للاستماع للحلقة:
السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وهالأسبوع لعبت Arzette: The Jewel of Faramore. فشنو Arzette بالضبط؟ وليش شكلها مرسومة ببرنامج Paint على مايكروسوفت؟ الله يسلمكم هاللعبة فكرتها جاية من مجموعة أشخاص يبون يسوون لعبة تشبه ألعاب زيلدا الي نزلت على جهاز الـ CDi. فخلوني استغل مقدمة الحلقة عشان نمر على درس تاريخ لشنو هو الـ CDi وليش نزلت عليه عناوين حصرية لنينتيندو.
القصة ان نينتيندو كانت في فترة جهاز SNES تبي تسوي إكسسوار جديد يشغل الألعاب من الـ CD بما انهم مازالوا يستخدمون الأشرطة أو الـ Cartridges. فتعاونوا ويا شركة صغيرة يمكن ما سمعتوا عنها من قبل اسمها Sony وسووا لهم نسخة مبدئية من اكسسوار اسمه PlayStation. لكن على آخر لحظة قامت نينتيندو وغدرت بـ Sony ومن خلف الكواليس تعاونوا ويا شركة Philips عشان يسوون لهم الاكسسوار… لكن نينتندو بعد غدرت ويا Philips لكن هالمرة ما طعنوهم في الظهر مثل ما طعنوا سوني الي راحت بعدين وطلعت PlayStation كجهاز منفصل، والباقي تاريخ كلكم تعرفونه. فعشان نينتيندو تراضي Philips قرروا يعطونهم حقوق لخمس من شخصياتهم عشان يسوون عنها ألعاب لجهاز الـ CDi. ومن هني طلعت 3 ألعاب زيلدا وكان المفروض 3 ألعاب ماريو لكن ما صدر منها إلا واحد وهو Hotel Mario ولعبة ثانية منها Prototype بسيط تسرب بعدين. فألعاب زيلدا الي نزلت للجهاز كانت مختلفة تماماً عن الي كانت تصدره نينتيندو وقتها، وكانوا يبون يستخدمون إمكانيات تشغيل الفيديو من الـ CD على جهاز Philips، فكانت اللعبة فيها مقاطع مرسومة أو Cutscenes… وهذه الألعاب كلش ماوصلت لتوقعات نينتندو من ناحية الجودة، والألعاب نفسهم صاروا مطنزة. طبعاً شخصياً ماكنت أعرف عن هالألعاب إلا بعدين لما كنت اقرأ في الانترنت، أو حتى أتوقع بسبب فيديو AVGN فكلش متأخر. يعني شخصياً ماعندي أي تاريخ ويا هالألعاب ولا كنت أعرف عن الـ CDi ولا شي.
هذه الألعاب صارت Meme في مجتمع لاعبين الريترو، ومثل أي شيء سيء، بعد فترة بكون في ناس بسبب سوء اللعبة تصير كوميدية وتستاهل تنلعب بسبب سوءها، وتجي نوع من المتعة من هالنوع من الألعاب. شيء مشابه للعبة Wanted: Dead مثلاً الي تكلمت عنها في حلقة منفصلة. فالمهم، ان طريقة الرسومات والتمثيل الصوتي في هاللعبة صارت مصدر الهام لوايد ناس. حتى ان في مجموعة هواة كانوا يقولون ان هالألعاب فيهم أفكار حلوة لكن تقنياً ماطلعوا بالصورة المطلوبة، فاشتغلوا هالهواة على ريماستر للعبتين من هالألعاب ومتوفرين على الـ PC وتصلح في وايد أشياء من القيمبلاي.. أنا لعبت شوي من هالريماسترات لكن ماكملتهم.
وهني نوصل لـ Arzette اللعبة الي بتكلم عنها اليوم. بسبب كل هالقصص ومثل ما قلت ان هالألعاب واسلوبهم صاروا مصدر الهام لبعض الأشخاص، ومنهم مطورين Arzette الي كانت عندهم فكرة انهم يسوون لعبة بنفس أفكار ألعاب زيلدا ويحاكون أسلوبها ورسوماتها وكل شي فيها، ويطلعونها كلعبة جديدة. عشان جذي انا أحب مطورين الألعاب المستقلين، مهما كانت الفكرة الأصلية غريبة فبتحصل ناس يحبونها ومستعدين يسوون لعبة جديدة على طريقتها. واذا كنتوا مهتمين بألعاب الريترو فعلى الأغلب تعرفون بعض الأسماء الي اشتغلوا على اللعبة، ومنهم Audi الي يطلع احياناً في فيديوات Digital Foundry وحتى John Linemman ساعد في تصميم اللعبة. وفي أصوات من قنوات YouTube بتعرفونها مثل ماقلت اذا تتابعون محتوى ريترو.
فأخيراً بعد هالمقدمة الطويلة الي أتمنى عطتكم فكرة شنو Arzette، خلونا نتكلم عن تجربتي ويا اللعبة نفسها، هل تستاهل، هل تعتبر ممتعة لشخص ما عنده هالتاريخ ويا ألعاب زيلدا على CDi، ويعرف عنها بس بسبب الـ Memes على الانترنت؟ الجواب المختصر، أي وايد حبيت اللعبة وكملتها 100%، أخذت مني 4 ساعات وشي وهذا وأنا أجمع كل شي في المراحل. فشوي قصيرة، لكن للأمانة فيها مراحل وايد وأحس ان طولها مناسب بالنسبة للي تقدمه. لو كانت أطول فكانت بتأثر عليها سلباً.
نوع اللعبة مغامرات بشكل أساسي، وصايرة على نظام مراحل. فتدخل المرحلة عبارة عن منصات بسيطة وتقاتل الأعداء، لكن هذا مو هو التركيز. القصة ان الشرير الكبير انشال عنه الأسر من الكتاب الي كان محبوس فيه بمساعدة جوهرة Faramore. فقام كسر هالجوهرة ووزعها على 5 من مساعدينه، الي هم الـ Bosses في اللعبة. فهدفك انك توصل للمراحل الي فيها الـ Bosses وتهزمهم عشان تجمع أجزاء الجوهرة، لكن في مهمة ثانية بعد انك تفعل الـ Beacons الي بعد بنهاية المراحل. الحلو في اللعبة ان تصميم اللعبة ككُل مو انك تخلص مرحلة وتنتقل للي بعدها، بل أكثر انك توصل لنقطة معينة من المرحلة وتكتشف شي جديد من شخصية معينة، وبعدها تروح للمرحلة الي بعدها عشان تكمل رحلتك، وفي المرحلة الثانية بتحصل أداة تخليك تفتح المرحلة الثالثة. ولما تروح للمرحلة الثالثة فبتحصل عنصر معين يخليك ترجع للمرحلة الأولى وتواصل من المكان الي وقفت فيه أول مرة. فهالأسلوب يخلي في تنوع بين المراحل، وحتى في المراحل الي زرتها من قبل بتفتح أجزاء جديدة منها، بتحتاج طاقاتك الجديدة الي اكتسبتها…. بس اللعبة مو Metroidvania. مثل ماقلت في البداية، اللعبة تركيزها على تصنيف المغامرات، فصح انك تسوي أشياء وترجع للمراحل بس هي مو Metroidvania وطريقة اللعبة كلش مختلفة عن أسلوب الـ Metroidvania. الي استمتعت فيه خلال اللعب ان بعد فترة بسيطة أحصل شي جديد أسويه وهو يدفعني أني اكمل بدون ما يكون في تكرار أو ملل من الي قاعد أسويه. ففالبداية بس عندك السيف وتحصل قنبلة تخليك تكسر بعض الجدران عشان تفتح مناطق جديدة. وبعدين تحصل ضوء يخليك تكتشف الكهوف المظلمة، وبعدها تحصل سحر يكسر بعض الجدران الملونة. فالمتعة جاية أكثر شي من إحساس المغامرة والتنوع بطريقة فتحك للمناطق الجديدة، بدل من التنقل أو القتال. فالي كان يدفعني للتجربة هو اني ابي اشوف الشخصيات الجديدة وأبي أحصل الأسرار في المنطقة عشان أطور من الأدوات الي عندي. فكل هالأشياء بشكل مترابط طالعة جيدة.
على نهاية اللعبة بتكون طورت السيف الي تقاتل فيه، وعندك مسدس يطلق سحر يساعدك تفتح جدران عشان تتقدم في المراحل وبعد يقتل الأعداء. وعندك أدوات منها القنبلة والمصباح، لكن بعد في الناي يخليك تفتح نوع معين من الجدران واستخداماته كلش قليلة، لكنه يخليك تقتل الأعداء الي يطيرون ففي له استخدام ثاني. وعندك قفاز بعد يخليك تكسر نوع من الجدران. فإذا بتركز على الأدوات الي تحصلها واستخداماتها بتشوف انها كلها تقريباً تسوي نفس الغرض من ناحية قيمبلاي فمالها داعي. لكن الغرض منها يجي من طرف القصة والمغامرة نفسها، ففي لها منظور مختلف تطالع هذه الأدوات منه. فإذا كنت لاعب يركز بس على القيمبلاي، فأي هالأدوات كلها تؤدي نفس المهمة، واجبارك انك تروح وتحصل أداة جديدة عشان تفتح جدار جديد عبارة عن تمطيط وتضييع وقت وسوء استغلال لطريقة تقديم الأفكار. لكن اذا بتنظر لها تحت سياق المغامرة نفسها، فبتحصل لها أهمية من هذه الناحية. فهالنقطة سلبية اتجاه اللعبة كلعبة، وعادية اتجاه اللعبة كتجربة. اتمنى شرحي واضح.
الـ Bosses سهلين زيادة عن اللزوم، وهذه أكثر نقطة كنت أتمنى لو انها كانت أفضل. صح ان التركيز في اللعبة مو القتال، لكن حتى الأدوات الي تحصلها عشان تستخدمها ضد الأعداء تحسها وايد Overpowered ضد الزعماء، وعندهم Patterns كلش سهلين وبسرعة تتفاداهم، فمن هالناحية ما كان في أي تحدي ضد الزعماء في المغامرة نفسها. لكن لما كملت اللعبة وفتحت طور الـ Boss Rush الي يخليك تقاتلهم ورى بعض بدون استرجاع الصحة أو الأدوات فطالعين صعبين شوي، لكن خلال المغامرة الأساسية نفسها فحدهم سهلين.
فمن ناحية القيمبلاي، لما كنت ألعب Arzette كنت أقول اني صح مالعبت وايد من ألعاب Zelda للـ CDi، لكن بطريقة تقديم هالمطورين لهالأفكار في Arzette صرت أحس ان فعلاً هالألعاب يمكن كان فيهم أفكار ممتعة لو كانت مصقولة بالدرجة المطلوبة منها. يعني مثل ماقلت أكثر من مرة، ان إحساس المغامرة موجود وهو الدافع الأساسي بالنسبة لي في هاللعبة بما ان القيمبلاي بسيط. والدافع الثاني عشان أشوف المقاطع السينمائية الي أعتقد كان له أكبر دور اتجاه استمتاعي بهالتجربة.
فخلونا نتكلم عن هالـ Cutscenes الي مرسومين ببرنامج الرسام. حدهم صايدين طريقة ألعاب زيلدا، صح انهم بألوان Flat ودقتهم قليلة لكن في لهم Charm معين، وانت تلعب يخليك تستانس عليهم. حتى الـ Animation ضابطينه بالضبط على طريقة الألعاب الي يبون يحاكونها، وحتى الأصوات. الكوميديا تعتمد على الشخص اذا يحبها أو لا، وهاللعبة بالنسبة لي على الأقل خلتني أضحك واستانس، لكن بعد في بعض الأشياء حسيتها سخيفة. فمن ناحية الستايل، أقدر أقول انه أكثر عنصر ممتاز من Arzette ويغطي على نواقص اللعبة.
وفي شخصيات وايد في اللعبة ولهم Cutscenes، وذلين هم الي يعطونك المهمات الجانبية. ومن ناحية المحتوى الجانبي، ففي أسرار بمناطق مخبأة مثل عملة في كل مرحلة، وأكياس فيها كنوز، و Bonuses وحدة منها تحاكي لعبة Hotel Mario بشكل بسيط. فهني بعد تعتمد درجة استمتاعك بالقيمبلاي على درجة تقبلك لبعض هذه الأفكار الي يحسنها سياق القصة والمغامرة، وبدونها فهي أشياء بسيطة مالها داعي. يعني بالنسبة لي كتجربة شخصية لأني حبيت المغامرة نفسها فكنت متقبل كل هالأفكار، وما فكرت بمحدودية الي تسويه Arzette من ناحية القيمبلاي إلا بعد ما كملت اللعبة وقعدت أفكر فيها من ناحية تقييم للمحتوى نفسه. أما خلال اللعب فكنت مستمتع بكل لحظة لحد آخر زعيم بسبب ارتباطي بالستايل.
كتجربة كاملة فـ Arzette لعبة ونيسة وهذا أفضل وصف لها. قاعدة تقدم أفكار اللعبة الي تحاكيها بأفضل صورة ممكنة ويا الإبقاء على بساطة جوهر هالأفكار المأخوذة من الأصل. إذا بتنظر للعبة على أساس انتاج جديد فبتكون ناقصة من عدة نواحي مثل ما تكلمت خلال الحلقة، لكن لما تحط في بالك فكرة هاللعبة الأساسية فبتشوفها انها تقدم أحسن تجربة ممكنة تحت هالسياق. فإذا بجي انصح بلعب Arzette فقط اذا كنت مهتم بالتاريخ الي تحاول تقلده، حتى لو مالعبت الأصل نفس حالتي. أقدر أقول اني استمتعت بالتجربة كـ Parody. أما اذا بتفكر فيها كلعبة انتاج جديد وتزيل منها فكرة اللعبة فما بحسها بتقدم لك المطلوب لأن ينقصها وايد أشياء. أو بالأحرى، محاولة محاكاتها لألعاب الـ CDi هو الي شايل اللعبة، وبدونه فبتكون تجربة لا بأس بها.
صعب الصراحة الموازنة بين مدح اللعبة وذمها، لأنها مو لعبة سيئة ولا هي لعبة ممتازة، صايرة في الوسط ويا ميول شوي عند الجانب الجيد. شخصياً استمتعت فيها، وبنفس الوقت ما بنكر ان فيها نواقص. بس بتذكرها كتجربة ممتعة بالنهاية.
وكانت هذه حلقة اليوم. كان وياكم علي الساهي ومع السلامة.
