السلام عليكم وياهلا فيكم بحلقة جديدة من بودكاست خفايف ألعاب… وياكم علي الساهي وهالمرة بكلمكم عن لعبة Golden Sun الي كملتها هالفترة. بديت ألعبها على نهاية شهر 5،، ووصلت لمنطقة في اللعبة، أو بالأحرى لزعيم كنت مو قادر أفوز عليه فتركتها شهر تقريباً.. بس بعدين رجعت لها بداية شهر 7 وقررت أتعلم أسلوب القتال بشكل أفضل، ولما رجعت لها وفهمت القتال أكثر، ماقدرت أهد اللعبة لحد ما كملتها. Golden Sun من ألعاب…أو سلاسل نينتيندو الي اختفت، وهي لعبة RPG نزل لها جزئين على Gameboy Advance وبعدين جزء أخير على DS نزل قبل 13 سنة…
هذه أول مرة ألعب فيها Golden Sun، فماكنت أدري شنو أتوقع منها، سواء من ناحية القصة أو نظام القتال.. فلما قررت ابدأها كنت حاط في بالي انها بتكون مشابهة لألعاب فاينل فانتاسي ويا عالم مفتوح، ومناطق منوعة بحصل فيها NPCs ومهمات جانبية. فكنت كلش متوقع بس أبسط تخيل حق أي واحد بيتخيل لعبة JRPG وتوقعاتي كانت عادية. وحتى أنا لما بدأت اللعبة كنت بس شغلتها على جهاز Analogue Pocket كنت أبي تجربة بسيطة حق اللعبة ما كنت مقرر أني ألعبها وأختمها أصلاً، مادري شنو كنت أسوي الصراحة… بس أول ساعة شدتني وكل ما كنت أقول خلاص ببند اللعبة، شفت روحي أكمل لحد خلص الجارج حق الـ Pocket بدون ما أحس. فأول يوم لعبتها فيها كانت تخليني القصة والحوارات أبي أكمل بس شوي زيادة عشان أعرف شنو بصير… يعني القتال نفسه بالبداية اعتيادي كلش… لعبة Turn-based RPG، عندك ضربات عادية، وعندك ضربات Elemental… شنو يقولون حق Elemental بالعربي؟؟… مو سحر، هي أكثر عناصر… ضربات عنصرية يعني؟؟ لا مايصلح عنصرية….
المهم هذه ضربات تستخدم فيها عناصر البيئة الأربع، الي هي النار، والأرض، والرياح، والماء. لكن في البداية ماعندك شي وايد فصايرة أكثر كأنها لعبة تركز على الضربات العادية…. بس والله كنت بعيد عن النظام الحقيقي، لأن القتال يتغير لشي أفضل بوااايد من الي تشوفه في بداية اللعبة،، ويمكن أخذ مني وقت، واضطريت اني أقرأ أونلاين شوي عشان أفهم نظام القتال.. بس لما فهمته أكثر، صدق أقدر أقول انه هذا الشي الي ميز اللعبة بالنسبة لي وبتكلم عنه أكثر بعدين.
فيعني هذه كانت بدايتي ويا اللعبة، الي شدني وخلاني أبي أكمل كانت القصة والشخصيات. ما بحرق وايد وبكتفي بأحداث بداية اللعبة بس عشان أشرح عن شنو تتكلم اللعبة.. تشوف في البداية اني في حادثة تصير وتبدأ حجارة اتطيح من جبل ألف وتدمر أجزاء من القرية الي انت عايش فيها،، وخلال هالحادث يموت 4 أشخاص من ضمنهم أبو الشخصية، وعائلة وحدة من صديقاتك الي يموت أخوها وأمها وأبوها. فأنت تلعب بعدين بـ Isaac ووياه واحد من أصدقائه من هذه القرية وتكتشف ان الحادثة الي صارت كان لها علاقة بالكيمياء، والي هي شي كان يستخدمه عصر قديم من البشر عشان يساعدهم في حياتهم.. يعني كل شخص كان عنده قدرة على التحكم بالعناصر، فالبشر كانوا يبنون جسور من الصخر مثلاً لأن عندهم قدرة على التحكم بعنصر الأرض، أو يقدرون يسيرون الرياح… بس هذا الجيل من البشر انقرض من مدة طويلة واندفنت وياه الكيمياء الي تعطي هذه القدرات للبشر، وكان في تَعَمُد على هالشي لأسباب انت ماتعرفها… فالمهم ان حادثة الجبل كانت لأن في أشخاص يحاولون يرجعون هذه الكيمياء للعالم ويبون يكتشفون أسرارها ويقدرون يتحكمون بقدراتها. وأنت كشخصية تربيت في قرية يعتقدون ان نشر هذه الكيمياء شيء يضر العالم والمفروض ما يكون في يد أي أشخص.. وأنت وغيرك من سكان هذه القرية عندكم قدرات مخبئة حق استخدام العناصر وان كانت بشكل قليل، الا انها مازالت موجودة بشكل بسيط… لكن الكل يحاول يخفي هالشي.
فالقصة تبدأ على ان Isaac واحد من الأشخاص الي عندهم هذه القدرة المخبئة وهو يقدر يتحكم بالنار، أو اسمهم Venus Adept. ويروح يتدرب عند واحد من العلماء الي يكشف حق Isaac عن سر الجبل وشنو الي موجود فيه… ويقول له عن الي يعتقده ويخلي Isaac وصديقه Garret يروحون يستكشفون الي صار لأنه مايعتقد ان الحادثة كانت شي طبيعي، بل يعرف انه حادث بسبب بشري. فهذه القصة باختصار، ولما تروح الجبل تكتشف الأشخاص الي يبون يرجعون أو يسرقون هذه الأسرار وانت تبي توقفهم عن هالشي..
يمكن تبين على انها قصة عادية في عالم الـ JRPG انت انت شخص يبي ينقذ العالم وغيره… لكن… الي يعجبني ان Golden Sun تختلف من هالناحية. وبحرق شوي من الأحداث الحين، فإذا ماتبي تسمع.. سرِع شوي من الحلقة. يعني في بداية اللعبة كنت أنا كلاعب أبي أوقف الأشرار على ما كنت أسميهم، لأن هذا الشي الي الكل الي في قريتي يعتقده، وصار اعتقاد عندي انهم أشخاص أشرار يبون يدمرون الأرض بالي قاعدين يسوونه. لكن ويا الأحداث تشوف ان في ناس تعرفهم يساعدون هالأشخاص فتبدأ تسأل روحك كلاعب، هل أنا فعلاً بطل القصة ومتيقن من ان الي قاعد أسويه بطولي 100%، ولا في نسبة من الخطأ في تقديري ومو قاعد أعطي فرصة للأشرار بين قوسين، انهم يشرحون وجهة نظرهم من الي قاعدين يسوونه. والصراحة في شي ماعجبني في النهاية… يعني كلعبة وجزء منفصل، لما تكمل هالجزء ما ينشرح لك أو ماتنتهي بنهاية تغلق الكتاب على القصة الي بدأتها اللعبة… يعني في أفكار انت طول اللعبة قاعد تسعى عشان تحصل جواب لها، لكن ماتحصلها…. بس هذا لأني لعبت الجزء الأول. ولما كملت الجزء الأول في الـ Cutscene الي بعد الأسماء في مشهد إضافي ومباشرة بعده To be continued.. فصادني فضول وبدأت الجزء الثاني الي هو The Lost Age،، وتفاجأت ان بدايته مباشرة بعد نهاية هالجزء، لكن تلعب بشخصية من الطرف الثاني من القصة. وهالشي الي انا ماكنت أدري عنه لما بدأت اللعبة. حتى ان الجزء الثاني يسمي اللعبة Book 2 أو الكتاب الثاني، ولما يكتب لك تفاصيل الجزء الأول يوصفه بالكتاب الأول.. فأي، القصة حرفياً ماتنتهي ويا الجزء الأول، فإذا بس تبي تلعبها كشيء منفصل، فقصتها ماتعطيك شعور بالخاتمة المُرضِية، وكشخص لعب 30 ساعة في الجزء الأول، حالياً ماعندي القوة اني ألعب الجزء الثاني مباشرة عشان أرضي فضولي… بس الصراحة يمكن أسوي هالشي لأن القيمبلاي عجبني ويمكن ماعندي مانع ألعب 30 ساعة ثانية من نفس الشي. المهم خلصت الحين فقرة الحرق، ونرجع نتكلم عن القيمبلاي والقتال.
فالقتال مثل ماقلت انه عندك شيين أساسيين، واحد منهم قليل في البداية الي هو قوة العناصر، والشيء الأول هو القتال العادي بضربات السيف الي عندك. اهي لعبة تبادل أدوار، فبداية كل قتال تختار من قائمة الضربات وتختار العدو الي بتسوي عليه الضربة، والقتال يمشي على حسب سرعة الشخصية، يعني مستوى الـ Agility هو الي يحدد من يضرب أول، وهل العدو أسرع منك فضربته تكون بوسط فترة هجومك بشخصياتك. أو اذا كنت تقاتل زعماء، ففي بعضهم يقدر يضرب مرتين في Turn واحد. أنا كنت مركز في البداية على الضربات العادية، لأن مثل ماقلت توقعها لعبة بهذا النظام، وان كل مازاد الـ Level حق الشخصية كل ماصارت قوتك أفضل… لكن هذا بعيد عن نظام القتال الي اللعبة توفره ومايعطيها حقها اذا لعبتها بس بهالطريقة. يعني المرة الأولى لما وقفت لعب لأني كنت أموت من الزعيم الي بنهاية صحراء “لامكان”… في أسامي عربية حق المناطق، صحراء لا مكان وجبل ألف، والطين Peak، وكهف اسمه قمة. المهم… فالسبب الي خلاني أوقف اللعبة لأن كنت أموت من الزعيم مع اني كنت أحس الـ Level حق الشخصية زين. الي صار اني ماكنت استخدم قدرات الـ “جن” بشكل صح. وهذا الشي الي ينضاف على القتال ويخليه مختلف عن الألعاب الباقية. تتذكرون ان قلت لكم في عندك ضربات عنصرية… خلاص بسميها عنصرية. ولأن كل شخصية عندها توافق ويا عنصر معين، فأنت تقدر تجمع مخلوقات اسمها “جن” في العالم، كأنها بوكيمونات. فهالجن تقدر تنقلهم بين شخصياتك في أي وقت… وكل جن مربوط بعنصر معين. يعني تحصل جن حق النار، هذا تقدر تربطه ويا Isaac لأنه يتوافق وياه فيزيد أكثر من قوة الـ Attack عنده مثلاً. بس هذا مو الشي الوحيد الي يسوونه الجن. هذا الي انا كنت اسويه، اني لما أحصل جن أقوم وأربطه مباشرة بشخصية وما أفكر فيه… لكن نظام القتال يبيك تستخدهم بشكل أكثر.
كل جن عنده هيئتين يقدر يساعدك فيها. الأول انك تخليه Set أو تربطه بشخصية معينة، وهذا يخليك تزيد قدرات الشخصية العادية مثل قوة الـ Attack. لكن في هيئة ثانية انك ماتربطه بأحد، فيتحول إلى Summon تقدر تستدعيه داخل القتال كضربة قوية. فأنت توازن بين انك تستغني عن الطاقة الإضافية الي يزيدها في الشخصية بأنك تخليه Standby عشان تقدر تستخدمه كـ Summon. لكن في طريقة ثالثة تجمع بين الاثنين…. لما انت تربط الجن بشخصية ففي عندك مجموعة جديدة من الضربات تقدر تسويها داخل القتال، أكثرها تكون Support، يعني استخدم هذا الجن عشان تزيد الدفاع حق الـ Party كله، بمقابل انك داخل القتال نفسه تشيل ارتباط الجن فيك وتفقد اضافاته لشخصيتك، وتحوله لـ Summon داخل القتال نفسه، وبعدين لما تستخدم الـSummon ويسوي الضربة، ففي فترة نقاهة على عدد الـTurns وبعدها يرجع ينربط بشخصيتك وترجع طاقتك تزيد. وهذا النظام الي انا ماكنت استخدمه والي يضيف لجمال أسلوب القتال.
وكل شخصية تقدر تحط لها أكثر من نوع جن، يعني صح Isaac عنده توافق مع النار، لكن لما تربط فيه جن حق الرياح.. هني انت تشكل الشخصية على كلاسات مختلفة. وهذا الي انا ماكنت أعرف عنه لأن ماتذكر اللعبة شرحت هالشي.. فعرفته لما قريت أونلاين أكثر عن نظام الجن. فيعني الجن الي تجمعهم، تقدر تحصل 7 حق كل شخصية من الأربع شخصيات الي عندك في نهاية اللعبة، وانت تقدر تحدد وتغير Class الشخصية على حسب عنصر الجن الي تربطه وياه.. ومو بس يغير الـ Class، إلا يضيف له ضربات عنصرية جديدة بعد تستخدمها في القتال.. وهذه الضربات تتطور على حسب الـ Level العام حق شخصيتك. يعني مستوى الضربة مثل فاينل فانتاسي ان Fire يصير Fira و Firaga. فهني نفس الشي، كل ضربة عنصرية تحصل تطورها كل ما زاد الـ Level حق الشخصية.
وبعد تتذكرون ان الجن اذا ماربطتهم بأحد فتقدر تستخدمهم كـ Summon؟ فنفس التطوير يصير في الـSummon، اذا عندك جن واحد فالـSummon مستوى أول، إذا عندك 4 من نفس النوع حاطهم Standby، فتقدر تستدعي أعلى Summon من هالعنصر. فـأي.. نظام القتال يعتمد على الجن بشكل كبير وهذا انا ماكنت استخدمه بشكل صح، فكنت اواجه صعوبة عند الزعيم، لكن بعد شوية قراءة صرت أعرف وقعدت استخدم الجن أكثر. ولهم استخدامات ثانية خارج القتال، وهي في حل الألغاز.
عالم اللعبة فيه ألغاز تقدر تتفاعل وياها عشان توصل لأماكان جديدة أو أماكن سرية… وعادة تكون ألغاز مثل أدفع التمثال إلى هالمكان عشان تضغط على زر. لكن في ألغاز ثانية تستخدم قدرات يعطيك إياها الجن لما تخليهم Set على شخصية معينة.. مثلاً تقدر تعطي Garret قدرة على انه يخلي الزرع ينبت عشان تقدر تتسلقه لمكان أعلى… أو حتى قدرات Support، مثل انك تسوي Recover حق شخصية ميتة من القتال. فنظام تبديل الجن بين الشخصيات وايد عميق،، يعطيك حرية داخل القتال وخارج القتال حق الألغاز.. وفي عندك قدرات شخصيتك تحصلها بدون الجن، يعني Mia مثلاً تقدر تجمد بقع الماي. و Ivan يقدر يسوي Reveal في العالم وتطلع لك أشياء مخبأة، أو تقرأ تفكير NPC عشان تعرف منه حل حق غرض معين.
فبعد ماعرفت لنظام القتال، وبسبب ان القصة شد انتباهي وايد وأبي أشوف نهايتها،، هالشي دفعني اني أكمل اللعبة خلال 3 أو 4 أيام من بعد مارجعت ألعبها في شهر 7. لكن مثل ماقلت ان النهاية مو كاملة وماتشبع فضولك، لدرجة اني وصلت للقتال الأخير وماكنت أدري انه القتال الأخير، لأن القصة لحد هاللحظة أحس وصلت لنصها بس فمو معقول ان كل الأحداث بتحصل خاتمة بعد هالقتال.. ومن بعد ماعرفت انه القتال الأخير، رجعت للعالم وجمعت كل الجن، وسويت المنطقة السرية الي في اللعبة، وكملت مهمة جانبية ماكملتها… هي مو مهمة جانبية، أكثر انها خاتمة لشيء جانبي في قصتك ما ينحل ويا أحداث اللعبة إلا اذا انت رحت تسويه بنفسك.. اللعبة مافيها مهمات جانبية سخيفة من الـ NPCs مثل في ألعاب Tales of وهذا شي للأحسن. فالمهم، حتى اني قاتلت الزعيم السري الي كان وايد صعب، وعشان أعترف، كنت استخدم Savestate لما قاتلته، فما بحسبها كانتصار لي.
وأي، هذه تجربتي ويا Golden Sun. كنت لاعب 25 ساعة لما وصلت للزعيم الأخير، بس رجعت أسوي الأشياء الإضافية وأجمع كل الجن فخلصت اللعبة في 30 ساعة. ومثل ماقلت ان هذه اعتبرها نص التجربة اذا تهمك القصة، لأن الجزء الثاني يكمل مباشرة على الأحداث. ومثل ماقلت لكم بعد اني شغلت الجزء الثاني، وفيها خاصية باسوورد عشان تنقل بعض أغراضك من الجزء الأول، والصراحة من أطول الباسووردات الي شفتها في حياتي. لأنه 260 حرف، وياريت بس حرف إلا Alphanumeric يعني أرقام ورموز بعد، تكتبه في 6 صفحات داخل اللعبة. بس ما أدري اذا بلعبها حالياً أو لا… صرت استخدم جهاز Analogue وايد هالفترة، فيمكن أواصل.. وعلى فكرة تكلمت عن الجهاز في حلقة سابقة اذا تحبون تسمعون رايي عن الجهاز بحط لكم الرابط في الوصف.
وخلاص هذا الي عندي أقوله عن Golden Sun أتوقع، مادري اذا نسيت شي أو لا… بس اللعبة وايد حلوة وتقدرون تلعبونها على Switch اذا عندكم الاشتراك الي يعطيك ألعاب Gameboy Advance… لعبة شخصياتها حلوة، وقصتها تجذبك، وألغازها حلوة في الـDungeons، لكن أهم شي ان القتال له أنظمة وايد تقدر تستكشفها بحريتك وتعطيك إحساس حلو وانت تلعبها. وكانت هذه حلقة اليوم وأتمنى انها عجبتكم. كان وياكم علي الساهي ومع السلامة.
