للاستماع للحلقة:
السلام عليكم ويا هلا فيكم بالحلقة الأخيرة لسنة 2023، وياكم علي الساهي في حلقة بتكون كلش عشوائية لأني بقعد أسولف عن الخرابيط الي قاعد ألعبها على نهاية السنة، لأني ما ابي أدقق في لعبة معينة حالياً، أو بالأحرى ماعندي طاقة أحلل لعبة معينة. فبدلها خلوني أكلمكم عن الأشياء الي قاعد ألعبها هالفترة وغالباً ما بتكون لها حلقة منفصلة أدقق فيها عليها، إلا اللعبة الأخيرة الي بمر عليها بنهاية الحلقة، ناوي أفصل فيها أكثر في حلقة منفصلة لأن فيها تفاصيل وايد وأحتاج اني أقضي وقت أكثر فيها… ما بشوقكم، اللعبة هي Avatar: Frontiers of Pandora، بس خلوها للأخير على السريع، وبالتفصيل في حلقة قادمة في سنة 2024.
فهالفترة من بعد عرض GTA VI رجع عندي الحماس للسلسلة وأخيراً بنشوف جزء جديد. فقررت أرجع أكمل GTA III من ريماستر الـ Definitive Edition، فكملت المهمات الي كانت باقية علي، وحتى كنت اجمع الـ Hidden Packages عشان تنفتح الأسلحة عند الـ Safe House، فكملت عليها كان عندي 68 من 100، فحصلت الباقي على الجزيرة الأخيرة. ففتحت كل الأسلحة عند بيوتي وتقريباً عندي عدد لا نهائي من الذخيرة لها كلها. وعشان أحصل الـ Flamethrower كان باقي اني أسوي مهمات سيارات الإطفاء، اني اطفي 20 حريقة في كل جزيرة، فحتى هذه كملتها. وبعد أصعب شيء بالنسبة لي كان مهمات الإسعاف، لازم أوصل Level 12 ورى بعض، بس الي لعب GTA III يعرف ان العصابات في الشوارع ما يرحمونك اذا كملت مهمات القصة، فكان صعب التنقل بالاسعاف بدون ما يتضرر وبدون ما ينفجر، وماتقدر حتى تطلع من الإسعاف عشان تغيره، فعشان التروفي سويت هالشي، ولكن بعد يعطونك قدرة حلوة والي اهي انك تركض لا نهائياً. وبعد شنو سويت،،، وصلت السيارات المطلوبة في الميناء والسيارات المطلوبة على الجزيرة الأخيرة، فالحين اذا أبي أي سيارة أقدر احصلها من الـ Garage بسهولة. وحتى سيارات الخدمات مثل الإسعاف والشرطة والاطفاء وصلتها للميناء، وحتى الدبابة الي تطلع لك لما توصل الشرطة إلى 6 نجوم. أي صح، عشان احصل الدبابة بسرعة، سويت مهمات الشرطة قبلها، لأن لما تكمل 10 مهمات لسيارة الشرطة في كل جزيرة تفتح رشوة للشرطة، الي هي العلامات الي تاخذها وتشيل نجمة شرطة منك. واذا تكمل 20، فتحصل رشوة ثانية. فلما سويتهم كلهم لكل الجزر حصلت الرشاوي الست. بعدها دمرت كل شي ووصلت نجوم الشرطة إلى 6، وخليتهم ينزلون الدبابة، ووقفت عند الـ Safe house. فلما وصلت الدبابة، بسرعة رحت أخذت الرشاوي الست ومسحت النجوم كلها وسرقت الدبابة وحطيتها في الـ Garage. فأي تحمست وايد لألعاب GTA من بعد العرض، وحالياً قريب اني أوصل 100% لكل شيء، فيمكن أحاول أجيب البلاتينيوم تروفي. باقي لي الـ Rampages الي يمكن يكونون صعبين بما ان العصابات كلها ضدي، وباقي الـ Stunt Jumps بالسيارة. أتوقع بس هذا الي باقي. فبعد GTA III ناوي على Vice City، بس متحير بين 3 اختيارات. هل ألعب النسخة الي في Definitive Edition على PS5 عشان التروفيز، ولا ألعب النسخة الأصلية على PS2 عشان الذكريات، ولا ألعب نسخة الـ PC الأصلية عشان احط Mods وهالسوالف… بس أتوقع ما عندي نسخة PC حق Vice City لازم أشيك، فيظل أول خيارين نسخة PS5 ولا PS2.و على طاري نسخة PC، أتذكر Vice City كنا نحطها في كمبيوترات المدرسة ونلعبها في حصة الحاسوب، حتى كانت نسخة بدون أصوات وموسيقى. والله أيام. وصح، نزلت نسخة Netflix على الموبايلات حق الـ Definitive Edition، ومن الي شفته بالمقارنات فهي نفس نسخ الكونسولز بس فيها تحسين أتمنى يضيفونه كخيار بتحديث لنسخ الكونسولز. رجعوا فلتر الألوان الأصلية حق الثلاث ألعاب، وحتى الـ UI تقريباً على الشكل الأصلي. فطالع شكل الألعاب أقرب للأصلية، مثل San Andreas عليها الألوان البرتقالية كفلتر. غريبة انهم ما نزلوا تحديث لنسخ الكونسولز، بس للأسف متوقع وشكلهم نسوا عنهم ولا راح توصلنا هالتعديلات. فأي، هذا بخصوص GTA.
أما الشيء الثاني الي للحين ألعبه فإضافة Valhalla حق God of War Ragnarok. للحين ما كملت القصة ومستمتع بالتنوع وطريقة اللعب الجديدة، ورجع لي شعور اتقان الـ Combat في اللعبة. بالنسبة لمفاجأة مجانية فقاعدة تقدم أكثر من الي توقعته. وهي وحدة من الأسباب الي مو قاعد ألعب ألعاب جديدة عشان أتكلم عنها، لأني ما أقدر أركز على لعبة وحدة بسبب هالإضافة الي جت فجأة. فالمهم، للحين قاعد ألعبها، واذا تبون تسمعوني أتكلم بالتفصيل عنها فاسمعوا الحلقة الي راحت.
لعبة ثالثة بدأتها بس ما تعمقت فيها هي The Last Faith. لعبة ايندي فيها أفضل رسومات Pixel-Art شفتها هالسنة، أو يمكن حتى إطلاقاً… لا ما بقول إطلاقاً يمكن في شي مو على بالي حالياً، بس فعلاً التفاصيل في الرسومات والخلفيات والأعداء شي خيالي ومو طبيعي. اللعبة عبارة عن Metroidvania بمستوى صعوبة عالي فيها من أفكار ألعاب الـ Souls. اذا تلعبون ألعاب الايندي فتعرفون هذه النوعية من الألعاب لأن في وايد منها… وحتى ما يحتاج أشرحها لأنه يكفي اني أقول انها Castlevania ممزوجة ويا Bloodborne. فأول شيء بتلاحظونه شكثر اللعبة تشبه Bloodborne من عالمها وبناياتها الـ Gothic إلى تصميم الشخصيات والأعداء، حتى نوعية الأسلحة. والشبه مو بس في الشكل، اذا تسمعون الموسيقى بتحسون شكثر مستلهمة هاللعبة من Bloodborne. والي ما يعرف، فـ Bloodborne بالنسبة لي لعبة الجيل الماضي بكل استحقاق.. فأي، لما شفت The Last Faith وايد تحمست لها وأبي أجربها. الصراحة مالعبت وايد، يمكن 40 دقيقة بس، وللحين في المنطقة الأولى. ما كنت أبي ابدأ لعبة جديدة وأنا للحين ماخلصت ألعاب ثانية، بس صادني فضول أشغلها وجذبتني حق فترة وبعدها قررت اني اهدها، وبحدد لها وقت منفصل عشان أركز فيها. بس من الي جربته لحد الحين فأشوفها تستاهل اللعب، والقتال ممتع. اذا تحبون هالنوعية من الألعاب وما سمعتوا عن The Last Faith فأبحثوا عنها وشوفوا.
وأخيراً اللعبة الي المفروض أكون ألعبها بس كل شوي تسحبني لعبة ثانية عنها، فهي Avatar: آفاق باندورا. أولاً، شكراً Ubisoft الشرق الأوسط على توفير اللعبة للموقع، ما قصروا ووفروها لنا. وعموماً أنا كان فيني فضول ألعبها من بعد عروضها. يمكن الي سمعوني في حلقات قديمة ويا عصام الشهوان في جرعة إضافية بتعرفون اني أعشق عالم Pandora. مو شرط قصص أفلام Avatar نفسها، بس العالم والبيئة، والاحياء والحضارات وهالسوالف. وبعد بكررها في هذه حلقة، ان السبب الي خلاني أعشق Horizon Zero Dawn في 2017، لأنها قدمت لي عالم جديد ذكرني وايد بباندورا. أو بطريقة ربط كلشي في العالم وكأنه مكان حي وحقيقي. والحين لعبة Avatar تذكرني وايد بـ Horizon. أدري ان وايد الي يقولون انها لعبة Far Cry، أما بالنسبة لي لحد الحين بعد 10 إلى 12 ساعة لعب فأشوفها أكثر من مجرد نسخة مختلفة من Far Cry. مثل ما قلت، ان الاكتشاف والحضارة والبيئة والعالم يخليها عميقة من هذا الجانب، فطريقة المهمات فيها أكثر من الاستيلاء على الـ Checkpoint أو المخيمات، ففيها جانب لعب استكشافي ومغامرات أكثر من أي شيء في Far Cry 6 مثلاً. فأحد الأسباب اني ما تعمقت في اللعبة لحد الحين، لأني أحب اقرأ كل التفاصيل المكتوبة، وفيها كتابة وايد عن الحيوانات والنباتات، فكل ما أشوف شيء جديد على Pandora أفتح واقرأ التفاصيل فياخذ من وقت اللعبة. فعشان هالسبب ما كنت أبي استعجل وأسوي حلقة كاملة عنها لحد فعلاً أتعمق فيها وآخذ كل تفاصيلها باللي توفره كتجربة، خارج عن الـ Combat والمخيمات الي تذكر الناس بـ Far Cry.
ومن ناحية التفاصيل المكتوبة للعالم، فهني جانب التعريب مهم حق وايد لاعبين، وأنا قررت ألعبها بالعربي عكس عادتي ويا باقي الألعاب عشان أشوف جودة ترجمة هذه المعلومات. خصوصاً انها معلومات مكتوبة على طريقة الموسوعات العلمية، وفيها وايد شروحات حق مثلاً شلون هذه النباتات تعيش وتتفاعل ويا بيئتها، وشنو الأجزاء الحيوية الموجودة في هذا النوع من الحيوانات، فما أحسها ترجمة سهلة نهائياً ويا المصطلحات العلمية الي يستخدمونها. فمن هذا الجانب أبهرني التعريب في Avatar، وصار شي متوقع من يوبي سوفت فأحس ما يحتاج نستغرب. لكن، في شي خلاني استغرب في التعريب، فبعطيكم لمحة سريعة عنه. داخل الإعدادات للغة العربية في خيار جديد مو متوفر للغة الإنكليزية، وهو لاختيار صيغة المخاطب. طبعاً لأن اللغة العربية فيها مخاطبة للمذكر والمؤنث، فأنت كلاعب أو كلاعبة بتقدرون من الإعدادات تحددون صيغة المخاطب، وهالخيار يغير كل شيء في الواجهة والارشادات عشان تكون بالصيغة المختارة. فمثلاً لما يطلع على الشاشة أمر “تَسلق”، تتغير إلى “تسلقي” اذا اخترتي صيغة المؤنث. يمكن تحسون وين قاعد أروح ويا كلامي. بالإضافة للمذكر والمؤنث، ففي صيغة ثالثة تقدر تختارها تحت مسمى “غير محدد”. في هذه الصيغة تتغير المخاطبة إلى صيغة الجمع. فـ”تسلق” من مثالنا، تتحول إلى “تسلقوا”.و “اضغط” تتحول إلى “اضغطوا”. اذا بحسن النية للحظات، فهذا الخيار موجود لأن اللعبة فيها لعب جماعي، وهذا الخيار عبارة عن استخدام لما تلعب Co-op وتبي تغير الارشادات لصيغة الجمع… لكن في هذه الحالة، اللغة العربية فيها جمع مذكر وجمع مؤنث. فمثلاً لو اللعبة تستخدم فعل أمر وتكتب “اَرجِع”. فيتغير التصنيف على حسب اذا كان جمع مذكر فيصير “اَرجِعوا”، أما إذا كان جمع مؤنث فيصير “اَرجِعن”. فعشان هالسبب، وعشان ان في صيغتين مختلفين للمذكر المؤنث الفردي ومافي نفس الشي للجمع؛ يخليني أفكر ان هالخيار تحت مسمى “غير محدد” المقصد منه شيء مختلف تماماً، وأستغرب من استخدامه في اللغة العربية. لأن مفهومه دخيل على مجتمعنا، وحتى دخيل على لغتنا… فهذا الشيء حيرني، من جانب عجبني إضافة المذكر والمؤنث، ومعناها ان كل الارشادات في اللعبة ترجموها مرتين وهذا عمل ممتاز، لكن من جهة ثانية خيار “غير محدد” مشكوك في أمره بالنسبة لي وأحتاج توضيح بشأنه. خصوصاً أن نسخة الشرق الأوسط هي الوحيدة الي فيها اللغة العربية، واذا كان المقصد من الخيار شيء آخر فالمفروض انه ما كان ينحط. لكن ما ادري، هذه مسألة تحتاج توضيح بشأن التعريب، وتحتاج ناس أكبر مني من ناحية الجمهور يتكلم عنها ويجذب الانتباه بخصوصها عشان نحصل جواب أو توضيح.
فالمهم، قبل ما أنتقل من Avatar. فبقول انه لحد اللي لعبته فانطباعي وايد إيجابي عن اللعبة من ناحية القيمبلاي. حتى اني أشوفها من أجمل الألعاب رسومياً ومن ناحية التوجه الفني، أحسها نزلت بنهاية السنة وما حصلت التقدير بهذا الخصوص. اللعبة جميلة جداً على PS5 خصوصاً من ناحية الألوان والـ HDR. ومثل ما قلت، اني ابي أتكلم أكثر عن رأيي في اللعبة بتفصيل حق المهمات والتقدم والقيمبلاي والعالم، بس ما كنت أبي استعجل، خصوصاً اني ما ركزت فيها وايد وبشكل متواصل. فإن شاء الله بتكون في حلقة مخصصة لها. بس الصراحة ما أقدر أحدد تاريخ معين لها، لأني بظل ألعبها على فترة طويلة، وبلعب ألعاب ثانية بجانبها. لأن أحس عالمها ضخم وما بقدر أخلصه بسرعة في دفعة وحدة. فترقبوا رأي مفصل أكثر في وقتٍ ما من 2024…
فهذه الخرابيط الي قاعد ألعبها بنهاية السنة، ومو هي الوحيدة، ففي مثلاً Otaku no Seiza: An Adventure in the Otaku Galaxy، لعبة يابانية من 91 نزلت على فاميكوم، وقاعد ألعب ترجمة مو رسمية لها. هي لعبة JRPG بنظام Dragon Quest، بس مستوى الصعوبة والتقدم فيها حده مضروب، والـ Random Encounter حده خربان. من فترة طويلة وأنا العبها بس ما خلصتها، ولا أتوقع بخلصها. وما أنصح تجربونها، ولا عليكم من الاسم، مافيها شي Otaku. وقصة اللعبة كلش ما أتوقع انها تمشي لو نزلت في 2023. وعموماً قاعد أجرب ألعاب وايد على جهاز Mister بشكل عشوائي ومافي شي ريترو محدد في بالي. فما بطول عليكم الكلام عن هالألعاب.
وبنهاية الحلقة أحب أشكركم على الاستماع للبودكاست، سواءً الي بدأوا يسمعون من 2022، أو الأشخاص الي عرفوا عن البودكاست خلال 2023، أو للي هذه أول حلقة يسمعونها. أتمنى انكم تستمتعون بالمحتوى الي أقدمه، واذا كنتوا مستمعين جدد، فشيكوا الحلقات القديمة ففي ألعاب منوعة أتكلم عنها يمكن نزلت قبل ما تبدأون تسمعون البودكاست. أعطوا الحلقة فرصة انها تمتعكم حتى لو كان اسم اللعبة في العنوان غريب. وأيضاً، لو كلش تعجبكم الحلقات وتبون تدعموني بشكل مباشر فعندي صفحة باتريون نادراً ما أتكلم عنها، وأي دعم مادي مهما كان بسيط راح يضيف شيء للبودكاست في المستقبل، والرابط موجود في الوصف ويا باقي الروابط. وفي مقالات على موقع قيمرز يونايتد من الزميل عبدالقادر يشرح فيها ألعاب مختلفة عن الي انا أتكلم عنها ومكتوبة بتفاصيل دقيقة لكل جوانب اللعبة، فعندكم مقال شرح لتفاصيل ريميك Persona 3 كتب عن الأشياء الي كشفوا عنها في العروض، بحط لكم هالرابط بعد في الوصف. واخيراً، أتمنى سنة 2024 تكون سنة خير على الجميع يا رب، وعادةً ما أتطرق لشيء خارج الألعاب لكن لا تنسوا شعب فلسطين من الدعاء، احنا داخلين في سنة جديدة وأغلب شعب فلسطين فاقد لأهله وأطفاله وبيته ومعيشته، فساهموا باللي تقدرون عليه لهم.
