السلام عليكم ويا هلا في حلقة جديدة من بودكاست خفايف ألعاب. وياكم علي الساهي الي ماله مزاج للألعاب في هذه الأسابيع وقاعد يسجل حلقة لبودكاست يتكلم عن الألعاب. بس هذا أفضل وقت نناقش فيه مسألة الـ Burn out من الألعاب الي يصيدنا في بعض الأحيان. فحتى لو كنت شخص مايقدر يستغني عن الألعاب وهي جزء من يومك، ومصدرك الأساسي للترفيه، ففي فترات بتحس فيها ان مزاجك مو جاهز عشان تلعب شي، حتى لو عندك مجموعة كبيرة من الألعاب الي تبي تخلصها أو تجربها. طبعاً هالشي طبيعي ويصير لنا كلنا ونحتاج فترة استراحة قبل ما نرجع نسوي الشي الي نحبه. ويمكن لاحظتون في آخر حلقتين ان وحدة منها كانت عن موضوع ليش ألعب الألعاب القديمة والحلقة الي بعدها كانت لتجربة بسيطة وهي لعبة Frogun، وماتكلمت عنها بالعمق الي عادةً اتطرق له. والسبب اني هالفترة مو في مزاج لعب او حتى بدء تجارب كبيرة، مع اني خلال أول شهرين من هالسنة لعبت أكثر من 10 ألعاب وتكلمت عن بعضها في حلقات البودكاست، وبعضها كتبت لها تقييم على الموقع، وبعضها تكلمت عنها في بودكاست جرعة إضافية لما كنت ضيف ويا عصام، وبعضها الي ماعندي شي أقوله عنها ومجرد لعبتها وكملتها لأني كنت أبي ألعبها.
وطبعاً هذا بالنسبة لسنة 2023 بس، وعشان هالسبب أحس اني أحتاج فترة راحة من الألعاب، أو حتى اذا قاعد ألعب فكلها تجارب بسيطة ما أتعمق فيها. فمثلاً قعدت ألعب شوي من لعبة Astro Boy على Gameboy Advance وشوي من بداية لعبة Forspoken، و Tetris على القيم بوي. لكن غير هذا فكل شي اجربه عبارة عن ألعاب Gameboy أجربها لدقايق قبل ما اصكها وأروح أسوي شي ثاني. فأكيد ان التشبع من كمية الألعاب الي لعبتها سبب، لكن السبب الأول والأهم هو اني خلال الفترة الماضية كنت مُهمِل لبعض الجوانب الثانية من حياتي والي محتاج لها هالفترة أكثر من الألعاب. فصح اننا نحلم يكون عندنا وقت لا نهائي عشان نقعد في البيت ونلعب كل شي نبيه وأكثر، ونقضي 15 ساعة في اليوم على الألعاب، إلا اننا نحتاج للأشياء الثانية في حياتنا. ومثل ما أقول في الحلقات السابقة ان التنوع مهم في نوعية الألعاب الي تلعبها عشان لا تتملل من التجارب المتوفرة، و التنويع في الأنشطة الي تسويها مهم عشان لا تتشبع من شيء معين.
بالنسبة لي أخذ راحة من الألعاب شي مهم اني اسويه بين الفترة والثانية. لأني لما أكون في مزاج لعب فأقضي أيام أو أسابيع أو حتى أشهر بدون ما أسوي شي جانبي ثاني غير الألعاب. وهذه الفترة أبي اني اطلع وأشوف مسلسلات أو أفلام فاتتني، واقرأ بعض الكُتُب الموجودة عندي. ووقت الراحة مناسب حالياً لأن الي ما يعرف فأنا أحب أتابع بطولة سباقات فورملا 1، وهذا الأسبوع راح يبدأ موسم 2023 ويا أول سباق في البحرين، وعادةً أنا اتابع الأيام الثلاث للسباق، يعني حتى فترة التجارب والتصفيات فوق السباق نفسه. اشتقت الصراحة للسباقات فحلو انها رجعت اخيراً وصادفت انها تكون بنفس الفترة الي احس روحي متشبع من الألعاب شوي.
أكيد ان في ألعاب وايد أبي ألعبها، لكن فترة الراحة منها ضرورية. واذا ما رجع لي المزاج للعب للأسبوع الجاي، فيمكن ما تكون في حلقة للبودكاست ببساطة لأني ما جربت شي جديد. وخلال هالفترة تابعوني على تويتر لأني بنشر مقالات كتبتها خلال السنوات الماضية عن الألعاب، وفرصة حق مستمعين البودكاست انهم يتعرفون على محتواي القديم قبل ما ابدأ بتسجيل البودكاست. فإذا تبون شي اسبوعي فتابعوني على تويتر لأني بحط المقالات لكم. ولكن مثل ماقلت، اني ما زلت ألعب بعض التجارب الخفيفة فيمكن تكون حلقات تجمع أكثر من لعبة واتكلم عن كل وحدة منها بشكل بسيط جداً وبدون تعمق، فاذا تبون هالشي خبروني.
هالحلقة غريبة شوي، لأنها نص موضوع عن مسألة التشبع من الألعاب والنص الثاني تحديث للي قاعد يصير وياي هالأيام. وشكراً لكم على الاستماع. كان وياكم علي الساهي ومع السلامة.
