للاستماع للحلقة:
Super Mario Wonder تسوي وايد أشياء حلوة، وخلونا نقول اختلاف عن الألعاب السابقة. وأكبر اختلاف والي خلاها مُنعشة بالنسبة لي، هو انهم اخيراً تخلصوا من تصاميم الشخصيات والعالم من سلسلة New Super Mario Bros.، الي بدوا يستخدمونها من أيام الـ DS في 2006. يعني تخيلوا 17 سنة بنفس التصاميم، حتى لو كانت حلوة بتتملل وانت تشوفها. فصج كنا نحتاج هالتغيير في التصاميم. ولو تسألوني عن رايي، فبحب لو ان نشوف هالماريو وباقي الشخصيات بهالتصميم الي كأنه مجسم طيني، في ألعابهم الثلاثية الأبعاد ونبتعد عن التصميم القديم شوي حتى لو لفترة وبعدين نرجع لها. بس صج ماريو كان يحتاج هالتحديث في التصميم، وما أتكلم عن ماريو الي على غلاف اللعبة، وانما ماريو الي داخل اللعبة لأن في اختلاف بينهم. ماعرف ليش ما استخدموا نفس التصميم على الغلاف، كان بيطلع أحلى.
وهالتصميم مو مقتصر بس على الشخصيات نفسهم، بل حتى العالم نفسه، فالأشجار مثلاً كلش مختلفة عن أشجار ألعاب New Super Mario أو الـ Blocks أو الـ Platforms نفسهم الي عليهم العشب. ونفس الشي بالنسبة للأعداء والـ Power-ups. يعني صح ان تغييرات بسيطة اغلبها في طريقة تلوين الشخصية والـ Shading ودرجة لمعان الـ Material المستخدم، لكن الفرق الإجمالي كبير على الـ Presentation حق اللعبة ككُل، فاذا تحطون New Super Mario Bros U عند Super Mario Wonder بتلاحظون مباشرة الفرق بين اللعبتين، مقارنة باذا حطيت New SMB U عند New SMB 2 من الـ DS فغير عن الـ Resolution ما في فرق بين اللعبتين شكلياً لأنهم يستخدمون نفس التصميم لكل شي. وكمية الـ Animations والتحريك الي ضافوها للشخصيات تزيد على جمال التقديم، وتشوف الفرق الي تسويه إضافات صغيرة مثل لما ماريو يدخل الأنبوب من على الجنب ويسحب قبعته بايده، أو لما يكون ماريو الفيل ويدخل الانبوب يكون التحريك مختلف عن لما يكون بهيئته الطبيعية، أو حتى التحريك لما تقفز أو لما تحصل Power-Up. كل هذه الأشياء الصغيرة الي من هني شوي ومن هناك شوي تبدأ تزيد على طريقة التقديم.
فكل هالشرح بس عشان أقول ان تقديم اللعبة شكلياً يحسسك انه شي Fresh أخيراً. لأن غير عن Mario Maker الي عشانه احتفال بتاريخ السلسلة وفيه التصاميم القديمة، من زمان ما حسيت بالـ Freshness وأنا ألعب ألعاب ماريو الـ 2D. وهالشعور يساعد وايد بانك تصير تبي تستكشف كل شي في اللعبة والمراحل، لأنك تحس انك في عالم جديد. وهذا لأن احنا في عالم جديد… اللعبة في الـ Flower Kingdom وابتعدنا شوي عن الـ Mushroom Kingdom. ففي حس مغامرة مثل الي كان موجود في Super Mario Odyssey اننا قاعدين نشوف مناطق جديدة، وصح ان حس المغامرة دائماً موجود في ألعاب ماريو الـ 2D، لأن العوالم داخل المملكة نفسها تنقسم وتتنوع، وهالشي مستمر في Wonder مع زيادة انه التصاميم شكلياً جديدة. لا تاخذون من كلامي ان ألعاب New SMB سيئة، لأن كل ألعاب ماريو ممتعة باللي تقدمه كمحتوى، وكلامي هني عن الشكل فقط.. إلا يمكن New SMB 2 أتذكر اني ما استمتعت فيه ووقفت ألعبه. هل يستاهل اني ارجع وأكمله ولا مو لازم؟
ما أبي أشرح بالتفصيل وأروح على كل عالم في اللعبة، بس توقعوا الـ Plains والعالم الصحراوي والحمم البركانية والجليد. تعرفون هالمناطق اذا لعبتون ماريو من قبل، وماعتقد في أحد ما لعب. بس شنو الـ Fresh في الموضوع اذا هي نفس طبيعة العوالم بتسئلوني؟ لأن الأفكار في تصميم المراحل الي داخل العوالم تختلف عن الي متعودين عليه، فصح اننا بمنطقة صحراوية، لكن عندنا أعداء جدد، مومياء طويلة تقدر تسحب اللفاف منها عشان تتخلص منها، أو انك تستخدم راس المومياء كمنصة تنط عليها وتوصلك لمناطق أعلى. وعندنا Block جديد، كريستال تقدر تكسره عشان تحصل الي داخله أو تسوي لنفسك طريق عشان تكمل المرحلة أو توصل لمكان سري اذا كسرتهم بترتيب معين يخليك تتسلق للمكان المطلوب. وهذه لمحة بسيطة بس عن الي موجود، لأنهم ضافوا كمية أعداء جدد وبلوكات جديدة على طول عوالم اللعبة.
طبيعة الأعداء الجدد الي ضافوهم يخليهم يتفاعلون ويا بيئة المرحلة ويغيرون منها، وهني يجي جزء من الاستكشاف في المراحل. مثلاً في طير يرمي عصا تلصق بالجدار وانت تقدر تستخدم هالعصا كمنصة توصلك لطريق مختصر أو منطقة سرية جديدة. فاذا انت مثلاً في المرحلة وتستخدم الـ Fire Flower وتتخلص من هالطيور، فمعناها مابتكون موجودة في مرحلتك العصا عشان تقدر توصل للأماكن الجديدة، وبتخلص المرحلة بطريقة مختلفة عن لو أنك لعبتها باستخدام هالتغييرات في البيئة. وهالكلام ينطبق حتى على الـ Power-Ups الموجودة عندك وانت في المرحلة. فعندنا ماريو الفيل مثلاً والي تقدر تستخدم خرطوم الفيل عشان تكسر الـ Blocks الي قدامك مباشرة، وفي أماكن ما بتقدر تكسر هالـ Blocks إلا بسلاحف الـ Koopa اذا كانوا موجودين في المرحلة، أو بانك تكون ماريو الفيل. ففي مرحلة كان بنهايتها Blocks وماكان في سلحفاة في المرحلة نفسها، وحتى انك ماتحصل Power-Up الفيل في هذه المرحلة، فجاني فضول ورحت لمرحلة ثانية وحصلت الـ Power-Up وبعدين رجعت لنفس هذه المرحلة ووصلت للنهاية بدون ما أنضرب عشان لا أخسر الـ Power-Up. ولما كسرت الـ Blocks فاكتشفت انها نهاية ثانية سرية للمرحلة، وتحصل Wonder Seed إضافي لأنك وصلت لنهاية سرية ما تقول لك اللعبة عنها إلا اذا انت جاك فضول تستكشف وتلبي متطلبات تلميحاتها جاية من البيئة نفسها. وهالشي موجود في الأغلبية الكبرى من المراحل اذا مو كلها. فاذا كانت منطقة سرية بتحصل فيها الـ 10-Coin البنفسجي مثلاً، أو اذا نهاية سرية فتحصل Wonder Seed.
وبما اني تكلمت عن هالشيئين فخلوني أشرحهم. اول شي الـ 10-Coin البنفسجية، هذه مثل العملة الذهبية الكبيرة في ألعاب New SMB الي موجود منها 3 في كل مرحلة، وتحصلها في مناطق صعب انك توصل لها، أو تحل ألغاز Platforming عشان توصل لها، أو انك تستخدم الـ Power-Ups بطريقة معينة عشان توصل لمنطقة جديدة أو أنبوب جديد يأخذ لمنطقة سرية. فاذا كنت تحب الاستكشاف فهذه موجودة في كل المراحل. وأي صح، في هالجزء تخلصوا من وقت المرحلة فتقدر تستكشف براحتك. من جهة ما عجبني ان المراحل مافي لها وقت محدد، لكن من جهة ثانية ما أتذكر آخر مرة انتهى فيها الوقت علي وأنا ألعب مرحلة في ماريو… فما أحسه تغيير كبير أو يأثر على اللعب. وبما ان المراحل فيها استكشاف أكثر من الي لاحظته عن ألعاب ماريو السابقة فما في دافع يخليك تستعجل تخلص المرحلة. وهذا بالنسبة للعملة البنفسجية.
الشي الثاني الي تجمعه وتحتاجه هو الـ Wonder Seed. كل مرحلة فيها 2، ماعدا المراحل الي فيها نهايات سرية ففيها 3. تحصل وحدة من الـ Wonder Seeds لمجرد انك خلصت المرحلة. أما الـ Wonder Seed الثانية فهني تجي ميكانيكية القيمبلاي الجديدة والي صج كلش استانست فيها في كل مرة وأنا ألعب. لحد الحين كلشي وصفته في Wonder يمكن يذكركم بشي موجود اصلاً في ألعاب ماريو السابقة لكن بتنوع وأفكار جديدة. أما الـ Wonder Flower فهذه وردة تحصلها في المرحلة وتكون بأماكن سرية في العادة، وتغير لك المرحلة بشكل مو طبيعي، وهذا الي شفناه في عروض اللعبة الي فجأة تتغير موسيقى المرحلة وتصير أشياء غريبة، مثل الأنابيب تبدأ تتحرك مثل الدودة أو قطيع ديناصورات يركضون بسرعة وانت تمتطيهم. والـ Wonder Flower تغير طبيعة المراحل بأكثر من شكل، ففي المراحل الي تحتاج سرعة في ردة الفعل لما تكون فوق ديناصور ولازم تقفز أو تتفادى الأعداء بسرعة وما تطيح من الديناصورات. وفي مراحل تحولك لبالونة وتطير في الفضاء وتتغير الجاذبية ولازم تتفادى الأعداء وانت في هالحالة. وفي مراحل تتغير للأبيض وأسود وشخصيتك تصير طويلة واذا تقفز فتطلع منصات من تحتك، واذا نزلت روحك وسويت Crouch فتنزل منصات جديدة من فوق. وفي مكان فاجئتني الوردة لأنها حولت المرحلة من منظور علوي Top Down وأمشي في أماكن محددة. هني جزء الابداع في تصميم SMB Wonder. لأنه حتى ويا التنوع الي في المراحل والأعداء والـ Power-Ups، انت مازلت في لعبة Side-Scroller platformer، أما الـ Wonder Flower تغير لك طبيعة الي تسويه في المرحلة لشي مو متوقع وجديد في كل مرة. انا حالياً في العالم الرابع من أصل 8، ولحد الحين كل شي تقدمه الـ Wonder Flower يكون شي جديد، وحتى اذا كانت من نفس الطبيعة إلا ان الاختلاف في المرحلة والأعداء الموجودين يخليها متنوعة وجديدة في كل مرة. وهني يرجع استخدام محدودية الوقت، لأن طاقة الوردة محدودة في بعض المراحل ولازم توصل للـ Wonder Seed قبل ما ينتهي الوقت، واحياناً الـ Wonder Seed ياخذك لمخرج ثالث سري بعكس اذا خلصت المرحلة بدون ما تأخذ الوردة.
لكن بعد فوق هذا كله، فهذا مو الشي المُنوع الوحيد في Wonder. لأن طبيعة المراحل نفسها تختلف وفيها أكثر من مجرد المراحل الي تمشي فيها من اليسار لليمين عشان تخلصها. هم المراحل موجودين على خارطة Overworld تمشي عليها بحُرية، فما في مراحل متتالية Dash 1 و Dash 2. لا، لأنك تقدر تدخل المراحل بأي ترتيب تبغيه على حسب العالم الي انت فيه. والي عجبني وايد وأشوفه حلو، انه حتى صعوبة التحديات في المراحل نفسها مو بشكل تدريجي، فما يكون العالم الأول سهل وايد ومافيه تحدي نهائياً. بالعكس، لأن كل مرحلة عليها تقييم للصعوبة من بين نجمة إلى 4 نجوم، وفي مراحل داخل العالم الأول صعوبتها 3 نجوم. يمكن في ألعاب ثانية يكون هالشي سلبي انه مافي مستوى صعوبة تدريجي يعلمك ميكانيكيات اللعبة، لكن هذه ماريو، وماعتقد في أحد مايعرف يلعب ماريو ومايعرف الميكانيكيات الاساسية. فهني صايرة ان اللعبة ما تخاف انها تعطي اللاعب تحدي من البداية وما تروح في توجه انها تسهل التحديات مثل الماي تحت مسمى الـ Accessability، وهذا شي حبيت لما شفته في Wonder. فأرجع حق موضوع التنوع. على الـ Overworld عندك المراحل العادية، وفي مراحل تحديات تختبر مهارة معينة من اللاعب، فعندك سباقات، تسلق، قتال أعداء في وقت معين، سباحة وغيرها. في هذه المراحل مثلاً للسباق، فلازم تظل تركض طول المرحلة وتقفز على المنصات بردة فعل سريعة وتتفادى الي موجود، لأنك قاعد تسابق الـ Wiggler ولازم توصل قبله للنهاية. وتحديات التسلق مثلاً، مافيها أعداء، وفيها منصات صغيرة عمودية موجودة في الجو ولازم تقفز بينها بدون ما تطيح. لأنك ترجع لبداية المرحلة اذا طحت. وتحديات قتال الأعداء فتحطك المرحلة في Arena مُقسمة لثلاث مناطق ولازم تتخلص من الأعداء كلهم قبل ما تنفتح البوابة، واذا وصلت لنهاية المرحلة قبل وقت معين فتحصل 3 درجات من الجوائز على حسب وقتك. وهذه التحديات توديني لكلام جديد عن ميكانيكات موجودة في القيمبلاي.
في ميكانيكيات كانت موجودة في ألعاب ماريو السابقة ومارجعت للأجزاء الي بعدها لأن كل لعبة تختلف وتتنوع بطبيعتها. والشي الجديد في Wonder، ان عندك ميداليات تعطيك طاقات او مهارات من ألعاب ماريو السابقة. لكن انت محدود انك تستخدم وحدة منها بس في المرحلة وتقدر تبدل بينها قبل ما تبدأ المرحلة. فتبدأ اللعبة ويا الباراشوت اللي لما تكون الشخصية في الهواء، تضغط R وتفتح الباراشوت وتبطأ سرعتك عشان تتجاوز حُفَر كبيرة. وتبدأ تحصل ميداليات جديدة من بعض مراحل التحديات الي كنت أتكلم عنها، وعشان تحصل الميدالية لازم تخلص التحدي باستخدام نفس هذه المهارة. فمثلاً عندك الـ High-Jump: لما تسوي Crouch لفترة وبعدها تقفز فتضاعف مسافة القفز بالشخصية وهذه من لعبة ماريو 2، وعندك الـ Flutter والي هي حركة Yoshi انك تواصل ضغطك على الزر والشخصية تحاول انها تروح لمسافة أبعد شوي بوسط القفز وهذه من Yoshi’s Island، وعندك شي حلو للتسلق أنك تقدر تسوي Wall Dash، فاذا تتعلق في جانب الجدار وتضغط القفز، بدل من ان ماريو يسوي Wall Jump، فراح يتسلق مسافة أعلى عمودياً وبعدين لما تضغط قفز للمرة الثانية فتسوي الـ Wall Jump. وعندك مهارة الدلفين الي تخليك تسبح بسرعة تحت الماي وبنفس الوقت تكسر الـ Blocks الي قدامك تحت الماي. وعندك مهارة الـ Jump Timing اذا تقفز مرتين ورى بعض بتوقيت معين فالقفزة الثانية تكون أعلى من القفزة الأولى وهذه من Mario 64. وفي غيرهم وايد وانا للحين ماحصلتها كلها… فهذه المهارة الإضافية لما تختار الميدالية قبل المرحلة بتغير من طريقة لعبك في المرحلة نفسها وبكون في أجزاء تصير أسهل وأجزاء ثانية أصعب على حسب الي تختاره. وكل مهارة لها مراحل تحدي، فسويت 3 مراحل من نجمة إلى 3 نجوم حق مهارة الباراشوت، وهذه المراحل مصممة خصوصاً على حسب المهارة الي تختبرك فيها. والصعوبة الأولى شفتها حلوة حق تعليم الأشخاص شلون يستخدمون هذه المهارات خصوصاً اذا كان اللاعب جديد، فشفتها تحديات لكن في نفس الوقت Tutorial ما يمسك ايدك، بل يخليك تجرب بنفسك وتعيد المرحلة لحد انت تتعلم من التجربة. بدل من مرحلة Tutorial بدون فايدة.
أتمنى ان من خلال وصفي قادر أوصل لكم مقدار التنوع الموجود في SMB Wonder. لأن مثل ماقلت لكم اني وصلت للعالم الرابع ولحد الحين ما أحس اني شفت كل شي تقدمه اللعبة، ولحد الحين قاعد أشوف أشياء جديدة ونوعية مراحل مختلفة ما كانت في العوالم السابقة. يعني أنا الحين في عالم الصحراء وشفت في الـ Overworld مرحلة سرية وهي عبارة عن مرحلة موسيقية، تلعب ماريو لكن على إيقاع الموسيقى. فتبدأ الموسيقى في المرحلة ولازم تقفز ويا الإيقاع، وكل قفزة بالوقت الصحيح تعطيك كومبو، وهالكومبو يفتح لك منصات جديدة تقدر تقفز عليها، وتختفي لما تخسر الكومبو. أو مناطق في المرحلة اذا ما قفزت ويا الإيقاع فتختفي المنصة الي تحتك وتطيح في حفرة أو على عدو. يمكن تكون تقريباً بنفس فكرة المنصات الحمرة والزرقة الي كانت في Super Mario 3D Land لكن أحلى وأمتع. ويمكن نسيت أقول لكن حتى لما تأخذ الـ Wonder Flower ففي جانب موسيقي حلو في اللعبة، فتتغير الموسيقى وفي حركة على الايقاع وذكرتني وايد بالمراحل الموسيقية الي كانت في لعبة Sackboy: A Big Adventure. وهذا غير الكلام عن الموسيقى نفسه في اللعبة ويا ألحان جديدة لعوالم ومراحل اللعبة، وريمكسات حق ألحان ماريو الكلاسيكية بطريقة حلوة.
وويا كل الكلام والوصف الي قلته، للحين في أشياء وايد ماذكرتها، منها مراحل سفينة Bowser الي تشبه لعبة SMB 3 أو الـ On-Off Switches الي من Super Mario World وغيره وغيره. فما أبي أطول عليكم، وبقول انكم اذا تدورون التنوع في لعبة منصات تتحداك في ألغاز جانبية ومناطق سرية ومجموعة أفكار جديدة في لعبة وحدة، فبتحصلونها بمقدار وجودة ممتازة في Super Mario Wonder.
لكن قبل ما أنهي الحلقة، أبي أتكلم عن الأشياء الي ما حبيتها وكنت أتمنى انها كانت أفضل. الـ Bosses في القلاع، أو بالأحرى الـ Boss الي اهو Bowser Jr.، نفسه يتكرر لكل القلاع الي وصلت لها لحد الحين، ويستخدم نفس الفكرة في المرات الي تقاتلت وياه، فكنت أتمنى انه يكون في تنوع أكبر في الـ Boss Fights من الي موجود لحد الحين. ويمكن في العوالم الي للحين ماوصلت لها تختلف طريقة الـ Boss Fights وتنحل هذه النقطة، مادري لازم ألعب وأشوف. والشي الثاني، كنت أتمنى ان الشخصيات الي تختار بينها ماكانت نصها عبارة عن مستوى صعوبة أسهل. فتقدر تختار تلعب من بين Mario و Luigi و Peach و Daisy و Toad و Toadette وذلين كلهم ينلعبون بنفس الطريقة، يعني مافي قفز أعلى لـ Peach أو لويجي يطير لمسافة أطول. وهذه مو مشكلة لأن المهارات هذه موجودة في نظام الميداليات. لكن باقي الشخصيات Yoshi بألوانه و Nabbit للأسف عبارة عن مستوى سهل. لأنك اذا تختارهم ما تنضرب شخصيتك. كنت أبي ألعب بـ Yoshi لكن ما أبي اني ما أنضرب، فكنت أتمنى لو انه كان خيار بدل من انه محدد على حسب الشخصية الي تختارها. وهذه بصراحة انتقاداتي الوحيدة للعبة، لأن اللعبة فعلياً ممتازة ومتقنة في كل الجوانب الي تقدمها من ناحية القيمبلاي والتنوع والأفكار الجديدة والرسوم والموسيقى والأداء، فصعب انك تحصل سلبية سوى انك ماتحب هالنوع من الألعاب من الأساس.
وأنا ألعب وأخلص كل مرحلة قاعد آخذ وقتي فيها وما أبي أخلصها بسرعة، لأني مستمتع وايد باللعبة وما ابيها تنتهي بسرعة لأني أعرف ان لازم أنتظر سنوات وسنوات قبل لعبة ماريو 2D جديدة. وأتمنى في محتوى بعد ما أخلص المراحل الأساسية إذا كانت مثل ألعاب ماريو الباقية، فأتمنى ان هالمحتوى بعد نهاية اللعبة يكون صعب عشان أواصل ألعب لفترة أطول. ومخطط أرجع ألعبها Co-Op بعد ما أخلصها فعندي هالشي عشان أرجع له. فاذا بختصر وصف اللعبة في كلمة فبقول انها Fresh. كمية الأشياء الجديدة الموجودة في هذه اللعبة كانت تستاهل كل الانتظار من آخر لعبة ماريو 2D .
