أقدم لكم الحلقة الرابعة من بودكاست خفايف ألعاب. بتكلم في هذه الحلقة عن لعبة Marvel الجديدة على الأجهزة الذكية وبشاركم تجربتي وانطباعي بعد ما لعبت أكثر من 15 ساعة هالأسبوع. وقبل ما نبدأ، أذكركم انكم تشتركون بصفحة البودكاست عشان توصلكم الحلقة أول ما تُنشَر على المنصات الي تستخدمونها. فخلونا الحين نبدأ بالحلقة ونشوف شنو الجديد في لعبة Marvel Snap.
إذا ما سمعتوا عن اللعبة فعلى الأغلب هي من نوع الألعاب الي انتوا مو مهتمين فيها. لأن لعبة Marvel Snap لعبة بطاقات مجانية على الأجهزة الذكية…. لحظة قبل لا تسكر الحلقة، أسمع انطباعي عنها ويمكن تغير رأيك شوي وتفكر تجربها. كانطباع مختصر، اللعبة ممتعة وتضيع وقتك لما تكون في مشاوير وتبغي تلعب مباراة ما تأخذ أكثر من 10 دقايق. بالنسبة لي، أنا لاعب Casual حق ألعاب البطاقات، فكلامي اليوم عن اللعبة بكون من شخص جرب يلعب Hearthstone و Yu-Gi-Oh! لكن أبعدني التعقيد عن هذه الألعاب، أما Marvel Snap أحسها مصممة للـ Casuals مثلي، بس بدون أنظمة ألعاب الـ Gacha Games مثل Dragon Ball Dokkan Battle الي كنت ألعبها حتى.
كل مباراة من Marvel Snap تسمح لك انك تدخل 12 بطاقة وياك. وكل مباراة تستمر لـ6 جولات بس. عندك طاولة اللعب مُقسمة إلى 3 ساحات معركة، وفي كل ساحة مسموح لك بـ4 شخصيات بس. الهدف من اللعبة أنك تفوز في ساحتين من المعركة عشان تفوز بالمباراة.
في البداية تعلمك اللعبة شلون تلعب إذا ما جربت لعبة بطاقات من قبل. الطريقة ان لكل شخصية مُتَطَلَب استدعاء، أو بسميها Mana في هذه الحلقة عشان تكون أسهل لكم. وكل شخصية عندها طاقة قوة. وفي الأغلب كل ما تتطلب الشخصية Mana أكثر كل ما كانت قوة الشخصية أعلى، لكن في قدرات خاصة بتكلم عنها بعد شوي متعلقة بالشخصيات. المباراة فيها 6 خطوات، وتبدأ أول خطوة وعندك طاقة Mana وحدة، وتزيد ويا كل خطوة لحد توصل إلى 6 Mana في آخر جولة. وقبل ما أشرح الشخصيات، نرجع حق طاولة اللعب والساحات الثلاث.
كل ساحة معركة لها نظام معين وتكون عشوائية في كل مباراة تلعبها. فمثلا عندك ساحات إذا تضيف لها شخصية، تستنسخ هذه الشخصية وتحطها في ساحة مختلفة، فتصير عندك شخصيتين من بطاقة وحدة. وعندك ساحات قتال تزيد قوة كل شخصية موجودة عليها بدرجة وحدة مع كل خطوة في المعركة. وفي ساحات ما تقدر تلعب عليها شخصيات نقاط الـ Mana حقهم أقل من 3. لازم تقرأ شنو خصائص الساحة عشان تعرف شنو أفضل استراتيجية وشنو أفضل الشخصيات الي تقدر تحطها. العشوائية هذه في ساحات القتال ويا كل مباراة هي الي تخلي كل قتال يكون مختلف ولكن بشكل حلو. لأن يمكن البطاقات الموجودة عندك تكون سيئة في أول 3 جولات، لكن بسبب ساحة معركة معينة تحصل شي إيجابي يساعد شخصياتك، وتتحول المعركة لصالحك بسبب الاستراتيجية.
هذه الاستراتيجية وليدة من ساحات القتال، لكن عندك استراتيجية ثانية ومهمة بدرجة أكبر، وهو قدرات شخصياتك. فعندك شخصيات مثل Medusa قوتها 2، لكن لما تلعبها في ساحة المعركة الوسطية يزيد طاقتها إلى 4. فتحاول دائماً انك تلعب Medusa في الساحة الي بالوسط، وتخيل مثلاً في احد المباريات تكون هذه الساحة تعطي شخصيتك قوة وحدة زيادة مع كل جولة، فتصير طاقة قوة هذه البطاقة تزيد من 2 كأساسي وتوصل إلى 7 بنهاية المباراة. وعندك شخصية Iron Man طاقة قوته صفر لكنه يحتاج 5 Mana عشان تستدعيه، فبتشوف انه شخصية ما تستاهل تلعبها اذا طالعت قوته بس، لحد ما تشوف قدرته الخاصة، لأنك لما تلعب Iron Man في ساحة المعركة يأخذ القوة الاجمالية للساحة ويضاعفها مرتين. فالحين تشوفون إذا Medusa كانت قوتها 7 بنهاية المباراة، و Iron Man ضاعف قوة الساحة بنهاية آخر جولة يصير الإجمالي 14. فتشوفون انكم استخدمتوا بطاقات ضعيفة من النظرة الأولى لكن لما تستخدم قدراتهم ويكون عندك حظ من ساحات المعركة يصب في مصلحتك، تقدر تحول أي مباراة إلى فوز.
بس أهم شي أقوله حالياً، أن اللعبة عجبتني لحد الآن لأن مافيها تعقيد ألعاب البطاقات الثانية الي جربتها. لأني لعبت Hearthstone مثل ما قلت لكم، لكن مشكلتي بالنسبة لي… لما يجي وقت تحط حزمة البطاقات الخاصة فيك أو جانب Deck Building. هني انا أفقد اهتمامي بألعاب البطاقات، لأني ما أعرف أصنع حزمة بطاقات متناسقة ويا بعض، عشان تطلع الاستراتيجية أفضل. لأنه بسبب قدرات البطاقات احياناً يخليك تسوي أشياء خارقة، لكنها تحتاج سقف مهارة كبير في الاستراتيجية. في Marvel Snap، على الأقل لحد الحين بعد 15 ساعة لعب، واللي شفت فيها بطاقات وايد، بسبب ان حزمة بطاقاتك محدودة بـ12 شخصية بس، فشغل Deck Building أقل، ولحد الحين القدرات واضحة في طريقة استخدامها وما فيها التعقيد الموجود في الألعاب الي تركز على نظام البطاقات بشكل كبير. وأتمنى هذا الشيء يتواصل مستقبلاً في Marvel Snap عشان تكون لعبة بطاقات يقدر أي شخص Casual في هذا النوع انه يلعبها.
مثل ما سمعتوا من شرحي، ان قدرات الشخصيات موجودة مثل باقي ألعاب البطاقات، لكنها مُبسطة لدرجة تخلي أي شخص جديد يفهمها بسهولة. يعني في ألعاب ثانية، عندك بطاقات عشان تستدعيها يكون الشرط انك لازم تضحي ببطاقة معينة، وبعدين تستدعي وحش من المقبرة، وتستخدم بطاقة تعطيك 3 Mana عشان تحط بطاقتين على الطاولة، بعدين تبدل هالبطاقتين بالشخصية الي كنت تبغيها. هالكلام مو موجود في Marvel Snap. موضوع تضحية البطاقات، من الي شفته انك مثلاً اذا بتستدعي شخصية Lady Sif هي راح تقتل أكبر بطاقة موجودة في ايدك وقتها وتنحط على الساحة مباشرة، و Carnage مثلاً يذبح كل شخصياتك على الساحة لكنه يحصل قوة إضافية لكل شخصية يدمرها. فما في تفكير من جانب اللاعب نفسه في هذه الأنظمة، لأن Marvel Snap تبسط موضوع الاستدعاءات في البطاقات حتى الكل يفهمها، لكن فيها بطاقات اذا عرفت تستخدمها تكون استراتيجية أكثر من قتالية.
الحين هذا كله في طريقة القتال نفسها، والشخصيات الموجودة في اللعبة وايد، ومن تاريخ كوميكس مارفل كله، فبتشوف بطاقات لشخصيات ما تعرفها أو أول مرة تسمع عنها. وتصميم البطاقات وايد حلو لأن التصميم أشبه برسم الكوميكس. وحتى البطاقات لنفس الشخصية في لها Variants معينة، يعني هي نفس البطاقة بس تقدر تحصلها بشكل ورسم مختلف. انت ماتقدر تلعب بطاقتين لنفس الشخصية، هي محددة ان كل شخصية مسموح انك تحط نسخة وحدة منها في حزمة بطاقاتك بس، وهالشي يبسط من القيمبلاي أكيد. لكن الحين في جانب لازم نتكلم عنه، وهو شلون تحصل البطاقات. لأن نعرف ان ألعاب البطاقات دائماً تطلب فلوس حقيقية عشان تشتري الحِزَم وتكون عشوائية، فشنو الوضع ويا Marvel Snap؟
أولاً في جانب ترقية البطاقات الموجودة عندك. فتقدر ترقي بطاقة Jessica Jones مثلاً، والترقية شكلية فقط باستخدام عملة اللعبة الي تحصلها من المباريات والمهمات اليومية والاسبوعية. لكن تقدر حتى انك تشتري العملة بفلوس من المتجر. فاذا طورت شخصية معينة، ما تزيد قدراتها او طاقتها، فقط يتغير شكل البطاقة ونوعها من Common الى Uncommon الى Rare وEpic إلى Legendary. والطريقة الي تحصل فيها بطاقات جديدة، هو انك ترفع مستوى بطاقاتك الحالية. لأن اذا صارت عندك بطاقات Rare أكثر، يزيد مستوى الـ Collection عندك، وتفتح بطاقات جديدة عشوائية بهذه الطريقة. لحد الآن ما واجهت عائق مادي اني لازم اشتري عشان أرقي بطاقتي. لكن هالشي يمكن يكون موجود مستقبلاً، لأن نظام الحصول على الشخصيات الجديدة مربوط ويا عدد وجودة البطاقات الموجودة عندك حالياً، وبما ان ترقية جودة البطاقات مربوط باستخدام عملة اللعبة، وبما ان هذه العملة تقدر تشتريها بفلوس، فتشوفون ان النظام كله مربوط ببعض …ويمكن يتحول لنظام استغلالي في يوم من الأيام. لكن حالياً قدرت ألعب واحصل شخصيات جديدة لفترة طويلة ومستمتع باللعبة بدون ما أفكر في عملة اللعبة، لأن دائما كان عندي كمية كافية منها لما احتاجها للترقية.
وأما البطاقات الي تقدر تشتريها مباشرة، حالياً هي Variants للبطاقات الي عندك فقط، مثل ما قلت لكم قبل شوي ان كل شخصية لها أكثر من بطاقة بأسلوب رسم مختلف، فهذه تقدر تشتريها، لكن انك تقول انا أبغي Magneto مثلاً وتروح تشتريه مباشرة بفلوس.. فهذا مو موجود. لأنه اذا كان موجود فأكيد الي يدفع راح تكون عنده أفضلية. بس أكرر كلامي، ان هالشيء على حسب الي لعبته في أسبوع إطلاق اللعبة ويمكن يتغير في أي وقت، فاذا تبغون تستمتعون في اللعبة حالياً بدون ما يكون فيها دفع أي فلوس إضافية فالحين الوقت المناسب انكم تلعبونها، لأن ما ندري شنو يكون مستقبل اللعبة.
لكن الي اعتقده حالياً من النظام نفسه انه يمكن يتحول استغلالي. مثلاً في موسم جديد اسمه Symbiote Invasion وفيه 3 باطاقات حصرية الي هي Spider-Woman وCranage وMiles Morales. بالنسبة لي وصلت للمستوى المطلوب عشان أحصل بطاقة Cranage وبعض الأشياء الإضافية الثانية لكني ما حصلتهم، لأن المطلوب انه يكون عندي الـ Season Pass عشان أحصل هذه البطاقات الحصرية، بالرغم من أني تجاوزت المستوى المطلوب عشان أحصلهم. فعلى هذا الوضع بكون في بطاقات حصرية للي يدفع للـ Season Pass ومن الي شفته في مبارياتي ان بطاقة Carnage قوية. قيمة الـSeason Pass 11 دولار وأعتقد يستمر لأسبوع واحد اذا مو شهر. ففيها نظام يشبه الـ Battle Pass ويكافئك ببطاقات حصرية. فإذا بتلعبونها مطولاً انتبهوا الى هذا الشيء، وأتمنى انه مايستمر، لكنه متوقع الصراحة من لعبة مجانية. بس هذا بالطبع للي بيلعب اللعبة لأشهر وسنوات، أما اذا بتصيرون مثلي وتبغون تجربة Casual وتكتفي بعد 30 ساعة مثلاً فبتستمتع في هالوقت. أنا حالياً مستوى فضي 35، وأعتقد هني بدأت أواجه مباريات صعبة ضد الأشخاص، لكن أغلب خساراتي ضد بطاقات موجودة عندي، فالفرق في الاستراتيجية.
عندي مشكلة وحدة ويا اللعبة وهي استهلاك البطارية سريع زيادة عن اللزوم، وحتى حرارة الجهاز ترتفع بشكل مو طبيعي. جهازي من 2019 فيه Snapdragon 855 Plus فيمكن يكون سبب المشكلة، لكن لما نزلت مستوى الغرافيكس إلى Low والفريم ريت إلى 30 إطار، تحسن استهلاك البطارية والحرارة وصار بشكل طبيعي. لما كنت ألعب على High Graphics و 60FPS كنت أقدر ألعب ساعتين بس قبل ماتخلص البطارية. اللعبة موجودة على Steam فجربت ألعبها وقدرت أربط حسابي وكل المعلومات والبطاقات موجودة، فتقدر تبدل بين النسختين.
اللعبة ككل حلوة، لكن الصراحة ممكن انها تكون أي لعبة بطاقات ثانية بدون اسم Marvel. لو تنزل نفس اللعبة بنفس الأنظمة لكن مع شخصيات ميكي ماوس مثلاً، ما في شي راح يتغير. الي أقوله انها صح فيها شخصيات مارفل واساليب اللعب تناسب الطاقات، لكن مافي شي مميز يخليها لعبة مارفل بميكانيكيات معينة. في ميكانيكية اسمها Snap وهذه وظيفتها انك لما تكون واثق بالفوز تستخدم Snap عشان تضاعف عدد النقاط بنهاية المباراة. واذا الي ضدك سوى Snap وانت واثق انه مايقدر يفوز، فانت تسوي Snap ثاني و تتضاعف النقاط 4 مرات. كل المباريات Ranked فاذا تفوز يزيد الـ Level وإذا خسرت تخسر النقاط وتنزل بمستوى الـRank. فالأفضل أنك تستخدم الـSnap في مباريات محددة لما تكون فعلاً واثق. لكن غير اسم Snap والشخصيات واسامي المناطق، ما في شي يخليها مارفل، مثل ماقلت انك تقدر تغير الشخصيات وبتطلع نفس اللعبة بالضبط. ما بتفاجأ إذا ديزني استخدمت نفس اللعبة بغلاف جديد بعد سنوات تحت اسم لعبة ثانية.
اللعبة ممتعة وأكرر هالكلام أكثر من مرة لأني مستمتع وقاعد ألعبها في كل فرصة ممكنة، لأن المباراة أقل من 10 دقايق. انا ما أسمي نفسي عاشق كبير لألعاب البطاقات، لكني مهتم في لعبها، مثل ماذكرت قبل اني كنت أجرب ألعاب البطاقات. لكن هذه أبسط وسهل انك تدخل تلعب كم مباراة وتطلع وتقضي وقت ممتع. فاللعب ممتع بسبب العشوائية في ساحات القتال في كل مباراة الي ممكن تقلب الطاولة لجانب أي لاعب، لكن مهارتك باستغلال هذه الساحات هو الي يحدد الفوز ومو عشوائية اللعبة.
