للاستماع للحلقة
السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وبفتح لكم اليوم أبواب حديقة الديناصورات المُعاد افتتاحها… أو طريقة ثانية عشان أقولكم بتكلم عن حزمة ألعاب كلاسيكية فيها مجموعة من ألعاب Jurassic Park القديمة. هذه الحزمة Special شوي بالنسبة لي.. مو لأني أحب هالألعاب، بالعكس أكره الجزء الأول على كمبيوتر العائلة وما اطيقه من أيام الطفولة (بس هذا موضوع لبعدين)، الحزمة Special لأنها تتعلق بموضوع حلقة سابقة لما تكلمت عن Limited Run Games ومحركهم الجديد Carbon Engine، فهالحزمة تستخدم هالمحرك، فتعطيني نظرة على الأداء وشنو يوفره المُحرك، وأبي أشارك وياكم رأيي عنه بما أني تكلمت عن المحرك سابقاً. طبعاً وايد متحمس لما ينزلون عليه ألعاب Gex و Tomba، بس لحد يكشفون عن تاريخ اطلاق هالألعاب خلونا نمر على حديقة الديناصورات ونشوف.
Jurassic Park Classic Games Collection فيها 7 ألعاب. لعبة من كمبيوتر العائلة أو الـ NES. لعبتين من السيغا جينسيس أو Mega Drive. لعبتين من Game Boy. ولعبتين من سوبر نينتيندو. ما بفصل في الكلام عن كل الألعاب لكن بتكلم عن بعضها بعدين. تركيزي في التجربة كان على أداء محرك الكاربون وشنو يقدر يضيفه للألعاب. من القائمة الرئيسية، طريقة التقديم بسيطة وايد. حاطين شاشة تلفزون على جهة اليسار يعرض فيديو من اللعبة الي تختارها من القائمة إلى على جهة اليمين. القائمة تعرض شعار اللعبة وتحته حاطين نوعها، بس شكلهم ما حصلوا حقوق استخدام اسم نينتيندو، لأن حق نسخ NES و سوبر نينتيندو و Game Boy كاتبين 8-bit و 16-bit و Portable. لكن حق ألعاب الـ Genesis كاتبين تحتها Genesis. شي غريب شوي، فأتوقعها مثلاً لنسخ بلايستيشن و اكس بوكس، لكن أنا ألعب نسخة السويتش، فما أعرف ليش Nintendo ما يسمحون فيها… كيفهم، بس طالع الاسم قبيح و Generic. وحتى اسم اللعبة مو موجود، يعني مكتفين بالشعار، لكن الاسم مو واضح مثل Jurassic Park II The Chaos Continues حق السوبر نينتيندو، مو كاتبين الاسم، ومكتفين ان الاسم يطلع في الشعار. يعني عموماً القائمة الرئيسية حدها بسيطة، تصميمها الشكلي حلو بس بسيط يؤدي المطلوب وبس.
غير عن القائمة الرئيسية ففي إضافة جديدة وهي مكتبة الموسيقى، لما تفتحها تقدر تنتقل بين كل لعبة في الحزمة وتسمع الألحان الي فيها. حلوة هالإضافة انهم ماخذين كل ملفات الصوت وحاطينها في Music Player… أو مو كل ملفات الصوت، فمافي أصوات الضربات أو الديناصورات مثلاً، بس الموسيقى…. وبس، هذه الإضافة الوحيدة الي زيادة على الألعاب نفسها. فما في الكتيب الأصلي حق الألعاب، ولا في تعليمات مكتوبة مأخوذة من الكتيب الأصلي والي تشرح فيها القصة وطريقة اللعب وغيره.. الصراحة أشوف هذه الأشياء ضروري تنحط في مثل هالحزم. يعني احنا نبي نحتفظ بالألعاب وبنفس الوقت نحتفظ بتاريخها، والكتيبات جزء كبير من هذه الألعاب. بعض الألعاب القديمة ما تقدر تلعبها لأنك ماتفهم المطلوب إلا لما تقرأ الكتيب. فعلى الأقل لو مايقدرون يحطون صور من الكتيب لأن عليه اسم Nintendo مثلاً، فيأخذون الكلام ويعيدون كتابته داخل اللعبة. يعني بالنسبة لي، هذه الأشياء الي فعلاً تخليك تعرف مستوى الجودة في حزمة ألعاب كلاسيكية. دائماً أتكلم عن مجهود كابكوم ويا ألعابهم القديمة. حزمة Capcom Beat em Up Collection فيها ألعاب آكريد وحاطين شكثر Concept Art ومعلومات عن الشخصيات لكل لعبة وغيره، تحس انك قاعد تحصل شيء إضافي زيادة على الألعاب.. وبهذه الطريقة انت كلاعب كلاسيكي تحس انك بتستانس وانت تشتري هالحزمة الجديدة. لأن إذا مافي شيء سوى اللعبة، فأقدر أشغل محاكي وأسوي نفس الشغل. فالمفروض تتواجد هالإضافات عشان تضيف قيمة للحزمة. لكن لحظة قبل ما استعجل بكلامي ففي شيء عجبني وايد وضافوه داخل الألعاب.
Jurassic Park على الـ NES. أو بالنسبة لي اللعبة الي أكرهها من طفولتي. عبارة عن لعبة من منظور علوي تقاتل فيها الديناصورات وهدفك انك تدمر أو تجمع بيوض الديناصور في المرحلة، وفي منها عدد محدد وبأماكن محددة. ولما تكمل المهمة تحصل Keycard عشان تفتح الأبواب للبنايات وتدخلها، وبعد تجمع بيوض وإلى آخره لحد تفتح البوابة الرئيسية وتنقل لمنطقة ثانية. في هذه اللعبة مثلاً الي موجودة على NES و Gameboy و سوبر نينتيندو. ضافوا الخريطة داخل اللعبة وتقدر تفتحها في أي وقت عشان تعرف مخطط المكان وما تضيع، فهذه إضافة حلوة وايد وعجبتني، لأن ببساطة هذا شي جديد ما كنت تقدر تسويه في النسخ الأصلية، فأعطى أهمية لهذه الحزمة. في البداية كنت أفكر ان محرك الكاربون قاعد يأخذ الـ Graphics من اللعبة مباشرة ويحطها في القائمة، فاعتبرته انجاز كبير للمحاكي الي طوروه، بس بعدين اكتشفت انها صورة مأخوذة مسبقاً ومحطوطة في مكانها… يبقى ان اضافتها شي حلو، لكن مو المحرك نفسه الي قاعد يسوي هالشي بطريقة مباشرة. لأن تحمست قلت أوه أكيد بيقدرون يسوون فيها أشياء حلوة حق ألعاب الـ 3D. بس يلا أتمنى يتطور المحرك مستقبلاً.
من بداية الحلقة وأنا أقول أكره هذا الجزء من اللعبة، بس للأمانة وللتوضيح أكثر، هذه اللعبة كان عندي أنا وأخوي شريط مقرصن صيني منها على الفاميكوم يوم كنا صغار، وكنا نشغل اللعبة لأن تعجبنا شاشة البداية. يطلع الديناصور ويفتح فمه وتشوف ضروسه يطيح منها دم. كان شي Wow وقتها فكنا نحب نشوف هالشاشة. لكن لما نشغل اللعبة كنا نموت بسرعة وماكنا نعرف شنو المطلوب، كنا نفكر اننا لازم نقتل الديناصورات، بس كل ما نطلق عليهم بالمسدس بسرعة تخلص الذخيرة وماتحصل منها بسرعة، فتطلع ديناصورات أكثر وتقتلك. فما كنا نعرف ان لازم نجمع كل البيض الموجود في المرحلة. بس طبعاً الحين أعرف شنو المطلوب فاللعبة جيدة، ما بخلي تفكير الطفولة يخرب علي اللعبة حالياً. بس بعد، تظل ما تعجبني لذاك الزود، ونفس اللعبة منها 3 نسخ في هالحزمة. الي على الـ Gameboy طبق الأصل منها لكن على شاشة صغيرة. أما الأولى الي على السوبر نينتيندو فالغرافيكس أفضل، وطريقة الأسلحة مختلفة، وحتى الخريطة نفسها غير.
اللعبة الي عجبتني أكثر شي هي Jurassic Park 2 حق الـ Gameboy. مالعبتها من قبل، ماكانت عندي. بس لو كانت عندي أيام القيم بوي أتوقع بخلصها أكثر من مرة. بالنسبة للـ Side scroller على القيمبوي فادائها أو جودتها جيدة. اهي Action platformer، فعندك منصات تقفز عليها وتروح لأماكن جديدة وبنفس الوقت في ديناصورات لازم تقتلها وعندك مسدس وبعد تحصل قنابل ترميها عليهم. فالهدف من كل مرحلة تجمع عدد معين من… ماعرف شنو هو، بس بطاقة مكتوب عليها Jurassic Park، ولما تجمع العدد فتفتح المخرج في المرحلة. بس الحلو فيها ان تصميم المراحل مفتوح، اذا تعرفون ألعاب البلاتفورمر الأوروبية ذيك الفترة يخلون مراحلهم فيها تفرعات وايد، ومو مجرد من اليسار لليمين، فتقدر تروح عمودياً وفي أماكن جديدة على اليمين واليسار، واحياناً تسبح داخل الماي وتروح لمناطق مختلفة. فشوي تصميم المراحل يخربط لأن لازم تعرف وين رحت ووين مارحت خصوصاً إذا وصلت للبوابة وانت ماعندك كل البطاقات. وبعد كل كم مرحلة فتقاتل زعيم، وفي أفكار حلوة للزعماء، الأول مثلاً عندك منصتين يتحركون فوق وتحت، والديناصور نفسه يهجم عليك افقياً، فلازم تحصل المكان المناسب على حسب هجمة الزعيم وتتفاداه، وبعدين تطلق عليه. والزعيم الثاني ديناصور طائر فلازم تتفادى الصخور الي يرميها وتصوب عليه بالمسدس وهو يتحرك. وفي مرحلة Auto Scroller، انت تهرب من ديناصور والمرحلة كلها تتحرك فلازم تكون سريع وتتفادى انك تطيح من المنصات.
وعلى طاري هاللعبة، فبقول انهم بعد حاطين خاصية Rewind عشان ترجع الوقت، اذا طحت او انضربت فتقد ترجع الوقت ثواني لورى، ومناسبة حق هالنوع من الألعاب، ومتوقعة من هالحزم. بس مافي Save states. في ملف حفظ واحد، لكن Save states وانت تلعب مثل المحاكيات او مثل أجهزة نينتيندو المُصغرة فمو موجود. وأي صح، في فلتر حق CRT مثل ما متعودين، لكن الي عجبني فتلر الـ Dot Matrix حق ألعاب القيمبوي، فاهتموا بهذا التفصيل ان طريقة عرض شاشة القيمبوي مختلفة فعطوها فلتر مناسب. مو مثل حزمة ألعاب Castlevania للقيمبوي أدفانس حاطين لها Scanline للـ CRT بدل من طريقة عرض الـ LCD الي كانت على الجهاز الأصلي. فالتركيز على تفاصيل صغيرة مثل هذه تعجبني.
باقي الألعاب جربتها على السريع، ولاحظت شيء في ألعاب السيجا. في باقي الألعاب فتشوفهم مغيرين اسامي الأزرار عشان تتناسب ويا الجهاز، مثلاً في لعبة Gameboy مغيرين النص داخل اللعبة يقولك اضغط زر + و – بدل Start و Select. لكن في ألعاب سيجا، الثلاث أزرار مو مغيرين اسمهم في الإعدادات للعبة. يعني دخل ابي اغير الأزرار واحدد شنو زر القفز وشنو زر الضرب وشنو الزر الثالث، لكن ماعرفت أحدده لأن حاطين اسامي الأزرار A,B,C على أساميها الأصلية، فمافي طريقة أعرف شنو الأزرار على جهاز السويتش إلا أدخل وأجرب اللعبة وبعدين أروح أغير الإعدادات. هذه المشاكل البسيطة الي تحتاج انهم يركزون عليها أكثر مستقبلاً عشان تكون طريقة التقديم أفضل ومتعوب عليها، يعني اهتموا فيها ببعض الألعاب لكن في بعضها ما ركزوا عليها، فتعطي درجة متفاوتة للجودة.
فيعني محرك الكاربون قاعد يتطور من أول لعبة جربتها عليه والي هي Shantae، فقاعد أشوف خواص جديدة قاعدين يشتغلون عليها ويضيفونها، وأكيد ويا كل إصدار بيتطور الوضع أكثر. ويعني لو بقدم اقتراحاتي حالياً فبقول أتمنى اهتمام أكبر بطريقة التقديم، انهم يضيفون أسماء الألعاب، ويحاولون يحتفظون بأسامي الأجهزة الأصلية. ولكن بعد انهم يضيفون أشياء أكثر من ناحية كتيب التعليمات من الألعاب الأصلية لأن فيها معلومات مفيدة ومعلومات ممتعة في بعض الأحيان، وفيها صور مو موجودة في أي مكان داخل اللعبة مثلاً. أما اذا ما يقدرون يصورون كتيب التعليمات ويحطونه كما هو بسبب الحقوق، فعلى الأقل يكتبونه كتابة وتقدر تشوفه. واخيراً، يبدو ان المحرك قادر على Save states، فأتمنى انهم يضيفون دعم أكثر للحفظ داخل اللعبة.
وهذا تقريباً كل شيء بخصوص أداء المحرك، بتلاحظون ان ما تكلمت عن جودة المحاكاة للألعاب نفسها، لأنهم ضبطوها من كل النواحي من أول اصدار، فحتى جربت أشغل نفس الألعاب على Mister وتعطي نفس النتيجة خلال اللعب فشيء حلو، أتمنى ان حتى محاكاة PS1 تكون بنفس الدقة. متفائل للألعاب القادمة وأتمنى انهم يستمرون بإضافة خواص جديدة ومن ناحيتي بحاول أوصل كلامي. وبس، كانت هذه حلقة اليوم، كان وياكم علي الساهي، ومع السلامة.
