حلقة اليوم نقاشية أكثر عن موضوع معين بدل ما أتكلم عن لعبة وحدة، وأبي اسمع رايكم بالموضوع فاكتبوا لي تعليقاتكم على تويتر، بتحصلون الرابط في الوصف. واذكركم بعد عشان تسوون فولو للبودكاست على المنصات المختلفة عشان توصلكم الحلقات أول ما تنزل. موضوعي اليوم عن الألعاب الي تستحق ريميك أو ريماستر. أو حتى أكثر من الاستحقاق، شنو الألعاب الي فعلاً تحتاج ريميك.
مافي شك ان كل شخص عنده لعبة يحبها كانت موجودة على الأجيال السابقة ويبي لو يسوون منها نسخة جديدة، بغرافيكس جديد، وتحسينات كبيرة للقيمبلاي يطلعها كلعبة جديدة مُصنعة لهذا الجيل… لكن هل فعلاً هذه اللعبة تحتاج ريميك أو لا؟ وبحاول اني أخلي كلامي أكثر على الريميك بدل الريماستر، وبفرق بينهم بشي بسيط وهو هل اللعبة الجديدة تضيف ميكانيكيات وتحسينات أكثر من مجرد الرسومات أو لا. لأن هذا الجانب الي يهمني في نقاشي.
في الفترة الأخيرة شفنا مجموعة ريميكات مثل Resident Evil 4 و Dead Space وثلاثية كراش وسبايرو أو Final Fantasy VII و Shadow of the Colssus…. معظم هذه الألعاب من رأيي ما تستحق الريميك… وعشان ما أزعل أحد، ترى في ألعاب أنا حبيت انها رجعت وسووها ريميك لكن ما أشوف انها كانت تحتاجه.. مثل Tony Hawk’s Pro Skater 1+2 وحتى وحدة من ألعاب المفضلة Shadow of the Colossus. وبقولكم ليش في هذه الحلقة، لأن كلامي أكثر عن موضوع الاستحقاق والحاجة لريميك، ومو تعليق على جودة الألعاب الي نزلت. فإذا تحب ريميك Resident Evil 4 فهذا شي حلو، لكن أنا ما أشوف انها لعبة كانت تستحق ريميك، مثل ما كانت Resident Evil 2 و3 تحتاج ريميك. لأن حتى في قائمة الألعاب الي انا ما اشوف انها تستحقها في ألعاب أنا شخصياً أحبها واستانست انها رجعت.
وفي المقابل في ألعاب نزل أو بينزل لها ريماستر، أنا شخصياً أتمنى لو أنه كان ريميك. كمثال لعبة Shadow of the Damned. وبحاول أوصل فكرتي عن طريق وصف Shadow of the Damned. الي مايعرف عن هذه اللعبة، فكانت تعاون بين Suda 51 ويا الناشر EA عشان ينزلون هذه اللعبة في جيل PS3 و Xbox 360. و Suda 51 وفريق التطوير كان عندهم أفكار غريبة حق هذه اللعبة بأنها تستخدم ميكانيكيات تعتمد على الضوء والظِل، وغيرها من الأفكار الي تقدرون تقرون عنها، والي بالنهاية شالوها من تطوير اللعبة. السبب كان في وقتها ان EA كانت تتدخل في تطوير اللعبة وكانوا يشوفون ان هذه الميكانيكيات ما راح تبيع العدد المطلوب من النسخ الي كان موجود في بالهم. فاضطر فريق التطوير انهم يسوون لعبة Third Person Shooter بمراحل خطية وبأسلوب قيمبلاي متكرر. أنا أحب Shadow of the Damned بس مو بسبب القيمبلاي، بل أكثر عشان القصة والشخصيات والغرابة بشكل عام. وفكرة الريماستر ما تحمسني او تشجعني اني أنصح بالنسخة الجديدة الي بتنزل. عكس لو انها كانت ريميك.
فصح انك اذا بتلعب Shadow of the Damned على PS3 ففيها مشاكل تقنية وايد، سواءً Texture Popping و Screen Tearing و حتى مستوى Frame Rate نازل. لكن في نفس الوقت نسخة Xbox 360 موجودة من ضمن ألعاب الـ Backwards Compatible على Series X واذا تلعبها على هالجهاز فبتحل معظم هذه المشاكل… الي الريماستر بقدمها في Package جديد كنسخة جديدة. لكن تعرفون شنو المشاكل الي ما يحلها الريماستر؟؟ طبيعة اللعبة نفسها كلعبة Third Person Shooter تشبه ميكانيكيات أي لعبة من هذا النوع على جيل PS3. فهني من رأيي هذه اللعبة الي تحتاج ريميك… ويكون ريميك يرجع الأفكار الأصلية الي كان يبيها فريق التطوير ويشتغل عليها أكثر من مجرد صبغة جديدة واستخدام لقوة الأجهزة الجديدة عشان تحل المشاكل من الجانب التقني بس.
فهذا نوع الألعاب الي أبي أشوف له ريميك. صح ان Red Dead Redemption لعبة ممتازة ومحبوسة على جهاز قديم، وصح ان Resident Evil 4 من أفضل الألعاب الي الكل يحبها. لكن هل فعلاً تحتاج ريميك؟ أنا أشوف لا، لأني أعتقد ان الألعاب الي كانت متوسطة بتقييمات بين الـ5 و7 من 10، هي الألعاب الي تحتاج ريميك، خصوصاً اذا كان فيها أفكار مختلفة عن الي متعودين عليه. لكن هذا مو معناه اني أكره أشوف The Last of Us Part 1 أو Demon Souls أو مرة ثانية Resident Evil 4، لكن أشوف ان ألعاب مثل Final Fantasy VII و Resident Evil 2 هي نوع الريميكات الي ابي أشوف منها أكثر. الريميك الفعلي الي يجدد نوع اللعبة بالكامل ويخليها مختلفة عن الأصل ويستخدم تقنيات جديدة مثل أسلوب القتال في Final Fantasy VII Remake و الكاميرا الجديدة في Resident Evil 2، بدل من تقنيات الرسومات الجديدة بس بدون أي تغيير فعلي في القيمبلاي، ومجرد الاكتفاء بتنقيح الي كان موجود أصلاً.
وعشان أعطيكم أمثلة على الألعاب الي أشوف انها تحتاج ريميك، عشان أخليكم تعصبون أكثر اذا ما كنتوا معصبين على الي قلته عن ريميكاتكم المفضلة. فبركز على جيل PS3 بس، وأشوف ألعاب مثل Singularity وDamnation و Blur و Split Second و The Darkness أو Wet وحتى The Saboteur الي سويت عنها حلقة منفصلة وتقدرون تروحون تسمعونها. هذه الألعاب الي أبي اشوف لها ريميك. يعني Damnation و Singularity اثنينهم ألعاب شوتر قصتهم تتكلم عن بُعد زمني مختلف أيام الحرب، و Singularity فيها ثقوب في الزمن تقدر تمشي بينها، فتخيلوا شنو ممكن تصير هاللعبة لو يصير لها ريميك بتقنيات مثل الي كانت تستخدمها Ratchet & Clank Rift Apart. أما Blur و Split Second فهي ألعاب سباقات فيها جانب آركيدي ما نشوفه في ألعاب Need For Speed أو Forza Horizon أو حتى The Crew Motorfest الي توجهها لنوع مختلف من تقديم اللعب والسباقات الآركيدي. وهذا غير كل الألعاب الموجودة على PS2 ويا كثرها، فهذه الريميكات بتحمسني أكثر من اني أشوف ريميك Prince of Persia Sands of Time، فصح اني بحب لو تنزل نسخة جديدة من وحدة من ألعابي المفضلة على الإطلاق للجيل الجديد، بس شنو الجديد الي بتقدمه هاللعبة غير عن استخدام تقنيات الغرافيكس الجديدة؟ وهني يجي الفرق بالنسبة لي للألعاب الي تستحق ريميك والألعاب الي تحتاج ريميك.
صح ان الألعاب المميزة عليها طلب واقبال أكثر بوايد من الألعاب الي الأغلب كان يكرهها لما صدرت أول مرة، بس من جانب أشوف ان الألعاب الي فيها أفكار هي الي تستحق فرصة ثانية بدل من Metal Gear Solid 3 و Silent Hill 2 الي الأغلب لعبها في وقتها، واصدارها مرة ثانية شي حلو للأشخاص الجدد الي سمعوا عنها بس ماكانت عندهم فرصة يجربونها أو يلعبونها. بس أكرر كلامي مرة ثانية، هذا مجرد رأي شخصي، ومابروح أتحجج على لعبة معينة لأن بينزل لها ريميك أو ريماستر، لأن اذا سمعتوا حلقاتي السابقة بتعرفون اني شخص يحب الألعاب القديمة، وأي فرصة عشان تتوفر على الأجهزة الجديدة فهذا شي بتقبله وبيعجبني. تعليقي الوحيد على تحديد الميزانية للألعاب الي تحتاج ريميك، لأني أبي أشوف شي جديد أكثر من أني أشوف الشي القديم لكن بصورة أفضل للألعاب الكبيرة والضخمة مثل Resident Evil و Red Dead Redemption وThe Last of Us. فموضوعي أكثر على شنو الي يحدد الحاجة من عدمها، هو فكرة شنو أساليب القيمبلاي الي كانوا يبونها المطورين الأصليين لكن ماقدروا يسوونها في وقتها، وهذه التقنية موجودة حالياً، ففي هدف أكبر من الريميك، بدل من مجرد الألعاب الي باعت نسخ وايد في وقتها واللاعبين يحبونها فبنسوي لها ريميك جديد لأن نعرف ان بنوصل للمبيعات الي نبيها لأن هذا هدفنا الأكبر.
ففي النهاية أتوقع الي أبي أوصله اني ما أمانع الريماستر للألعاب الضخمة والكبيرة الي حققت مبيعات عالية ويا أول اصدار لها، لكن أبي الريميك يقتصر على الألعاب الي كانت مبيعاتها ضعيفة في وقتها أو كانت سيئة تقنياً، لكنها من ناحية الأفكار، فيها شي جديد كان طَموح في وقته ولكنه ممكن حالياً. فعلى هذا الأساس ابي أسمع رايكم عن الألعاب الي تحبون لو تشوفون لها ريميك، من أي شركة ومن أي جيل، حتى لو تبون لعبة أتاري ترجع بتصور جديد، فاكتبوا لي هذه الألعاب وليش تبون لها ريميك، بحب اقرأ اقتراحاتكم واعرف ذوقكم في الألعاب القديمة. وكانت هذه حلقة اليوم، ولا تعصبون اذا قلت ان ريميك لعبتكم المفضلة ما كان يحتاج ريميك، لأن بكرر كلامي، ان حتى ألعابي المفضلة الي سوو لها ريميك وحبيت لما لعبتها، في جانب بداخلي أشوف انها ما كانت تحتاجه. وكان وياكم علي الساهي ومع السلامة.
