للاستماع للحلقة:
بكلمكم في هذه الحلقة عن لعبة ترجع ذكريات جيل سابق بأكثر من شكل، وأكثر شي يميزها هو الكوميديا اليابانية الي يخليها تجربة تذكرني بعدة ألعاب نزلت على بلايستيشن 3. وهالشي ينطبق مو بس على الأفكار، لكن حتى على التطبيق. فكلامي اليوم عن لعبة Wanted: Dead الي نزلت ببداية سنة 2023، ولكن تحسها انها نزلت في 2013.
يمكن تستغربون اذا قلت لكم، لكن حبيت هاللعبة أكثر من اللازم. هل هي لعبة ممتازة أو حتى جيدة باللي تقدمه؟ لا نهائياً. هاللعبة متوسط تقاييمها 57، وهالرقم بيعطيكم فكرة عن جودة هاللعبة. وأنا أتفق ان جودتها ضعيفة، لكن بالرغم من كل هذا، حبيت اللعبة وخلصتها، وأبي أرجع لها أكثر من مرة وأعيد لعبها في المستقبل. والسبب مثل ما قلت في البداية ان هذه اللعبة تذكرني وايد بمجموعة ألعاب لعبتها على بلايستيشن 3، ويمكن الأغلب يعتبر هالوصف كشيء سلبي، أما بالنسبة لي فهو إيجابي اذا باخذ من التجربة درجة استمتاعي باللعبة بدل من جودة اللعبة نفسها. فشنو الي خلى Wanted: Dead ممتعة بالنسبة لي؟
عشان أجاوب على هالسؤال، بعطيكم أسماء بعض الألعاب، والي منكم لعبها واستمتع فيها، بيعرف مباشرة ليش أنا أحس بهالشعور اتجاه Wanted: Dead، ويمكن حتى توقفون الحلقة وتروحون تلعبونها بدون ما تحتاجون تسمعون وصفي لها. فخلونا نبدأ… Lollipop Chainsaw…. Deadly Premenation… Onechanbara… Shadows of the Damned… Killer is Dead… No More Heroes… Dark Dreams Don’t Die… Deadpool. حسيت اني بستدعي وحش وأنا أقول الأسماء. فشنو الرابط الي يجمع كل هالألعاب الي ذكرتها؟ اذا تعرفون الإجابة فتعجبوني عندكم ذوق حلو. ولعبة Wanted: Dead تصف وياهم في نفس التصنيف.. وخلاص يحتاج بعد أكمل تسجيل الحلقة؟ وحق الي مايعرف هالألعاب، فتخيل نوعية الكوميديا الموجودة في سلسلة Yakuza.. يمكن.. تقريباً. لكن بنظام لعب متوسط اذا مو سيء حتى.
لعبة استهبالية، تحشيشية ويا الشخصيات والقصة والحوارات، وحتى بعض القيمبلاي. التمثيل الصوتي سيء، لكن مو سيء بانه يكرهك في اللعبة وماتهتم في أي شي يقولونه، بالعكس سيء انه يجذبك تشوفه وتركز فيه لأنه يضحك من سوءه ومن الكلام الي قاعد ينقال… وواضحة انها مقصودة في بعض الأحيان انها تكون بهالسوء، أو يمكن مو مقصودة؟ محد يعرف. يعني تكلمت في حلقة سابقة عن لعبة From Software الي هي Metal Wolf Chaos وشلون الحوارات والأحداث في ذيك اللعبة تضحك من غرابتها، ونفس الشي ينطبق في Wanted: Dead. فطالعة حلوة من هذه الناحية، أو على الأقل، تناسب حسي الكوميدي وماعرف عنكم. لكن في مشاهد صج ضحكت بقوة أول ما بدأ المشهد، أو لما يكون في Cut ونروح للمشهد الي بعده والي قاعد يصير كلش غريب وغير متوقع فجأة من الأحداث، أو ماله علاقة نهائياً باللي كان في المشهد الي قبله.
بس خلونا الحين عن القصة، شنو اللعبة نفسها؟ Wanted: Dead لعبة أكشن من منظور الشخص الثالث تركز أكثر شي على قتال الـ Melee بالسيف، لكن فيها شوي من ألعاب التصويب أو الـ Cover Shooters. واعتقد وقت مناسب أتكلم عن بعض المطورين الي اشتغلوا على هاللعبة، المُنتج Yoshifuru Okamoto والمُخرج Hiroaki Matsui كانوا من ضمن فريق Ninja Gaiden Black و Ninja Gaiden II على الاكسبوكس و Devil’s Third على الـ WiiU و لعبة Samurai Jack الأخيرة الي نزلت في 2020. فتعرفون ان خلفيتهم في هذه النوع من ألعاب الأكشن… لكن هل Wanted: Dead توصل لجودة أعلى هذه الألعاب… لا. لكن بنفس الوقت اهي مو بالسوء الي يخلي أنظمة اللعب فاشلة وما تستاهل أحد يجربها أو يلمسها. لأنه حتى لو ان القصة والشخصيات كانت كوميدية وتضحك، ما يفيد هالشي اذا اللعب نفسه كان فاشل ومضروب ومايشتغل صح. اهي لعبة أكشن بسيطة بالعُمق، أقل من حتى ألعاب Ninja Gaiden Sigma، لكن بسيط ماتعني انه سيء، لأن الأساس موجود ويشتغل بالصورة الي تتوقعها. عندك كومبو بسيط من الحركات يا اما تهجم بالسيف بعدة ضربات ورى بعض، أو انك تستخدم مسدس الـ Pistol بوسط الكومبو عشان تقطع حركة الأعداء أو دفاعهم وتخليهم في حالة Stun عشان تقدر تواصل تضربهم بالسيف. وهذه درجة العُمق الي توصل لها Wanted: Dead في الـ Melee، وعندك شجرة مهارات، لكن تفتح فيها أشياء بسيطة مثل Charge Attack و تقوي مستوى الضرر، لكن ما يتطور هذا الأساس في الكومبات عشان توصل لشيء كبير من هذه الناحية. وبالنسبة للـ Melee الي موجود فهو يشتغل بالدرجة المطلوبة منه ومافيه مشاكل كبيرة تأثر فعلياً على التجربة، سوى مثل ما قلت انها ما تتعمق أكثر من الأساس نفسه.
والجانب الثاني من الكومبات هو للتصويب من بعيد، وفي نظام Cover بدائي، انك لما تكون خلف حاجز أو جدار فالشخصية تلقائياً تدخل في الـ Cover، فيعني ماعندك تحكم كامل انك تضغط زر عشان تدخل الـ Cover أو تطلع منه. وهالشي يسبب بعض المشاكل احياناً انك تبي تنخش ورى جدار هبيط، والنظام نفسه ما يدخلك في الـ Cover فالأعداء يصوبون عليك ويضربونك. وعندك أنواع مختلفة للأسلحة منها SMGs وLMGs و Shotguns و Grenade Launchers. وفي شجرة المهارات تفتح الـ Grenades بنوعين مختلفين.
وهذا الكومبات ببساطة، وحرفياً ببساطة لأنه مافي تطور كبير من بداية اللعبة لنهايتها. وحتى ان التركيز على الـ Melee أكثر من التصويب، واللعبة نفسها تشجعك وتكافئك انك تقاتل بالـ Melee؛ لأن الذخيرة محدودة وماتكفي انك تقتل كل الأعداء في المرحلة، وبنفس الوقت لأن نظام الـ Melee أعمق، وبالنسبة لي أمتع من الـ Shooting.
الي يخلي القتال القريب حلو بالرغم من بدائيته، انه في Animations حلوين للقتال، وفي سرعة تخليك تستمتع وانت تستخدم هالنظام. فعندك Block اذا العدو يستخدم السيف، وعندك Dodge عشان تبتعد من الضربات الي Unblockable، وعندك Parry اذا توقيتك للبلوك كان قبل ما يضربك العدو مباشرة، والـ Parry يخلي العدو في حالة Stun، وحتى انك تفتح من شجرة المهارات Counter Attack حق هذه الحالة تخليك تقطع ارجل العدو… أي في تقطع مو طبيعي في هاللعبة وهو أحد الأسباب الي خلاني استمتع بنظام القتال. تقدر بالسيف تقطع ايادي العدو، فاذا كان يستخدم مسدس فمايقدر يطلق عليك، وتقدر تقطع أرجل العدو، ويطيح على الأرض، واذا ما قتلته فيفخخ نفسه بقنبلة ويفجر نفسه وهو يحاول يوصل لك على الأرض، وهالشي يضر الأعداء القريبين منه. (ففي حالات أسوي Counter Attack للعدو عشان أقطع رجايله بدون ما أقتله لأني أعرف انه بيفجر نفسه وفي مجموعة أعداء حوله، فاستغل هالحالات في مصلحتي، وهذه كانت في أحد زعماء المرحلة وفادتني الخطة بشكل كبير). وفوق هذا فلما يكون العدو في حالة Stun تقدر تسوي Special Attack تضغط دائرة ومثلث في نفس الوقت وتسوي Execution مباشر، فتقطع راس العدو، أو تطيحه على الأرض وتفجر مخه بالـPistol، أو تلصقه في الجدار وتفجر مخه، أو تدخل السيف من تحت راسه. والـ Animaition حق هالـ Executions حدها دموية وممتعة.
وبعد نظام الـ Melee فيه عداد ينشحن لما تسوي الـ Executions أو لما تقتل الأعداء بـ Headshot وغيره، وهالعداد يعطيك Super، لما ينشحن وتستخدمه فيخلي مجموعة من الأعداء الي حولك في حالة Stun بنفس الوقت، وتقدر تسوي لهم execution متواصل من واحد للثاني. وبعد هني في Animation ممتاز لهالضربات، أتوقع في أكثر من 80 حركة مختلفة حق هالضربات وفي لها تروفي انك تشوفها كلها، وأنا خلصت اللعبة في 11 ساعة وبعد للحين ما شفت كل الـ Executions. ومن الي شفتها كلها حلوة كأنها من فلم John Wick وفيها ابداع بطريقة استخدام المسدس والسيف على حسب مكانك في المرحلة أو اذا كنت قريب من جدار، أو عند طاولة أو على الأرض.
فصح ان نظام القتال بسيط وبدائي، لكن تشوفون من وصفي ان لحد الحين فيه أكثر من مجرد “اضغط زر مربع واقتل كل الأعداء”، وهذا الشي الي خلاني استمتع بالرغم من بدائية النظام نفسه، لأن كل شي حول النظام حلو، سواء من ناحية التقديم والـ Presentation، او ميكانيكية السوبر الي تحصلها من التفادي والصد والهجمة المضادة، الي تخليك تبي تبدع في مواجهتك ويا أمواج الأعداء الي يرمونهم عليك، بدل من انك تقاتلهم لمجرد المقاتلة. فعندك دافع داخلي يخليك تستمتع باللي تسويه في القتال خارج عن نظام اللعب نفسه. وهذا بالنسبة لي الفرق الي يبين اللعبة تهتم بتقديم القتال بشكل حلو بالرغم من بساطته، فتحس انهم يعرفون محدودية ميزانيتهم أو خبرتهم أو أي كان سبب البساطة، ولكن بالرغم من هذا قرروا يشتغلون حول هذه المحدودية ويعطونك شي ممتع باللي موجود عندهم. فهي من الألعاب الرخيصة والي اهي تعرف انها رخيصة لكن ما يمنعها انها تقدم شي مو شرط يكون خرافي، لكن تحس بالشغف وراه.
اللعبة عدد مراحلها قليلة، لكن في صعوبة تجي من نظام الـ Checkpoint في اللعبة، وهذا أحد الجوانب الي تذكرني بألعاب PS3 والي انا حبيته في أغلب الأوقات، لكن يمكن الأغلب يكرهه لأن حتى انا أكرهه في بعض المراحل. اللعبة ما تسوي Autosave من بعد كل موجة أعداء، لأن لازم توصل لـ Checkpoint معين وهو Drone الي يخليك تعدل سلاحك الرئيسي، وهني اللعبة تحفظ مكانك في المرحلة. فحتى اذا واجهت مجموعة أعداء ورحت لـ Cutscene ومنطقة جديدة، لكن ماحصلت هالـ Checkpoint في المنطقة الجديدة، فاذا مت بترجع للمكان القديم. يعني لا تتوقع لأنك شفت Cutscene جديد ان اللعبة حفظت التقدم… لا، لأنك ما وصلت لـ Checkpoint جديد. والمراحل كلها خطية وعبارة عن مجموعة غرف أو مناطق واسعة، توصلها ممرات، والمراحل فاضية مافيها وايد أشياء تتفاعل وياها سوى الـ Collectables الي عبارة عن مستندات تعرفك بالشخصيات. فالحين تحسون ليش هذه اللعبة تذكرني بألعاب PS3، لأنها عقلية تصميم الألعاب في ذيك الفترة. يعني الصراحة Wanted: Dead كأنها ريماستر للعبة نزلت في ذاك الجيل مع دقة أعلى لكن مافي وجود للعبة الأصلية. ولأني شخص أحب هالنوع من الألعاب وللحين أرجع وألعبها، فما أشوف ان هذا عيب أو سلبية سوى ان في بعض الأماكن اللعبة تصير بطيئة وينزل الـ Frame Rate وهذا مو مقبول للعبة PS5 بهالبساطة في المظهر والمراحل.
المهم، انه بنهاية هذه المراحل في زعيم، وهني تبدع اللعبة، على حد مستواها يعني، مع الزعماء، لأن في لهم أفكار حلوة وانت تواجههم. ومستوى صعوبتهم قفزة كبيرة من المرحلة نفسها الصراحة وبتموت أكثر من مرة وانت تواجههم. فالزعيم الأول عبارة عن دبابة عندها أرجل عنكبوت لازم تقاتلها بالسيف (أي، سمعتوا الكلام صح، ولا نسيتوا اني قلت لكم هاللعبة تحشيشية) فعشان تقاتل الدبابة لازم تضرب أرجل العنكبوت وتطيح الدبابة وتقدر تسوي لها Execution، وبعدها تقدر تقتل الأعداء الي عندهم Grenade Launcher وتستخدمه ضد الدبابة. وفي Boss تلبس ثياب Stealth Camo، شكلها ماخذته من Metal Gear، وتقاتلها على سطح بناية بوسط المطر. فلما تختفي، تعرفون شنو تسوون ما يحتاج أشرح لكم. ففي أفكار حلوة حتى وان كانت بسيطة، وهذا أكثر شرح مناسب للعبة كلها، حلوة بالرغم من بساطتها وبدائيتها.
لكن نرجع لجانب الكوميديا شوي، لأن شكلكم نسيتوا ان هذا أكثر جانب عجبني. يعني بعد ما قاتلت الدبابة الكبيرة في مواجهة حماسية وبمستوى ضخم. المهمة الي بعدها تبدأها في مطعم Ramen وتشتغل أغنية وانت لازم تحاول تاكل أكثر عدد صحون من الـ Ramen على وقع الأغنية بانك تلعب Rhythm Game وتضغط الأزرار بالوقت المناسب، وكل ما سويت كومبو بدون أخطاء تاكل أكثر من الصحن لحدما تخلصه، ويجيك الصحن الي بعده وتزيد سرعة النوتات، ولما تخلص هالصحن، فيجيك صحن ثالث وتزيد النوتات لخطين بنفس الوقت بدل خط واحد. وهالـ Mini-game يجي فجأة وكلش ماكنت متوقعه، وهذا الي يضيف بالنسبة لي على غرابة الكوميديا في هذه اللعبة. القصة عن مجموعة مرتزقة يشتغلون في شرطة Hong Kong، وانت تلعب بوحدة سويسرية، وفريقك فيه أمريكي وروسي وهولندية. والعالم نفسه مظلم وتعيس و Cyberpunk فانت تسوي مهمات للشرطة الي ممولة من شركة كبيرة تخصصها في بناء بشر اصطناعيين، أو روبوتات بذكاء اصطناعي خارق. والي فجأة تقرر انها ما تبي تكمل العقد ويا الشرطة وتستخدم شركة حماية خارجية، فأنت تبي تكتشف الغموض ورى كل الأشياء الي تصير، وفي أشياء عن غسيل المُخ ومسح الذكريات واشياء تعيسة عموماً… ففجأة انك تخليني أروح لـ Karaoke وأغني أغنية ماعرف بأي لغة مباشرة من بعد Cutscene تعيس وبدون مقدمات، فتصير بشكل غير متوقع واللي يضيف للغرابة بالنسبة لي. يعني بتوقعها في لعبة Like a Dragon على الأقل لأنها لعبة عالم مفتوح وفيها أنشطة جانبية. لكن هني صج تفاجئك لأنها لعبة خطية وتتوقع منها شي محدد، فيصيدك Tonal Whiplash مو طبيعي ماعرف شنو ترجمتها بالعربي. لكن ما أوصفها انها سيئة، لأنها ضافت أكثر للتجربة بالنسبة لي كونها لعبة استهبالية وهذا يأكد على هالشي. وحتى أشياء ثانية مثل لما اللعبة كلها يكون الـ Cutscene عبارة عن in-engine وثلاثي أبعاد، فمن بداية ما تشغل اللعبة وانت متعود ان هذه طبيعة الـ Cutscenes، فلما فجأة بعد 4 ساعات تخلص مهمة ويجيك Animated Cutscene من ولا مكان فأكيد بتتفاجئ منه. أو حتى تروح للآركيد عشان تزور واحد من أعضاء الفريق الي وياك، وتشوفه قاعد يلعب وفجأة اللعبة تخليك تلعب لعبة الآركيد الي هو يلعبها. وحتى في مقر الشرطة في Crane Game تقدر تحصل مجسمات للشخصيات الي في اللعبة والزعماء وموسيقى جديدة حق الـ Mini-game لمطعم الـ Ramen.
Space Runaway لعبة آركيد 16-bit وهي عبارة عن Horizontal Shooter في الفضاء ومقسمة لمراحل بنهايتها زعيم. ومثل باقي ألعاب الشوتر الآركيدية مثل R-Type و Gradiusو Life Force، فانت تتحكم بروبوت ضخم هو عبارة عن سفينتك الفضائية في هذه اللعبة وتطلق على الأعداء. لكن داخل المرحلة بتحصل نوعين من الصناديق، الأول عبارة عن نوعية سلاح جديد، يتغير بين 3 ألوان، الأصفر للطلقات العادية، الوردي للطلقات الموجهة الي تلحق الأعداء، والأزرق لسلاح الليزر الي يتجاوز الأعداء ويمر خلالهم عشان يقتل كل الأعداء الي في خط واحد. ويتغير اللون على حسب الوقت، وانت لازم تشيل هالطاقة الإضافية على حسب اللون الي تبغيه عشان تختار السلاح، وأنا حبيت السلاح الأصفر وبدأت استخدمه في كل المراحل، ويقهرني لما يتحول إلى اللون الوردي قبل ما آخذه ويتحول سلاحي للطلقات الموجهة الي كلش ما أحبها، لأنها تصوب على الأعداء بشكل عشوائي وما عندك تحكم بدقة على السفن الفضائية الي تبي تصوب عليها. وهذه مشكلتي مع هذا لنوع من الأسلحة في كل ألعاب الشوتر الآركيدية، انها صح توجه السلاح بشكل تلقائي، لكن الأعداء يحتاجون عدد طلقات أكثر عشان يموتون. وبخصوص سلاح الليزر الأزرق فما أحب استخدمه لأنه بطئ بالمقارنة بالسلاح الأساسي. أما الصندوق الثاني ففيه رموز تتغير مع الوقت، وانت لازم تاخذها على الحرف الي انت تبيه، فحرف P يرفع من عدد الطلقات لسلاحك الأساسي، وعندك 5 تطويرات لكل سلاح، وحرف B يعطيك قنبلة إضافية، وحرف S يعطيك نقاط إضافية للـ High-score، وأيقونة الـ Option تضيف لسفينتك مركبة إضافية تطلق رصاص مختلف، وتقدر تغير اتجاهها بين قدام، وفوق وللخلف. فأنا احب اني اجمع حرف P للسلاح الأصفر الأساسي، لأنه يعطيني 3 طلقات لقدام، وطلقتين باتجاه Diagonal لفوق وتحت، فيغطي مساحة كبيرة، وبنفس الوقت آخذ 2-options وأخليهم يطلقون لقدام فأغطي مساحة كبيرة من الشاشة. مشكلة Space Runaway هي نفس مشكلتي مع باقي ألعاب الشوتر، انك لما تموت بعد ما جمعت كل هذه التطويرات، فأنسى انه يكون عندك فرصة ترجع وتخلص المرحلة، لأن تصميم أماكن الأعداء كل ماتوصل لمكان بعيد يزيد على أساس انه عندك كل التطويرات للسفينة. فلما تموت، سفينتك تفقد كل هالطلقات الإضافية وترجع لطلقة وحدة، فصعب انك تواصل، وتحتاج تجمع صناديق الي تكون بعيدة في مكانها عن بعض، فبالنسبة لي أحسن اني أصير Game Over وأرجع ألعب من البداية على اني أواصل بدون التطويرات. وصلت لزعيم المرحلة الثانية وماقدرت أهزمه، لكن اللعبة حلوة وأبي أحاول أخلص أول مرحلتين بدون ما أموت ويكون عندي كل الطلقات، وهذه الألعاب تعتمد على انك تحفظ أماكن الأعداء وتتوقعهم، فلازم تصير Game Over أكثر من مرة، وكل مرة توصل لمكان أبعد لحد تحفظ كل شي. فـ Space Runaway كلعبة شوتر آركيدية… جيدة.
اتخيلكم تقولون علي… عن شنو قاعد تتكلم؟ هذه حلقة Wanted: Dead شنو Space Runaway؟ هذه طال عمركم اللعبة الي انت تلعبها لما تروح للآركيد في واحد من الـ Cutscenes. وهي لعبة آركيد كاملة، فحبيت أحاكي غرابة الي تسويه Wanted: Dead بالقفز من شي لثاني فجأة بدون تنبيه، بمراجعة بسيطة للعبة الي داخل هذه اللعبة.
نرجع لـ Wanted: Dead. بالنسبة لي أشوف التوقعات لهذه اللعبة هو الي يحدد درجة استمتاعك فيها. سمعت عن اللعبة وشفتها في المحلات أكثر من مرة وحبيت اني أجربها، لكن ما كنت أعرف بالضبط شنو الي توفره هذه اللعبة. وللأمانة فخذيتها مستعملة وبسعر رخيص، وكنت أدري انها لعبة متواضعة، فلما لعبتها ومريت بهذه التجارب فبدأت أحبها أكثر مما توقعت، وبدأت تعجبني ويا كل مرحلة أكثر وأكثر، واكتشافي لنظام القتال والأشياء الممكنة فيه خلاها أعمق من الي انا كنت حاطه في بالي. اللعبة ونيسة الصراحة اذا بننسى شوي عن القصة المظلمة والتعيسة، لكن كلعبة فهي ممتعة، ومثل ماقلت أكثر من مرة انها تناسب حسي الكوميدي. لكن في نفس الوقت، اللعبة مو موجهة للكل. وأسامي الألعاب الي ذكرتها في بداية الحلقة هي بتحدد اذا تناسبكم Wanted: Dead أو لا من رأيي. لأن الشي الي يجمعهم كلهم، انهم ألعاب رخيصة، اذا بتحلل القيمبلاي فالتصويب عادي ومشابهة لأي لعبة Cover Shooter من منظور الشخص الثالث نزلت على PS3 فقديمة من هذه الناحية، و قتال الـ Melee جيد وأكثر تعمق من ألعاب الـ Slasher الرخيصة الباقية، لكنه ما يوصل لجودة عظماء هذا النوع من الألعاب، فصح انه في نظام Parry ممتع ويكافئ فهمك للعبة، لكن أكيد لا تتوقع Sekiro، وصح في كومبوات بالسيف والمسدس لكن أكيد لا تتوقع Devil May Cry 5. وأكرر، لأني ماكنت أعرف تفاصيل عن طبيعة اللعبة فكانت مفاجأة حلوة بدون أي توقعات، وبما اني وصفت لكم هذه الأشياء الي فاجأتني فهل بتكون عندكم نفس التجربة اذا لعبتونها، ولا خربت عليكم استمتاعكم بهذه اللعبة بسبب وصفي لها. لما أشوف متوسط التقييمات لهذه اللعبة، فأحس روحي أتفق وياها من ناحية تحليلية، لكن هل هي لعبة فاشلة ماتقدم شي ممتع، هني أنا أختلف لأن مثل ماوصفت في الحلقة، أشوف ان في لها جمهورها الي بيتذكرها بإيجابية في المستقبل، وأنا من ضمن هالجمهور.
وقبل ما أختم فخلوني أتكلم عن بعض الأشياء للبودكاست والمحتوى الي من فترة ما ذكرتها. باتريون يرسلون لي ايميلات اني اذكر المتابعين ان عندي صفحة للدعم، وبما انه مافي عندي أي داعمين على الموقع من فترة طويلة فخلوني اذكرها بنهاية الحلقة، ان اذا عجبكم المحتوى وتبون تدعموني بشكل مادي والي أنا شفاف بخصوص هالمبالغ الي تروح لاستضافة الموقع بشكل أساسي، أو اني استخدمها عشان أشتري ألعاب ايندي غريبة وأتكلم عنها في البودكاست، أو آخر مرة استخدمتها عشان أطور المايكروفون الي استخدمه في تسجيل الحلقات. فاذا بتدعموني على باتريون أو كو-في وبتحصلون الروابط في الوصف، فكلها تروح للمحتوى نفسه وما آخذ شي لنفسي. وتابعوني على تويتر اذا تبون تسألوني عن أي شيء أو تتكلمون عن أي لعبة في بالكم، فإذا في لعبة تشبه Wanted: Dead مثلاً أو أي لعبة تكلمت عنها وانتوا لعبتوها فأحب اذا تكتبون لي رايكم عنها ويمكن أجربها مستقبلاً إذا ما كنت لعبتها وأسوي حلقة أتكلم عنها. ولا تنسون تقيمون البودكاست على المنصات الي تستخدمونها للاستماع، وهذه من الأشياء الي انا ما أسويها للتسويق حق البودكاست، لأن الصراحة ماعندي خبرة فيها، لكن تقييم البودكاست من المستمعين ضروري ويساعد في نشر البودكاست. وحتى مشاركة الحلقات ويا اصدقائكم أو أي شخص تعرفونه ومهتم بمواضيع الحلقات الي أقدمها. هدفي من البودكاست من البداية كان عشان أشارك تجاربي ويا الأشخاص الي مهتمين بنفس نوعية الألعاب الي ألعبها، وأتكلم وياكم واسمع رايكم عنها بنفس الوقت. وبما انكم تسمعون الحلقات فمعناها في ألعاب تجمعنا، وأكيد انتوا لعبتوا أشياء أنا ما سمعت عنها، فبحب أني أجربها اذا تتوقعون انها بتعجبني فاكتبوها لي.
