في هالفيديو بلعب وياكم Dragon Ball Xenoverse 2 نسخة الجيل الحالي وأقارنها برأيي عن هاللعبة من قبل أكثر من 7 سنوات لما نزلت ولعبتها أول مرة.
مر الوقت بدون ما أحس فيه، أتذكر كانت هذه وحدة من الألعاب الي كتبت عنها مراجعة في 2016. والصراحة ما توقعتها انها بتستمر طول هالسنين، وبتظل تنزل لها تحديثات طول هالفترة وبتصير وحدة من أكبر ألعاب Dragon Ball ولعبة MMO بكل هالمهمات واطوار اللعب الي انضافت لها.
لما لعبتها كانت تغطي أحداث Dragon Ball Z وشخصيات من الأفلام الجانبية. لكن بعدها مع الوقت حصلنا مجموعة من الإضافات إلي خلت لنا أحداث من Super، وهذه لعبة Dragon Ball الأولى الي بدأت تغطي أحداث سوبر، لأن نزلت DLCs حق لعبة Kakarot لبداية سوبر و لحد Future Trunks، بس Xenoverse 2 فيها شخصيات من الـTournament of Power…والحين بعد في الـ Future SAGA في اللعبة يتدخل شخصية Fu من Super Dragon Ball Heroes… والصراحة ماعندي فكرة عن Super DB Heroes، تابعت منه 3 حلقات وحسيته يميل وايد لجانب الـ Fan Fiction فما عطيته اهتمام.
هي لعبة قتال بعناصر RPG بانك تصنع شخصيتك في عالم Dragon Ball وعندك عروق مختلفة سواءً أرضي أو ناميكي أو سايان وغيره. لكن الـ Customization من ناحية وجه الشخصيات فكلش بسيط… بس من ناحية الملابس الي تحصلها من المهمات فهي التركيز عليها أكبر، تقدر تحصل تقريباً أغلب ملابس الشخصيات الرئيسية وحتى الفرعية من الأنمي. وعلى حسب نوع الملابس فتعدل من الـ Stats لشخصيتك
الحلو في Xenoverse و Xenoverse 2، انها نزلت في وقت شخصياً تمللت من إعادة نفس قصة Z من مواجهة راديتز إلى قتال Buu. فهاللعبة من ناحية القصة تغطي شي مختلف في وقتها انها تخليك تلعب كحارس للزمن، ومهمات القصة أغلبها إعادة تعديل المجرى الزمني. فصح انك بتشوف نفس الأحداث، بس فيها اختلافات عن القتالات الي تعودنا عليها من كل ألعاب Dragon Ball قبلها. وماكانت فكرة جديدة كلياً، لأن كان في سيناريو مختلف للأحداث في Budokai وحتى Budokai Tenkaichi. بس عموماً تقديمها في لعبة كاملة مخصصة للتغييرات الزمنية في سلسلة Xenoverse كان شي جذبني لها أكثر من ألعاب Dragon Ball الي تحكي نفس القصة الأصلية الي شفناها في عشرات الألعاب قبلها. وبعد سبب ان الـ Future Saga من الي شفته في العروض شد انتباهي لأنهم قاعدين يسوون شي جديد ويا الشخصيات بأحداث لا طلعت في المانقا ولا الأفلام.
وبعد الي يخلي عالم Xenoverse 2 وايد ممتع انه يدخلك في جو Dragon Ball Z، بأسلوب المهمات الي تتعلم منها الضربات. فإذا في ضربة خاصة موجودة في بالك وتبي تتعلمها، لازم تروح للشخصية الي عندها هالضربة في الأنمي، مثلاً تروح لـ Piccolo وتتدرب وياه وتسوي عدة مهمات عشان تحصل ضرباته. وبعدها تقدر تسوي Mix and Match في ضرباتك بين بيكولو و فيجيتا والأندرويدز وغيرهم. وهذا أحلى نظام في اللعبة، الي يعطيك الـ Power Fantasy الي تبيه لما تصنع شخصية في هالعالم.
نظام القتال الصراحة هو أكثر شي عندي تعليق عليه في اللعبة، لأن شفنا هالنظام للقتال في وايد من ألعاب Dragon Ball قبلها، وحتى بعدها، وللأسف متشابه ويا وايد من ألعاب الأنمي الثانية الي تنزل من بانداي نامكو. هو النظام زين يؤدي غرضه ويشتغل بطريقة صح، لكن بالنسبة لي أحسه يميل وايد لجانب الـ Button Mashing.
في جانب بسيط من الاستراتيجية بين انك تسوي الـ Super Moves بوسط الضربات العادية، وعندك الـ Ultimate Moves. لكن أغلب الأحيان بتميل للضربات العادية وتضغط الزر ورى بعض.. والي يخلي النظام أقل مستوى بالنسبة لي أنه مافيه خيارات دفاعية متوفرة. يعني اذا قاعد تنطق من العدو فما تقدر تسوي شي غير انك تنتظر تنتهي سلسلة الضربات عشان انت تبدأ بعدها بضرباتك.
موجود الصد في اللعبة، لكن أغلب الأحيان وأنا ألعب فـبما اني قاعد أنضرب ومافي فايدة من الصد. فمافي نظام Combo Breaker مثلاً… الي تقدر تسويه انك تستخدم الـ Vanish، بس تحتاج Stamina. وعلى الأغلب اذا كنت تهجم قبل ما تنضرب فما عندك Stamina كافية عشان تبتعد عن ضربات العدو… الخيارات الدفاعية في اللعبة سيئة بالنسبة لي، وبالرغم من اني كملت كل مهمات القصة لما نزلت اللعبة لكن لحد الحين ما أحس ان عندي فكرة واضحة عن استخدام نظام القتال، غير اني يلا بسوي Button Mashing ولما أحصل فرصة بالوسط بسوي Special Move أو Ultimate Move. أما اذا القتال يعتمد على الصد فما أحس ان كلاعب عندي شي أقدر أتقنه عشان أصلح من طريقة لعبي.
فالتغييرات الي لاحظتها لحد الحين في نسخة الجيل الحالي، ان دقة الصورة أعلى من النسخة القديمة طبعاً، بس ويا ستايل الرسومات فمو واضح الفرق بدرجة كبيرة، لكن لما تقارنهم مباشرة تشوف ان الدقة أعلى… بس الصراحة هالنسخة خلتني أتحمس وايد للعبة Sparking Zero…. اذا تشوفون عروض اللعبة والانيميشن على الشخصيات وخصوصاً شعر الشخصيات والمؤثرات البصرية للضربات، تحس بالتطور الكبير رسومياً بين هاللعبتين.. يعطيني الإحساس ان Sparking Zero مطورة أكثر مقارنة بـ Xenoverse 2 و Kakarot.. بس هذا موضوع ثاني، وأدري ان اغلبكم الي يحب ألعاب Dragon Ball متحمس أساساً حق Sparking Zero.
التغيير الثاني الي لاحظته في هالنسخة ان الـ Loading صار أسرع… وهذه كانت وحدة من السلبيات بالنسبة لي ويا نسخة PS4. انك تطلع وتدخل بين المهمات وتحتاج تعيد بعضها، لكن كان في Loading في كل مكان في اللعبة، وتطول وايد بنسخة الـ PS4. حالياً ويا نسخة الجيل الجديد تحسنت،،، لكن للأمانة للحين أحسها طويلة مقارنة بباقي الألعاب الي شفناها على PS5. فاذا تسوي مهمة للقصة فيها 4 مقاطع قبل ما تبدأ القتال، فلما تعيد المهمة وتقعد تسوي Skip للمقاطع السينمائية للحين بتحس ان الوقت طويل على ما ترجع للعب نفسه.
فأي هذا رأيي عن اللعبة، أو عن النسخة الجديدة لحد الحين. مثل ما قلت بالبداية اني لما قيمت هاللعبة في 2016 ما كنت متخيل نهائياً انها بتظل أكثر من 7 سنوات وبتمون يضيفون عليها شخصيات ومهمات و DLCs. صح انها ما وصلت لعدد الشخصيات الموجودة في سلسلة Budokai Tenkaichi، لكن حالياً احنا قريبين من اننا نحصل لعبة جديدة من هالسلسلة وتظل Xenoverse كسلسلة تقدم شئ مختلف من ناحية نظام مهماتها وطبيعتها، إذا مو من ناحية القيمبلاي، وهذا شي يعطيها الفرق عن باقي ألعاب هالأنمي.
واذا تبون مراجعتي القيديمة عن اللعبة فتقدرون تقرأونا على
