السلام عليكم ويا هلا فيكم بحلقة جديدة من بودكاست خفايف ألعاب. وياكم اليوم نسخة حزينة من علي الساهي، لأني ضيعت وقتي وأنا ألعب هذه اللعبة الي بتكلم عنها اليوم، والي يضحك أكثر، ان هذه أول لعبة ألعبها نزلت في 2023، واحنا الحين في شهر 8. يعني ما كانت زيلدا Tears of the Kingdom ولا Armored Core VI، ولا Hogwarts Legacy أو فاينل فانتاسي 16.. كانت Testament الي قررت أعطيها اللقب بأول لعبة نزلت هذه السنة ولعبتها في وقتها. وفي سبب لهالشي، لأني في يوم من الأيام شفت هذه اللعبة وقرأت المزايا الموجودة فيها وشفت Trailer حقها. وبما انها من استوديو مستقل، فقلت ليش لا، وقررت أجربها لأني كنت أعتقد بتقدم شي جديد وحلو.
للأسف اني انخدعت من العروض ومن الكلام المكتوب. لأن مافي شي يبين لك جودة اللعبة مثل ما انك تأخذ الكونترولر وتلعبها بنفسك. و Testament من ألعاب الايندي الي جميلة شكلياً، فيغرك مظهرها على انها لعبة تشبه الألعاب الكبيرة، ويعطيك المظهر ثقة مزيفة بالي يمكن تقدمه اللعبة. فخلونا نبتعد عن المقدمات، وندخل في الموضوع وأوصف لكم تجربتي ويا Testament: The Order of High Human.
اللعبة فيها مزيج بين عدة أشياء من ناحية البيئة وطبيعة القصة، فأحداثها في عالم Fantasy حده Generic، والمكان الأولي يذكرك كأنك تلعب Skyrim. لكن بعد شوي تدخل أفكار الأشياء الخارقة للطبيعة في قصة اللعبة وتبدأ تشوف السحر وتدخل في عالم مليء بالـ Sword & Sorcery مثل مايقولون. وأنت تتحكم في ملك الـ High Humans الي انخدع من أخوه ونزل من مرتبته العالية، و مُجَرد من أي قوة خارقة كانت عنده ومن أي أسلحة كان يحملها، وقصة خربوطية ما اهتميت لها الصراحة لعدة أسباب بتكلم عنها بعدين.
هي لعبة من منظور الشخص الأول، وفي بيئة ثلاثية أبعاد مثل ماقلت انها تشبه Skyrim في البداية، تخيل انك في أي غابة من غابات سكايرم. عندك 3 طرق للهجوم، أولها السيف، وبعدين تحصل القوس والسهم، وآخرها السحر. وفي السحر تبدأ تفتح تعويذات زيادة مع الوقت في اللعبة لما تحصل XP وتفتح شجرة المهارات. الكومبات من البداية حده عادي، ولحد ما وصلت… أو بالأحرى لحد ما تحملت هاللعبة، الكومبات ما يتغير، وبالعكس يصير أسوأ كل ما ينضاف عدد أكثر من الأعداء. القتال بالسيف وايد غبي، لأن مافي نظام جيد حق الكومبات ويا الأعداء. ما تحس انك قاعد تقاتل أحد وتقدر تتصدى لضرباته أو تتفاداها، أو تسوي Parrying. الشعور كأنك ماخذ شخصيتين وتضربهم في بعض والأثنين قاعد ينزل دمهم لحد واحد يموت أسرع من الثاني. فتتمنى انك ما تكون الي يموت أول.
التحكم غريب شوي وماتعودت عليه، يعني القتال كان عادي، بزر R2 و L2 حق الضربات السريعة والضربات الثقيلة. لكن بعدين اذا تبي تسوي Deflect ( وهذا تحصله من شجرة المهارات)، فتضرب R2 و L2 بنفس الوقت، ولازم تكون بتوقيت صح ويا ضربة العدو…. اللعبة مافيها دقة في الكومبات، فحركة الـ Deflect نادراً ماتحس فيها، كأنها عشوائية تسويها ويا تنضرب أو تسوي Stun حق العدو لثواني سريعة ويرجع يضربك. صدق أحس ما أقدر أوصف سوء القتال، حده فاشل خصوصاً ويا مجموعة من الأعداء. بس الحين بكمل الكلام عن الأزرار. فعشان تقفز تضغط R1، والزر الي تتوقعه انه يخليك تركض الي هو L3 هذا استخدامه للـ Crouch، و L1 حق الركض. وتضغط مثلث عشان تبدل السلاح للقوس، ودائرة ترجع للسيف، و مربع عشان تختار السحر. وبعد ما تختارهم تتحكم فيهم بـ R2 و L2. وايد عفسة التحكم، أنا لعبتها على PC وهذه كانت الأزرار الافتراضية. فصايرة أزرار القتال كأنها لعبة أكشن، لكن أزرار الحركة كأنها لعبة Parkour، ودامجين الأسلوبين مع بعض بطريقة ما تتناسب، وتبدأ تنسى الأزرار لما يشتد اللعب وتبي تسوي شي بسرعة. يعني كم مرة أنسى ان الـ Deflect هو زرين مع بعض وأضغط يا R1 واقفز للعدو أو L1 الي يخليني اتفادى يازعم بس دائماً بجهة ضربة العدو، أو اني اضرب L2 واسوي ضربة قوية بالغلط.
واللعبة محدودة من ناحية الموارد، يعني مو كأنها لعبة أكشن أو RPG وتقدر يكون عندك Potions وهالسوالف. لا، اللعبة تبي تعامل الكومبات كأنه Soulslike وتخلي لك 4 أدوات للـ Healing، وتحصلهم لما تقتل الأعداء أو تكسر البراميل. واذا تستخدمهم ما يرجعون لأنه Consumable، فحتى اذا مت وانت استخدمت الأربع الي عندك فبترجع بصفر. وبعد ماتقدر تجمع أكثر من 4 وتخليهم في الـ Inventory لأنه يقولك Inventory Full. ونفس الشي حق الي يرجع طاقة السحر. هذا العدد تقدر تزيده مع المهارات بعدين، بس ماكان عندي مزاج أكمل هاللعبة. يعني من الي أنا شفته في القتال، هذه المفروض تكون لعبة يرجع فيها مستوى الصحة والسحر مع الوقت، مو باستخدام Consumables، ولا وبعد Consumable محدود ماتقدر تخزن منه أكثر. فهذا أكبر غلط أشوفه في اللعبة، المطورين قاعدين يعاملون الـ Combat كأنه Soulslike ويبونك تقاتل الأعداء ببطء، وتصد ضرباتهم وتتفاداهم، لكن الـ AI مو مبني على هالشيء نهائياً والكومبات فاشل لأكبر درجة ممكن تتصورها.
وبتقول لي اني لازم استخدم القوس والسهم وأضرب الأعداء من بعيد؟ حتى هذه محدودة، عندك عدد معين من الأسهم وصعب انك تحصل اسهم في كل مكان لأنها نادرة. وبتقول لي استخدم التسلل، بقول لك، أي هذا أحسن حل، أبي اتسلل من الأعداء، مو لأن التسلل حلو ومتقن… لأن القتال مزعج ومتعب. يعني في لعبة الكومبات فيها فاشل، أكيد ما بكون في AI جيد حق التسلل. وحتى السحر لازم تكون قريب من العدو، وهو قاعد يهجم عليك، وبترجع سالفة القتال بالسيف، انك انت تنضرب بنفس الوقت الي قاعد تضرب فيه العدو.
وغير هذا ففي عدد كبير من الـ Consumables حق سحر محدود، غير عن السحر العادي. هو حتى السحر العادي محدود بالاستخدام، لكن هذه تستخدم Consumables عشان تعطي طاقة نارية أو كهربائبة للسهم مثلاً، أو انك ترفع مستوى الدفاع عندك لفترة محدودة. وتقدر تصنع هذه الأشياء في أي وقت باستخدام Shards، وهذه الـ Shards تحصلها في العالم ولما تقتل الأعداء. لكن طريقة الـ Crafting غبية، لأن لازم تفتح الـ Wheel أو العجلة الدائرية الي تستخدم منها هالـ Consumables، وعشان تفتحها لازم تضغط زر السهم فوق وتظل ضاغط عليه، وتحرك بعصا الآنالوق اليمين للشي الي تبيه وتضغط R1 عشان تصنعه….. خلاص ما أبي أتكلم عن الكومبات زيادة، لأن صدق ماحبيته نهائياً وكرهني في اللعبة. يعني اذا كرهتون كومبات في أي لعبة AAA نزلت هذه السنة وتفكرون انها سيئة، شغلوا لعبة Testament عشان تشوفون شلون ممكن تكون أسوأ.
فأنا كرهت اللعبة بسبب الكومبات، فليش كنت مواصل ألعبها… أوكي،، شوفوا في جزء ألغاز مخلوط مع هرار الـ Fantasy. يعني هي اللعبة في عالم فانتاسي ومرة وحدة تنتقل لمكان غريب كأنه Trial من زيلدا، وDungeons فيها أنوار وألغاز Platforming، وألغاز تحرك فيها المنصة الي انت عليها، وتقفز بين المنصات. أو حتى ألغاز كأنك في لوحة من MC Escher، أو أحجية الألفية من Yu-gi-oh لما يدخلها وفي سلالم معكوسة في كل مكان. فلازم تحرك المنصة عشان تقدر تستخدم السلالم وتوديك لمكان ثاني وتحصل زر يفتح الباب. وهذه الأجزاء من اللعبة كانت حلوة بالنسبة لي، وخلتني اني أبي أواصل. وحتى في ألغاز على طاولة فيها ليزر وتستخدم فيها المناظر عشان تعكس الضوء وتوصله للجوهرة عشان تحل اللغز. يعني لو أنهم مركزين على انهم يسوون لعبة ألغاز منظور شخص أول، وتركوا جانب الـ Combat كله، كان أحسن. لأن على الأقل هني الحركة متقنة والألغاز تنحل بالشكل الي تتوقعه. يعني بالنسبة لي كأنها كانت لعبة ألغاز أولاً وبعدين قرروا يضيفون لها جانب ثاني والي هو الـ Combat. فطالعة كأن هالمناطق أفضل من الأجزاء الرئيسية في اللعبة.
أوكي وعدتكم بتكلم عن القصة، بس ماعندي شي أقوله غير انها هرار وخرابيط Fantasy، وزيد عليها ان حوارات الشخصية كلها تقط عليك Exposition على أي شيء تسويه بشكل مو طبيعي. لدرجة اني من أول نص ساعة قررت ما أبي اهتم لأي شي يقولونه الشخصيات وقعدت ألعب بدون صوت. لهالدرجة كانت الحوارات سيئة. واذا ماكانت هي سبب يخليني أترك اللعبة، فالقتال نفسه كان الحد الي كسر صبري. بعد ما وصلت لغرفة كبيرة وفيها مجموعة من الأعداء تحت على الأرض، وبعضهم فوق على البلكونات ويرمون عليك أشياء، هني ماكان في شي ينفع ضدهم لأني ظليت أموت، وما كنت أبي أعذب روحي زيادة ويا الكومبات السيء وقررت أوقف اللعبة بعد 3 ساعات تقريباً.
مافي شي يشفع حق Testament غير أماكن الألغاز الي كانت حلوة شوي. بس هل كانت حلوة لأنها مميزة، أو لأنها كانت تكسر التكرار وتغير الجو المتعكر من الكومبات؟ الصراحة، ما أبي ألعب زيادة عشان أعرف الجواب. اكتفيت من هذه اللعبة، ومادري ليش كان لي مزاج ألعبها بدل من اني أشغل أي لعبة ثانية نزلت هالسنة. بس يلا، تكلمت عنها في حلقة، ويمكن هذه الحسنة الوحيدة الي حصلتها منها. كان وياكم علي الساهي، ومع السلامة.
