للاستماع لحلقة البودكاست عن لعبة Ship of Fools:
حلقة اليوم بتكلم فيها عن لعبة Ship of Fools من Fika Productions الي هم مجموعة مطورين مستقلين من كندا عددهم 9 أشخاص على حسب الي شفته، واللعبة من نشر Team17 وهم الي وفروا كود اللعبة لغرض التغطية. في البداية فكرت اللعبة من نفس مطور The Swords of Ditto لأنها شكلياً تشبهها من ناحية الرسم، وحتى طريقة اللعبة مشابهة تقريباً. لكن هذه من مطورين مختلفين ومو نفسهم، بس ان كانت تشبهها فهذا شي حلو بالنسبة لي لأني أعتبر The Swords of Ditto وحدة من أفضل ألعاب الايندي من الجيل الماضي، فكنت متحمس اني أجرب Ship of Fools. فقاعد ألعبها حالياً، فخلونا نتكلم عنها ونشوف.
فكرة اللعبة وتوجهها انها بنمط ألعاب الـ Rouge-Like. فعندك سفينة وانت تبدأ على جزيرة صغيرة، ولما تركب السفينة وتبدأ الإبحار فتبدأ اللعبة وياها. برجع لموضوع الجزيرة بعدين، بس لأنها في البداية فاضية مافيها شي تسوييه، فلازم تبدأ بانك تُبحر. وهني يبدأ نظام اللعبة، أول ما توصل للبحر تطلع لك خريطة فيها خانات تختار منها. فتختار مثلاً الخانة الي على يمين المكان الي بدأت منه، فتصير السفينة تتحرك وتروح للمكان الي اخترته، وانت تتحكم بشخصية على السفينة وتشوف ان الأعداء بدأوا يطلعون في البحر. سلاحك مدفع موجود على جانب السفينة، والطريقة الي تقاتل فيها الأعداء انك تطلق عليهم بالمدفع، فأنت تتحكم بزاوية المدفع وشحن الذخيرة. كل ما خلصت الذخيرة فعندك صندوق على ظهر السفينة تأخذ منه ذخيرة وتحطها في المدفع وتواصل القتال. فأول ما تبدأ في بداية البحر يكونون الأعداء أقل، وكل خانة تروح لها بعدين بتزيد أعدادهم.
لحد الحين الفكرة بسيطة، وهذه فكرة اللعبة كلها، لكن طبعاً ما تظل نفسها من البداية للنهاية فتبدأ تتطور مع الوقت. فشلون يشتغل الكومبات في اللعبة، ان عندك مدفع على السفينة وتقدر تشيله من مكانه، لأنها لعبة 2D ومنظورها من فوق، فلما انت تكون في السفينة الأعداء يا يكونون في الجزء الأعلى من الشاشة أو الجزء الأسفل من الشاشة. وعندك أربع أماكن تقدر تركب فيها المدفع، 2 باتجاه و 2 بالاتجاه الثاني، الي هو فوق وتحت. فعلى حسب وين يطلعون الأعداء لازم تحرك المدفع عشان تقدر تطلق عليهم، وفي نفس الوقت لما تخلص الذخيرة لازم ترجع للصندوق عشان تشحن المدفع من جديد. وهني تجي الصعوبة، لأن السفينة عندها نقاط HP محددة فاذا وصلوا لها الأعداء وبدأوا يخربونها، فمع الوقت راح تغرق. واذا غِرقَت فهذه نهاية الرحلة وترجع للجزيرة من جديد، وتفقد أي فلوس جمعتها أو أي أنواع ذخيرة جديدة أو أي ترقيات مؤقتة للسفينة أو الشخصية. لكن تظل عندك عملة ما تفقدها لما تجمعها في البحر، وهذه تظل وياك على الجزيرة، وهي الي تستخدمها عشان ترقي السفينة والمدافع قبل لا تبدأ الإبحار من جديد.
فهذا نظام الـ Rouge-Like في اللعبة، انك في كل مرة تدخل البحر، تحاول توصل لمكان أبعد وتجمع الموارد الي تظل وياك بعد ما تموت. عشان لما تموت وترجع للجزيرة تقدر ترقي وتدخل البحر وتوصل لمكان أبعد. لكن مو بس هذا الي يصير في اللعبة. في الخريطة الي تختار فيها المكان الي بتبحر اليه، في أماكن عليها رموز تختلف، تعطيك كنوز، أو نوع ذخيرة جديد، أو إمكانيات لطلقات المدفع، مثلاً يزيد قوة ضرباتها، أو تتحول الطلقات لنارية أو جليدية، وتحصل خشب عشان تصلح أضرار السفينة، أو قلادات للشخصية تطور من خصائص وضربات معينة. في البداية يكون عندك مدفعين، واحد تلقائي يصوب على الأعداء ويضربهم، انت عليك بس تشحن الذخيرة لما تخلص أو تغير مكان هذا المدفع، ومدفعك الثاني هو الأساسي الي انت لازم تطلق منه يدوياً. مثل ما قلت ان على ظهر السفينة في صندوق للذخيرة، وظهر السفينة شي ثاني لازم تفكر فيه، لأن عندك 3 أماكن عشان تحط عليها أشياء. فعندك صندوق الذخيرة، ولما تُبحر تحصل صناديق جديدة، بعضها فيها ترقيات لقوة الضربة مثلاً، أو الي تعطيك نوع ذخيرة جديد مثل قذائف جليدية. فانت محدود انك تخلي 3 صناديق في نفس الوقت بس، ونفس الأماكن الـ3 هذه تستخدمها حق تحفظ أشياء ثانية. لأن أي شيء موجود على ظهر السفينة ومو محطوط على هذه الخانات فراح يختفي لما تنتقل من خانة لثانية في الخريطة أو في البحر. وقلت لكم ان السفينة تتضرر لما يضربها العدو فعندك قطع خشب تقدر تستخدمها عشان تصلحها، لكن هذه بعد لازم تحفظها على وحدة من الخانات الثلاث عشان تستخدمها بعدين لو احتجتها. مثلاً في جزء من الخريطة تحصل الخشب، لكن حالياً سفينتك مو متضررة فتبغي تحط الخشب لبعدين تقدر تستخدمه لما تتضرر، لكن ماعندك مكان فاضي فلازم تتخلص من الصندوق الي يزيد عدد الطلقات في المدفع مثلاً. فهني يصير تفكير بين شنو الي تحتاجه على المدى الطويل، فهل تتخلص من الخشب لأنك يمكن تحصله بعدين، وما يهمك عدد الطلقات. وكل هذه الأشياء ما تبقى وياك لما تغرق، لأن كلها ترقيات مؤقتة تختفي بعد ماتموت، فتبغي كل رحلة تشوف شنو الأشياء العشوائية الي تحصلها وتفكر في الأشياء الي تبغي تحافظ عليها والأشياء الي تتركها. وتصير كل رحلة موازنة بين الموارد الي تحصلها وعندك وقت تفكر قبل ما تختار خانات البحر الي بتسافر لها.
هذه المحدودية الموجودة في البداية تبدأ تتحسن مع اللعب، فلما تجمع العملة للترقية تصير عندك 4 أو 5 خانات على ظهر السفينة عشان تحط أشياء أكثر. وتقدر ترقي قوة السفينة فالـ HP حقها يزيد من بداية رحلتك وتظل وياك بشكل دائم. وتبدأ تحصل أنواع جديدة من المدافع، وحتى نفس المدفع تقدر ترقي طاقته، فيصير يِتسع لذخيرة أكثر، أو سرعة الإطلاق تزيد. فالسفينة هي الشي الأساسي الي تبغي تركز ترقيه، لكنه مو الشي الوحيد. لأن عندك شخصيات مختلفة تحصلهم في البحر وبعدين تقدر تلعب فيهم. كل شخصية عندها طاقة خاصة، الأعداء الي في البحر تقتلهم بالمدفع، لكن في أعداء يدخلون ويجون على ظهر السفينة، وهني شخصيتك تقدر تقاتلهم Melee، ففي شخصيات عندهم سرعة كومبو الضربات عشان تقتلهم بسرعة، فكل شخصية عندها طاقة أساسية وحدة، والباقي تحصلهم في رحلتك على شكل قلادات لكنها مؤقتة لكل رحلة.
فالحلو في اللعبة الاستكشاف انك تُبحر لأماكن جديدة، لانك بتحصل شخصيات جديدة تضيفهم للجزيرة، في بعضهم يبيعون عليك ترقيات وبعضهم انت تلعب فيهم. وفي كل رحلة تحصل نوع جديد من الذخيرة تسهل عليك الرحلة، وبسبب العشوائية تشوف الحظ احياناً من بداية الرحلة. أتذكر في وحدة من رحلاتي حصلت صندوق احطه على ظهر السفينة ويزيد الـ HP حق السفينة أتوقع كان 4 HP زيادة. وفي خانات في البحر بدأت أحصل دروع أركبها خارج السفينة، فمن بداية الرحلة كانت سفينتي لها HP وايد ومحصنة من الضربات. وبعدين وصلت لجزيرة صغيرة حصلت فيها صندوق عليه طير، وهذا الطير لما تركبه على ظهر السفينة يبدأ يبيض خلال وقت معين، وتستخدم البيض كذخيرة. وكانت الذخيرة متفجرة، فلما تضرب عدو واحد تنفجر وتقتل كل الي حوله، وفوق هذا حصلت قلادة حق شخصيتي تضيف طاقة نارية لطلقات المدفع العادي. وفي هذه الرحلة وصلت للزعيم الأول وهزمته ووصلت للبحر الثاني وقدرت أوصل للزعيم الثاني لكن ماقدرت أهزمه لأن للحين كنت محتاج ترقيات دائمة. أي صح، ما قلت لكم، في زعيم بنهاية كل بحر. كل خريطة عبارة عن بحر جديد، ودائماً تبدأ بنفس البحر وكلها تكون بنفس الترتيب أعتقد، فمو عشوائية، لكن الخانات الي في كل خريطة والموارد الي تحصلها هي عشوائية. فالهدف دائماً انك تكمل الرحلة في البحر وتقتل الزعيم، وبعدها تروح للبحر الي بعده ومناطق وأعداء جدد، وتوصل للزعيم وهكذا. بس كل مرة تموت حتى لو هزمت الزعيم، ما تبدأ الرحلة من البحر الثاني، لازم ترجع للبحر الأول وتوصل للزعيم وتهزمه وبعدين توصل للبحر الثاني. لكن الحلو ان البحر الأول يصير سهل مع الوقت وماياخذ منك مجهود فتصير أسهل تبحر للمكان الجديد بسرعة.
تطبيق اللعبة نفسه حلو، أول مرة بدأت ألعبها قعدت 4 ساعات تقريباً، وفي البداية كانت رحلتي قصيرة بسرعة أموت، بس بدأت أحصل العملة المطلوبة وأرقي السفينة، ووصلت لمرحلة صرت فيها أقدر أوصل للزعيم الأول وأهزمه بسهولة وأوصل للبحر الثاني والزعيم الثاني في كل رحلة ابدأها لكن ماقدرت أهزمه لحد الحين. ومع الوقت أكيد برقي السفينة وبقدر حتى الزعيم الثاني اهزمه بسهولة وأشوف شنو في هذا المحيط الي توفره اللعبة. فيها جانب من الإدمان الحلو في هالنوعية من الألعاب، والمكافآت الي تحصلها تجي بتوقيت مناسب عشان لا تحس انك قاعد تتملل لأنك تموت بسرعة، وما تجي بسرعة عشان تفقد التحدي، فالتوازن من الي لعبته لحد الحين كان مضبوط.
واللعبة فيها Co-Op على نفس الشاشة ان كل لاعب يتحكم في مدفع بس ماقدرت أجربه مع أحد فما اعرف هل تصير اللعية أسهل، أو هل انها تتأقلم وتزيد عدد الأعداء عشان تصير أصعب. وفي خيار للأونلاين بس لأني ألعب على Steam فكنت أقدر أضيف ناس من قائمة الأصدقاء بس، فما في Matchamaking ويا أشخاص عشوائيين.
