدران المباني واعلانات الشوارع وأي سطح ممكن ينرسم عليه. وشنو الي يمنعهم انهم يتحكمون بكل المناطق؟ لأن في عصابات منافسة تتحكم فيها وعليك انك ترسم على الـ Graffiti حقهم عشان تأخذ منهم التحكم بالمنطقة. والحين اتخيل انكم تقولون لي، لكن علي انت قلت انها مو مجرد Jet Set Radio لكن كل الي قاعد توصفه نسخة كاربونية بالضبط من الي شرحته في الحلقة الي راحت. وبقولكم، أي صح، لكن صبروا شوي لأني بدخل في الاختلافات الي بعضها بسيطة وبعضها تغير من أسلوب اللعب والي تسويه في المرحلة بشكل كامل.
أول اختلاف بسيط، انك تقدر تمشي… اوكي مو اختلاف كبير، بس الي يقدمه انه يعطيك تحكم أفضل بالشخصية في الأماكن الضيقة، أو داخل المباني. واذا سمعتوا الحلقة الي راحت بتعرفون ان احد المشاكل بالنسبة لي كانت التحكم في هالمناطق، فحلو ان في حل بسيط لها. وويا المشي ففي حركات جديدة مثل الـ Slide الي يخليك تدخل في أماكن صغيرة أو فتحات التهوية مثلاً، وعندك الـ Air-Dash لما تنط فتقدر توصل لأماكن أبعد، وتغطي مسافات أكبر بالقفز. هذا بالنسبة للتنقل، وفي أشياء غير بتكلم عنها لما بوصف التنقل بتفصيل بعدين. وفوق هذا ففي كومبات في Bomb Rush Cyberfunk، بما ان في شرطة يطاردونك بسبب الأشياء الي تسوويها، فتقدر تتحكم أكثر بالوضع بما ان عندك ضربات تقدر تسويها وانت تتزلج، أو انك ترش عليهم بالبخاخ. وهذه الإضافة يمكن كانت في Jet Set Radio Future بس انا مالعبتها فما أعرف اذا كانت نفسها بالضبط أو لا. فهذه الإضافات الي بتشوفها في بداية اللعبة وتقدم اختلافات بسبب الي تقدمه هاللعبة من أنظمة جديدة، مثل قتال الزعماء الي تشوف شوي منه بالبداية، أو حتى العمق الي يضيفه لنظام التنقل والحركات الفنية والكومبوز بعدين في المراحل.
اذا تتذكرون كلامي من حلقة Jet Set Radio، بتعرفون ان مافي الزامية حق الحركات الفنية بالتزلج، لأنها كانت مجرد وسيلة للوصول إلى المناطق الي فيها الـ Graffiti. أما في Bomb Rush Cyberfunk فضافوا نظام حركات جديد كامل، يغير من طبيعة اللعبة نفسها وفكرتها، فيصير التنقل داخل المرحلة أكثر من مجرد طريقة توصل فيها للـ Grafitti، وانما يحولها للعبة تحديات ألغاز بلاتفورمينق تكافئك بالنقاط كلما زاد الكومبو حقك. وهني بالنسبة لي الاختلاف الأكبر بين هاللعبتين، ان زيادة على نظام لعب الـ Graffiti الي كان جوهر وقلب لعبة Jet Set Radio، فهني في نظامين متناسقين ويا بعض يعطيك شي تسويه وهدف من تنقلك داخل المرحلة نفسها، فتبي انك تجمع نقاط وتتفنن بالحركات عشان تكبر الكومبو، لأن هذا نظام مبني عليه هاللعبة. ولأنه كان تركيز في التصميم من البداية، فبتحصل ان المراحل تأخذ هالشي وتقدم لك منطقة لعب تعتمد على هالفكرة. فزيادة على الـ Grinding الي كان موجود، ففي إضافات مثل الحركات الي تقدر تسويها خلال الـ Grinding، وتقدر تسرع من حركتك في التعرجات الي على العمود الي انت عليه اذا تتحرك بنفس اتجاه التعرج. وتقدر تقفز بوسط الـ Grind وتسوي حركات بالجو وترجع للـ Grinding، أو حتى تقفز وتستخدم الـ Air-Dash عشان تواصل الكومبو في مكان مختلف من المرحلة. بسمي نظام الحركة Tony Hawk Lite، يعني أقل عُمق من ألعاب Tony Hawk، لأنها تأخذ النظام وتبسطه بالتحكم عشان يناسب ويا طبيعة لعبة Bomb Rush Cyberfunk.
توقعتون اني بكمل هالحلقة بدون ما أجيب اسم Tony Hawk في السالفة؟ صدق صرت ما أقدر أتكلم عن أي لعبة فيها تزلج وحركات بدون ما أجيب طاري ألعاب Tony Hawk. تتوقعون كم مرة قلت اسمه في كل حلقات خفايف ألعاب لحد الحين؟ أنا أعتقد اني تكلمت عنه في حلقة Airblade وحلقة Session Skate Sim أكيد ويمكن حلقة No Straight Roads، وطبعاً حلقة Jet Set Radio. ماعرف وين يمكن بعد تكلمت عنه، يمكن في حلقة Games Done Quick و Prince of Persia؟ بس يلا عشان تعرفون شكثر ألعاب Tony Hawk ممتعة بالنسبة لي.
المهم وين كنا…
فعشان كل هالأنظمة الي لها علاقة بالحركات والتنقل، فالمراحل مطورة بشكل حلو، كلها مناطق مفتوحة وواسعة. وكلها مصممة بان يكون فيها خطوط كومبو، وحطوا خط تحت كلمة خطوط. لأنه مو مجرد خط كومبو واحد، بل يبدأ كخط واحد وبعدين بتشوفون ان المرحلة مصممة انها تخليك تتفرع وتصنع خطوط ثانية على حسب اكتشافك حقها، ويمكن خط صغير بالبداية تكون اكتشفته، يكون جزء من خط أكبر يمتد على مساحة المرحلة كلها، بس تحتاج لطريقة ثانية تربط فيها حركاتك عشان توصل لهالمكان وتخليه جزء من كومبو واحد. وبما ان في أنظمة جديدة مثل الـ Air-Dash ، وتقدر تسوي Boosted Air-Dash، وانت تضغط على L2 فلما تكون بالجو فتشغل الـ Jet Pack الي على ظهرك عشان تقطع مسافة بعد أطول من الـ Air-Dash العادي. وزيد عليها الـ Wall run الي يخليك تمشي على الإعلانات الي في المرحلة، وبتشوف ان إمكانيات نظام التنقل أكبر بوايد من أي شي قدمته Jet Set Radio. وبعد عندك Manual تسويه على الأرض عشان تواصل الكومبو اذا ماكان في عواميد تسوي عليها Grind وتضطر انك تنزل على الأرض. فكلشي غطوه عشان يعطيك حرية بالكومبو. اذا وصلت لمسافة طويلة بين العمودين، فتقدر تقفز وتسوي Air Dash وماتقطع الكومبو، واذا كنت قرب الجدار ومافي أي عمود قريب منك، فتقدر تمشي على الجدران عشان توصل لمنطقة جديدة بدون ما تقطع الكومبو، واذا خلاص مافي شي قدامك غير الأرض، فعندك الـ Manual بالـ R2 تواصل تضغط عليه وتحاول تحصل شي تسوي عليه Grind عشان ماتقطع الكومبو.
وفي تحديات جانبية تختبر مهارتك في الكومبو، فبتحصل تماثيل في المرحلة رافعين ايدهم عشان تعطيهم High Five. وهذه تحدي لازم تبدأ بالكومبو قبل ماتوصل لأول واحد، وتعطيه High Five وتواصل بنفس الكومبو بدون ماتقطعه عشان توصل للثاني والثالث والرابع الي يكونون بأجزاء بعيدة في المرحلة. ففي اختبار جانبي مو جزء من المهمة الرئيسية، بس يعطيك دافع عشان تستكشف خطوط الحركات وتتحدى نفسك.
بتلاحظون اني تكلمت شكثر، وللحين ماجبت طاري الـ Graffiti الي هو كان قلب Jet Set Radio ومهمتك الرئيسية فيه. فهني في نظام Tagging موسع أكثر. فعندك اكثر من رسمة تقدر تسويها على الجدار. وبدل ما تكون بنفس نظام Jet Set Radio انها تخليك تحرك عصا الانالوق باتجاهات ورى بعض، فانت عندك حرية تختار الرسمة الي تبيها وتتذكر شلون طريقة حركة العصا عشان تسوي هالحركة. فعندك مجموعة نقاط وانت توصل بينها بالرش عشان تسوي الرسمة، وعلى حسب النقاط الي تستخدمها وتوصلها ببعض فتختلف بينها. فالواجهة الي تستخدمها Bomb Rush Cyberfunk في الـ Tagging تختلف بطريقتها عن الدوائر الي تسويها في اللعبة الي تستلهم منها. وهذه الرسومات الموجودة عندك، تقدر تضيف عليها زيادة باكتشاف المرحلة، وتتذكرون التماثيل الي تعطيهم High Five، هذه لما تخلصها تعطيك رسمة جديدة تستخدمها للـ Tagging، أو حتى الشخصيات الي من العصابات الثانية لما تتحداهم بنفس طريقة Jet Set Radio انك تكرر حركاتهم بلعبة SKATE…. رجعنا حق لعبة SKATE. المهم انه في حركات يسوونها وفي وسطها تقدر تحصل رسمة جديدة. فمثل كل شي في هاللعبة وبكرر نفس الكلام، هي تاخذ الي سوته Jet Set Radio ولكن توسعه أكثر. فاذا كانت Jet Set Radio البيتا فـ Bomb Rush Cyberfunk النسخة 2.0 منها بعد اضافات وتحسينات وايد.
ومادري شلون راح عن بالي، بس في البداية في أول مرحلة مفتوحة فانت تستخدم لوح تزلج، وقبلها كنت تستخدم حذاء Inline Skating، بس بسبب أحداث تصير في البداية ومابحرقها عليكم فتصير تبدأ بـ Skateboard، وفي اختلاف بسيط في استخدامهم مثل الـ Boosting وانت تركض بالحذاء مو موجود وانت تستخدم الـ Skateboard. وفي بعد دراجات. وعلى طاري الأحداث، ففي شخصيات تتعرف عليها، بعضها شريرة وبعضهم أصدقاء. واذا كانت تصاميم Jet Set Radio غريبة، فتصاميم الشخصيات هني مجنونة. وبشكل العام اللعبة بستايلها تميل أكثر لجانب الـ Cuberpunk فتشوف شخصيات عندهم Augmentations غريبة واشياء تصير في القصة بخليكم تكتشفونها بنفسكم.
فبعيد وأكرر الي قلته بالبداية، الي يقول ان Bomb Rush Cyberfunk مجرد Jet Set Radio فغلطان. لأن هذا بالضبط الي انا توقعته، لكن بعد مالعبت اللعبتين ورى بعض، أنا أشوف انها تطور من الصيغة الي بدأتها Jet Set Radio أكثر من كونها مجرد نسخ لأفكارها. فصح انك ما تقدر تتكلم عن Bomb Rush Cyberfunk بدون ما تتكلم عن مصدر الهامها، لكن بالنسبة لي ما أشوف ان هذا عيب ينحط ضد اللعبة. وهذا مجرد رأيي أكيد، بس تذكروا الي قلته في الحلقة الماضية عن Jet Set Radio، ان سنة 2023 هي المرة الأولى الي أقعد وألعبها بشكل مطول، وانطباعي الإيجابي عنها كان أكثر من مجرد حنين للماضي، لأن ببساطة ما عندي هالحنين بما أني ما جربتها في وقتها. ولكن بالرغم من هذا، انا أشوف Bomb Rush Cyberfunk تعطيني الي ابيه كشخص يحب ألعاب التزلج والحركات الفنية، بالإضافة للأفكار الي حسيت بمتعتها في Jet Set Radio. فهذه اللعبة موجهة لي بالتحديد، انها تأخذ الأفكار الحلوة من هذا النوع من الألعاب ومن أكثر من لعبة وتدمجها في بعض في قالب يشبه اللعبة الي تستلهم منها أكثر شي. فأعرف شعور الجانب الي ممكن يحس ان هذه اللعبة مجرد تكرار لأشياء كانت موجودة سابقاً، لكن بالنسبة لي أشوفها كأنها أخذت لعبة معينة وضافت عليها الي كانت تفتقده اساساً وخلتها كـ Package كامل موجه حق فئة معينة من اللاعبين. وبعطيكم مثال بس مادري اذا يصلح أو لا، فاذا قلت لي ان Bomb Rush Cyberfunk لعبة تعتمد على أفكار قديمة وتكررها، فبقولك انها شبيهة بألعاب القتال، ليش ألعب Street Fighter 6 اذا Street Fighter 3 موجودة قبلها؟ لأن SF6 تضيف ميكانيكيات جديدة مثل Drive Rush و Drive Impact تخلي الـ Moment to Moment Gamplay مختلف تماماً عن Street Fighter 3 حتى لو على السطح يبين وكأن اللعبتين تشبه بعض، فنفس الشيء بالنسبة لـ Bomb Rush Cyberfunk، فتضيف أشياء مثل الـ Tricks خلال الـ Grinding، والـ Manual بوسط الكومبو، و الـ Wall Run و الـ boosted Air-Dash ومراحل مصممة بخطوط كومبو في البال، كلها تخلي اللعب في اللحظة مختلف تماماً عن أي شيء تقدمه Jet Set Radio. وفي الأخير مع فرق أيام بين لعبي هاللعبتين، فبقول ان Bomb Rush Cyberfunk تستاهل انها تكون الخليفة الروحية لـ Jet Set Radio، لكنها تجذب أشخاص أكثر من مجرد عشاق اللعبة الي تستلهم منها، وتستاهل انها تنحسب كلعبة لها هويتها الخاصة بالرغم من كثرة استلهاماتها واقتباساتها.
وبس، هذا كل شي عندي أقوله عن اللعبة. وسعيد اننا بوسط موجة كبيرة من الألعاب، لكن للحين في شي موجه لكل شخص في عالم الألعاب. فعندنا الألعاب الكبيرة، وعندنا الألعاب التجريبية والغريبة، وعندنا ألعاب مثل هذه الي تغطي فجوة في نوعية ألعاب مطلوبة وماتحصل حقها. وبالأخير فاللاعبين هم المستفيدين من كل هالتنوع. كان وياكم علي الساهي ومع السلامة.
