السلام عليكم وياهلا فيكم بحلقة جديدة من بودكاست خفايف ألعاب، وياكم علي الساهي وباخذكم اليوم لعالم فاينل فانتاسي.. يمكن أغلبكم قاعد يلعب أو حتى خلص لعبة فاينل فانتاسي 16، وعلى حسب عجبكم أسلوب الأكشن في القتال أو لا فيعتمد على ذوقكم اتجاه السلسلة. لكن اليوم بنشيل الـ I من نهاية الرقم اللاتيني ونرجعه لقبل الـ V. لأن كلامي مو عن عالم فاليس-ثيا لأن باخذكم إلى هايدلين ويا Final Fanyasy 14.
حصلت لي الفرصة اني أجرب لعبة فاينل فانتاسي 14 من بعد ما وصلني ايميل يشرح ان سكوير اينكس مهتمة توسع نطاقها في منطقة الشرق الأوسط وشمال أفريقيا عشان تجذب لاعبين لفاينل فانتاسي 14. فأخذت هالفرصة عشان ابدأ رحلة مبتدئ في هاللعبة وأحط نفسي مكان أي لاعب جديد بيفكر يبدأ فاينل فانتاسي 14. وحق الي ما يعرف، فهي لعبة MMORPG نازلة قبل 13 سنة ومازالت مستمرة بالتوسعات للقصة والي آخرها كان في نهاية 2021 ويا Endwalker. فمعنى كل هالكلام انك اذا كنت شخص يبي لعبة تظل وياه فترة طويلة فيها آلاف المهمات فيمكن تفكر تلعب فاينل فانتاسي 14.. خلنا نقول من بعد ما لعبت فاينل فانتاسي 16 وتبي تشوف أجزاء ثانية من السلسلة. طبعاً هي لعبة MMORPG بنظام مختلف عن ألعاب القصة، لكن نظام المهمات واستكشاف العالم يمكن يجذبك لها. انا عن نفسي اذا تتابعوني من فترة فتعرفون اني ما أميل لألعاب الأونلاين، لكن هذه مو أول تجربة لي في ألعاب الـ MMO، فكنت ألعب Dream of Mirror Online (يا قدمي)… وجربت DC Universe Online و Neverwinter… ومابقول اني كنت ألعبها طول الوقت ومدمن عليها… لأني ماكنت، لكن كانت التجارب حلوة وحتى ويا لعبي يمكن أكثر من 50 ساعة في كل لعبة منهم، فأخذت الأشياء الي استمتع فيها واكتفيت بأني ما أحتاج أكمل وأشوف كل شيء في اللعبة لأن غالباً مافي قصة تعطيني دافع اني أكمل، فكنت ألعب هذه الألعاب عشان أسباب مختلفة، يا ان أحد الأصدقاء طلب مني ألعبها وكنت أخصص وقت وياهم عشان ألعبها. أو ان القتال كان حلو فكنت أدخل بين الفترة والثانية عشان أكمل مجموعة مهمات وبعدها أترك اللعبة وأرجع لألعاب القصة… فكانت هذه حالتي ويا كل تجارب الـ MMORPG سابقاً.
فشنو تغير وخلاني أجرب Final Fantasy XIV؟ الصراحة، في أي مرة يجي طاري اللعبة، أو يكون الكلام عن الألعاب الي فعلاً غيرت جوهرها وتطورت تطور مو طبيعي من يوم إطلاقها إلى حد اليوم، دائماً Final Fantasy XIV تنذكر.. وحتى انها ترشحت وفازت بجائزة أفضل لعبة مستمرة في The Game Awards وغيرها من الجوائز… وحتى الأشخاص الي يلعبونها دائماً يقولون انها لعبة تستاهل التجربة وان الي سووه في التوسعات شي مو طبيعي… فبكذب عليكم اذا قلت لكم ما حسيت اني أبي ألعبها عشان أحصل نفس الشعور الي يحسوون فيه لاعبينها. وفعلاً بدأت التجربة وكان عندي شهر كامل في الفترة التجريبية عشان ألعبها… لأن اللعبة تحتاج اشتراك شهري، وبرجع لهذه النقطة وبشرحها أكثر بعدين لأن اللعبة تحتاج نوع من الالتزام المالي اذا تفكر تلعبها… فالمهم، انه خلال هذه الفترة طبعاً ماقدرت أشوف كل شي توفره اللعبة عشان أتكلم عنه في البودكاست، وللأسف خلال هذه الفترة كانت عندنا حالة وفاة وكنت مشغول بالتزامات ثانية فماقدرت أتذوق التجربة بالقدر الي كنت اتمناه قبل ما أتكلم عنها. لكن هدف الحلقة من البداية كان ان هل فاينل فانتاسي 14 مناسبة لشخص مبتدئ في هذا النوع من الألعاب على اعتبار انه خلنا نقول عجبته لعبة فاينل فانتاسي 16 ويبي يرجع يستكشف 14 لأنه مخرجها هو منتج 16. والموضوع الثاني عن شلون التجربة على الكونسولز خصوصاً لنوع من الألعاب الي تكون مصممة حق الـ PC في البداية، فأنا لعبت نسخة PS5 وبقول لكم عن رأيي في التحكم.. وأخيراً هل تقدر سكوير اينكس تنجح في جذب اللاعبين العرب في المنطقة من ناحية دعم اللغة والسيرفرات للعبة.. فهذه النقاط الي بركز عليها في هذه الحلقة.
بداية اللعبة بطيئة وايد وتعامل اللاعب على أنه أول مرة يجرب شي اسمه RPG، والي بالنسبة لي أشوفه شي حلو لحد معين في هذه الألعاب خصوصاً إذا كانت هذه أول تجربة MMO بالنسبة لك… لكن ما يمنع اني انتقذ هالأسلوب بالنسبة لكل اللاعبين. فمثلاً بالنسبة لي كنت أبي أجرب الي تقدمه اللعبة خلال فترة بسيطة لغرض هذه الحلقة، وكان شي يقهر اني لازم ببداية اللعبة أسوي مهمات سخيفة مثل تجميع أعشاب، أو أكلم الأشخاص الي في المدينة وأزور السوق، أو أنقل غرض معين من النقطة “أ” إلى النقطة “ب”. أو حتى أقاتل وحوش ضعيفة،، حتى كلمة وحوش كبيرة عليهم لأنهم غنم وضفادع وأرانب. فبالنسبة لي كنت أتمنى لو في اختيار يخليك تتخطى كل هذه الأشياء أو تسرع منها. فيمكن أول 5 ساعات من اللعبة تروح على مهمات مملة ومتكررة، والصراحة تظلم اللعبة وماتعطي انطباع أولي جيد للتجربة الي فعلاً توفره اللعبة. فيصير صعب انك تقول لأحد يلعبها وأول الأشياء الي تشوفها من اللعبة كلش مملة. لكن في نفس الوقت أفهم سبب هذا التصميم، لأن في أساسيات وايد لأنظمة اللعب ولازم تعطيها للاعب بشكل تدريجي عشان لا ينصدم من كمية التعقيد، خصوصاً انها لعبة MMORPG ومو مجرد RPG. يعني غير على انك لازم تشرح أساسيات اللعب لكن لازم تضيف عليها أساسيات العالم واللاعبين الموجودين عشان تفتح فكرة الـ Raids ويا الناس وغيره. فأي اللعبة بطيئة ومملة من البداية، لكنها تبي تعلمك المكان الي انت فيه، تعطيك هذه المهمات عشان تنتقل من مكان لثاني عشان انت تحفظ خريطة المدينة الصغيرة الي انت فيها، وأول ما تطلع من المدينة بتعطيك مهمات تخليك تروح لمكان بعيد شوي وترجع مرة ثانية للمكان الي انت فيه عشان تعلمك مكانك في هذا العالم.. وتتوقع منك اللعبة انك انت بدأتها وغرضك وهدفك انت تلعبها على المدى الطويل فتبيك تتأقلم ويا كل هذه الأشياء بطريقة بطيئة. يعني في أي لعبة ثانية يمكن بعد 10 ساعات بتكون وصلت للمدينة الثانية وتقدمت في القصة وعرفت الشرير وعندك معرفة بمجموعة من الشخصيات، لكن في FFXIV انت للحين ببداية اللعب وبمرحلة التأقلم والتدريب. فالصراحة توازن صعب من الناحيتين، بالنسبة للعبة وبالنسبة للاعب. فمنظور اللاعب يبي يشوف شنو الي توفره اللعبة خلال المدى القصير ويقرر اذا يواصل أو لا، غير عن منظور اللعبة نفسها الي تشوفك كشخص تبي تلتزم على المدى الطويل. صعب بالنسبة لي أقرر اذا كان هذا عيب أو لا، فأي تمللت وأنا ألعب البداية، لكن بنفس الوقت قعدت أفكر في البديل أو طريقة للتحسين وماقدرت أعرف، لأن فعلاً اذا كنت لاعب جديد فبتحتاج كل هذه المعلومات توصلك بتأني عشان تفهمها.
المهم، بما انك تبدأ بتصميم شخصيتك ففي عندك أنواع مختلفة من أساليب اللعب، وأنا قررت أروح للسحر بدل من القتال القريب بالسيف أو السهام عشان أعطي لروحي تجربة مختلفة عن باقي أنواع الألعاب الي عادةً ألعبها. ونظام القتال من الي قدرت أشوفه خلال الفترة الي لعبتها انها لعبة قوائم بدل أكشن أو تفاعل مباشر بينك وبين الشخصية. فإذا انت من الأشخاص الي ماعجبهم أسلوب فاينل فانتاسي 16 الي يركز على الأكشن السريع، فنظام فاينل فانتاسي 14 غير وايد عنه. فشنو الأساسيات الي لازم تعرفها عن نظام القتال؟ او شي ان عندك ضربات تلقائية انت ماتضغط فيها أي زر، وهذه تتفعل تلقائياً لما تكون قريب من العدو أو في حدود مسافة معينة… الـ Damage ضعيف حق هذه الضربات فما أتوقع انك تبي تستخدمها، فالبديل هو الشي الثاني الي يتغير على حسب الـ Class للشخصية، فمثلاً أنا عندي أنواع من السحر ولازم أسوي لها Casting، أما اذا كانت شخصيتك عندها سلاح ففي عندك Weapon Skill والي هي عبارة عن ضربات وفكرتها تشتغل على نفس فكرة السحر وهي انك لازم تضغط الزر مثلاً R2 ودائرة وشخصيتك بتسوي الضربة، لكن بعدها عندك فترة Cooldown لازم تنتظر قبل ماتقدر تستخدم نفس الضربة. ففي البداية عندك شوي ضربات تقدر تختار منها لكن اذا شفت أي فيديوات للعبة للقتالات الي بنهاية اللعبة فبتشوف ان النظام يتعقد وايد. لكن تظل الفكرة نفسها، ان انت تفاعلك ويا اللعبة خلال القتال يكون انك تختار الضربات وتسويها بوقت معين، وخلال فترة الـ Cooldown للضربة الأولى تروح تسوي ضربة ثانية وعلى هذا الأسلوب. فالتفاعل ويا نظام القتال غير عن الي يمكن تكونون متعودين عليه في ألعاب الأكشن، والتركيز أكثر على القوائم والأرقام. ويمكن من الشرح تحسون انه شي ممل، لكن انا اشوفه ممتع باختلافه، وان تركيزك يتحول على شي ثاني وأنت تتقاتل. بس مثل ماقلت لكم انه ما مداني ألعب وايد من اللعبة وكل القتالات الي سويتها ضد أعداء صغار ولفلات قليلة وماوصلت للحين للتعقيد الي توصل له اللعبة. لكن كأساسيات فعجبتني طريقة القتال.
أكثر شي بتلاحظه في بداية اللعبة انك بتعرف ان هذه لعبة PC حتى وان كنت تلعب نسخة الكونسولز. فحتى أول ما تشغل اللعبة على PS5 بيفتح لك صفحة انترنت عشان تدخل في حسابك وتختار السيرفر وكل هذه الأمور في بداية اللعبة. واذا كنت متعود على طريقة تحكم الشخصية في ألعاب الـ RPG على الكونسولز فهذه بتكون مختلفة تماماً. يعني من الأشياء الي بتلاحظها ان في أي لعبة كونسول اذا تروح لعند شخصية معينة فتتوقع انك تضغط X وتبدأ تتكلم على طول وتستلم المهمة. لكن هني اللعبة مبنية على انك تروح عند الشخصية وبعدين تضغط عليه وبعدين تكلمه، فتخيل كأنك تستخدم الماوس وتأشر على الشخصية الي تبي تتكلم وياها. وحتى بالنسبة للقوائم في اللعبة كلها نظامها PC. في البداية كنت متعقد من السالفة وحسيت ان نسخة الكونسول مو مناسبة حق استخدام الكونترولر، يعني صح انها تدعم لكونترولر وعندك اختصارات للأشياء الي لازم تسويها، لكن دعم الكونترولر جاي على صورة محاكاة لنظام التحكم في الـ PC اذا فهمتوا قصدي، بدل من انها لعبة مصممة عشان تنلعب بكونترولر. فاذا مثلاً انت تمشي وتبي تكبر الخريطة فمافي طريقة سهلة مثل انك تضغط على الـ Touchpad، فلازم تضغط مربع وتكبر الخريطة واذا هي مفتوحة ماتقدر تتحكم بالشخصية لأن الكونترولر انربط بالخريطة الحين كنافذة منفصلة. هذا الكلام كان في أول ساعة لكن كانت مسألة تعود بس، لأني متعود على ألعاب الـRPG للكونسولز وكنت أبي ألعب فاينل فانتاسي 14 على انها نفس الشي.. لكن قدرت أتعود على طريقة التحكم بمجرد اني قعدت أفكر فيها على انها محاكاة لطريقة الاستخدام على الـPC. فيظل كلامي انها صح تدعم الكونترولر، لكن مو فعلاً تدعمه بالطريقة الي انت تفكر فيها وكان ممكن انها تصير أحسن لكنها تتطلب تغيير في تصميم التحكم كامل والمطور ماكان يبي يشوي هالشي. بس الحلو انك تقدر تستخدم ماوس وكيبورد على PS5 اذا تبغي، لكن من رأيي أخذ لك وقت تتأقلم على طريقة الكونترولر وبتصير أسهل. الشئ الثاني ان عندك اختصارات وايد، فعندك 16 خانة في الـ Hotbar أو شريط الأدوات، وهذه الي فيها ضرباتك، 8 على جهة اليمين و 8 على جهة اليسار. فتقدر تستخدم أربع على اليمين بأزرار الكونترولر: اكس ومربع وغيره، ولما تضغط R2 يحول الشريط الي على اليمين لأربع أشياء مختلفة، فتضغط R2 ويا اكس ومربع فعندك أشياء غير تستخدمها. فأي اذا من شرحي تحسون ان التحكم معقد، فهو معقد، لكن بطريقة سهل تتأقلم عليها اذا مفهوم قصدي.
تقدر تلعب اللعبة لشهر مجاناً اذا عندك حساب سكوير اينكس وتقدر توصل لحد لفل 60. فعلى الأقل تقدر تعامل اللعبة على أنها MMO مجانية مثل باقي الألعاب من هذا التصنيف عشان تتخطى فترة البداية المملة وتختبر التحكم وطريقة القتال اذا هي مناسبة لك أو لا. بس على عكس ألعاب الـMMO ففاينل فانتاسي 14 تحتاج انك تشتريها اذا تبي تلعب بعد الفترة التجريبية وعلى حد علمي مافي نسخة مجانية كاملة، فكل توسعات القصة الي نزلت تحتاج انك تشتريها وتتوفر نسخة Complete Edition فيها اللعبة وكل إضافاتها الكبيرة. وهني لازم أتكلم عن سالفة الاشتراك. عشان تواصل اللعب فزيادة على انك لازم تشتري اللعبة، ففي اشتراك شهري سعره 13 دولار للشهر الواحد، لكن عليه تخفيض اذا بتشترك لفترة أزيد. لكن ماتحتاج انه يكون عندك اشتراك بلايستيشن بلس عشان تلعبها أونلاين. ومن هذه الناحية أقدر أقول ان فاينل فانتاسي 14 التزام مالي ويمكن هذه النقطة الي تخلي لاعبين أقل يعطونها فرصة عكس ألعاب الـMMO الباقية. فأحس ان فاينل فانتاسي 14 تستاهل تجربة، لكن ابدأ بالنسخة المجانية وكون متأكد ان عندك وقت كافي خلال الشهر المجاني عشان تجرب الي توفره اللعبة وتحدد اذا تعجبك أنظمة اللعب والمهمات والتحكم قبل ما تقرر تشتري اللعبة وتبدأ بالاشتراك الشهري. فمن هذه الناحية حلو ان سكوير اينكس عندهم هذه النسخة المجانية المحدودة فيتحول الالتزام المالي إلى التزام وقتي على الأقل في البداية، فحاول انك تكمل البداية المملة خلال هذه الفترة عشان لمى تقرر تشتريها تكون عارف انك ما اكتفيت من اللعب وعاجبك الي توفره اللعبة.
وهذا من ناحية الدفع، لكن شلون عن ناحية الدعم للمنطقة؟ كلعبة MMO وأول شي راح تلاحظه لما تشغل اللعبة ان فيها كمية كبيرة من الشرح الكتابي. حتى ان موقع الـ Launcher يقول لك شوف الـ Starter Guide عشان تتعلم قبل ما تبدأ اللعبة. بالنسبة لي قررت اني ما اقرأ الـ Starter Guide وابدأ كشخص جديد وأشوف اذا اللعبة ممتازة من ناحية التعليم أو لا، وتكلمت عن هالشي وما يحتاج أعيد… لكن ويا كل هالشرح والكلام تجي نقطة مهمة وهي اللغة. عشان تستمتع في فاينل فانتاسي 14 أو حتى عشان تعرف شنو الي قاعد تسويه، المفروض ان لغتك الإنكليزية قوية وعندك تحمل عشان تقرأ وايد… توقع انك بتقرأ كل شيء اللعبة بتقولك عنه لأنها أشياء مهمة، وهذا واضح من البداية في طريقة شرح استخدام القوائم وحركة الشخصية وشلون تتكلم مع الـ NPCs وبعدين ويا نظام القتال. اللعبة تعتمد وايد على الشرح الكتابي بدل من طريقة التعليم الديناميكي الي نشوفها في ألعاب القصة مثلاً. فأحياناً في ميكانيكيات صعب أو يمكن مستحيل انك تعرف تستخدمها من خلال استمرارك في القتال بدون ما اللعبة تعطيك نافذة مكتوب فيها شرح لهذا النظام الجديد وطريقة استخدامه. فمن هذه الناحية على عكس فاينل فانتاسي 16، فمافي لغة عربية ولازم تعتمد على لغتك الإنكليزية والي يمكن يكون عائق للاعبين في المنطقة. أما من ناحية السيرفرات، فلما اخترت الدولة وحطيت البحرين، فاقترحت اللعبة السيرفرات الي في أوروبا، وحطوا في بالكم انك لما تختار عالم في بداية اللعبة فماتقدر تغيره بعدين، لكن السيرفرات أتوقع الي في نفس العالم تقدر تغيرها. فالمهم، ان أغلب السيرفرات الأوروبية الموجودة كتبت لي ان الاتصال Poor أو سيء لأغلبها الي حاولت اختارها. لكن بعد مادخلت اللعبة ما لاحظت السبب، لأني لعبتها لحد الآن كلعبة Single Player وما تفاعلت مع باقي اللاعبين بس كنت أشوفهم يتحركون طبيعي، وكان في لاعب ساعدني في مهمة وكانت الأمور طيبة. لكن على حسب كلام اللعبة نفسها فالاتصال كانت جودته سيئة، ومافي سيرفرات قريبة بالمنطقة وشيء متوقع اذا مافي قاعدة جماهيرية تستدعي سيرفر خاص لنا.
وفي شيء كنت أبي أتكلم عنه في هذه الحلقة بس مابقدر لأن مثل ماقلت لكم ان صادتني ظروف خلال الفترة التجريبية منعتني أني أجرب اللعبة لوقت أطول، وأحد هذه الأمور كانت اذا هل أقدر استمتع باللعبة كلاعب فردي، بدون ما أكون علاقات اجتماعية مع اللاعبين الثانيين، وهل اللعبة تخليني استمتع بالمهمات الي تحتاج أكثر من لاعب بالـ Mathmaking اذا ماعندي أشخاص من جهتي يدخلون وياي هذه المهمات. هذه الأمور تحتاج وقت لعب أطول وما أقدر أتكلم عنها في هذه الحلقة، وكان تركيزي على تجربة البداية مثل ما قلت لكم. فإذا تحبون تجربون فاينل فانتاسي 14 أنصحكم تبدأون بالفترة التجريبية وتخصصون وقت كافي خلال الشهر عشان تتخطون ملل البداية وتعرفون اذا اللعبة توفر لكم المتعة الي تبونها أو لا، بالنسبة لي استمتعت بالي لعبته وكنت أتمنى ان لو عندي وقت أكثر، لكن بسوي هالشي خلال الفترة القادمة لأني أبي أرجع حق اللعبة ومابي أتركها.
وبس، هذه كانت حلقة اليوم. أحسها نوع مختلف عن الحلقات الثانية وأكثر كحلقة تعريفية عن لعبة غنية عن التعريف الصراحة لكن حبيت اني أتكلم عن تجربتي وياها. كان وياكم علي الساهي ومع السلامة.
