للاستماع للحلقة عن لعبة Dragon View (Super Drakkhen):
في هذه الحلقة بكلمكم عن لعبة سوبر نينتيندو كان السبب الرئيسي لكلامي عنها بكون انه فيها عالم مفتوح وتستخدم 3D في رسم المضلعات. لكن بعد ما لعبتها لساعات أطول، اكتشفت ان في لعبة حلوة مخبأة في عنوان قليل الكلام عنه لما نستذكر ألعاب الأكشن RPG على جهاز السوبر نينتيندو. Dragon View نزلت في 1994 وهي من تطوير Kemco وببساطة فهي لعبة أكشن RPG بثيم الفانتاسي وبقصة عادية جداً ماتقدم شيء جديد من ناحية الأفكار. الشيء الوحيد الي يمكن يخليها غريبة، أن الحوارات في اللعبة كلها تقال بمنظور شخص ثاني والي هو راوي القصة، فأنت قاعد تلعب بالشخصية الرئيسية الي اسمها Alex، لكن لما تتكلم مع سُكان المُدن والشخصيات الثانية، فتشوف أن الحوار من وجهة الراوي بأنه يقول: Alex انهار على الأرض ورفع صوته وقال، وبعدها يكتب لك الكلام. بدل من صندوق الحوارات العادي الي موجود في ألعاب الـ RPG.
بما أن القصة من أهم عوامل ألعاب الـ JRPG في التسعينيات، فهذا أحد الأسباب الي أتوقع مو وايد ناس تتكلم عن Dragon View، لأنه مثل ماقلت، انها قصة فانتاسي عادية جداً، أنت البطل من سلالة بطل سابق، وتبدأ القصة لما يختطفون البنت الي تعشقها، ولازم تلحق وراء الساحر وتكتشف شنو خطته. وخلال المغامرة لازم تجمع هذه الخواتم السحرية الي تفتح لك الطريق، عشان تجمع 4 قطع تحتاجها عشان توصل للساحر. فبالنسبة لي، مو القصة الي يخلي أحد يتكلم عن Dragon View، بقدر أسلوب اللعب نفسه.
هي لعبة أكشن RPG فمافي تعاقب أدوار، ومشابهة لـ Zelda II اذا لعبتوها، لكن طريقة القتال تشبه ألعاب الـ Beat em Up الي من منظور جانبي، وطبعاً فهي لعبة 2D، وتتحكم بشخصيتك وتروح في أربع اتجاهات، يمين ويسار وفوق وتحت. لكن خلال القتال تقدر تستخدم سلاحك الرئيسي وتقدر تقفز وتقدر تتفادى بإنك تروح فوق وتحت، وتقدر تستخدم أدوات مثل الـPotions أو القنابل والسحر. فأسهل وصف انها لعبة Beat em Up لكن بعناصر أكثر.
الفرق في Dragon View ان العالم المفتوح او الـOverworld معروض بطريقة ثلاثية أبعاد، وتتنقل فيها بمنظور الشخص الأول. والي هي مختلفة تماماً عن أي ألعاب RPG نزلت في وقتها. لأن دائما كان الـOverworld من كاميرا علوية ومرسومة 2D مثل أجزاء Final Fantasy و Dragon Quest الي نزلت على السوبر نينتيندو. فاللعبة الوحيدة على الجهاز والي تستخدم فيها نفس الطريقة في لعبة RPG، هي Drakkhen، والي هي اساساً من نفس المطورين ونزلت قبل هذه اللعبة، وتعتبر أول لعبة RPG نزلت على جهاز سوبر فاميكوم في اليابان. حتى ان اسم لعبة Dragon View في اليابان كان Super Drakkhen على أساس انه الجزء الثاني من اللعبة، وفي نص القصة يتكلمون عن أربع شجعان انت من سلالتهم، والي هم الأشخاص الي تلعبهم في اللعبة الأولى. شغلت Drakkhen شوي، لكن نظام اللعب فيها مختلف تماماً، فعندك بارتي من الشخصيات والقتال كلش مختلف، لكن ما تعمقت في اللعبة لأن Dragon View شدتني أكثر بأسلوبها.
فهذا الي فاجأني في اللعبة أول مرة شغلتها، أعرف ان في ألعاب سوبر نينتيندو تستخدم 3D فأكبر مثال Star Fox، لكن المُبهر في هذه اللعبة أن مافيها Super FX Chip، لأنها تستخدم طريقة ثانية حق ترسم الـ 3D، والأداء يظل ثابت على الجهاز، لأن نص الشاشة تستخدم فيها منطقة اللعب، والنص الثاني فيه الـ HUD Elements الي يطلع لك كم الـ HP الي عندك والـ EXP الي وصلته، والأدوات الي مسوي لها Equip. طبعاً الـ 3D الي أتكلم عنه مو أي شيء كبير اذا تشوفونه حالياً، لكن بالنسبة لوقته وبدون شريحة Super FX فشي مبهر. فهذا الـ Overworld تمشي فيه بمنظور الشخص الأول، وعالم مفتوح يوصل بين المدن والكهوف الي تزورها في اللعبة.
والاستكشاف في العالم المفتوح موجود، لانه حتى لما تحصل خريطة للمكان الي انت فيه، تكون خريطة عامة أو مُبسطة ما تطلع فيها كل الأماكن، فإذا تروح خارج الاماكن الرئيسية بتحصل كهوف فيها ترقيات لمستوى الماجيك يخليك تطلق 6 ضربات بدل 4، وحتى بعدين لما تحصل خاتم النار الي يخليك تطلق سحر ناري، ففي ساحر تحصله في مكان داخل شجرة، ويزيد لك لفل الضربات حق سحر النار، ونفس الشي لخاتم الثلج. بداية اللعبة بتموت شخصيتك بضربتين او ثلاث، فلازم اتفرم على الأعداء الي يطلعون في العالم المفتوح. ونظام الأعداء الي يطلعون حلو، لأنه مو Random Battles، يعني مو كل ما تمشي فجأة تدخل قتال. الطريقة انك تشوف سحابة او دخان، لما تقترب منها تدخل في قتال. وويا التلفيل بتزيد عندك طاقة الـ Attack والـ Defense. لكن الـHP ما يزيد الا اذا تشتري الترقية من بائع يطلع في كل مدينة مرة. والقتال بعد يعطيك Jade الي هو عملة اللعبة. وفوق هذا عندك ترقيات للدرع الي لابسه، وتقدر تحصل أسلحة غير عن السيف الي عندك ومثل ماقلت خواتم السحر الي تستخدم الـ Mana.
المهمات تنعطى لك لما تدخل المُدن وتكلم الناس فيها وتعرف شنو لازم تسوي، ففي القصة الرئيسية يقولون لك وين تروح وتستخدم البوصلة عشان تعرف الطريق، وبتحصل الخريطة المُبسطة عشان تعرف انت وينك في العالم المفتوح. لكن بعض المهمات فيها النظام القديم الي تحتاج تسوي backtracking او ترجع لمكان بعيد انت كنت فيه اصلاً عشان تاخذ شي يساعدك تدخل الكهف الي كنت عنده اساساً، فتصير الرحلة أطول بهذا السبب. لكن في Teleporters تحصلهم يسرعون شوي.
لكن، اللعبة صعبة وخصوصاص في البداية لأن مثل ما قلت انك بتموت من ضربتين أو ثلاث من الأعداء العاديين. ومافي تخزين على كيفك، لازم ترجع للمدينة وتكلم الشخص الي يسوي لك Heal ويرجع الـ Mana ويسوي Save. الي يصير احيانا انك تدخل Dungeon وتقاتل الأعداء الي فيه، واحياناً في الغاز تفتح فيها الغرف او تتخلص من عوائق معينة مثلاً تحرك التماثيل أو تستخدم خاتم النار عشان اتذوب جليد، وفي أنواع أعداء مختلفين داخل هذه الكهوف. وطول الوقت وانت في الكهف تبدأ تلفل وترفع مستوى شخصيتك، والي يصير انك توصل لزعيم الـ Dungeon وانت بمستوى أقل من المطلوب عشان تهزمه. وطبعاً اللعبة ما ترحم فاذا دخلت للزعيم ما تقدر تهرب، واذا ماتت الشخصية فمعناها Game Over وترجع لآخر تخزينة. يعني كل شيء سويته في الـ Dungeon لازم تعيده من جديد. الزين ان الـ Dungeons لحد الي لعبته مو طوال، وبما انك سويتهم أول مرة فسهل وسريع انك تسويهم المرة الثانية. فعلى الأقل أقدر أقول انها لعبة صعبة لكنها رحيمة. فإذا عرفت مكان غرفة الزعيم، ماتدخل لها وترجع تفرم وتجمع Jade عشان تشتري Potions وتجهز للقتال. والحلو انك ماتحتاج تفرم وايد، يعني أغلب الزعماء، كنت أقل بمستوى واحد أو 2، فثاني مرة أواجههم كنت أهزمهم.
فاللعب نفسه حلو، لأنها مثل ألعاب الـ Beat em Up لكن مع Overworld ألعاب الـ RPG، بس مالاحظت مهمات جانبية مثل في Dragon Quest مثلاً، بس في أهمية للاستكشاف انك تحصل تطوير للأسلحة وغيره. ورسم اللعبة حلو لكنه عادي، يمكن بعض المناطق الي تزورها متنوعة الخلفيات فيها، لكن مافي Style معين يميز مناطقها، والموسيقى على حسب المنطقة في بعضهم كنت استمتع فيهم، وبعضهم نسيته. فيعني اذا بختصر وصف Dragon View، فبقول لعبة عادية في قصتها وفي رسمها وموسيقاها، يميزها تقنياً العالم الـ3D المفتوح، ولعب ممتع كأسلوب Beat em up.
