السلام عليكم، ويا هلا بالحلقة الإضافية لبودكاست خفايف ألعاب. وياكم علي الساهي ومثل ما وعدتكم بكلمكم عن رأيي في عروض ومعلومات لعبة Prince of Persia: The Lost Crown الي اعلنوا عنها هذه الفترة.
الصراحة مر وقت طويل من آخر لعبة حق Prince of Persia واذا سمعتوا الحلقة الماضية بتعرفون اني اشتقت للسلسلة ورجعت لعبت الريبوت الي كنت اتفاداه طول هالوقت. لكن هذا الريبوت ما كان آخر لعبة للأمير، لأنه مع وقت عرض الفلم كان في لعبة جديدة باسم The Forgotten Sands، أو بالأحرى ألعاب مختلفة كلها نزلت بنفس اليوم وبنفس الأسم لكنها مختلفة بطريقة اللعبة والقصة والمحتوى. على العموم، أنا لعبت The Forgotten Sands نسخة PS3 في 2012 وأتذكر اني حبيت اللعبة، لكن مارجعت ألعبها. وناوي ألعب نسخة PSP لأنها لعبة 2D Platformer مختلفة عن نسخة PS3، لعبت منها أول ربع ساعة وعجبتني فناوي أكملها، وحتى نسخة Wii و DS كلهم غير عن بعض. المهم، The Forgotten Sands مو موضوعنا اليوم. The Lost Crown موضوعنا.
تفاجأت لما شفت اعلان Prince of Persia جديدة، خصوصاً اني كنت متوقع ريميك The Sands of Time انه يكون الشي الوحيد الي يوبيسوفت شغالة عليه حق السلسلة، وكلنا نعرف شلون كان عرض الريميك، وحتى اني كتبت مقال انطباعات عنها بخلي الرابط في الوصف اذا بتقرأونه. والصراحة النظرة الأولى على The Lost Crown ما كانت تشجع في البداية، لكن ويا مرور الأيام والقيمبلاي الي شفته، وكلام الي جربوا للعبة خلاني أغير رأيي.
أول ما شفت العرض، كان في شيئين الي شدوا انتباهي، وكان بشكل سلبي أكثر من إيجابي. أول شي كان تصميم الأمير، أو على الأقل الي كنت أعتقد انه الأمير. وثاني شي الموسيقى الي كانت في التريلر الي كلش ما تناسب طبيعة وعالم اللعبة. جا على بالي الموسيقى الي في Warrior Within. فبتكلم ليش ماعجبوني هالشيئين والبداية ويا الشخصية، و لا… السبب مو لأن الشخصية سمرة، وأقول هالشي لأني شفت تعليقات على هالجانب. من نظرتي مو هذا السبب، كان السبب أكثر التصميم (بين قوسين) الشبابي حق الشخصية. فأول شي جا على بالي ان حركات Ubisoft بترجع انها تبي تسوي شي قديم يميل لجيل الشباب الجديد، أو بالأحرى الشباب الغربي. وأول لعبة تذكرتها منهم والي هي آخر لعبة لعبتها منهم وكانت Riders Republic، والشخصيات والحوارات في هذه اللعبة من أسوأ ما سمعت. فكنت متخوف من هذا الجانب، خصوصاً ان في نفاق غير طبيعي في Ubisoft كشركة بأفكارها. من جانب يدعون التنويع العرقي في ألعابهم بشكل يراوي الفئة المقصودة باحترام ودقة، ولكن من جانب ثاني نعرف في الواقع مو هذا الي قاعد يصير. وهذا الي كان في بالي ويا Prince of Persia، ان ليش شخصية أمير,,, كانت كل ألعابه في بلاد فارس والهند، تغيرونها بطريقة تميل أكثر للجانب الغربي. فليش بدل هذا التغييرما تحاولون تبرزون ثقافة فارس والشرق بشكلها الطبيعي حتى تثقفون الغرب. المهم، هذا مو موضوعنا اليوم، ولحد الآن مالعبنا اللعبة ولا نعرف قصتها وشخصياتها حتى نقول بشكل أكيد ان هذا الي قاعد يصير. ولكن هذا كان تعليقي وخوفي الأول من العرض في أول يوم انعرض فيه.
أما الشي الثاني الي هو الموسيقى، انه شلون في لعبة اسمها Prince of Persia وسمعنا في ألعاب من السلسلة سابقاً تستخدم فيها موسيقى شرقية أو أهازيج تناسب طبيعة العالم، فشنو هالموسيقى الي استخدموها في العرض؟؟؟. ومثل تعليقي الأول، ما نعرف لحد الآن شنو الي بصير في اللعبة كاملة، لكن أتمنى ان اختيار الموسيقى فيها مو مثل الاختيار الي شفناه في العرض. وويا هذه المخاوف الي كانت عندي، كنت مركز عليها أكثر من تركيزي على اللعبة نفسها والتدقيق في القيمبلاي الي كان ينعرض في التريلر. فبعد يوم قررت اني أشوف التريلر مرة ثانية وثالثة عشان أشوف اللعبة كلعبة، لأنها شدت انتباهي انها بمنظور 2D، وانها من نفس مطورين ألعاب Rayman الأخيرة، فكان في بصيص أمل ان القيمبلاي راح يكون شي يبهرني. وفعلاً، كل ما دققت في الحركات الي في التريلر كل ما تحمست أكثر حق اللعبة، طبعاً مع النقاط الي ذكرتها قبل سوي للحين موجودة في بالي.
من التريلر شفت لعبة 2D تركز على الحركة والـ Platforming ومن الي كان واضح انها متقنة على الأقل شكلياً. وويا كل إعادة للتريلر كانت تذكرني بالحركة في لعبة Guacamelee والي هي وحدة من ألعابي المفضلة وأنصح كل شخص مالعبها يروح يلعبها. اصلاً أقول لروحي هالكلام لأني لحد اليوم مالعبت الجزء الثاني. المهم، اني بعد ماركزت على القيمبلاي في التريلر تحمست وصارت من الألعاب الي ابي ألعبها، يعني حتى لو ماكانت Prince of Persia فكنت بلعبها لأنها ذكرتني بـ Guacamelee وانا كنت حاب Guacamelee.
وبعدين لما في مؤتمر Ubisoft نفسهم عطونا معلومات أكثر زاد حماسي لأنهم أكدوا انها لعبة Metroidvania، وركزوا على بعض جوانب الحركة الي شكلياً تبين انها متقنة، طبعاً مالعبتها فما أقدر أقول أكيد اذا راح يكون التحكم متقن وسلس لكن هذا الي يبين. وعجبتني المقاطع الي فيها التحكم في الوقت، أو هني أكثر انك تخلي سراب لنفسك في الماضي وتواصل انت الحركة بالشخصية، وبعدها ترجع للسراب وتحل الألغاز بهذه الطريقة. كل هذه الأشياء الجديدة على السلسلة تبين انها حلوة واضافات ممتازة، بس كل شي يعتمد على استخدامها في اللعب وشنو الألغاز والمناطق الي صمموها حق تستخدم فيها كل هذه الأشياء. وغير هذا، في تركيز أكبر على القتال ويمكن أقدر أقول بشكل ما شفناه في السلسلة من قبل. يعني كان في زعماء كبار ووحوش تقاتلهم، ما عرف الصراحة شلون أحس عن هالجانب لحد الحين، يعني نص ونص بين اني يمكن اكرهه وبين اني احبه. لأن الأهم عندي هو الـPlatforming وتصميم المراحل والألغاز نفسها مثل ما قلت في الحلقة الماضية لما تكلمت عن الريبوت.
ومن المعلومات الي قالوها بعد ان اللعبة كبيرة وفيها مناطق وايد عشان تستكشفها وبأسلوب الميترويدفانيا، يعني في طاقات مو موجودة عندك وتكتسبها ويا اللعب وتفتح فيها مناطق جديدة في مراحل قديمة. هذا الشي يحمسني في The Lost Crown لأنها لعبة 2D، مع اني كرهت هالنظام في الريبوت لأنها لعبة 3D. بس بعد في بعض التحفظ من ناحيتي، فهل بصير مثل الريبوت ان في ألغاز حلوة لكن بسبب طبيعة اللعبة الي فيها Backtracking فبتشوف نفس المكان أكثر من مرة وبتحس بالتكرار. لأني مثل ماقلت في الحلقة الماضية ان جوهر Prince of Persia بالنسبة لي لما تكون مناطق خطية فيها لغز يختبر استراتيجتك في التخطيط واستخدامك للحركات والقفز بشكل متواصل ومتقن، فهل راح نفقد هالشي في لعبة ميترويدفانيا فيها رجوع لنفس المناطق أكثر من مرة بسبب طبيعة تصميم الخارطة؟ وهل نقدر نثق في يوبيسوفت انها تعطينا عالم مفتوح ممل ومحشو كعادتها في ألعابها؟ كلها تساؤلات…
فللحين في تساؤلات وايد في بالي أخاف من ان اجاباتها تكون بالفشل، لكن الي ريح بالي شوي كلام الإعلاميين الي جربوا اللعبة وقالوا ان التحكم متقن وكل شي تنفذه يكون بالسلاسة الي تتوقعها في بالك. فعلى الأقل أقدر أحدد ان التحكم بكون شي ما أخاف منه، لكن تظل باقي الأسئلة ان ليش بقرارهم انك ماتلعب بشخصية الأمير وشلون طبيعة هذه الشخصيات وشنو قصتهم، واختياراتهم للحوارات شلون بتكون وحتى بالنسبة للموسيقى. والأهم من كل هذا ان تصميم الخارطة والعالم كله يكون متقن، فمافي شك ان بتصير عندك حركات وخصائص وايد تقدر تنفذها، لكن هل العالم نفسه يخليك تستمتع بتأدية هذه الحركات في الأماكن الي صمموها لك؟ وهذه اسألة بنعرف اجابتها لما تنزل اللعبة.
فردة فعلي السلبية بداية ما انعرض التريلر تغيرت لنوع من التفاؤل حق اللعبة بعد ماركزت على القيمبلاي نفسه وسمعت ترويج يوبيسوفت لمحتويات اللعبة. فبجرب The Lost Crown وبعطيها فرصة. وهذا رأيي من كل شي شفناه وسمعناه لحد الحين، لكن تظل تجربة اللعبة نفسها هي الي تحدد رأيي النهائي. وكانت هذه حلقة اليوم، كان وياكم علي الساهي ومع السلامة.
