السلام عليكم. وياكم علي الساهي في حلقة جديدة من بودكاست خفايف ألعاب، بكلمكم فيها عن لعبة كملتها قبل كم شهر و ماكنت ناوي أتكلم عنها. لكن بسبب الظروف وجدولي الضيق شوي هالأيام، ماقدرت ألعب الأشياء الي كنت مخطط أتكلم عنها في الحلقات الثلاث القادمة، فتغيير بسيط عن الجدول الي حددته لروحي. وبكلمكم عن لعبة The Angry Video Game Nerd I&II Deluxe.
السبب الي خلاني ما أخطط أتكلم عنها؛ لأنها لعبة موجهة لجمهور محدود جداً وشخصياً ما أحس انها بتعجب اللاعبين خارج هذه الدائرة. فهي موجهة للأشخاص الي كانوا يتابعون فيديوات Angry Video Game Nerd زائد اللاعبين الي يحبون ألعاب الريترو الصعبة والـ Cheap وUnfair في بعض الأحيان. فدائرة الي يبون يجربون هذه اللعبة صغيرة وايد وصعب انك تقنع أي شخص يلعبها كلعبة منفصلة بدون التعلق بالشيئين الي ذكرتهم.
حق الي ما يعرفون الـ Angry Video Game Nerd. على السريع، هو شخص يسوي فيديوات ريفيوز للألعاب القديمة من قبل ما يكون في منصة اسمها YouTube من 2004، وأنا بدأت أتابعه تقريباً في 2010 و 2011. وفيديواته كوميدية وترفيهية أكثر من انها تكون ريفيوز تقرر منها مستوى اللعبة، وكان حلو في ذيك الفترة لأنه ما كان في أشخاص وايد يتكلمون عن ألعاب الريترو الي كنا نتذكرها، مثل ما هو الوضع حالياً على اليوتيوب، فكان شي مختلف. وأتذكر انه خلال الفترة الي كنت أتابعه فيها كانوا شغالين على لعبة بتنزل لـ بسميه مسلسلهم وكانت بتنزل في 2013 على الـ PC. وأنا من وقتها وكنت أبي ألعبها، بس ماكنت شخص أحب ألعب على الـ PC فماشريت اللعبة وقتها. لكن لعبة AVGN Adventures نزلت بعدها على الـ Consoles بس شخصياً ماكنت مهتم فيها لأنه قل اهتمامي بـ AVGN بشكل عام، وحتى انه نزل جزء ثاني بعدها، ومالعبتهم لحد الحين.
فمن فترة لما Limited Run Games قرروا يصدرون اللعبتين على ديسك حق PS4 فقررت اني اخذ اللعبة. وحتى انها بأغلب الأوقات متوفرة بسعر رخيص وايد على المتجر الرقمي وخذيتها رقمية بعد. وتعرفون ليش؟ ماعرف سبب ان ليش الحنين للماضي غريب بهذه الطريقة. لكن لما أشوف الحلقات القديمة من AVGN أحن للمسلسل، الي اصلاً تابعته في 2010 لأنه كان يخليني أحن للألعاب الي كنت ألعبها في التسعينات. وشكله بعد 10 سنوات من الحين إذا الله أحيانا، بكون أحن لهذه اللعبة الي خلتني احن للمسلسل الي كان عبارة عن نوستالجيا لألعاب الطفولة. فالمهم، انه بعد 10 سنوات من اصدار اللعبة الي كنت ناوي ألعبها في ذيك الفترة، أخيراً قعدت ولعبت وخلصت AVGN Adventures.
اللعبة عبارة عن 2D side-scroller action platformer، لكن بمستوى صعوبة يخليك تنقهر وانت تلعبها. وتخليك تموت في اللعبة بسبب أفخاخ حدها unfair لكنها مو Cheap deaths. لأن أسلوب اللعب يعتمد على انك تموت في المكان وتتعلم تتعامل ويا الفخ او العائق بطريقة تخليك تتفاداها. الصراحة أبي أقول انه هذه Genre منفصلة من الألعاب الي تسوي Troll للاعب. يعني بصنف من ضمنها The Impossible Game و Geometry Dash و Trap Dungeons 2 ويمكن في بعد ألعاب غيرها مو على بالي حالياً. بسميها Troll Platformers او بختصرها Trollformers. فـ AVGN Adventures تعتبر من ضمن هذه الألعاب، وفيها 8 مراحل تقدر تلعبها بأي ترتيب، ومرحلة تاسعة تنفتح لما تكمل كل المراحل.
طريقة تقديم المراحل تعتمد وايد على الـ References حق حلقات AVGN، وبنفس الوقت على الألعاب الي كان يلعبها في هذه الحلقات. وهذا السبب الي خلاني أٌقول ببداية الحلقة اني ما أحس ان اللعبة موجهة للكل، وتقتصر على دائرة صغيرة ومحدودة من اللاعبين. فبحب لو أسمع راي شخص مو مهتم ولا يعرف AVGN ويجرب هذه اللعبة. لأن جزء كبير من الاستمتاع في مراحلها بالنسبة لي كان اني أشوف الشخصيات الي هو صممها في حلقاته، وتصميم المراحل الي مبنية على الأشياء الي هو كان ينتقدها في فيديواته على الألعاب الي كان يلعبها. فصاير تصميم المراحل عبارة عن أسوأ الأشياء الي كان هو يواجهها في الألعاب، والأجزاء الصعبة الي كان يكرهها مجمعة في تصميم مراحل لعبته الي قصتها انه يواجه أسوأ مخاوفه.
لكن بالرغم من ان تصميم المراحل يعتمد على أسوأ الأفكار الي هو يوصفها في الألعاب الي ينتقدها، إلا انها مصممة بطريقة عادلة شوي. فصح انك بتموت وايد، لكن بتحس انك بعد ما تخلص المرحلة مرة وحدة، بتقدر ترجع لها وتلعبها وتخلصها بدون ما تموت حتى. لأن السبب يرجع ان كل شيء في المرحلة يعتمد على الـ Cycle وعلى الـ Pattern. فكل شيء في المرحلة من طريقة حركة الأعداء ومكان الأفخاخ، والمزج بين مكان الأعداء ومكان الأفخاخ والحُفر كله يعتمد على توقيت معين تقدر تتخطى فيه الحاجز. فإذا بتحاول بعشوائية وتلعبها بدون ما تفكر في الـ Patterns فبتكون صعبة وبتحس انها لعبة مستحيلة وحدها Cheap وتقتلك بدون سبب. لكن لما تدرس الـ Patterns فتقدر تخلص أي مرحلة او حتى اللعبة كلها بدون ما تموت. وهذا شي يخليها لعبة ممتازة حق الـ Speedrun؛ مافيها جانب عشوائي لأن كل شي بتوقيت وحركة محددة مسبقاً، فالـ Speedrun بيعتمد على درجة اتقانك وذاكرتك في كل الأوقات عشان تخلص المرحلة بنفس الطريقة كل مرة. ونفس الشي تطبقه على الزعماء بنهاية المرحلة، وتضيف عليها تصميم حلبة مواجهتهم لأنك لازم تتفادى أفخاخ وبنفس الوقت تتحرك من Pattern الـ Boss نفسه. واستمتعت وأنا أفك شفرة طريقة التنقل عشان أخلص المراحل، وفي أماكن لما رجعت ألعب نفس المرحلة حسيت روحي Speedrunner… بس متأكد اني اذا رحت شفت Speedrun للعبة فيسوون أشياء خرافية مافكرت فيها حتى. والله ما أتذكر اني شفت لها Speedrun، يبي لي أدور وأشوف بعد ما أسجل الحلقة.
وصح، سلاحك في اللعبة هو الـ NES Zapper فتقدر تطلق بالمسدس في 5 اتجاهات، وعندك زر قفز وعندك Special تستخدمه لما تحصله في المرحلة. وتقدر تأخذ 3 ضربات قبل ماتموت، وعندك عدد محدود من الـ Lives قبل ما تصير Game Over. المراحل فيها Checkpoints، واذا تموت ترجع للـ Checkpoint لكن لما تصير Game Over فلازم تعيد المرحلة من البداية. لكن مثل ماوصفت قبل شوي انك لما تعرف طريقة تجاوز المرحلة أول مرة فبعدها بتقدر تعيدها بسهولة. وحتى القفز مُتقن وعندك تحكم كامل وهالشي يساعد انه يحدد صعوبة وتحديات اللعبة على مجرد معرفة الـ Pattern والـ Cycle. فما بتموت لأن القفز ماكان متقن، أو لأن السلاح ما ضرب بشكل صح. بل أكثرها بسبب انك سويت شي بتوقيت غلط.
كملت الجزء الأول في 3 ساعات و42 دقيقة ومت 388 مرة. أكثر المرات الي مت فيها كانت في آخر مرحلة على آخر زعيم لأني ما صدت الـ Pattern عدل. واللعبة فيها Collectables في كل مرحلة وبعض المراحل حصلت فيها كل شي، لكن بعضها لازم أرجع لها وأحصل الباقي. الحلو في الـ Collection انه اللعبتين موجودين على الديسك، ولما تخلص كل المراحل من الجزئين فبتحصل شابتر جديد ماكان موجود في اللعبة الأصلية. وتقدر تغير بين الشخصيات وتختلف طريقة السلاح وسرعة الركض وغيره لكل شخصية. للحين ما لعبت الجزء الثاني وبرجع لها وقت ثاني، لكن كحزمة تقدر تحصلها بسعر رخيص فحبيت التجربة ككُل. لكن أعيد كلامي بأني ما بقول للكل انه يروح يلعبها لأنها موجهة لجمهور محدد، وحتى بعض الرسومات والمراحل والكوميديا والنكت فيها جانب بتعرفونه اذا تابعتون حلقات AVGN، وحق الي ما يعرف بكتفي اني أقول تصنيف اللعبة M فلا يغركم مظهرها البكسلي.
وهذا كل شي عن AVGN Adventures الجزء الأول الموجود في الحزمة. وعلى حسب الي شفته فالجزء الثاني فيه أكثر من نفس الموجود في الجزء الأول لكن بمراحل جديدة وشخصيات جديدة. فأتوقع اني بستمتع فيها مثل الجزء الأول. وبرجع شوي حق نقطة الحنين للماضي، يعني كان غريب بالنسبة لي اني اسمع الـ Theme song حق AVGN وأشعر فعلاً ان هذا الشي من الماضي ورجعتني الموسيقى لأيام قبل، مع اني فعلاً ما أحس انه مرت أكثر من 10 سنوات من وأنا أتابع فيديوات AVGN. ما أعتبر نفسي Fan حق AVGN بس كنت استمتع بفيديواته، وحتى للحين يسوي فيديوات بس مثل ماقلت اني مو مهتم بنفس الدرجة، لكن بين الفترة والثانية أرجع وأشوف بعض الفيديوات لما تنزل أو أرجع للفيديوات القديمة. كان محتوى ألعاب الريترو مو موجود وقتها غير النقاشات على المنتديات، فأحس كان له دور بأن ناس أكثر تسوي فيديوات عن الألعاب القديمة، وحتى برنامج Game Center CX الياباني كان من نفس الفترة ويرجع للألعاب القديمة.
وعلى طاري Game Center CX فكان في لعبة نزلت على الـ DS حق البرنامج وتلعب فيها ألعاب مصممة على أفكار الريترو وفيها تحديات صعبة تحاكي شوي البرنامج نفسه. ومن فترة أعلنوا بانداي نامكو انهم بنزلون ريماستر لها على السويتش. لكن لحد الحين أعلنوا بس عن النسخة اليابانية وما أعرف اذا بنزلونها في أوروبا وأمريكا مترجمة أو لا. لكن هذه لعبة مهتم فيها وأبي أجربها لكنها تحتاج ترجمة لأنها RPG شوي. المهم، بنتظر اخبار أكثر عنها مستقبلاً.
وكانت هذه حلقة اليوم. ماتوقعت ان عندي كلام وايد عن هاللعبة، لكن ان شاء الله عجبتكم الحلقة، وبرجع لجدولي وأتمنى أقدر ألعب الألعاب الي مخطط لها خلال هالفترة وأتكلم عنها. المهم خلصت الحلقة. كان وياكم علي الساهي ومع السلامة.
