السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي واليوم بكلمكم عن اللعبة الي أدمنت عليها في الفترة الأخيرة وهي V Rising. لعبة أكشن من منظور علوي جانبي، تركيزها كبير على نظام ألعاب الـ Survival و الـ Crafting وجمع الموارد وبناء القلعات وصنع الآلات وغيره، والي يميزها انك تلعب بـ Vampire أو مصاص دماء، وهذا له تأثير على طريقة اللعب بجانب الـ Survival وبكلمكم عنه بعد شوي. واذا مهتمين تشوفون طريقة اللعب فسويت فيديو تعريفي بسيط على قناة قيمرز يونايتد يشرح أفكار اللعبة في بدايتها، وبس بخلي المقدمة قصيرة؛ لأن في وايد عشان أتكلم عنه في لعبة V Rising في هالحلقة، وبتكون دسمة من ناحية شرح أساليب اللعب وكل الي عجبني فيها. فخلونا نبدأ.
بما انها لعبة بقاء، ففكرة اللعبة من البداية بسيطة، انت مصاص دماء تستيقظ من بعد فترة طويلة، وفي هالعالم كان الـ Vampires يتسيدون العالم قبل ما يهجم عليهم البشر من سنين طويلة وشبه يعدمهم من الوجود. فأنت تستيقظ كـ Vampire ومهمتك انك تستعيد الي كان ملكك وتتواجه ويا الي في طريقك نهايةً بدراكولا. هي اللعبة نفسها تقدر تلعبها بالطور الفردي، وهذا الي سويته ولعبت لأكثر من 60 ساعة بوقت تسجيلي لهالحلقة وللحين مستمر بلعبها. لكن فيها جانب أونلاين، لأن حتى الطور الفردي تلعبه في سيرفر انت تصنعه وتخليه Private عشان لا يدش عليك أحد، بس تقدر تدعو اصدقائك للسيرفر وتلعبون مع بعض. وكلكم Vampires وهي لعبة تعاونية اذا تلعبها أونلاين.
فالمهم، بما انها لعبة Survival فهدفك الأول انك تجمع الموارد الأساسية في العالم عشان تصنع لك أسلحة ودروع، وخاتم يخليك تستخدم السحر… واللعبة نفسها ممتازة من ناحية المهمات الأولية انها تمشيك في طريق يعلمك أساسيات اللعبة، وفي نفس الوقت يخليك تتعود على الي بتسويه طول اللعبة. فأول الأعداء الي بتواجههم هم هياكل عظمية لما تقتلهم تقدر تستخدم عظمهم كمورد تصنع منه سيف وفأس وغيره. والي بدورها هذه الأشياء تفتح لك مجال عشان تجمع موارد من الطبيعة، فمثلاً تقطع الأشجار عشان تحصل خشب، وتكسر الصخور عشان تجمع حجر وإلى آخره.
هذه البداية في اللعبة تستمر لمدة نصف ساعة تقريباً، بالمهمات البسيطة الي تقدر تسويها ورى بعض والي تكون عبارة عن اجمع هذا المورد من هذا المكان عشان تفتح Blueprint أو مخطط شيء جديد تقدر تصنعه. فصاير في تداخل جميل بين نظام الـ Survival و الـ Crafting بشكل Tutorial، لكن بدون ما تحس ان اللعبة ماسكة ايدك في كل شيء. واعتبر هالـ Tutorial ينتهي بمجرد انك تبدأ تصنع قلب القلعة والي هي بتكون مكانك الرئيسي الي بترجع له عشان تستخدم الموارد الي جمعتها من العالم، وتصنع أشياء جديدة تساعدك في رحلتك…. فتمام لحد الحين كل شيء مثل باقي ألعاب الـ Survival.. لكن هني يجي دور الـ Vampire كشخصيتك الرئيسية.
بما انك Vampire فتنطبق عليك أشياء خاصة ما تنطبق على البشر، فمثلاً تحتاج انك تستهلك الدم عشان تبقى على قيد الحياة، بدل من انك تصداد الحيوانات وتطبخهم عشان تسوي لك أكل مثل باقي ألعاب السرفايفل. الدم في اللعبة ينقسم إلى 3 أساليب مختلفة، فأول شيء بتلاحظه ان في نوعية أعداء مختلفة في اللعبة، فالهياكل العظمية وغيرهم من الـ Undead ما بيعطونك دم لما تقتلهم، لكن البشر والحيوانات فبتحصل منهم شيء اسمه Blood Essence لما تقتلهم، لكن هذا مورد تستخدمه للـ Crafting ومايرجع الدم لشخصيتك. فالأسلوب الأخير هو انك تجرح البشر والحيوانات لكن ما تقتلهم، فيكون عندك الخيار عشان تستهلك دمهم، وهذا الي يعطي الدم لشخصيتك.
الدم بالنسبة للـ Vampire مو نفسه مستوى الصحة أو الـ Health، هو له علاقة مباشرة وياه طبعاً، لكن لما تتغذى على دم المخلوقات فهذا ما يرجع صحتك مباشرة، وانما يعتبر خزان للدم ينحسب باللتر، تقدر باستخدام السحر انك تحوله لمستوى الصحة، وهذا بدوره يقلل من مخزون الدم ويرفع من الـ Health. والدم الي تجمعه في الخزان يختلف من مخلوق لثاني ومن بشر لثاني بشيئين، وهو درجة نقاوة الدم الي ينحسب بنسبة مئوية، ويختلف بنوعية الدم: الي مثلاً للمخلوقات غير عن البشري المقاتل وغير عن البشري العامل، وغيره من الأنواع. فنقاوة الدم تعطيك Stat Boost للشخصية: لسرعة الحركة أو سرعة الضربات أو مقدار استرجاع نسبة معينة من الصحة لما تقتل الأعداء، فدائماً تبي تشرب الدم الأنقى لأنه يفيدك بأنه يقوي شخصيتك بهذه الخصائص… لكن بنفس الوقت لما تشرب الدم فما يظل وياك طول مدة اللعبة، لأنه ينتهي أو يقل مع الوقت. فبتلاحظ ان المخزون يقل لما تقطع الأشجار وتجمع موارد، أو لما تقاتل أو لما تتحرك في العالم.. فأعتبر الدم كأنه Stamina و Health بنفس الوقت في هاللعبة. فواحد من أساسيات أسلوب اللعب انك تحافظ على مخزون الدم وتحصل أفضل طريقة لاسترجاعه، والأهم انك تبي الدم النقي… فشلون تحصل لك مخزون دائم من الدم النقي؟؟
في البداية تمشي في عالم اللعبة وتدور لك هالأشخاص.. لكن بعدين في اللعبة بتفتح امكانية صنع السجون داخل قلعتك عشان تحبس البشر. فتبي تحصل لك خوش آدمي دمه نقي 100%، فتحبسه عندك في سجن القلعة وتقعد تسحب منه الدم في غراش زجاجية عشان تشرب منها في الوقت الي تبي، بس لازم تحاسب لما يكون مسجون فلازم تعطيه أكل عشان ما يموت. فيصير عندك مصنع دم في القلعة من أجود الأنواع الموجودة. لكن هالكلام بعد أكثر من 30 ساعة لعب.
وبعد من الأشياء الي لها علاقة بشخصية الـ Vampire وتأثر على نظام الـ Survival، ان الفترة الصباحية لما تكون الشمس طالعة فما تقدر تمشي براحتك في العالم لأن ضوء الشمس يخلي جسمك يحترق، ففي بداية اللعبة لما تبني الملجأ الأساسي بالنسبة لك، فتبي تترك كل شيء له علاقة باستكشاف العالم وجمع الموارد والأكشن والقتال إلى الليل، وتستغل فترة النهار بأنك تكون داخل الملجأ وتصنع الأدوات أو تحول الحجر إلى طوب للبناء، أو تقطع خشب الأشجار إلى خشب تستخدمه للبناء وغيره من أمور الـ Crafting…. والحين نجي لجوهر اللعبة نفسها، شنو غرضك من البناء وتجميع الموارد وبناء القلعة؟؟
V Rising لعبة أكشن، ووحدة من أهدافك الأساسية انك تهزم الزعماء الموجودين في عالم اللعبة وهم فوق الـ 50 زعيم… لكن عشان تقاتلهم ففي ترتيب معين بحسب لفل الزعيم… وعشان تكون عندك فرصة انك تهزمهم، فالمفروض ان عندك لفل معين من الأسلحة والدروع وغيرها من الأدوات والـ Potions، وعلى حسب ترتيب الزعيم فراح يكونون موجودين في كل مناطق عالم اللعبة… لكن بعض هذه المناطق ماتقدر تدخلها لأن الأعداء العاديين لفلهم عالي ومابتقدر تهزمهم… فنظام الـ Progression في اللعبة مربوط بهزيمة الزعماء الي يفتحون لك إمكانية بناء مُعِدات وآلات جديدة في القلعة أو الـ Blueprints للبناء، والي بدورها بتخليك تروح لجزئية الـ Crafting من اللعبة الي بتوسع من الأشياء الموجودة عندك وتفتح لك المجال تطور أدواتك ولفلك على حسب الـ Blueprints الي حصلتها، والي بدورها بتحتاج استكشاف للعالم عشان تجمع الموارد الي تحتاجها حق تستخدمها في هذه الآلات… والي بعد بدورها بتحتاج انك تكون بلفل معين عشان تدخل المناطق الجديدة، فلازم تهزم الزعماء عشان تطور… وهذا الـ Gameplay loop الي توفره اللعبة… كل أسلوب لعب مربوط بالثاني بطريقة حلوة وممتازة وهو الشيء الي خلاني أدمن اللعبة.
في البداية كانت أول قلعة بنيتها على السريع وأقعد أسوي الأشياء المطلوبة لما اللعبة تطلبها مني بدون ترتيب أو تنسيق لأماكن الغرف. بس وانا أحط الآلات، لاحظت انه تقدر تقلل من وقت تشغيل الأداة وتحويل الموارد إذا كانت موجودة في غرفة مخصصة وتكون الأرضية خاصة بهذا النوع من الآلات. فقعدت أشوف طريقة عشان أفتح Blueprint لامكانية بناء الأرضيات الخاصة لهذه الغرف.. واكتشفت اني لازم اهزم زعيم معين هو الي يفتح لي هذا المخطط، فلما شفت لفل الزعيم، عرفت اني احتاج أسلحة أقوى من الي عندي، فبحثت عن الموارد الي احتاجها عشان أصنع هالأسلحة، ودخلت على الخريطة للعالم وشفت الأماكن الي تتواجد فيها هذا الموارد، فرحت في رحلة استكشافية عشان أجمع هذه الموارد وأرجعها للقلعة عشان أستخدمها في الآلة عشان أصنع السلاح وبعدها أروح للزعيم وأهزمه عشان أحصل Blueprint لبناء الأرضيات المطلوبة عشان أقلل من الوقت الي تاخذه هذه الآلات عشان تشتغل.
بس بعدين لما انفتحت اللعبة، ومثل ماقلت اني اعتبر أول نصف ساعة هي الفترة الي تعلمك فيه اللعبة كل شيء، فبعدها عندك الحرية تسوي الي تبيه. فأنا قررت أني أطور القلعة لأنه عجبني أسلوب البناء، وقعدت أقضي وقت طويل عشان أحول أسوار القلعة من خشب إلى حجر.. وهذه بدورها تخلي القلعة تكتمل ويكون عليها سقف، وبعدين قعدت أخطط للغرف، فحطيت غرفة محددة للأدوات الصناعية مثل كسارة الحجر ونشارة الخشب وطاولة التصنيع.. وغرفة ثانية للأفران الي تذوب النحاس، وغرفة ثالثة للآلات الي تستخرج الـ Blood Essence من بعض الموارد.. وأنا أسوي هالأشياء قاعد أخدم رحلتي الأساسية لأني قاعد أفتح امكانيات جديدة لبناء أدوات أفضل، فمثلاً كنت استخدم في البداية أسلحة مصنوعة من العظام، لكن ويا الفرن الي يخليني أذوب النحاس، فصارت عندي القدرة اني أصنع أسلحة من النحاس بنوعية جديدة الي كانت أقوى. والي بدورها تسمح لي اني أجمع الحديد، بس هني تشوف ان الفرن ما يقدر يذوب الحديد حالياً فلازم يكون عندك Blueprint تحصله لما تهزم زعيم محدد، فخلاني أروح للزعيم وأهزمه، والي سمح لي اني أطور لأسلحة من الحديد. لكن الحديد ياخذ وقت طويل عشان يذوب، فرحت صنعت فرن ثاني عشان يشتغلون بنفس الوقت وأقسم الحديد على الفرنين. وانتون تشوفون شلون كل هالـ Gameplay loop يخليك تدمن. لأن في الوقت الي تنتظر فيه الحديد يذوب، بتستغل الوقت عشان تستكشف العالم فبتحصل أشياء وأماكن جديدة، وموارد مختلفة تخليك تبحث عن آلات تحتاجها عشان تستفيد من هالموارد.. وبتكتشف ان مثلاً الدروع تحتاج فيها الجلد الي تحصله لما تقتل الحيوانات، لكن تحتاج خيط وأبرة، وهذه تحصلها في صناديق من مخيمات الأعداء، لكن في آلة معينة تخليك تحول الزرع إلى مواد خياطة،، فتبدأ تقضي وقت انك تبني مزرعة صغيرة توفر لك الي تحتاجه.
وهذا الحلو في أنظمة الـ Crafting في اللعبة، انه كل مورد ففي أكثر من طريقة عشان تحصله، يا أما من عالم اللعبة والاستكشاف وقتال الأعداء، أو عن طريق آلة تستخدم فيها موارد مختلفة وبخطوات متعددة عشان تصنع المورد الي تحتاجه.. فعندك الخيار بين الصناعة أو الاعتماد على الطبيعة.
جزئية الأكشن في اللعبة أقرب لألعاب مثل Diablo أو Path of Exile أو Divinity. فألعاب الـ RPG على الكمبيوتر. فعندك الضربات العادية، ومع تطوير الأسلحة بتحصل ضربات خاصة وهذه فيها وقت للاستخدام. فمثلاً اذا استخدمت الضربة فتحتاج Cooldown لمدة 5 ثواني قبل ما تستخدم نفس الضربة مرة ثانية. والضربات الخاصة تختلف بنوعية السلاح، فالفأس مثلاً تقدر ترميه من مسافة، لكن الـ Mace فشخصيتك تقفز وتهجم بضربة وهي نازلة للأرض، والسيف عندك ضربة تسحب العدو وتخليه في حالة Stun مايقدر يتحرك. وفي أسلحة تنفع ضد نوع معين من الأعداء لأنه يسبب مقدار ضرر أعلى. وبالرغم من كل هذا إلا النظام مو معقد، يمكن من كلامي تحسون ان في خصائص وايد لازم تاخذها بالحسبان وانت تتقاتل، لكن كل شيء واضح وبسيط. وفوق الضربات العادية فعندك قدرات السحر.. وهذه أنواع على حسب العناصر، وكل عنصر فيه خيارات مختلفة. وهذه القدرات تفتحها لما تحصل Skill Point من هزيمتك للزعماء. وتنطبق عليها الـ Cooldown طبعاً.
من ناحية الـ Combat فمافي نقاط خبرة أو EXP تحصله وانت تهزم الأعداء. لأن الأشياء الوحيدة الي تزيد من لفل شخصيتك فهي نوعية الأسلحة الموجودة عندك، ونوعية الدروع والملابس الي على شخصيتك. فما في Grinding من ناحية القتال عشان تحصل EXP، وانما الـ Grinding يجي ويا الـ Gameplay Loop نفسه بتجميع الموارد عشان تصنع الآلات وتستخدم الموارد الي تصنع لك الأسلحة الجديدة الي لفلها أعلى مثل ما شرحت لكم من شوي.
فيعني كل أنظمة اللعبة بدايةً من الـ Survival إلى الأكشن إلى الـ Crafting كله مربوط بدائرة حلوة تخليك كلاعب تتنقل بينها بدون ما تحس انك قاعد تضيع وقت. وهذا الي خلاني أدمن اللعبة وتمر ساعات طويلة بدون ما أحس بالوقت. يعني بالنسبة للبناء، كنت أقدر اني أكتفي اصنع غرف على السريع وما أركز على الترتيب وتخطيط القلعة، وبس احط كل شيء في الوسط وانتهى الموضوع. لكن لأني أبي تكون عندي كفاءة باستغلال الوقت، فشفت طريقة أقلل فيها من وقت صناعة الموارد، وبنيت مخطط يخليني اتنقل بين هذه الغرف بسرعة لما آخذ مورد من الفرن فتكون طاولة الصناعة قريبة بخطوتين، وكل الأشياء الي لها علاقة بهالآلات موجودة في غرفة وحدة من القلعة. وشخصياً أحب البناء في الألعاب فأقعد أزين الجدران والأرضيات، وأخلي أواني وطاولات للديكور مع انها مو ضرورية. بس بالنسبة لي فيهمني شكل القلعة تكون مرتبة.. وحتى القلعة لها تطويرات، فتحتاج موارد معينة انت تسعى أنك تحصلها وتكون من ضمن الـ Gameplay Loop، وهذه بدورها تزيد Limit البناء للقلعة، فتقدر تحط طابق ثاني وثالث.
أدري اني قاعد أتكلم وأعيد نفس الأفكار كل شوي، بس فعلاً اللعبة خلتني أدمن على أساليب اللعب وقاعد أحاول بكل طريقة اني أوصل لكم هالشعور. يعني حتى وأنا قاعد أسجل الحلقة فاللعبة شغالة لأني حاط موارد تنصنع وتاخذ فترة طويلة، فللحين عيني على اللعبة.
فأعتقد اني بكتفي باللي قلته لحد الحين، واذا كنتوا مهتمين بألعاب مثل Diablo أو Path of Exile أو Valheim.. أو حتى Minecraft.. يعني كل هالكلام عن الـ Crafting والبناء شلون ماجبت طاري ماينكرافت، بس بدموية وعنف أزيد. فهذه نوعية اللعبة الي عليه V Rising وفيها Mechanics تمزيها عشان الشخصية الي تلعب فيها Vampire.. فأي جربوها وألعبوها.. هي كانت في الـ Early Access لسنتين أتوقع، لكن الحين ويا النسخة النهائية أخيراً نزلت للكونسولز والمحتوى الي فيها وايد واسع… بالنسبة لي كنت مهتم أجربها وشدت انتباهي بس نهائياً ما توقعت اني بحبها لهالدرجة.. أشوفها مرشح قوي للعبة السنة بالنسبة لي الصراحة وما كنت متوقعها.
فهذا كل شيء عندي أقوله عن V Rising أتوقع. وهذه حلقة اليوم. كان وياكم علي الساهي ومع السلامة.
