السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وخلونا نبدأ في الألعاب مباشرة بما اني بتكلم عن لعبتين ومابي الحلقة تكون طويلة. وأعتذر عن صوتي لأني أسجل وأنا مريض، والصراحة ماعرف شلون بيطلع الصوت. المهم اللعبتين مافي شي يجمعهم الصراحة.
اللعبة الأولى هي حزمة اسمها Visco Collection، وتجمع ألعاب آركيد من التسعينات من تطوير شركة ألعاب اسمها Visco. الشركة نفسها مو معروفة، والصراحة أول مرة سمعت عنها كانت ويا ألعاب القتال الي سووها: Breakers والجزء المطور منها Breakers Revenge.
أغلب ألعاب Visco كانت للآركيد واذا كان في نسخ منزلية فكانت حصرية على Neo Geo، بما ان النيو جيو جهاز آركيد منزلي. لعبت Breakers Collection الي نزلت في بداية 2023 لأن توفر لي كود من الناشر QUByte Games، بس ما تكلمت عنها لأن ماكان في شي وايد أقوله، سوى انها لعبة قتال آركيدية طلعت من بعد اشتهار Street Fighter II لما كل الشركات كانت تفكر انها تطلع لعبة مشابهة، عشان تستفيد من الشعبية والمبالغ الخيالية الي كانت تحصلها مكينة ستريت فايتر 2 وقتها. واللعبة نفسها تحكمها يشبه ستريت فايتر وفيها شخصيات مختلفة وتصاميمهم حلوة لا بأس فيها، وعندكم الأنواع الي نعرفها للشخصيات الـ Grapplers والـ Zoners. وبالنسبة لي تفاصيل تصاميم الخلفيات كانت حلوة. وحتى في شخصية عربية، اسمه ماهر لابس غترة وسروال وضرباته كلها حريقة؛ بما ان تعرفون العرب والبترول. فهذه الحزمة كانت جيدة بالنسبة لي واذا كنتون اشخاص يحبون ألعاب القتال وتلعبونها ويا ربعكم، فبرنامج انكم تشغلون اللعبة وتجربونها. لكن ما أنصح فيها اذا ماعندك احد تلعب وياه، لأنه مافيها غير طور الآركيد وبتتملل بسرعة اذا ماعندك احد تلعب ضده. ورأيي على الحزمة انه حلو إرجاع هذه الألعاب الي يمكن الأغلب ما عمره سمع عنها وتصير تتوفر على الأجهزة الجديدة بشكل رسمي، وتعرفون رأيي بخصوص هذه الأشياء لأني أحبها. المهم، تكلمت لكم عن هالحزمة وانا مخطط على لعبتين غيرها، فيلا بتحصلون كلام عن 3 ألعاب في حلقة وحدة.
حزمة Visco Collection تجمع ألعاب ثانية طوروها الشركة للآركيد، لكن للأسف مو كل ألعابهم، وهذا شي ما فهمته الصراحة. بما ان QU Byte Games عندهم حقوق ألعاب Visco كلها على ما يبدو، أو المطور Pixel Heart هو الي يملك الحقوق، ليش ما يخلونها كلها في حزمة وحدة. كنت أفهم فصل Breakers عنها بما انها لعبة قتال وفي أشخاص مهتمين فيها بروحها. لكن ألعابهم الباقية مثل الي موجودة في هذه الحزمة تشمل لعبة سيارات ولعبة كرة قدم وألعاب شوتر وبلاتفورمر. فكنت أُفضل لو انهم جمعوا كل ألعاب شركة Visco وتكون الحزمة بمثابة توثيق لكل ألعابهم بدل من اختيار ألعاب محددة وعشوائية. يمكن السبب ان المحاكاة حالياً شغالة لهذه الألعاب الي تستخدم Hardware معين، وباقي ألعابهم على Hardware ثاني ومايدعمه المحاكي الي عندهم حالياً. في هذه الحالة أفهم السبب، لكن هذا الكلام من عندي ومو أكيد.
الحزمة فيها 7 ألعاب منوعة بتصنيفها، وأنا كنت مهتم أجرب 3 منها على الأقل. لـتصنيف Action Platformers ففي لعبة Ganryu الي كأنها أي لعبة نينجا في التسعينات، خصوصاً لعبة Shinobi من سيجا. وعندك طريقتين حق القتال، بالسيف وبسلسلة طويلة. والمراحل أفقية على شوي جانب عمودي تصعد على البيوت وتفتح صناديق تحصل منها نقاط وطاقات، وفي نهايتها زعيم كبير. اللعبة جيدة حق الي يحب ألعاب الأكشن على السوبر نينتيندو والسيغا، فهذه مشابهة لنوعية هذه الألعاب باللي تقدمه، لكن على الأغلب شيء جديد بالنسبة لكم. بس القهر ان في جزء ثاني لهذه اللعبة، وأصدروه قبل فترة كإصدار منفصل وما ضافوه في هذه الحزمة.
ونفس الكلام بالنسبة للعبة الشوتر Andro Dunos، ففي جزء ثاني منها ونزل بروحه، لكن اكتفوا يخلون الجزء الأول في هذه الحزمة. طبعاً الي اقصده بلعبة شوتر انها Shmup أو بالتحديد Horizontal Shooter. يعني الكاميرا من الجنب مثل لعبة Garadius ومو Top Down مثل لعبة كابكوم 1942. أنا مو فان لألعاب الـ Shmup بشكل عام، ما أحبها وايد فتمللت بسرعة وأنا ألعب Andro Dunos. بس توقعوا الأشياء الموجودة في ألعاب الـ Shmups، ففي أنواع مختلفة من الأسلحة والحلو في هاللعبة انك ما تحتاج تجمعها أو تختار بينها، لأن تقدر تبدل بينها في أي وقت. والي تجمعه في المرحلة عبارة عن تطويرات لهذا السلاح الرئيسي وأسلحة جانبية مثل صواريخ أو ليزر يطلق باتجاهات مختلفة. والصراحة ماعرف ليش ما حطوا الجزء الثاني.
أما اللعبة الي كنت فعلاً مهتم فيها هي Neo Drift Out، لعبة سيارات آركيدية، او بالتحديد لعبة رالي. فيها 3 سيارات من أساطير الرالي الي هي Toyota Celica و Mitsubishi Lancer و Subaru Impreza، وفيها 5 مراحل، أو هذا آخر شي وصلت له وأنا ألعب يمكن في أكثر. فيها حلبات الغابة والصحراء وفي الي على الثلج. منظور اللعبة صاير علوي على جانبي، والتحدي الحلو في هذه الألعاب بالنسبة لي أنها تحديات Time Trial لازم تخلص الـ Course في وقت محدد، وفيها Checkpoint في الوسط يزيد لك الوقت. أحب هذه الألعاب بالرغم من انها بسيطة، لأن بالنسبة لي ممتع اني أعيد الـ Course أكثر من مرة ويصير التركيز مسألة حفظ للانعطافات، فتبدأ أول شي تكون المنعطفات واسعة وتقدر تلف فيها بسرعة معقولة. لكن ويا المراحل تبدأ الانعطافات تزيد وتكون حادة أكثر فتحتاج تفنن في التحكم، ومرحلة الثلج مثلاً تسوق فيها على الجليد الي يخليك تزلق فتحتاج تحكم أفضل في السيارة. فلو تسألوني بقولكم ان الحزمة تستاهل بس عشان هذه اللعبة.
وعلى السريع فباقي الألعاب عندك Bang Bead و Flip Shot لعبتين كأنها Windjammers. تختار من بين شخصيات وترمي الصحن ولازم تسجل هدف على الخصم أو تكسر الأعداء على طرف الشاشة. و لعبة Captain Tomaday تلعب فيها بطماط يسوق طيارة، وهي لعبة Shmup لكن هالمرة Top Down و Cute em up وعندك تحكم منفصل للأيد اليمين وللأيد اليسار في الضربات. وأخيراً Goal! Goal! Goal! من اسمها يعني، لعبة كرة قدم تشبه ألعاب SNK الي نزلت للآركيد بنفس الفترة لكنها أقل جودة من ناحية الأنيميشن واللعب بشكل عام. وفيها منتخب السعودية.
وعلى طاري ألعاب كرة القدم من SNK فمعلومة بسيطة يمكن ماكنتوا تعرفونها، لعبة The Ultimate 11 نزلت في الآركيد في 96 وصح فيها منتخب البحرين، حتى فيفا ماتخلينا في ألعابها وايد. المهم مو هذه المعلومة. هذه اللعبة كانت تدعم اللغة العربية في أجهزة الآركيد، فلما تغير الـ Dip Switches على البورد نفسه، تقدر تغير كل النصوص للعربي. جربت اللعبة على جهاز Mister وفيه خيار تغيير الـ Dip Switches فحطيتها بالعربي، فتعتبر SNK من أوائل اذا مو أول شركة تعدم اللغة العربية بشكل رسمي في لعبة. ماعرف الصراحة عن النسخة الرقمية الي موجودة من Arcade Archives اذا فيها هذه الخيارات أو لا.
فيعني هذه حزمة Visco باختصار، فيها ألعاب غريبة ومنسية، وتستاهل تجربة فقط اذا مهتمين بالألعاب القديمة. وكحزمة فكانت تحتاج شغل أكثر فمثلاً مافي أي أشياء إضافية مثل معلومات عن اللعبة، أو Concept Art مثل الي تحطها كابكوم في حزم الآركيد، ولا في طريقة تقديم حلوة. هي الألعاب موجودة وتختارها من قائمة رئيسية تعرض اللوقو وشاشة اللعب، لكن هذا أقل مجهود يمكن تحطه في حزمة من هذا النوع. محاكاة الألعاب نفسها تشتغل بطريقة صحيحة فمن جانب اللعب ماعليها كلام، لكن من جانب طريقة التقديم والألعاب المحطوطة في الحزمة فكانت تحتاج شغل أكثر. يعني مثلاً الأجزاء الثانية من الألعاب الموجودة في هذه الحزمة نزلت بشكل منفصل، وانا أشوف المفروض تكون موجودة في حزمة وحدة ومرتبة بشكل أفضل.
ننتقل للعبة الثانية الي بتكلم عنها اليوم وهي Calico. محاكي مقهى القطط. أو تصنيفها Life Simulation Game على طريقة Animal Crossing مثلاً. تعرفون أحياناً ما يكون مزاجكم جاهز للعبة كبيرة لكن تبون تلعبون شي خفيف، هذا الي صار. اللعبة وفرها الناشر Whitethorn Games بعدما طلبتها منهم، لأن شفت في الفترة الماضية وايد ألعاب تدير فيه مقهى قطط، واتوقع الإعلانات أثرت فيني لأني صرت أبي أجرب واحد منها. ماعرف اذا كان اختياري لهذه اللعبة صح، ولا في لعبة ثانية تقدم الفكرة بطريقة أفضل. لكن خلونا نتكلم عن تجربتي.
Calico من النظرة الأولى بالنسبة لي كانت تحتاج توجه فني مختلف. ما بقول ان الـ 3D قبيح وايد، لكن… أي قبيح شوي. والنظرة الأولية مهمة حق تعطيك انطباع إيجابي أكيد. وبالنسبة لي كان انطباعي انها لعبة مصممينها على محرك Unity قبل ما ألاحظ أي شيء ثاني. وخصوصاً ان في المقطع السينمائي الأول في مقدمة اللعبة يصير clipping بين الكاميرا المتحركة وبين تضاريس العالم والأشجار. حتى طريقة الانتقال في القوائم ما أحسها مضبوطة خصوصاً ان أول شي تسويه في اللعبة انك تصمم شخصيتك وكان التنقل بين الخيارات مُتعب ومو منسق بطريقة حلوة.
اللعبة نفسها هدفها انها تريحك نفسياً وتخليك تلعب بشي خفيف بدون ضغوطات. تنتقل لقرية صغيرة وتدير مقهى كجزء من القيمبلاي، فتحط الأثاث بأماكن مختلفة وتختار الألوان والتصاميم. والجزء الثاني من القيمبلاي حق صناعة الكيك والحلويات والقهوة عشان تبيعها في المقهى وتحصل فلوس تشتري فيها الأثاث. والجزء الثالث من القيمبلاي الاستكشاف واكمال مهمات بسيطة لسكان القرية. والجزء الرابع من القيمبلاي تحصل القطط والحيوانات الأليفة الثانية وتجيبها عندك في المقهى. فبمر على هذه الجوانب بشكل بسيط عشان أشرح تجربتي.
الجزئية الأولى المتعلقة بالمقهى تشبه تنسيق البيوت في Animal Crossing، لكن ينقصها شي وهو انه مافي Grid Lock أو شبكة مربعة عشان تثبت الأثاث الي تختاره في مكان معين. من ناحية فهذا شي حلو لأن عندك حرية أكثر بأنك تختار المكان المناسب وبأي ترتيب تبيه للطاولات والكراسي والسجاد وغيره. لكن من ناحية ثانية فتقدر تحط جزء من الأثاث داخل الجدار ويصير Clipping، لأن مافي Grid يحدد مكان التصاق الأثاث بالجدار. وتعتبر هذه الجزئية بسيطة أكثر من الي توقعته خصوصاً بأنها تركيز أساسي للعب. فمثلاً ما تقدر توسع مساحة المقهى فمحدود بالمكان الي تبدأ فيه.
نفس الشيء بالنسبة لجزئية تجميع القطط عشان تخليهم في المقهى، توقعت اني بكون في المقهى وقت أطول من اليوم، وأديره وأتعامل ويا الزبائن وأشوفهم يلعبون ويا القطط. لكن اجمالاً الوقت الي بتكون فيه داخل المقهى وتديره، وتعاملك ويا الحيوانات الأليفة أقل من الي توقعته. فماتقدر تسوي وياهم شي إضافي غير انك تخليهم يلحقونك على الجزيرة، أو تشيلهم وتلعب وياهم بشكل بسيط جداً. فماتقدر مثلاً تحط لهم ألعاب على الأرض وتشوفهم يتسلون، ولا تقدر تحدد مكان لهم عشان ياكلون أو تحط لهم أنواع أكل محدد، أو انك تحدد وقت لزبائن المقهى يلعبون وياهم ويعطونهم أكل. وعندك حديقة خارج المقهى فكان حلو لو استغلوا هذه المساحة بانك تضيف مكان خارجي للعب بالحيوانات وتوسعة للمقهى بشكل عام.
جزء صناعة الكيك ممتع، ومنوع من ناحية انه يوفر ميني قيمز وانت تصنع الحلوى. فتصير شخصيتك صغيرة في المطبخ وتروح تجيب المقادير للوصفات الي تشتريها وتخلطها ويا بعض، وفي ميني قيمز حق فرد العجين، وطبخه في الفرن وتشكيله أو تخلي الـ Glazing، وأشياء تخليك تبي تطلب دونت عشان تاكله وانت تلعب. وهذه الجزء من اللعبة خفيف وكيوت، وعجبني الي سووه. أحس المحتوى المتوفر والمخصص حق هذه الجزئية أفضل من آخر نقطتين تكلمت عنهم. وبعد ما تخلص صناعة الكيك والحلويات فتعرضهم في المقهى للبيع وتشوف الزبائن يجون يشترونها حتى لما انت تكون برة المقهى وتسوي Quests.
وهذا يوصلني لآخر جزء من اللعبة وهو انك تسوي quests للشخصيات الثانية، تساعدهم بالاستكشاف وفتح أماكن جديدة، توصل طلبات وتحصل منهم شي في المقابل يساعدك في المقهى، أو تفتح أثاث وملابس وتصاميم جديدة تستخدمها في تزيين المقهى. وهذا أكبر جزء من التقدم في اللعبة، يخليك تكتشف الجزيرة وتكلم الشخصيات، فتقضي أغلب اليوم بعيد عن المقهى وانت تؤدي هالمهمات.
وهذا القيمبلاي لووب في Calico. تسوي مهمات بسيطة لسكان القرية السحرية. تحصل خيارات جديدة للتزيين، وتحصل فلوس تشتري فيها من المحلات أثاث جديد للمقهى. وبعدها ترجع المقهى تزينه وترتبه وتحط الحيوانات الي حصلتها في البرية، وتدخل المطبخ وتصنع الكيك والحلويات عشان تبيعه في المقهى وتحصل فلوس.
يعني مثل ماقلت بالبداية، انها لعبة خفيفة تلعبها على هدوء ومناسبة حق الي يحبون الأشياء الكيوت. أنا لعبتها على بلايستيشن 5، لكن أشوفها مناسبة أكثر على السويتش. شخصياً كنت أتمنى تركيز أكثر على جانب تزيين المقهى وحتى تكبير حجمه عشان تقدر تشتري أثاث أكثر وتزين أكثر، وحتى التفاعل ويا الحيوانات الأليفة يكون له جانب أكبر من الي موجود… ما أطلب إضافات كبيرة، بل يكون بنفس مستوى أجزاء الطبخ مثلاً بتفاعل وميني قيمز وحركات خفيفة.
فتجربتي حق Calico كانت من فضول لتجربة هذا النوع من الألعاب، ذكرتني شوي بلعبة اسمها Community Pom على بلايستيشن 1 وكانت حصرية يابانية، لكن ذيك اللعبة فيها عناصر اكشن RPG ودانجنز مثل ألعاب زيلدا الـ 2D، فتمنيت هذه اللعبة تكون مثلها ببعض الجوانب. والله يبيلي أرجع ألعب Community Pom لأن ماكملتها، ويمكن آخر مرة لعبتها 3 او 4 ساعات بس.
وهذا كل شي عن تجربتي Calico وحتى Visco Collection. وأتمنى انكم استمتعتم بالحلقة ويا لعبتين مالهم علاقة ببعض. وهذه حلقة اليوم. كان وياكم علي الساهي، ومع السلامة.
