السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وفي هذه الحلقة بقولكم عن الاشياء الي ابي اشوفها في العاب سلسلة ماريو كارت مستقبلاً.
فكنت ألعب Mario Kart 8 Deluxe هالفترة بس السنقل بلاير، وخلصت كل الكؤوس على 50cc يعني 12 بطولة وتقريباً نص الكؤوس على 100cc. ومستمتع باللعبة، لأن الصراحة كانت عندي من فترة طويلة بس مالعبتها والسبب الأكبر كان لأن عندي Crash Team Racing وكانت تلبي كل الي ابيه من العاب الـ cart racer وبجي لهالموضوع بعدين. فالمهم اني استمتعت باللي لعبته، وابي اخذ كل الـ DLCs حق البطولات الاضافية، لأن تصميم الحلبات عجبني وايد وأبي يكون عندي حلبات أكثر.
هذه وحدة من الأشياء الي فعلاً تخليك تستمتع بألعاب الكارت ريسر، ان في حلبات منوعة، ومو بس من ناحية التصميم الفني، حتى طريقة الحلبة واللفات، يعني الـ Layout نفسه. طريقة المنعطفات وحدتها، والمسافة بين المنعطف والثاني وشلون موصلة بين بعض. وتغير الارتفاع داخل الحلبة نفسها، واذا في مناطق تحت الماي، او عواقب مثل مرحلة الصحراء الي فيها رمل بطئ في الوسط ولازم تسوق على الجوانب. يعني من بين كل الحلبات يمكن 3 او 4 الي مستواهم أقل من الباقي، اما كلهم ممتعين الصراحة.
الشي الوحيد الي شفته بدون فايدة كان اماكن الـ Anti-Gravity، الي تنعكس الحلبة فوق تحت. ما اشوف ان منها فايدة لأن مايتغير أسلوب اللعب فيها. الكاميرا تظل ورا السيارة فتحس انك قاعد تسوق على شارع طبيعي وماتدري انك بالمقلوب الا بالبداية لأن شفت السيارة وهي تروح بالعكس. الأماكن الوحيدة الي هالشي زين فيه، هو لما تسوق على الجدار بجوانب الحلبة لأن الكاميرا تظل بمكانها السابق فتحس ان سيارتك والتحكم فيها مختلف. أما الأماكن الي انت بالمقلوب فما تلاحظ التغيير.
اوكي بدخل في الموضوع، هذه الحلقة مو مراجعة للعبة… ابي اتكلم عن النواقص الي في سلسلة ماريو كارت. وهذه مو سلبيات اذكرها، لأن مثل ماقلت لكم اني حبيت اللعبة وقاعد أعيد البطولات على المستويات المختلفة وابي أخذ الـ DLC. فاذا كنت كاره اللعبة ليش بتعب روحي بكل هالأشياء، هدفي من الحلقة اني ابين شنو الي تفقده هذه السلسلة واتمنى اني أشوفه في الجزء الي بعده. لأن مثل ما قلت ببداية الحلقة، بالنسبة لي Crash Team Racing Nitro-Feueled أفضل من ماريو كارت في عدة اشياء وللحين متمسك بهالفكرة، وابي ان ماريو كارت توصل لهالمستوى وأعرف ان نينتيندو قادرين على هالشي.
ببساطة، ماريو كارت تحتاج تحط السباقات تحت تناسق معين. انها تضيف هدف من كل الي قاعد تسويه، وتربط بين كل البطولات والسباقات بمجرى معين له بداية ونهاية. يعني اختصار الكلام، ماريو كارت تحتاج طور مغامرة.
البطولات حلوة وماعليها كلام، لكن هذا مو شي يساوي سينقل بلاير محترم. كلنا نعرف ان المالتي بلاير في ماريو كارت هو مصدر الاستمتاع حق أغلب اللاعبين، لكن من رأيي اذا تبي تلعب بالطور الفردي، فما في محتوى يليق بالتجربة.
وقبل ما تقولون لي، أي اعرف ان CTR اخذت هالفكرة من Diddy Kong Racing، وهذا السبب الي اقول ان نينتيندو تقدر تسوي هالشي، لأنها أول من بدأت الفكرة ويا Rare.
فأبيكم تتخيلون كل الحلبات الموجودة في ماريو كارت 8 ديلوكس، واربطوها ببعض بحيث ان كل بطولة كأس تكون بمنطقة بخريطة مفتوحة تقدر تسوق فيها للسباقات. وتخيلوا محتوى نينتيندو بتصميم هذا العالم المفتوح وشلون يقدرون يبدعون فيه، عشان تصير هذه الخريطة الي اتوصل بين السباقات بنفسها مكان انت تحب تسوق فيه. واذا في حلبات من ألعاب نينتيندو الثانية مثل زيلدا، فتكون المنطقة في Hyrule وتشبه ألعاب السلسلة.
هذا الي اتخيله في بالي، ان هالمنطقة المفتوحة فيها عقبات تقدر تقفز منها بالسيارة وتجمع كوينز. وبدل النظام الحالي الي يفتح لك قطع جديدة للسيارة لما توصل لعدد محدد من الكوينز. شنو لو هالقطع تحصلهم في اماكن صعب الوصول لها في هالخريطة المفتوحة. يعني مثلاً لازم تسوي دريفت من نقطة الى ثانية عشان تحصل Boost في السرعة يخليك تقفز المسافة الي توصلك لكهف سري تحصل داخله قطعة جديدة للسيارة. او تقفز من أعلى التل وتفتح المظلة يدوياً عشان تتخطى نهر يوصلك لجزيرة عليها تحدي Time Trial على حلبة معينة واذا كملته تحصل نوع ثاني من الكؤووس مختلف عن الي موجود بالبطولات.
وهذه هي الفكرة، انك تضيف السياق المطلوب على المحتويات الي موجودة في اللعبة اساساً، يعني نفس الحلبة خل لها انواع مختلفة من الكؤوس، بالضبط مثل الي في CTR. وحدة منها للسباق العادي، والثانية للـ Time Trial الي موجود اساساً في اللعبة.
وتتذكرون الـ Boss Fights الي في CTR؟ تقدر تسوي شي أحسن في ماريو كارت، انك تخلي حلبات الـ Battle Mode كطريقة اللعب في الزعماء لكل منطقة أو بطولة. فتصير ينهاية كل بطولة بعد ماتخلص السباقات، يكون الاختبار الأخير بالنسبة لك في الـ Battle Mode ضد شخصية كبيرة مو ضروري تكون موجودة في اللعبة. فحط لي NPCs يكونون زعماء في هذه المراحل.
وبعد فوق هذا، هالمرة ماباخذ شي من CTR، باخذ شي من ماريو كارت نفسهم من الـ DS. وماعرف ليش هالشي مارجع في الألعاب الي بعدها. كان في طور تحديات أو Missions ممتاز في Mario Kart DS وتركز على اللعب الفردي. فتستخدم الـ Power Ups مثل الـ Green Shell عشان تلعب Whack a Mole. يطلعون لك المونتي مول من الأرض ولازم تضربهم بالـ Shell عشان تحصل نقاط. هذا مثال واحد، لأن في تحديات وايد حلوة في لعبة الـ DS. مااتذكر اذا كان في Bowling أو لا، بس يقدرون يضيفونه. وهذا كله شي بعيد عن السباقات ويعطي طريقة لعب مختلفة بالأدوات الي موجودة اصلاً في اللعبة، بس بتغييرات في طريقة تقديمها.
لأن الصراحة، بعد ما كملت الكؤوس أول مرة، جاني الاحساس ان ماريو كارت 8 ديلوكس، مو فعلاً ديلوكس. حسيت ان اللعبة فاضية بعدها (وطبعاً كلامي كله عن السنقل بلاير). يعني اوكي حلو انك تسوي البطولات، بس بعد فترة يصير ان تسوي سباق ورى سباق ورى سباق، بدون مايكون في شي يجمعهم. فحرام ان يضيع كل المحتوى الممتاز الموجود في اللعبة ويعتمد على حسب مزاج اللاعب اذا يبي يسوي بطولة ثانية أو لا، بدل من ان اللعبة توجهك بمغامرة وتخليك تبي تروح للبطولة الي بعدها وتبي تسوي السباق الي بعده.
وآخر شي ناخذه من CTR قبل مانطلع. لما نزل ابديت لـ Nitro Fueled خلوك تختار الـ Stats حق المركبة الي تختارها على حسب الشكل الي يعجبك. يعني قبل كانت كل شخصية تختلف بالـ Stats في بعضها ثقيل فالـ Top Speed أقل، والدوران أفضل، وفي بعضها الدريفت أحسن. لكن شالوا هالشي بعد الابديت لأن في ناس تبي تلعب بشخصية وسيارة تعجبهم تصميمها، بس ما يحبون طريقة قيادتها. وفي ماريو كارت 8، طريقة القيادة تعتمد على الشخصية وقطع السيارة، فأبي اشوف يستغنون عن هالشي ويعطونك انت الخيار على حسب نوع الحلبة والبطولة، فاذا تبي تستخدم Bowser وتبيه سريع في بطولة، او تبيه يسوي دريفت أحسن في بطولة ثانية يكون أفضل انك انت تختار بدل انها تظل ثابتة. بس هالشي مو مهم وايد بالنسبة لي، لكن أشوفه اضافة حلوة.
الي بخليني اتحمس أكثر من انهم يضيفون Samus او Captain Falcon أو حلبات من عوالم ألعابهم الثانية، هو لو أنهم يضيفون طور المغامرة بالأشياء الي وصفتها. بالنسبة لي الشي الي بخلي ماريو كارت أفضل، مو انهم يحولونها سوبر سماش للكارت ريسر، بل المحتوى الأفضل.، اتمنى ان الجزء الجديد مو بس يضيفون نوع مختلف من المركبات وتكون في سيارات و طائرات وقوارب، بل يركزون أكثر انهم يعدلون ويضيفون لمحتوى اللاعب الفردي، لأن عندهم شي ممتاز ومايحتاج تغيير في تصميم اللعبة حق اللعب المتعدد. لكنهم متخلفين في جانب اللعب الفردي مم رأيي. وفي سوق قاعد ينشحن بألعاب الكارت ريسر، مثل ديزني بشخصياتها صار عندهم لعبة و Dreamworks وبسوونها، وحتى Nickelodeon و Garfield وغيرهم شكثر الي بنظام Free to Play. فالي بميز ماريو كارت ماعتقد بكون الشخصيات فثط، واما ابداع نينتيندو بتصميم العوالم والمغامرات.
وكانت هذه حلقة اليوم، كان وياكم علي الساهي ومع السلامة.
