باخذكم اليوم في رحلة سريعة لأيام قبل ما يكون عندنا انترنت في البيت، أو بالأحرى ما كان اتصال دائم وكان Dial-Up ببطاقة مسبقة الدفع. فبين سنة 2000 إلى 2002 ما كنا نقدر ندخل ونبحث عن أي لعبة ونحصل معلومات عنها، وكان عندي لعبة بلايستيشن 1 اشتريتها من محل كان عنده ألعاب يابانية وغريبة وطبعاً منسوخة. الي من البحرين يمكن يتذكر محل ” أصالة ” على شارع جدعلي في مدينة عيسى. هاللعبة الي بتكلم عنها خذيتها من هالمحل وفترة طويلة ما كنت أعرف حتى اسمها، وبعد فترة ما كان يشتغل الديسك فما كنت أقدر حتى أنى ألعبها… لحد سنة 2010 أو 2011 لما بدأت أرجع حق ألعاب بلايستيشن 1 وشفت الديسك وعرفت الاسم وقدرت أحصلها على الانترنت. يمكن بسبب غرابة الجو حول اللعبة ولأني ماكنت أعرف عنها شي غير الاشياء الي لعبتها وشفتها، كان دائماً عندي اهتمام فيها. بالنسبة لي جو الغموض عن اللعبة، الي ماكنت أشوف أحد من أصدقائي يلعبها في وقتها، خلاها تكون هاللعبة المميزة الي أتذكر انها كانت ممتعة بسبب اقتباسات صغيرة من ذاكرتي. رجعت ولعبت اللعبة أكثر من مرة من بعد سنة 2011 وهالفترة كنت ألعبها، وبعد هالمقدمة ببدأ أعرفكم عليها وليش جِذبَت انتباهي وقتها وللحين استمتع بإعادة لعبها.
Gear Fighter Dendoh نزلت في بداية سنة 2001، وهي لعبة مقتبسة من أنمي بنفس الأسم لكن ما أعرف عنه شيء وماكنت أعرف انها لعبة أنمي اساساً. اللعبة نزلت على بلايستيشن 1 بعد مانزل جهاز بلايستيشن 2 ويمكن يفسر سبب أن محد من أصدقائي لعبها، لأن أغلب الي أعرفهم أشترى بلايستيشن 2، والجزء الأكبر ما كانوا يلعبون. ما كان عندي جهاز PS2 في هالفترة فكنت للحين أشتري ألعاب PS1 الجديدة الي تنزل وهذه من ضمنها. اللعبة فيها شخصيات أنمي وأنت تلعب بروبوت ضخم وتصميمه حلو، اللعبة تصنيفها Beat em up لكنها 2D ثنائية أبعاد ويمكن يكون هذا سبب ثاني أن محد أعرفه لعبها، النظرة لألعاب 2D وقتها كان أنها تجارب أضعف وأبسط خصوصاً ان على PS1 في ألعاب Beat em up ثلاثية أبعاد انشهرت عندنا وايد وكنا نحبها مثل Fighting Force الي للحين البعض يسميها قتال الشوارع أو حرب الشوارع، ولعبة Crisis Beat مثلاً ويمكن أصنف لعبة Jackie Chan في فئتها. ففي لعبة Gear Fighter Dendoh أول ما تبدأها أنت في مرحلة تمشي فيها من اليسار لليمين وتتحكم في روبوت ضخم وتقتل الأعداء، لكن الروبوت نفسه والأعداء والخلفيات كلها 2D مافي شيء 3D فثلاً ما كانت شخصيتك 3D والخلفيات مرسومة 2D. كانت أقرب أنها صورة للروبوت على خلفية تقريباً تشبه Mega Man 8 بس ماعرف إذا نفس التقنية أو لا، لأنها كانت أقبح. فكان مظهر اللعبة غريب شوي وفي سنة 2001 قبيح، يعني لا هي بأسلوب البكسل مثل Castlevania: Symphony of the Night ولا رسمها حلو مثل Mega Man 8.
نظام الـ Beat em up فيه شوية عمق، فمثلاً الروبوت عنده ضربات بزر مربع بس. لكن لما تقفز وتضغط الزر يكون في حركة تشبه الـ Dive Kick وتضرب أكثر من مرة، وعلى الأرض إذا كنت قريب من العدو وتضغط مربع تقدر تشيله وترميه مثل باقي الألعاب من هالنوع. لكن كان فيها حركات مثل ستريت فايتر فلما تضغط ربع دائرة بالأسهم ومربع عندك ضربة كهربائية، واذا تسوي حركة Dragon Punch فعند الروبوت ضربة Anti-Air. والمرحلة مثل ماقلت انها من اليسار لليمين وتصميمها بسيط جداً مافيها تفرُع كافي، لكن يختلف نوع الأعداء على حسب المراحل. وبنهاية المرحلة تواجه الزعيم وهو روبوت ثاني ضخم وعنده حركات مختلفة كأنك تواجه زعماء Mega Man لكن أبسط. يمكن هذا وصف اللعبة أن كل شيء تبغيه من هالنوع من الألعاب موجود ولكن ببساطة، فاللعبة تتعمق تعطيك تنوع ولكنه مو تعمق كافي.
لكن بنجي لنقطة الحين وهي الي ميزت اللعبة بالنسبة لي وقتها، ولحد الحين أشوفها فكرة حلوة. بعد ما تهزم زعيم المرحلة يطلع لك زعيم ثاني وهو موجود في نهاية كل مرحلة لأنه الشرير الرئيسي. لكن في كل مرحلة يطلع فيها يكون عنده سلاح مختلف على حسب شعار المرحلة، مثلاً في شعار الحصان والثعبان وأسد، وضرباته تتغير ويا كل سلاح يكون عنده. وهني اللعبة فجأة تتحول 3D كامل! الروبوت الي انت تستخدمه يكبر وياخذ مساحة نص الشاشة على جهة اليسار، والشرير يأخذ نص الشاشة اليمين وحجمه كبير، وهني تتحول اللعبة إلى لعبة قتال 3D! تتغير اللعبة تماماً لو أراويكم مقطع فيديو من الأسلوبين بتقولون لعبتين مختلفتين. بس التحكم ثقيل شوي في القتال، ماعندك أزرار كفاية، حتى ان القفز بزر X مثل في الطور الرئيسي، وتقدر تستخدم مربع للحركات لكنها حركات مختلفة تماماً عن الي كانت عندك في المرحلة العادية، لكنها تستخدم نفس الطريقة بالأزرار. فهذا الجانب عجبني وقتها أن في أسلوب لعبتين في هذه اللعبة، ولما تقضي على الشرير تحصل سلاحه والمرة الي بعدها لما تواجهه تقدر تختار السلاح وتصير ضرباتك مختلفة، نفس فكرة Mega Man لكن لو تطبقها في لعبة قتال. والشيء الحلو أن من قائمة اللعبة الرئيسية تقدر تختار هذا الطور الإضافي وتلعب ضد صديقك بأسلوب القتال، ولما تفتح الأسلحة والمراحل من الطور الرئيسي تقدر تختارهم في هذا الطور الإضافي. وهذا كان ولازال شيء حلو في اللعبة بالنسبة لي.
لكن سَبَق وقلت إن اللعبة عيبها أنها تتعمق بالأساليب والعناصر لكنها ما تتعمق كفاية عشان تطلعها بأفضل صورة، خصوصاً لما ألعبها هذه الأيام. أبغي أشوف لعبة جديدة تتبنى هذا الأسلوب وتصير أعمق في الجانبين، عنصر الـ Beat em up يتطور من ناحية تصميم المراحل والاستكشاف. وعنصر الـ Fighting Versus يتطور عشان يقدم لعبة قتال متقنة أكثر، وتشبه ألعاب القتال الي متعودين نشوفها في ألعاب الأنمي. وتظل فكرة هزيمة الزعيم عشان تفتح شخصيات جديدة بحركاتها، تنضاف لعنصر القتال في الطور المنفصل. وحالياً تعرفون شنو اللعبة الي ممكن تقدم هالشيء قريباً؟ Street Fighter 6. لأن من الي شفناه من عروض طور القصة، يوحي بأن فيها جانب لعبة مغامرات تستخدم شخصيتك عشان تتعلم حركات من الشخصيات الرئيسية في ستريت فايتر، وزيادة عليها جانب استكشاف وBeat em up. لكن مثل مانعرف ان Street Fighter هي لعبة قتال بالأساس وهو الجانب الرئيسي من اللعبة. فبنهاية هذه الحلقة تعرفون ان Gear Fighter Dendoh بالنسبة لي، قدمت خليط جديد بين نوعين من الألعاب الي أحبهم، وهذا أكبر جزء يخليني اتذكرها بعد كل هالسنين ومازلت أستمتع بلعبها إلى يومنا هذا.
إذا تعرفون عن أي ألعاب Beat em up قديمة أو حديثة تدمج هالأسلوبين مع بعض، أكتبوا لي أسمها عشان ألعبها مستقبلاً
