السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وهالحلقة الكلام كله عن Dead Rising. كانت صدفة بس بقولكم سر: كنت مخطط لهالحلقة قبل ما يعلنون عن الريميك، لكن صارت فرصة ان الكلام رجع عن السلسلة عند اللاعبين ويا الإعلان، فصارت الصدفة ان الوقت كلش مناسب لهالحلقة. لأني وأنا ألعب ريماستر Beyond Good & Evil الي تكلمت عنه في الحلقة السابقة، تحول مزاجي للألعاب الي لها Mechanics مميزة وكانت على PS2، وتذكرت Dead Rising (مع انها مو فعلياً من ذاك الجيل بس برجع لهالكلام بعدين). وخططت اني ابدأ ألعبها بمجرد اني أكمل الحلقة الي راحت… وخلال هالفترة فجأة كابكوم نزلوا بوست ان في ريماستر لـ Dead Rising، الي هو أقرب للريميك الصراحة. بس عموماً عن المقدمات، بقول لكم في هالحلقة ليش Dead Rising تقدم تجربة فريدة وممتعة، وهذه فرصتكم انكم تجربونها لما ينزل الريميك اذا تبون شي مختلف عن باقي ألعاب الـ AAA.
Dead Rising لعبة ما تقدر تحصرها في Genre معينة… يعني ما أقدر أقول انها لعبة أكشن، ولا هي لعبة قتل زومبيز، ولا حتى لعبة بقاء ورعب. مع ان الـ Survival Horror أقرب تصنيف لها، بس فيها جانب كوميدي يضيف لجو اللعبة ويخلي وصف الرعب مو دقيق 100%. فأنت تلعب بـ Frank West صحفي عنده كاميرا يتورط في تغطية مؤامرة زومبي … هممم،، كأني قلت نفس هالكلام في الحلقة الي طافت؟ فالحين تعرفون ليش Dead Rising جت على بالي. الي تسويه في اللعبة كله مربوط ويا بعض بطريقة وايد مميزة، فبشكل عام انت تزور منطقة بعيدة في كولورادو بالمروحية، عشان تغطي خبر انت ماعندك أي فكرة عنه. توصل للمنطقة على أساس ان في أعمال شغب وهذا كل شيء تعرفه. وهذه المدينة فيها مكان واحد هو الـ Attraction المميز في المدينة والي هو المجمع التجاري Willamette Parkview Mall. فأغلب سكان هالمدينة كلهم موجودين هناك أغلب الوقت في الأيام العادية، فلما صار الشيء، والي هو تحول الزومبيز، فالأغلب انحبس في المجمع وقرروا ياخذونه كملجأ وينتظرون الانقاذ من الحكومة. وانت تواعدت ويا طيار المروحية انه يرجع لك بعد 72 ساعة، تكون خلالها انتهيت من التقرير الي جيت عشانه، فهذه الفكرة العامة من قصة اللعبة، وعلى أساسه ففي Gameplay Loop معين تسويه خلال وجودك في المجمع التجاري.
هدفك كمصور صحفي انك تاخذ صور للأشياء الي تصير في المجمع، لكن أغلب الصور المهمة مربوطة بالقصة فبتشوف Frank ياخذها في المقاطع السينمائية، بدل من انك انت الي تصورها خلال اللعب. هو كـ Mechanic فموجود التصوير وتحصل نقاط على الصور الي تاخذها. وهذه النقاط لها أهمية بشرحها بعدين، بس الحين أبي بعطيكم فكرة عامة عن باقي الـ Gameplay Mechanics قبل ما أشرحها بتفصيل. فبما ان المجمع انشحن بالزومبيز فأكيد انت كـ Frank عليك انك تحمي روحك منهم، لأنك بتضطر انك تتنقل داخل المجمع، فهني في جزئية الأكشن والقتال. بما ان Frank مو شرطي ولا عسكري، فانت ما جيت للمجمع وعندك أسطول من المسدسات، وانما الأسلحة الي تستخدمها هي كل شيء موجود في المجمع من بضاعة في المحلات أو أشجار زينة أو عصا قولف من المحل الرياضي. فعشان جذي لما تشوف صور أو فيديو من اللعبة يمكن تشوف Frank شايل سلة قمامة أو دب قطني أو قناع Servbot من MegaMan، وقاعد يستخدمه عشان يضرب الزومبيز. وبنرجع لهالجزئية بعدين بكلام أكثر. الجزئية الي بعدها تخص انقاذ الناجيين الي تحصلهم خلال تنقلك داخل المجمع. فبعد أحداث بداية اللعبة، تكونون 4 أشخاص يختبأون في غرفة ناطور المجمع، وهذه الغرفة على سقف المجمع ولها طريقة دخول وخروج وحدة من السقف، بما انهم قرروا يسدون الباب المربوط بالمجمع. فلما تشوف أي ناجيين؛ عليك انك ترجعهم وياك لهذه الغرفة من مكان وجودهم في المجمع.. وكالعادة عندي شرح لهالجزئية بعدين. أما الجزئية المهمة الي تربط كل هالـ Mechanics ويا بعض، ان عندك 72 ساعة أو 3 أيام عشان تنجز كل شيء، بأنك توصل لكشف تفاصيل القضية، وتساعد الناجيين في المجمع، وتقتل الزعماء أو الـ Psychopaths، وأي شيء جانبي ثاني موجود في اللعبة. وهالوقت فعلياً محدود. والساعة تمشي من مجرد ما انك تبدأ في اللعبة.
فكشرح مبسط، الي تسويه في كل 24 ساعة في اللعبة، انك تتنقل في المجمع لغرض الوصول لأماكن تخص القضية الرئيسية وتقابل شخصيات مهمة للأحداث. وتنقلك في المجمع خطير بسبب وجود جماعات الزومبيز الي مستعدين يهجمون عليك، فلازم يكون تنقلك مُخَطط وبحذر، وتلجأ للقتال في أغلب الحالات باستخدام الموجود قدامك من أدوات كأسلحة. وانت تتنقل داخل المجمع بتصادف ناجيين بمناطق مختلفة تقدر ترجعهم للملجأ، وبتصادف مجانين الي هم الـ Psychopaths زعماء مقسمين لرئيسيين للأحداث، وجانبيين لانقاذ ناس أكثر، أو فتح قدرات ومساعدات اضافية. ومرة ثانية، كل شيء له وقت محدد خلال الـ72 ساعة الي انت موجود فيها في المجمع.
المجمع التجاري كمنطقة لعب وايد شيء ممتاز، لأنها منطقة مغلقة متوسطة الحجم، وتنقسم لـ 6 مناطق مختلفة، بوسطها ساحة كبيرة. فمنطقة اللعب محدودة وعلى أساسه فعندك طرق معينة عشان توصل للمكان الي تبي تروح له، وبالبداية تكون البوابات بين المناطق مقفلة، فلازم تلجأ للطريق الأطول والأبعد عشان توصل لبعض المناطق، بس ويا تقدمك في الأحداث فبتفتح هذه الاختصارات. وهالشيء له تأثير ممتاز على الـ Gameplay نفسه. يعني محدودية الخيارات في البداية تدفعك انك توازن بين استراتيجيات مختلفة في التنقل. وبالنسبة لي المجمع كمكان يقدم مثل ما قدمه القصر في Resident Evil أو مركز الشرطة في Resident Evil 2. مكان تحفظه ويا الوقت وتعرف تتنقل فيه. بعطيكم مثال بسيط عن استراتيجيات التنقل، بالبداية عندك خانات Inventory قليلة عشان تشيل الأسلحة أو الأدوات، وعليك انك تروح لأماكن بعيدة؛ فطبيعي انك تواجه وايد زومبيز في طريقك. فهني انت توازن حق شنو تستخدم هالـ Inventory slots؟ هل تشيل وياك أكل، وسلاحين لأن رحلتك طويلة وبتاخذ وقت ولازم تهيأ نفسك للقتال وتأكل عشان ترجع الصحة، ولا تختار انك تشيل سلاحين وبدل الأكل تاخذ Skateboard تستخدمه عشان توصل بسرعة للمكان المطلوب وتترك الأكل لأن رحلتك بتكون أسرع بالـ Skateboard؟… فهذه الخيارات عشان تخطط تنقلك في المجمع ببداية اللعبة لها تأثير من كل جانب في الـ Gameplay. سواءً من الاختصارات المفتوحة في منطقة اللعب، أو محدودية قدرات Frank للـ Inventory وللـ Health وسرعة الحركة، وأكيد بسبب محدودية الوقت نفسه.
فعشان تكون عندكم فكرة، خلونا نتكلم عن Frank وقدراته. خلال كل شيء تسويه فـ Frank عنده تطويرات لشخصيته يقدر يحصلها خلال اللعب، وهني جانب النقاط الي تحصلها. النقاط عبارة عن نظام XP بس فيه شيء حلو ومميز. هذه مو لعبة RPG تحصل منها نقاط وبعدين تختار من شجرة مهارات للأشياء الي تطورها. التطوير في Dead Rising عشوائي (لدرجة ما). يعني لما تزيد من Level 1 إلى Level 2، فاللعبة هي عشوائياً في كل مرة تقرر شنو تطور في Frank، هل بتحصل خانة إضافية للـ Inventory عشان تشيل أغراض أكثر؟ ولا بتحصل مربع صحة إضافية يزيد الـ Health، ولا بتحصل ضربة Melee جديدة، ولا بتزيد سرعة حركة Frank؟ يمكن وانتوا تسمعون هالوصف تقولون انه التطوير العشوائي شيء سيء لأن اللاعب ماله اختيار في طريقة لعبه والي يناسبه. لكن هالطريقة وايد حبيتها لأنها تسوي لي شيئين.. أولاً، انها تعطي قيمة لإعادة لعب Dead Rising أكثر من مرة، بما ان كل مرة تجربتك بتكون مختلفة. وثانياً، ان تجربتك بتكون مختلفة لأن بتتأثر الاستراتيجية الي تستخدمها لأداء مهماتك على حسب شنو القدرات الموجودة عندك. فتتذكرون المثال الي عطيتكم قبل شوي عن استخدام الـ Inventory للـ Skateboard أو للأكل… الحين فكروا شلون ممكن هالاستراتيجية تختلف اذا اللعبة طورت سرعة حركة Frank. هل بتحتاج انك تفكر بالـ Skateboard بما انك سريع في الحركة؟ وشلون اذا كان الـ Health أعلى؟ هل بتحتاج انك تفكر انك تاخذ أكل زيادة، ولا تترك هالخانة حق سلاح إضافي. وشلون إذا حصلت قدرة قتال Melee جديدة؟ هل تحتاج سلاح ولا بتكتفي باستخدام حركات المصارعة الي تعطيك اياها اللعبة؟ فهني تشوفون ان هالعشوائية في التطوير تأثر على طريقة لعبك وبالنسبة لي بشكل ايجابي ومميز عن باقي الألعاب، لأنه مصمم بطريقة تاخذ كل جوانب الـ Gameplay في البال وتعرف بالضبط الي قاعدة تسويه للاعب. فهل هالنظام يناسب كل الألعاب؟ أكيد لا، بس تشوفون من الي يقدمه في Dead Rising انه مطور بطريقة ذكية، ويشرح لك شكثر هاللعبة ذكية بتصميمها. فهو نظام مصمم خصوصاً عشان يناسب الي تسويه في Dead Rising.
وهالشيء يتاوصل ويا طبيعة النقاط الي تحصلها عشان ترفع الـ Level من الأساس. عندك أساليب لعب مختلفة مثل ما شرحت لكم بالبداية، بين القتال وانقاذ الناجيين والتصوير. فكل Action تسويه في اي وحدة من هذه الجزئيات فتكافئك اللعبة بنقاط. تقتل زومبي بتحصل نقاط، تصور زومبي بوضعية مضحكة بتحصل نقاط. تقرر تساعد ناجي عشان تحاول توصله لمنطقة الأمان بتحصل نقاط. وكل هالنقاط تروح لنفس الـ Level Up العشوائي.. فيعني اللعبة ما تبيك تركز على جزئية وتترك جزئية ثانية. يعني مثلاً ما قرروا يخلون نقاط التصوير ترفع من تطوير خانات الـ Inventory، وقتال الزومبيز يرفع من تطوير الـ Health. لا، يبونك تسوي كل شيء توفره اللعبة براحتك بدون ضغط أو دافع خارجي يخليك تركز على جزئية معينة بسبب انها تخدمك في اللعبة. يبون تجربتك تكون ديناميكية وطبيعية على حسب لعبك انت، بدل من ان اللعبة تقرر شنو المهم وشنو الأهم. فأحب هالنظام وايد وأشوفه مميز وذكي ومو شرط انه ينفع لأي لعبة ثانية غير Dead Rising.
من ناحية القتال فهي لعبة مو غرضها انها تدفعك لقتال الزومبيز، يعني من أكثر الأشياء الي اشوفها لما أحد مالعب Dead Rising ويحاول يوصفها، يقول انها لعبة زومبيز وقتل زومبيز وغيره من هالأمور. بالنسبة لي الزومبيز مو أعداء تقاتلهم في اللعبة، وانما حواجز في بيئة اللعبة تحاول انك تعرف أحسن طريقة تتعامل وياهم، وتكون في الأغلب بأنك تقاتلهم. وفي فرق صدقوني، حتى لو اني يمكن ما أقدر أوصفه بكلمات، بس في فرق في بالي بين الاثنين. وهذا أحد الأشياء الي أحس Dead Rising 3 ماعرفت تطبقها. في ذيك اللعبة حولوها إلى لعبة قتل زومبيز عالم مفتوح تركيزها على الأكشن وكأنهم نسوا شنو الي كان يميز Dead Rising من الأساس، وخلوني اقول لكم انه ماكان قتال الزومبيز… بالنسبة لي على الأقل. بس خلونا من الجزء الثالث ونرجع للأول. مثل ما تعرفون انك تستخدم كل شيء حولك في المجمع عشان تدافع عن روحك، وهذه الأسلحة لها استخدام محدود، يعني تنكسر بعد فترة. أو اذا كان مسدس فعندك ذخيرة محدودة. وهذه المحدودية هي الي تدفعك انك تجرب كل الي موجود قدامك، فمثلاً عندك عصا Baseball قاعدة تخدمك بأحسن طريقة لكنها تنكسر فجأة بوسط مجموعة زومبيز، فتروح لأقرب شجرة زينة أو مقاعد الاستراحة عشان تستخدمها بما انه مافي شي ثاني قريب منك. وطريقة تفاعل Frank ويا هذه الأسلحة تختلف، فاذا تشيل مظلة فتحس ان لها وزن ووظيفتها انها تسوي طريق وتفصل الزومبيز لجهة اليمين واليسار عشان تمشي بسهولة في الوسط بدل من انها تقتلهم. و الـ CDs الي ترميهم غرضهم انها تحط الزومبيز في حالة Stun تعطيك وقت عشان تمر بينهم. والأقنعة أو السطل الحديدي تحطه على راس زومبي عشان ما يقدر يشوف. فالاختلافات تتعدد، والحلو في المجمع انه مثل ماقلت بالبداية، محدود بالمناطق الي تقدر توصل لها بسرعة، فأماكن الأسلحة القوية والمسدسات وسيف الـ Katana وغيره، مو متوفر لك بسهولة من البداية، لأن من رأيي انها تخليك Overpowered فالأحسن انك تستخدم الي حولك، بس بعد الحلو ان اللعبة ما تمنعك انك تروح تاخذ هالاسلحة اذا تبي تستخدمها من البداية. يعني مثل ما قلت ان في تصميم مناسب حق إعادة اللعب. فيمكن هذه سابع مرة تلعب فيها Dead Rising وتبي تشعر بالقوة، فتروح بأسرع وقت تاخذ الـ Shotgun وتمشي براحتك في المجمع بدون خوف. لكن أكيد اذا كانت أول مرة تلعبها فما تعرف الاختصارات ولا تعرف أماكن وجود هالأشياء، فهالمعلومات بتكون موجودة للي يرجع يلعب اللعبة، لكنها مو موجودة للتجربة الأولى. ففي توازن حلو في التصميم يخدم نوعية اللاعب بحسب تجربته السابقة أو عدمها ويا اللعبة.
أما النقاط الي تحصلها من جانب التصوير فانت عندك كاميرا ابو فيلم، يعني حدك 30 صورة ولازم تمسح الصور الي ما تبيها. في عدة نوعيات من الصور، مثل الرعب أو الدراما أو الكوميديا، بحسب مضمون الصورة. واذا في عدة أشياء تصير في الصورة الوحدة فبتحصل على كل وحدة منها نقاط مختلفة. وفي مكافأة للمخاطرة، لأنك اذا تصور زمبي من قريب وهو قاعد يهجم عليك فالنقاط أعلى بوايد من انك تكون بالطابق الثاني وتصور الزومبيز الموجودين في الطابق الأرضي. وفي تفاعل ويا الي تسويه عشان تخدم نتيجة الصورة، يعني اذا تبي صور بعنوان الكوميديا فتقدر تاخذ قناع الـ Servbot وتحطه على راس زومبي وتاخذ الصورة فبتكون من ضمن هالتصنيف. أما اذا شخصيتين محبوسين وفاقدين الأمل من النجاة فالصورة بتكون بتصنيف الدراما. وانت تقرر تحتفظ بالصور الي تبيها وتمسح الي نقاطها قليلة. ومرة ثانية هالنقاط تروح للـ Level Up فعندك دافع توقف بوسط زومبي وتقرر تاخذ صورة لأنك قريب من الـ Level الي بعده.
وفي شيء ماعرف متى أتكلم عنه بس بقوله الحين. المجمع التجاري فيه محلات كتب، وهذه الكتب تقدر تشيلها وياك، لكنها تاخذ خانة Inventory فلازم تفكر باللي تشيله وتخليه. الي تسويه الكتب انها تضيف لخصائص الحصول على النقاط، ففي كتاب مثلاً يخليك تحصل 25% نقاط أكثر من التصوير، أو 25% نقاط أكثر من قتل الزومبيز، أو تزيد من مدة استخدام سلاح من فئة معينة قبل ما ينكسر. أو انك تتعلم تتكلم ياباني… وهذا الكتاب الأخير يوديني لجزئية مختلفة من الـ Gameplay.
انقاذ الناجيين شيء جانبي تقدر انك ما تسويه نهائياً… اذا ما كانت عندك رحمة طبعاً. وكمثال، عشان تقدر تنقذ سياح يابانيين فلازم يكون عندك كتاب اللغة اليابانية عشان تقدر تكلمهم وتقنعهم يروحون وياك. فوانت تتنقل في المجمع فيمكن تشوف شخص أو مجموعة أشخاص يصرخون ويطلبون المساعدة، أو ان Otis الي هو ناطور المجمع يتصل عليك باللاسلكي ويقولك عن انه شاف ناجي في كاميرات المراقبة في محل معين من المجمع، فعندك وقت محدد تروح تنقذه فيه، قبل ما ياكله زومبي أو قبل ما يقتله ناجي ثاني بالـ Sniper. الي موجودين في المجمع غير عن الزومبيز هم عبارة عن ناس طبيعيين، وناس مجانين هم الـ Psychopaths. فاحياناً عشان تنقذ مجموعة أشخاص، فلازم تواجه زعيم في اللعبة عنده Health bar وضربات وطريقة قتال مختلفة. هالأشخاص فعلاً مجانين، ويجي منهم جانب الكوميديا الي تكلمت عنه بالبداية.. غريبين أطوار وقصتهم حزينة وتضحك بنفس الوقت، وهو الي يضيف حق الـ Lore وعالم هاللعبة والي يخلي هالمكان يتصدق وهالشخصيات لهم خلفية وتحس انهم ناس صجيين ومو مجرد NPCs محطوطين عشان يضيفون للـ Gameplay. برجع اذم في Dead Rising 3 شوي، هناك مثلاً لأنك في عالم مفتوح فخلوا الـ Survivors عشوائيين، يحط له اسم وشكل عشوائي ويطلعون بأماكن مختلفة من الخريطة، ويصيرون Respawn مع الوقت، وتبيك اللعبة انك تهتم انك تنقذهم. لكن لا هم شخصيات ولا تهتم لأمرهم لأن واضح في ذيك اللعبة ان وجودهم مجرد Gameplay feature بدل من فكرة محطوطة بعناية ومربوطة بعالم وقصة اللعبة. في Dead Rising لأنك تشوف الوضع الي اهم فيه ومحاولتهم للنجاة، وحتى لما تكلمهم كل شخص له حوار خاص فيه كشخصية في اللعبة بدل من مجرد NPC يبيك توصله للأمان، فتحس ان كل ناجي عبارة عن شخص فعلي ومختلف تبي تحاول انك تنقذه. وهذا له تأثير سايكولوجي على اللاعب… أو بالنسبة لي على الأقل.
وأبي اذكركم ان انقاذ الناجيين وقتال الـ Psychopath شيء جانبي في اللعبة ومو أساسي. وبعد بخلي في بالكم نقطة ان الوقت محدود، وبرجع لها بعدين.
فالمهم ان جزئية اللعب حق الانقاذ فيها موازنة مثل كل شيء ثاني في اللعبة. وهني الموازنة تجي بعدة طرق. أولها، هل احاول أنقذ أكثر من ناجي بنفس الوقت؟ وثانيها، هل عندي وقت كافي قبل المهمة الرئيسية عشان انقذ شخص واوصله وبعدين أروح للثاني؟ وبعد عندك موازنة في طريقة تنقلك داخل المجمع عشان توصل للناجي، هل لأنه في منطقة بعيدة فعندي وقت ضيق عشان أوصل له فبروح له بالبداية وبعدين أرجع للناجي الي قريب من منطقة الأمان؟ لكن شلون لو ان الناجي البعيد في أمان لأنه مختبأ في محل التُحف فمافي زومبيز يقدرون يوصلون له ويقتلونه، لكن الناجي الي أقرب مني موجود في منطقة الألعاب للأطفال المفتوحة وحوله زومبيز من كل مكان؟ شلون هالشيء بغير من تخطيطك واستراتيجيتك لمحاولة انقاذهم؟ وبعد لازم توزان بين ان في ناجيين تقدر تعطيهم سلاح ويدافعون عن نفسهم وهم يلحقونك لمنطقة الأمان، فيقدرون يقتلون الزومبيز الي في طريقهم، أما في نوعية ثانية يخافون وكل شوي يطلبون انك تمشي قريب منهم وتقتل الي حولهم فياخذون وقت أطول عشان توصلهم للأمان، وفي عجايز ما يقدرون يمشون فلازم تحملهم على ظهرك، فتوقف كل بين فترة في محل آمن مؤقت، وتروح بـ Frank تقتل جماعات الزومبيز عشان تخلي الطريق فاضي وبعدين تشيل الناجي على ظهرك وتوديه لمنطقة ثانية وتكرر الي صار، فما تقدر تنقذ 3 أشخاص دفعة وحدة اذا كانت هذه نوعية الناجيين. ففي الأخير، هل بتقبل انك ما تقدر تنقذ كل الناس وبتكتفي باللي تقدر عليه؟ وهالنقطة الأخيرة الجانب السايكولوجي الي قلت لكم عنه.
لأنك تحس ان الناجيين شخصيات او اشخاص حقيقيين ومو مجرد اسم في قائمة، ففي جانب مني كان يقول لي اني لازم احاول انقذهم وما ابي احد يموت في مكانه. فمثلاً وأنا راجع من منطقة بعيدة وانقذت ناجي من المهرج، فهو علمني طريق مختصر بين المناطق، وهذه كانت مكافئتي لانقاذه بدون ما أدري سابقاً انه بيعطني هالأفضلية الكبيرة (لأنها ما كانت في قائمة في اللعبة وتشجعك اللعبة على انك تسويها). فهو كان وياي وكنا قريبين نوصل لمنطقة الأمان، لكن قريب من الباب الي ياخذني للمستودع، كان في ناجية بوسط زومبيز واذا دخلت المستودع عشان أوصل الناجي الأول فمستحيل أني بقدر انقذها… لكن في نفس الوقت كنت أشعر داخلياً اني ممتن حق هالناجي لأنه علمني طريق مختصر فما أبي أجازف بمحاولة انقاذ البنت وأخسر هالشخص الي سوى لي خدمة بالمقابل. لكن بعدها قررت اقوله يوقف بمكان معين كان آمن شوي، لكنها مو منطقة محصنة. فرحت عشان انقذ البنت. وفعلاً قدرت انقذ الاثنين ووصلتهم بآمان لغرفة الناطور… لكن هذه مو نهاية الموقف، لأني وانا بغرفة الناطور، طلع لي بوسط الشاشة اسم شخص توه مات قبل لحظات ( لأن اللعبة تقولك اذا شخص مات بأحرف كبيرة تطلع بوسط الشاشة) فدشيت لمعلومات الدفتر عشان اقرأ عن الي ماتت ووين كانت بالمجمع، فتفاجأت ان صورتها تشبه البنت الي انقذتها وهي قدامي حالياً، لكن الي انقذتها كان الاسم الي تحت هالأسم الي مات. فلما شفت التفاصيل عرفت انها اختها التوأم، لكني ما شفتها أو ما انتبهت للحوار قبل ما انقذها، فيمكن قالت لي عن مكان اختها، بس انا كنت مشغول احاول احط عين على الشخص الثاني الي كان وياي بوقتها فما انتبهت لوجود التوأم. فبالنهاية انقذت وحدة منهم بس، وهني فعلاً جاني شعور غريب بسبب اللعبة، مع انه مو Mechanics ولا حوار محطوط، بس في بالي قاعد أقول اني انقذت اخت وخليت الثانية تموت، فهل الاخت الي انقذتها بتشعر بالحزن لأنها فقدت اختها، بدل من انها تكون ممتنة اني انا انقذتها، وبنفس الوقت عطتني اللعبة شعور بأني شخص واحد قاعد أحاول أسوي الي أقدر عليه، لكن ايد وحدة ما تكفي، وعندي وقت محدود قاعد أحاول أسوي وظيفتي الأساسية وبنفس الوقت قاعد احاول استخدم وقتي الضيق عشان انقذ الناس. فماعرف شلون انظم وقتي عشان انقذ الكل.
وهالشعور يتكرر، فمثلاً كنت راجع ووياي 4 أشخاص، وقريب من الملجأ طلعت لي رسالة ان شخص واحد مات. كنت أفكر من الـ 4 الموجودين وياي، لكن طلع شخص خامس ماشفته. فحزنت على شخص واحد مع ان حرفياً وياي 4 انقذتهم دفعة وحدة. وهالشعور ما يروح وانت تلعب وتعيد اللعب، لأن في كل مرة يمكن تسوي الأمور بترتيب مختلف وتلتقي بشخصيات مختلفة لهم قصة مختلفة فتجربتك ما تكون نفسها. وهذا جانب من اللعبة للحين مستمر وياي.
فالحين أخيراً، بجي للنقطة الأخيرة الي تربط كل القيمبلاي ويا بعض. محدودية الوقت، والتخزين اليدوي. تعمدت اني أخلي هالنقطة للأخير لأن ويا اعلان الريميك طلعت معلومات انهم بيضيفون Auto Save في اللعبة، وبالنسبة لي وبالنسبة لوايد من الي لعبوا اللعبة الأصلية شوي متخوفيين من هالقرار… مو لأن نبي شي قديم مثل ما كان بالأصل وما نحب التغيير وما نحب مزايا الـ Accessibility. لا بالعكس، بس لأن هالنظام كان جزء من الـ Gameplay loop ويربط كل شي ببعض، فتعمدت اخلي الكلام عنه للنهاية عشان الي يسمع الحلقة ومالعب Dead Rising تكون عنده فكرة كاملة عن ليش الـ Manual Save كان خيار تطوير، وماكان محدودية الجيل. اللعبة الأصلية نزلت على Xbox 360 وكان في ألعاب تدعم الـ Auto Save وقتها، فالوضع مختلف شوي عن Resident Evil الي نزلت بجيل الـ Memory Cards فكان في محدودية أدت لخاصية قيمبلاي. هني الوضع بالعكس، اختيار المحدودية كان مُتعمد لغرض يخدم القيمبلاي.
عندك 72 ساعة عشان تسوي كل شيء رئيسي في اللعبة، أو أي شيء جانبي تقدر توازن وقتك عشانه خلال الأوقات الي تنتظر فيها ساعة معينة لغرض الأحداث الرئيسية. فيعني الشعور الي وصفت لكم عن الموازنة بين انقاذ الناجيين وتخطيط طريقة تنقلك وكل هالأشياء، انت مجبور كلاعب بوقت محدد، وهو الي يضيف للـ Stress في هاللعبة. لو اني اقدر انقذ الناجيين بأي وقت ابيه لأنهم يظلون بمكانهم بما اني ماتفاعلت وياهم، فهذا ما يخلي اهمية للموازنة بين الخيارات المتوفرة قدامي. فبكل بساطة بروح اسوي كل شيء مهم وبعدين أروح للناجي بعد ما أخلص كل شيء. لكن لأنه محدود بوقت معين، فعندي بالضبط نصف ساعة قبل ما لازم اكون موجود بمطنقة المهمة الرئيسية، فهل أقدر اسوي هالشيء الجانبي حالياً وأرجع لمنطقة الأمان قبل الوقت المحدد؟ فكل مرة تطلع فيها للمجمع من غرفة الأمان فأنت قاعد تجازف وتوازن بين عدة اشياء. فالمكان الي تخليك اللعبة تحفظ فيه تقدمك هو في غرفة الأمان، وداخل المجمع في الحمامات العامة. فهذه المنطقتين هم طريقتك الوحيدة لحفظ التقدم، لأنهم بداية أي مخطط رحلة. لما تقرر تطلع للمجمع انت عازم على الشيء ومخطط لطريقك ومخطط لوقتك بانك تنجز الشيء الجانبي الي تسعى عليه خلال هالمدة المحددة المتوفرة لك. فاذا وصلت للـ Psychopath وقتلك فـ Gameover لازم ترجع لآخر ملف حفظ، بدل من انك تعيد من بداية القتال… ويمكن خلال هالوقت انت حصلت Level Up وجمعت أسلحة قوية، ووراك ناجي شفته بالصدفة وقررت تاخذه وياك… لكن بسبب موتك عند الزعيم فانحذفت كل هالانجازات الي سويتها ورجعت للنقطة قبل ما تبدأ هالرحلة… هل هو عقاب من اللعبة؟ لا… هل هو تصميم متعمد؟ أي… بس شلون؟؟ بحاول أشرح.
لأنك مت عند الزعيم الجانبي فهذا سببه شيئين أو يمكن عدة اشياء. يا اما، ما كنت مستعد من ناحية الأدوات والأسلحة الي شلتها وياك، فمت بسبب الـ Health لأن ماشلت وياك أكل لانك قررت تاخذ بس اسلحة في الـ Inventory slot المحدود عندك. أو انك مت لأن انتهى الوقت عليك ورحلتك كانت أطول من الي توقعته، فحتى بعد ما هزمت هالزعيم الجانبي لكن ماكان عندك وقت كافي ترجع لمكان المهمة الرئيسية فخسرت تقدمك.
السبب الي يخلي اللعبة ترجعك لمنطقة الأمان بوقت محدد كـ Gameover، هو عشان تعطيك درس: خطط رحلتك بطريقة أفضل. هالمرة انت تعرف ان الزعيم قوي وعرفت حركاته فتعرف شنو السلاح الي لازم تاخذه وياك. فتخطط الرحلة بطريقة تخليك تروح لمكان من المجمع تاخذ فيه هالسلاح قبل ما تروح تواجهه، مع انه ياخذ وقت اطول إلا انه بيقلل من وقت مواجهتك ويا الزعيم نفسه فبتوفر وقت بالنهاية. والدرس الثاني، لازم تخطط اولوياتك في هذه الرحلة، انت صرت Gameover لانك قررت تسوي وايد اشياء جانية، وقررت تروح لأكثر من مكان وأكثر من ناجي عشان تستغل الوقت، لكن في المقابل انت مو مستعد من ناحية قدراتك أو وقتك، وقررت انك تاخذ مسؤليات اكثر من الي تتحملها. فالحين بما انك تعلمت انك بتموت فلازم تغير تفكيرك لنفس الرحلة وتنظر لها بمنظور ثاني. وهني ترجع فكرة الموازنة… أي يمكن Frank ما يقدر ينقذ كل الموجودين، فللأسف شخص من الناجيين راح يموت وما بقدر أسوي شي… وهالشيء بالنسبة لي يغذي عنصر إعادة اللعب.. فالحين بما انك كملت اللعبة للمرة الأولى، بتعرف ان في اهمية للتطوير وبتبدأ من الساعة الأولى الي تحط رجلك داخل المجمع انك تخطط للي بتسويه بعد 50 ساعة من الحين.
شخصياً أفهم ليش بحطوون Auto Save.. لأن في حالات ممكن انك تفقد كل شيء سويته خلال 10 ساعات لعب بلحظة وحدة. يعني المهمة الأخيرة وانا ألعب هالمرة، كنت قريب من اني أقفل على روحي اللعبة بدون طريقة اني اخلصها فلازم أعيد اللعبة كامل من البداية. كان الـ Manual Save الي سويته قريب من وقت آخر 4 مهمات الي هي ورى بعض، فمافي طريقة اني اخلص اللعبة لو أني كنت تأخرت 5 دقايق من الوقت داخل اللعبة. يعني فعلياً كنت محدود بالوقت، وأقل تأخير ممكن انه يسبب ان هالتخزينة خلاص مالها رجعة. لأني شنو سويت، كانت المهمة الأخيرة عليها مربع أصفر من ناحية الوقت، وهاللون يتغير من أخضر الى اصفر الى أحمر بحسب كم باقي. فالمهم اني شفته أصفر وقررت أروح أقاتل Psychopath، لكن ضيعت وقتي بعدة اشياء، فصارت المهمة الأخيرة في الوقت الأحمر وهني انا رجعت للأمان وسويت Manual Save. مع انه مداني أروح وابدأ المهمة الأخيرة، لكن ما كنت أقدر انهيها في الوقت المحدد، فصرت Gameover بسبب الوقت، وخلاص ما أقدر أسوي شي. يعني حتى اذا عدت من هالتخزينة فهذه أسرع حركة ممكن اسويها للتنقل بين الأماكن المطلوبة وهزيمة الزعيم، فكل مرة أعيد راح يخلص علي الوقت. بس زين ان كان عندي تخزينة سابقة قبل ما اسوي الرحلة الجانبية الأخيرة الي ضيعت وقتي، فرجعت لها وكملت اللعبة بدون ما أسوي الشي الجانبي. طبعاً في حل ثاني، تقدر تبدأ اللعبة من جديد لكنك تحتفظ بكل الترقيات الي حصلتها لـ Frank، فحتى لو بدأت من جديد، بتكون اللعبة أسهل لأنها موازنة انها تحافظ على تقدم شخصيتك حتى لو صرت Gameover.
فيعني أعرف ان حالياً طبيعة اللاعبين نفسهم ما يبون يحسوون انهم ضيعوا وقت ووصلوا لنقطة خلاص مايقدرون يرجعون فيها ومايقدرون يكملون اللعبة بسببها، وبيعتبرونها لعبة فاشلة قفلت تقدمهم باللعبة بسبب خطأ تقني بنظام الـ Saving مع انه مو هذا السبب. فالـ Auto Save عبارة عن حل لهالمشكلة. فيعني كانت مشكلة أنا كنت بواجهها، لكن لأني أعرف نظام اللعبة فكنت أعرف اني اخلي أكثر من تخزين بأوقات مختلفة عشان أرجع للتخزين السابق اذا صادني مثل هالشيء. يعني حتى اللعبة على Xbox 360 كان فيها 3 خانات حفظ، مقارنة بنسخة PS4 الي زادتها لـ5.
لكن مشاكل الـ Auto Save أو انك تحفظ بأي مكان، بتكون واضحة لتأثيرها على أساليب اللعب بالنسبة لي. فالحين ويا النظام الجديد الي للأمانة للحين ماعندنا تفاصيل كاملة عنه، لما أوصل للـ Psychopath، بسوي Save قبل ما ادخل اواجهه، واذا خسرت، برجع لهالنقطة مباشرة واواجهه مرة ثانية وثالثة ورابعة.. فحتى لو اني ماكنت مستعد من ناحية الأدوات والأسلحة، الا اني أقدر أدرعم أو استخدم Brute force مثل ما يقولون لحد أطلع بالنتيجة الي ابيها. وهالشيء يأثر على طبيعة اللعبة الي تبيك تخطط. فجانب التخطيط ممكن انه يقل او حتى ينعدم بسبب تغيير بسيط مثل امكانية الحفظ بأي مكان أو Auto Save. فبروح انقذ شخصية، وانا راجع شفت شخصية ثانية، بسوي Save وبحاول انقذ الشخص الثاني، واذا فشلت فبرجع للـ Save السابق وبحاول بطرق مختلفة لحد انقذهم اثنينهم… فتتذكرون الموقف الي قلت لكم عنه عن الأخت التوأم… هالشيء بكون معدوم بسبب تغيير لنظام الـ Save ويشيل جانب مهم كان يعطي شعور للاعب بأنه مايقدر ينقذ الكل. فيعني أفهم ليش بغيرونه، لكن يأثر على توازن اللعبة الي كانت موزونة بشكل ممتاز من الأصل. فأميل لجانب الي اتمنى يكون Save محدود بطريقة ما عشان يمنع هالتأثير السلبي. ومثل ما قلت، ان ما عندنا تفاصيل كاملة، فأتوقع ان أول مرة العب فيها الريميك بجربها بالـ Auto Save عشان اشوف اذا في تغيير في التوازن والاحساس باللعب، ولا راح يضبطونه بطريقة ثانية.
أما من جوانب ثانية فالريميك يحمسني وايد الصراحة. قلت لكم بالبداية اني كنت مخطط لهالحلقة قبل اعلان الريميك، ففي ملاحظات كتبتها أول ماحصلنا الاعلان لكن قبل ما نحصل التفاصيل، فأكدوها حالياً. كنت أتمنى انهم يضيفون تمثيل صوتي كامل، لأن اللعبة الأصلية فيها حوارات مكتوبة لما يكلمك Otis باللاسلكي مثلاً، فيمكن تكون مشغول بتركيزك داخل عالم اللعبة وتشيل عينك من الحوار المكتوب. فأفضل لو كان في تمثيل صوتي كامل. وهالشيء أكدوه للريميك. وحتى عرفته من اول Teaser نشروه، بما ان صوت Frank West للممثل الصوتي الي كان في الجزء الرابع بدل الأصلي، فيعني كان واضح انهم اعادوا تسجيل كل شيء من البداية. أما من ناحية الـ Balancing… فالأشياء الي تخص محدودية الـ Inventory وعشوائية التطويرات الي تحصلها فهذه ما أبيهم يغيرونها. يعني لو كان في شجرة مهارات انت تختار منها فهذا شيء يأثر على موازنة اللعبة نفسها، فأتمنى يحافظون على الأصل.
في أشياء وايد خلت Dead Rising تكون لعبة ترجع تلعبها أكثر من مرة. يعني بعيداً عن النهايات المختلفة الي تقدر تحصلها. أتوقع في 7 أو 8 نهايات مختلفة… لكن حتى داخل اللعبة من الاشخاص الي تنقذهم، والـ Psychopath الي تواجههم. فمتأكد ان اول مرة تلعبونها ما بتشوفون كل الزعماء الجانبيين، ولأن تجربتك تكون مختلفة في كل مرة تلعبها فانت تبي تلعب اللعبة كلها من جديد وتسوي خيارات مختلفة. أو حتى الأطوار الاضافية الي تفتحها، أو تبدأ الطور العادي بكل الترقيات الي حصلتها فـ New Game+. وصدقوني لما أقول ان التفاعل ويا كل شيء موجود في العالم شيء مجنون، وكله يعتمد عليك وانت شنو تحب تجرب، يعني الـ Skateboard الي قلت لكم عنه يمكن ماتفكر اصلاً انك تروح عند الرف الموجود عليه عشان تشوف ان في زر يخليك تستخدمه، ونفس الشيء بالنسبة لآلات المشي واللياقة في الـ Gym، أو الـ Blender في الـ Food Court. اللعبة نفسها ماتحط لك زر من بعيد عشان تعرف ان هالغرض تقدر تتفاعل وياه، بس تقريباً كل شيء موجود في المجمع له طريقة تتفاعل وياها وتعطيك نتيجة فريدة مختلفة عن الأغراض الثانية الموجودة.
بس هل هي لعبة بدون أي مشاكل؟ أكيد لا، فيعني عندك الـ AI للـ Psychopaths مو دائماً ذكي وممكن انك تحشرهم بمكان وتقتلهم بدون تحدي، وحتى الـ AI للناجيين يقهرونك وانت تحاول تنقذهم. يعني الـ AI كله بشكل عام، وهذه اهم نقطة يبي لها تحديث بالريميك. وفي جوانب من القصة الي ما بتكلم عنها، لكم عليها من ناحية الكتابة. لكنها لعبة من تطوير ياباني تستخدم مناطق وشخصيات أمريكية، ففيها الجانب الكوميدي الي أنا أحبه مثل في لعبة Metal Wolf Chaos، يعني يمكن Stereotypes و Over the top احياناً بس شخصياً ما امانعها وبالعكس أحبها. ونسخة الـ PS4 فيها مشاكل تقنية، احياناً تخلي كل الشخصيات ظِلال والصوت ينقطع وفيها Screen tearing. فيعني هي مو لعبة مثالية، لكن المتعة والحرية الي تقدمها لك كلاعب كتجربة فريدة تغطي على كل هالأمور، والي بتتذكره من اللعبة بعد ما تلعبها هو الأشياء الحلوة الي سويتها.
فالحين أتمنى صرتوا تعرفون ليش Dead Rising لعبة ممتازة، سواءً بتقررون تلعبون نسخة PS4 والا تنتظرون الريميك الجديد عشان تجربونها أول مرة… فصدقوني حتى لو انكم سمعتوني أتكلم عن كل هالأشياء وأفصل فيها، الا انكم لما تلعبونها ما بتفقدون شيء من هالشعور وبتحصلون تفاصيل أنا ما مريت عليها في هالحلقة. مع طول هالحلقة إلا ان في تفاصيل أكثر وللحين في أشياء تكتشفونها بروحكم… وتشويقة لكم، في شيء اسمه Overtime mode، ما بتكلم عنه.
فبرجع لكلامي بالبداية اني سميتها لعبة PS2. تعرفون لما أحد يحاول يقلل من قيمة لعبة معينة حالياً يقول عنها لعبة PS3 أو لعبة أتاري. بس احياناً هالشيء مو ذم بالنسبة لي وانما ايجابية اذا تحب نوعية الألعاب من مختلف الأجيال. بالنسبة لي Dead Rising مع انها لعبة Xbox 360 إلا انها بطبيعتها أو تصميمها كأنها من الـ Dreamcast. نوعية من الألعاب الي تركز على تجربة مختلفة لكل مرة تلعبها فيها بدون ما انها تضيف اشياء جانبية وتوسع خريطتها لغرض إضافة وقت لعب أزيد، بدل من متعة لعب أكثر. يمكن اقول عنها لعبة Dreamcast لأنها تذكرني بطريقة اللعب في Illbleed، لعبة Survival Horror بطابع كوميدي وبأساليب لعب تركيزها مو الأكشن… ويمكن هاللعبة يبي لها حلقة منفصلة في يوم من الأيام.
لكن عموماً هذه أطول حلقة خفايف ألعاب من بين الـ79 حلقة الي نزلتها. غيرت شوي في طريقة التجهيز والكتابة لهالحلقة وماعرف اذا بتلاحظون الي تغير أو لا. على الأغلب ما بتلاحظون. فقبل ما أخليكم، أتمنى اذا عجبتكم الحلقة فتعطونها لايك على يوتيوب، أو تقيمون البودكاست على المنصات الي تسمعون عليها الحلقات. أحاول أوصل كلامي عن الألعاب لمجموعة أكبر من الناس، فإذا حبيتوا الي سمعتوه لا تبخلون بمشاركة الحلقة ويا أشخاص ثانيين يحبون الألعاب.. واذا عندكم أي تعليقات عن هاللعبة فاكتبوها لي سواءً على يوتيوب أو على تويتر، والروابط موجودة في وصف الحلقة. وبعد عندي صفحة باتريون و كوفي اذا تحبون تدعموني بشكل مادي مباشر… وبالأخير، حدي متحمس لريميك Dead Rising مع اني توي لاعبها ومخلصها. وهذا كل شيء لحلقة اليوم. كان وياكم علي الساهي ومع السلامة.
