السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي كالعادة، واليوم بكلمكم عن تجربتي ويا أكثر لعبة كنت انتظرها في 2024 – الغنية عن التعريف Final Fantasy VII Rebirth. اللعبة ما تحتاج أي مُقدِمات، هي الجزء الثاني من ثلاثية لإعادة تطوير فاينل فانتاسي 7. الي يحتاج مُقدِمة هو تجربتي ويا فاينل فانتاسي 7 بشكل عام. عكس وايد من الناس، أنا من القليلين الي ما لعب اللعبة الأصلية على بلايستيشن 1، وكانت تجربتي الأولى وياها لما لعبت Final Fantasy VII Remake الجزء الأول من هذه الثلاثية. يمكن تلاحظون من الألعاب القديمة الي اتذكرها واتكلم عنها في البودكاست، اني ماكنت ألعب تصنيف الـ JRPG او الـ RPG عموماً، وفي عدة أسباب. كنت صغير لما نزلت Final Fantasy VII فلغتي الإنكليزية ماكانت ملائمة نهائياً عشان أعيش هذه التجارب الطويلة الي تتطلب قراءة حوارات عميقة بين الشخصيات، وعشان تفهم المطلوب من اللعبة نفسها. والسبب الثاني، يمكن سبب غبي شوي. بس ماكان عندي Memory Cards وايد للجهاز، وكنت أخزن الألعاب الي كنت دائماً أرجع لها، بدل من أني أمسح وأخزن تجارب جديدة، فحتى اذا جربت ألعاب JRPG كنت ابدأ فيها وما أكمل أكثر من مقدمة اللعبة. طبعاً موضوع اللغة مو شرط انه يكون عائق كبير وتقدر تستمتع باللعب بدون ما تفهم المكتوب، وأكبر مثال الألعاب اليابانية الي كنا نلعبها، وخصوصاً ألعاب الكابتن ماجد الي هي بحد ذاتها RPG استراتيجية، بس ويا جيل بلايستيشن 1 كنت أميل أكثر لتصنيف البلاتفورمر والأكشن والقتال بدل من الـ RPG، ففي تجارب وايد رجعت لها بعدين، وفي بعضها لحد اليوم ما لعبتها. فالمهم، كل هذا عشان أقول ان تجربتي الأولى ويا Final Fantasy VII كانت الريميك، ومن بعدها رحت شريت اللعبة الأصلية على PS1 ولعبتها لحد نفس المكان الي وقف فيه الريميك، عشان بس أشوف الفروقات، وانبهرت من كمية التفاصيل الي حطوها في الريميك من توسيع للمناطق، والأحداث، والشخصيات مقارنة بنفس المناطق من اللعبة الأصلية، ومن وقتها وأنا انتظر تكملة اللعبة. فكلامي اليوم عن Rebirth بكون خليط بين تجربتي ويا Remake خصوصاً للأشياء المشابهة والي تطورت في Rebirth، والاشياء الجديدة المحصورة حق Rebirth. عشان تكون عندكم فكرة عن رأيي بما أنى ماتكلمت عن Remake في حلقة منفصلة من قبل.
Rebirth تواصل تميز الأشياء الي سوتها ريميك من ناحية القيمبلاي الي أنا شخصياً حبيتها. نظام القتال مثلاً أخذ فكرة الـ Active Time Battle من اللعبة الأصلية وحولها لقتال أكشن مُحافظ على خصائص الـ Turn based بطريقة حلوة. يعني أتذكر ان أكثر شي ابهرني وعجبني في Remake كان طريقة الاكشن السريع للضربات العادية، ويا عداد ATB موجود للضربات الخاصة والـ Abilities و الـ Magic أو حتى استخدام الـ items من Potions وغيره. وصح ان في ألعاب ثانية تستخدم نفس الأسلوب، وحتى ألعاب فاينل فانتاسي بنفس الأسلوب، لكنها متقنة في Remake. وجزء ثاني يحافظ على فكرة الـ Turn based، انك تتنقل بين الشخصيات في الـ Partyعشان تستثمر وقتك في القتال بشكل صح، بانك تضرب بشخصية معينة وتملأ عداد الـ ATB عشان تسوي Ability معين، ومباشرة تغير لشخصية ثانية عشان تسوي نفس الشي، وبعدين للثالثة قبل ما ترجع للأولى. أنا من النوع الي أغير بين الشخصيات داخل القتال بشكل مستمر، وأحب القتالات الطويلة الي تعتمد على تغيير أسلوب القتال… بس بنفس الوقت أعرف لاعبين بنفس اللعبة وبنفس نظام القتال كانوا يفضلون انهم يلعبون بشخصية وحدة طول الوقت، ويستخدمون الـ Commands أو الأوامر على الشخصيات الثانية في الـ Party بدون ما يتحكمون فيهم بشكل مباشر. وهذا الي بالنسبة لي خلى Remake مناسبة حق شريحة أكبر من اللاعبين، وفتح المجال للأشخاص الي يحبون ألعاب الأكشن بأنهم يجربون ويستمتعون باللي تقدمه لعبة JRPG بدون الخوف من فكرة انها تكون Turn Based الي في وايد ما يحبونه في الألعاب. طبعاً عشان جذي اذا ابي أوصي بلعبة JRPG حق احد، ابدأ بسلسلة Tales of الي احسها مظلومة الصراحة. نظام القتال في Final Fantasy VII Remake مقارب للي تسويه سلسلة Tales of في ألعابها، فأعطوها فرصة اذا ما جربتوها من قبل، فأحس Berseria و Arise مكان مناسب اذا تحب تبدأ بلعب سلسلة Tales of.
فـالمهم، Rebirth تأخذ الي سوته Remake من هالناحية في القتال، وتزيد عليه بإضافات شفتها حلوة وضافت للعب بشكل إيجابي. يعني بعيداً عن الشخصيات الجديدة واختلاف أساليب قتالهم الي بتكلم عنها بعدين. حتى بنفس الشخصيات الي كنت تستخدمهم في Remake شفنا إضافات مثل ضربات الـ Synergy بين شخصيتين، والـ Synergy Ability الي مشابهة للـ Limit Breaker لكن يستخدم دمج لطاقة شخصيتين بنفس الوقت. الي تضيفه ضربات الـ Synergy يرجعني لكلامي عن الأشخاص الي يستخدمون شخصية وحدة في القتال بشكل أساسي، فهالإضافة تفيدهم وايد، فمثلاً اذا تستخدم Cloud لكن تبي ضربات من بُعد الي يوفرها Barret، فتقدر تستخدم الـ Synergy ان Barret يطلق الرصاص عليك، وانت توجه الطلقات بسيف Cloud على العدو الي اخترته، فبديل جيد للي ما يبي يغير الشخصية إلى Barret بس عشان يطلق، ونفس الشي اذا شخص يستخدم Aerith ويبي الدفاع الي يوفره جسم Barret الضخم. في أشياء حلوة في الـ Synergy بين كل شخصيتين وحسيت انها فعلاً قدمت شي جديد لنظام القتال وطورت منه. كنت مو مألوف باستخدامه ببداية اللعبة لكن مع الوقت صرت احب استخدمه لأن في أشياء حلوة مثل انك تطول عداد الـ ATB لثلاث خانات، أو تسوي ضربات خارقة بشخصيتين.
الشي الثاني الجديد والي بعد ضاف وااااايد للقتال هو الـ Abilities الجاية من الكُتُب أو الـ Folios. هذه الإضافة عبارة عن Skill Tree لكل شخصية وتطور من قوة الضربات وتضيف الـ Synergy الي تكلمت عنهم. بس شي ثاني تسويه انها تضيف Abilities جديدة لكل الشخصيات. يعني في Remake كانت الضربات الخاصة لكل شخصية تجي من احتراف الأسلحة المختلفة الي تنضاف للشخصية بعد ما تستخدم هالقدرات بعدد معين ويا كل سلاح، هالشي للحين موجود في Rebirth. بالإضافة لنوعية قدرات جديدة تضيف لك ضربات سحرية، تستخدم العناصر مثل النار والجليد والرياح، لكن بدون ما تستخدم الـ Mana أو الـ MP، وهذا الشي الكبير بالنسبة لي انه مايستخدم MP. حتى اني في البداية حسيتها وايد Overpowered ان اللعبة تخليك تستخدم ضربات سحرية بدون ما تشيل من عداد السحر.. بس طبعاً تأثيرها أقل من لما تستخدم السحر الأصلي ففي موازنة من هالناحية. لكن يبقى انها تضيف قدرات جديدة تساعدك وايد لما ما يكون عندك MP وتحتاج ضربة نارية عشان تخلي عدو معين يفقد توازنه، فالحين في Rebirth عندك وسائل ثانية تجيب منها ضربات بالعناصر غير عن السحر الاعتيادي، وهذه تفتح المجال لتنوع أكبر في استخدام الـ Materia بين الشخصيات، وتجربة ماتريا مختلفة عن الاعتيادية الي تعطيك سحر استخدام العناصر، فتخليك تجرب في خانات الـ Materia بأشياء مختلفة تغير طريقة لعبك عن Remake.
هذا كله غير عن الشخصيات الجديدة الي تنضاف وياك في الـ Party، وتجنباً للحرق ما بتكلم بتفاصيل عنها، غير Yuffie الي لعبتوها في إضافة INTERmission. بس بالنسبة لي للحين ما لعبت الإضافة فكانت Rebirth تجربتي الأولى حق أسلوب Yuffie والي صج يعطيك إحساس النينجا. احياناً أحس ان 3 شخصيات تبدل بينها في القتال ما تكفي عشان تعطي كل الشخصيات حقها. كنت وايد أحب استخدم Yuffie، لأن أكثر شي أحبه في الألعاب لما يكون عندك سلاح وتدمج فيه طاقة عنصرية، كهرباء مثلاً، وأسلوب Yuffie كله يعتمد على دمج العناصر للسلاح. يعني أرمي نجمة النينجا الي تستخدمها بمثلث واملأ الـ ATB عشان استخدم الـ Ninjutsu وتبدل على راحتك بين النار والجليد وغيره على الطاير. وبعدين لما تحصل قدرة الـ Doppelganger وتسوي نسخة ثانية منها، فشي خيالي الصراحة. يمكن الشخصية الوحيدة الي ماكنت استخدمها باستمرار كان Red XIII، ماتعودت على طريقة لعبه وماكنت أعرف أحسن طريقة استخدمه فيها فغالباً كنت أبدل بين باقي الشخصيات. بس أقوى شي في القتال بالنسبة لي هو انك فعلاً تعرف تستخدم كل شخصية بحسب الي توفره، فـ Aerith بدوائر السحر أو الـ Wards تفتح لها احتماليات مو طبيعية بالأشياء الي تقدر تسويها، ونفس الشي ويا Tifa لما تركز على المواجهة القريبة والقوة على حسب الأعداء الي تواجههم. كان الـ Enemy Intel وايد مهم بالنسبة لي، كنت استخدم قلادة الـ Assess عند Cloud عشان اقرأ معلومات كل عدو أواجهه، وأشوف من الشخصية الأنسب لهذه المواجهة. هو مو شي مهم انك تسويه ويمكن وايد مايعطونه اهتمام، بس التفاصيل الموجودة لشلون تخلي هالنوع من الأعداء يكون Pressured أو شلون تخليه يفقد توازنه بسرعة، طبعاً غير عن العناصر الي تضر هالعدو. كل هالمعلومات كانت مهمة وايدة بالنسبة لي، وكل Region من العالم أوصل له، أحاول اعرف أنواع الأعداء الي فيه ونقاط ضعفهم لأنه يخلي القتال أفضل وممتع أكثر بالنسبة لي، ويخليك كلاعب تستخدم كل الي توفره اللعبة من عمق في أسلوب القتال الي يمكن ما تشوفه اذا ماتعطي أهمية لهالمعلومات المكتوبة وتكتفي بالأكشن الي تشوفه على الشاشة لما تقاتل.
تعليقي الوحيد على الـ Enemy Intel أو موسوعة الأعداء، ان مافيها خيارات تصنيف. مثل ماقلت اني كنت اهتم لهالمعلومات المكتوبة وايد قبل وخلال كل قتال، فلما أنسى عن عدو معين وشنو نقاط ضعفه كنت استخدم الـ Enemy Intel، بس صعب تحصل الوحوش في الموسوعة بسهولة لأنهم حاطينهم لك بترتيب الأنواع، لكن مافي خيارات تصنفهم على حسب المنطقة الي انت فيها حالياً. فكنت اضطر اني امر على كل الوحوش لحد أحصل الي ادور عنه. فيمكن هذه نقطة كنت أتمناها تكون أفضل. هو الخيار الثاني اني ادخل القتال وأستخدم ماتيريا الـ Assess مرة ثانية، بس هاي يأخذ من الـ ATB فتضييع وقت وموارد.
لكن عموماً اذا ماكان واضح من كل كلامي، فصج أحب نظام القتال في Rebirth حتى أكثر من Remake بسبب كل الإضافات الي فعلاً تضيف لتحسين جودة القتال. كنت أحس القتال في Remake مثالي كما كان، فماكنت متوقع حتى ان Rebirth بتقدر تبهرني أكثر غير عن إضافتها لشخصيات وأساليب قتال جديدة، لكن فعلاً قدرت تبهرني من هالناحية. وقبل ما انتقل لشي ثاني، ففي عندي بعض الملاحظات بخصوص القتال. الـ Summons قل استخدامي لهم بشكل كبير في Rebirth، نادراً ما استخدمهم فما أعرف السبب وأبي اسمع رايكم وتجربتكم بهالخصوص. هل كنتوا تستخدمون الـ Summons وتعتمدون عليهم؟ بالنسبة لي حسيت ان خف التركيز عليهم ومافي فعلاً سبب يخليك تستخدمهم، أو اللعبة نفسها ماتعطيك دافع لاستخدامهم. لأن تنوع الضربات من الـ Party نفسه كافية ضد حتى الزعماء. وبنفس الوقت، كان القتال ضد الـ Summons في الـ VR عشان تحصلهم وايد صعب بالنسبة لي، لدرجة اني ماقدرت أحصل ولا واحد منها… الـ Summons الوحيدين الي كانوا عندي هم الي يعطونك إياهم بسبب تخزينتك القديمة. فما عرف ليش ماقدرت أغلب الـ Summons وحاولت عدة مرات لحد استسلمت، لأني شفت اني ما استخدم الي عندي، فحسيت ماله داعي أخذهم لأنهم ما يضيفون لتجربتي شي.
أحس كفاية كلام عن أسلوب القتال. فبتكلم عن العالم والي هو النقلة الكبيرة بين الجزء الأول والثاني. كان خيار حلو انهم ينهون Remake في أحداث Midgard ويتركون فتح العالم كجزئية تميز Rebirth. وبالنسبة لي هالاختيار موفق مو بس من ناحية قيمبلاي، بل حتى كاختيار يدعم الـ Narrative أو سرد القصة. في أشياء لاحظتها مادري اذا في وايد غيري لاحظها، وبتكلم عنها بعدين. لما ركزوا في Remake على أحداث Midgard ومن بعد تجربتي لها خلتني أحس انها لعبة تقدر تنلعب كشيء منفصل حتى لو ما حبيت تكمل في الثلاثية الي هم مخططين لها، وهذه كانت نقطة إيجابية بالنسبة لي. مثل اذا برجع لكلامي لما قلت ان أسلوب القتال كان موجه عشان يجذب شريحة أكبر من اللاعبين، فحسيت ان أحداث Remake كانت بعد مناسبة عشان تجذب اللاعبين، ويكتفي البعض بلعب هالجزء بدون تكملة. يعني شخصياً أحس انها كانت تروي قصة تنفع انها تكون كافية لاشباع اللاعب إذا ماكان مهتم يواصل بباقي أجزاء الثلاثية، هذا رأيي طبعاً بس صج أحس بهالشي، اني أقدر أقول لأي شخص بس ألعب Remake وبتحصل تجربة كاملة من ناحية القصة، والنهاية بتفتح مخيلتك لشنو ممكن يكون معناها، فاذا اهتميت تقدر تكمل للعبة الثانية، بس اذا ماكنت مهتم تعرف، فالجزء بروحه كافي.
النقلة الي صارت بين Remake وRebirth من هالناحية طبعاً هو العالم المفتوح، الي يجي بسببه تنوع كبير في البيئات والمناطق الي تزورها. صح ان Midgard في Remake ببعض الـ Sectors كنت تحس بتنوع المناطق بينها، لكن ويا Rebirth فعلاً تشوف بيئات متنوعة وبتضاريس مختلفة تفتح لك صورة شكثر ان العالم أكبر من الي كنت تشوفه، ومن ناحية قصصية، ان شلون تأثير كل الأحداث الي صارت في Remake ممكن انها تؤثر على كل الي تشوفه. لما قلت ان هالشيء اختيار موفق انهم قرروا يتركون العالم المفتوح للجزء الثاني من ناحية Narrative، كشخص مالعب الأصلية فويا الانتقال من المناطق بسميها الـ Industrial في Midgard، وبعدين تشوف الأشياء الي تصير برة هالمناطق الي تعودت تشوفها لما تلعب Rebirth، عطتني نظرة جديدة للخطر الحاضر طول الثلاثية، وبعد عطتني منظور أفضل لخطر الـ Mako. طبعاً بعيداً عن الحرق، لما زرت منطقة Cosmo Canyon أحس ان منظوري للعالم كان مثل الشعور الي حسوه الشخصيات في هاللحظة، كان له تأثير أقوى لأن في Remake كان في تعمد بالاقتصار على Midgard وانت كلاعب ما عندك علاقة ويا العالم ككل وظليت سنين في الواقع بهذا المنظور قبل ما تنزل Rebirth، فلما فتحوا لك كل الخيارات في Rebirth وبدأت تشوف الي تشوفه خلال رحلتك، يكون في تأثير أقوى ومنظور مختلف للـ Mako مشابه للي يحسه Cloud في اللعبة في هذه اللحظات. يعني بالنسبة لي في Remake كنت أحس الـ Mako مثل البترول، انه وقود احفوري اعتمدنا عليه لكن له اضراره على البيئة. بس ويا الي تصير تعرفه في Rebirth، مادري بس بالنسبة لي غير تفكيري من الجزء الأول الي احسه الحين كان سطحي، وهو كان سطحي لأن اللعبة كانت تبيك تشعر بهالشي، عشان تفتح عيونك أكثر بعدين ويا Rebirth. فصج مادري اذا انا الي أشوف وأحس بهالشي وأعطيه أهمية أكبر من الي يستحقه، ولا هو فعلاً خطوة متعمدة من كتابة الـ Narrative وتوزيعه في الثلاثية عشان تربطك أكثر بـ Cloud وباقي الشخصيات باللي يمرون فيه ويكتشفونه لما يتنقلون في العالم، بس عموماً تأثيره كان مميز بالنسبة لي.
وبشكل بسيط بعد من ناحية القصة، حسيت ان الجزء الثاني غرضه انه يعطيك نظرة أفضل وأعمق على كل شخصية، سواءً الي كنت تعرفهم، أو الي ينضمون لك في هالرحلة. فصايرة أغلب الأحداث تركز على ماضي بعض الشخصيات، أو تطور يصير فيهم خلال الأحداث، بشكل أكبر من انه يواصل على القصة الأساسية الي ابتدأت في Remake. وهالمواصلة أكيد بتكون التركيز في الجزء الثالث. فإذا بهيأ أي شخص لعب الأولى وللحين مالعب Rebirth، فتوقع ان تركيز القصة والأحداث تكون انها تعطيك تعلق أكبر بالشخصيات الي وياك في رحلتك بدل من انها تواصل القصة العامة الي كانت في Remake. وهو شي مناسب للجزء الأوسط، وعلى حسب الي شفته من بين اللعبتين، فأكيد ان التعلق الي بنوه طول هاللعبة لكل الشخصيات بيكون له أثر قوي في الجزء الثالث والأخير. وبس هذا كل الي بقوله عن القصة.
نرجع لعالم اللعبة، طبعاً ويا العالم المفتوح يجي الإيجابي وللأسف يجي السلبي. وببدأ كلامي اني بقول ان بعض الأشياء الي أشوفها سلبية يمكن تكون للبعض شيء عادي أو حتى إيجابي، وهذا كله يعتمد على نوع الألعاب الي تحبها، فكلها مسألة ذوق لا أكثر ولا أقل. أعتقد بعد كل المدح لكل شي قلته لحد الحين بتعرفون اني أشوف Rebirth كلعبة ممتازة، فما ابي تحسون ان الي بقوله الحين يقلل من قيمة اللعبة. لكن اللعبة فيها مشاكل، وبعضها بالنسبة لي أثر وخرب على الـ Pacing او تسلسل اللعبة والأحداث. وهالخلل له علاقة بالـ Mini-games… وآخ يالـ Mini-Games. أحس Square Enix اخذوا راحتهم زيادة عن اللزوم ويا هالـ Mini-Games.
طبعاً أنشطة العالم المفتوح معروفة وماتحتاج شرح لأن صرنا نشوفها في كل الألعاب، عندك أبراج Ubisoft الي تكشف لك بعض أسرار الخريطة، وعندك القتالات الجانبية الي غرضها التعرف على أنواع وحوش جديدة، وعندك الكهوف الي تحصل فيها موارد وفي Rebirth هذه مناطق الـ Lifestreams. كل هذه وغيرها كلها بس أنشطة العالم المفتوح الي تعودنا عليها في باقي الألعاب، وكلها بسبب شخص واحد اسمه Chadley. أكثر شي مزعج بالنسبة لي في Rebirth هو Chadley. صرت ما أطيق أسمع صوته وبستانس وايد لو ما شفته من جديد في حياتي. الي لعب Remake بيتذكره هو الي يعطيك مهمات الـ VR، بس في Rebirth كل شي ما احبه في اللعبة هو الي سببها… وما يكتفي انه بس يعطيك إياها، يمللك ويقعد يتصل فيك ويزعجك بعد كل صغيرة تسويها له. صج كنت أتمنى انه لو في خيار يخليك تعطيه بلوك عشان ما يتصل لك على الجهاز الي يعطيك إياه. يعني بعض أنشطة العالم كنت أحب اسويها وبالعكس ما كرهتها، القتالات مثلاً وايد عجبتني، وحتى الـ Mini Bosses الي تحصلهم بعد سلسلة اكتشافات كانت قتالات مميزة. بس الي كرهني فيها اني لما أشيل قطعة أو أقتل عدو، أو بدخل في مواجهة، قبلها وبعدها لازم توقفك اللعبة عشان تخليك تسمع Chadley وهو يتكلم، وماتتحرك إلا لما يكمل كلامه. وهذا الي أزعجني أكثر من الأنشطة نفسها… بس هذا مو الي خرب الـ Pacing بالنسبة لي، لأن هذه كلها تعتبر أنشطة وتقدر تتغاضى عنها ولا تسويها.
أما الـ Mini-games الاجبارية فهذه قصة ثانية. مرة ثانية بكرر، تعليقي مو على جودة الـ Mini-games نفسهم، لأن بعضهم أو أغلبهم احب اسويهم، لكن تعليقي على شكثر هم Intrusive أو مُقحَمة على التجربة. عندك Mini Game لعبة البطاقات، Mini game التسلل عشان تحصل الـ Chocobos الي تستخدمهم في التنقل، Mini Game لعبة الطاولة الاستراتيجية الـ Tower Defense، Mini Game ألعاب الكارنفال على الشاطئ، Mini Game الـ Space Shooter، Mini Game سباقات الـ Chocobos، Mini Game حلبات تحدي القتال، Mini game تدمير الصناديق، Mini game عزف البيانو، Mini Game الروبوتات. Mini games تطلع مرة وحدة طول اللعبة، Mini games تطلع مرتين طول اللعبة… كفاية….. الي مالعب Rebirth يمكن يقول هذه أنشطة جانبية مو لازم تلعبها، لكن هني المشكلة، بعضها مو أنشطة جانبية وبس، بعضها اجباري عشان تكمل اللعبة، واجبارية مو بس مرة وحدة، اجبارية اكثر من مرة. فتحس في بعض المناطق اللعبة تسحبك وتبعدك عن التقدم في الأحداث عشان تلزمك تسوي هالـ Mini Games، وهني التأثير على الـ Pacing بالنسبة لي. واسوأ منطقة تسوي هالشي، هو من لما توصل لمدينة الملاهي الـ Golden Saucer. لأنك تروح لهالمنطقة من بعد حدث له علاقة بالقصة، بس ماتقدر تكمل لأن اللعبة تلزمك تروح لكل لعبة جانبية موجودة في مدينة الملاهي وتسويها مرة وحدة على الأقل، واذا كل هذا مو كافي عشان يقنعك بكلامي، فلما تخلص هالخطوات الاجبارية، تنزل لمنطقة جديدة أول مرة تزورها، ومهمتك الرئيسية عشان تكمل اللعبة انك تسوي 3 مهام جانبية عشان تحصل أكل للـ Chocobo، ومن ضمن هالثلاث مهام الجانبية انك تلعب لعبة البطاقات ضد 3 اشخاص وتفوز عليهم. وعقب ماتسوي كل هالأشياء وتحصل الأكل، فتاخذه للـ Chocobo عشان شنو تسوي؟ عشان تلعب Mini game سباق للـ Chocobo قبل ما أخيراً يخلونك تكمل أحداث القصة، ومباشرة بعدها تفتح منطقة مفتوحة كبيرة فيها الأنشطة الجانبية الخاصة بالعالم، فيمكن تنشغل ببعضها لكنها مو اجبارية، ولما توصل للمنطقة المطلوبة لتكملة القصة، فأول شي يقولونه لك انك تقدر ترتاح في القرية وتسوي مهمات جانبية، من بعد كل الي سويته؟ لا شكراً ابي اواصل طريقي. فهالتسلسل بهالجزء من اللعبة كسر رتم الأحداث بالنسبة لي، وتكرر بنسبة أقل في مناطق ثانية. ماعندي مانع لو في 60 Mini game، لكن انك تدخلهم بهالطريقة بشكل متتالي وماتخليني أكمل جزئية القصة بدون ما اسويهم، فهذا له تأثير سلبي على التجربة الكلية. وهل أثر على تجربتي واستمتاعي بـ Rebirth بشكل عام؟ اذا بكون صريح، أي أثر، ولا ماكنت بشتكي عنها. مثل ما قلت وكررت أكثر من مرة، بعض هالـ Mini Games وايد حبيتهم، بس بحبهم لما انا أقرر اسويهم في الوقت الي انا ابيه، وبما انهم صاروا أشياء اجبارية فلازم أتكلم عنهم كجزء أساسي من التجربة وأقول رأيي باللي حسيته منهم. هذه النقطة الوحيدة الي تخليني أقول ان Remake من ناحية تسلسل الأحداث كانت أفضل، مع ان كان فيها أشياء جانبية إلا انها ما أثرت على التجربة مثل ما تأثر هالـ Mini Games على Rebirth. فإذا أبي شي من الجزء الثالث، انهم يقللون من اقحام الأنشطة والألعاب الجانبية داخل مهمات اللعبة الرئيسية. وما ابي أشوف Chadley.
فبعد كل هالنقاط السلبية، خلوني أقولكم عن الـ Mini-games الي حبيتهم. لعبة البطاقات Queens Blood وايد عجبتني، ومع اني كل مرة كنت أفوز كنت احس انه بالحظ بدل من استراتيجية متقنة، بس كل فوز كان شعوره حلو. اللعبة مو معقدة بس مع اللفلات الي عقب بتحصل البطاقات الي تخليك تستخدم استراتيجيات يمكن ماتفكر فيها وانت تلعب ببطاقات بدون قدرات، مثل انك تدمر مجموعة بطاقات عشان ترفع من مستوى بطاقة ثانية وغيرها من هالحركات. و Mini-Game لعبة الطاولات نسيت اسمها شي Gambit أعتقد، بس اهي Tower Defense وتختار تنزل جنود على الطاولة عشان تدافع عن قاعدتك، وبنفس الوقت تبي تهجم على قاعدة العدو وتكسرها خلال الوقت المحدد، هذه اللعبة بعد كانت حلوة وتوفر تجربة مختلفة خلال رحلتك. وهالاثنين أكثر شي عجبني من الي متوفر، وبس بكتفي بكلمة Mini Game وما أبي أقولها زيادة في هالحلقة.
فأخيراً، شنو تعتقدون رأيي في Final Fantasy VII Rebirth. أكيد هي من أفضل ألعاب السنة ودرجة الاستمتاع الي تجي من اللعبة كلها صعب انها تنوصف بدون تجربة. الي سووه في نظام القتال فعلاً أبهرني لأني ما كنت متوقع انهم يحسنون من الي كان بالنسبة لي مثالي في Remake، بس أثبتوا ان كلامي غلط وعطونا إضافات وشخصيات تخلي كل قتال ممتع وما تتملل منه. في بداية اللعبة نسيت شلون ألعب وويا أول زعيم ماتوا كل شخصياتي وبقت Aerith، وهني رجع لي شعور اتقان نظام القتال، لأني بشخصية وحدة استغليت كل نقاط قوتها واستخدمتها بالطريقة الي تليق بأسلوب قتالها وهزمت الزعيم بدون الشخصيات الباقية، وهالقتال رجع لي أهمية اتقان قدرات الشخصيات وذكرني بأفضل طريقة حق اللعب. لعبة متقنة بس مثل ماكلمتكم عن الأشياء الي عكرت مزاجي، ففيها جانب كان ممكن يكون أفضل بالنسبة لي على الأقل. العالم بروحه حلو ويخليك تبي تستكشف وتسوي الي متوفر فيه بدون اجبار، فمادري ليش كان في إصرار على اجبارك ببعض الأشياء في مناطق معينة وهو الي خرب الـ Pacing شوي، بس بالنهاية تظل لعبة ممتازة وقعدت ألعبها بشكل متواصل لفترة طويلة، وأبي أرجع ألعب إضافة INTERmission لأن Rebirth ذكرتني شكثر القتال ممتع في هالألعاب.
وهذا وصف مفصل لتجربتي ويا Final Fantasy VII Rebirth ماعدا القصة وأتمنى انكم استمتعتون بالحلقة، وانكم تستمتعون أكثر بلعب هاللعبة اذا للحين ما خلصتوها أو ما بدأتوها. كان وياكم علي الساهي ومع السلامة.
