السلام عليكم وياهلا في هذه الحلقة الإضافية من بودكاست خفايف ألعاب. وياكم علي الساهي ويا حلقة ثانية بنفس اليوم. هذه الحلقة بتكون أخف عن العادة لأني بسولف وياكم عن محرك كاربون، والألعاب الي اعلنوا عنها Limited Run والي بنزلونها بهاي المحرك. أبرزها بالنسبة لنا أكيد ثلاثية Gex و Tomba. اهما تكلموا عن Carbon Engine من قبل ونزلت عليه 3 ألعاب. لعبتين منها كانت ألعاب قيمبوي وقيمبوي كولور ولعبة سوبر نينتيندو. بس ويا اعلاناتهم الجديدة واضح انهم قدروا يجيبون ألعاب من أجهزة أكثر خصوصاً بلايستيشن 1، والي قالوا قبل انهم بسوون هالشي بس ماكان في معلومات عنها.
فالمهم شنو محرك كاربون؟ حبيت أشرح عنه عشان أوصل فكرة هذه الألعاب الي بتنزل شلون بتكون، عشان محد يتوقع انها بتكون ريماستر أو بضيفوون عليها شي جديد أو بيشتغلون على هالألعاب أكثر. يعني أدري ان الناس مو متوقعة ان ثلاثية Gex بتكون بنفس جودة ريماستر ثلاثية كراش وسبايرو، بس أحس اني ابي أتكلم عن محرك كاربون عشان تعرفون شنو تتوقعون من هالألعاب خصوصاً انهم ما راوونا فيديوات من اللعبة نفسها أو القيمبلاي.
هذا المحرك طوروه Limited Run نفسهم وغرضه الأساسي انه يشغل محاكيات أجهزة قديمة على الأجهزة الجديدة. يعني اذا تعرفون شغل Digital Eclipse الي سووه ويا ألعاب Mega Man، فهالمحرك تقريباً يسوي نفس الغرض. لأن المحرك نفسه يستخدم المحاكاة كأساس حق تشغيل هذه الألعاب لكن يقدر يضيف عليها تحسينات إضافية، بس مو في اللعبة نفسها، بل أكثر على الـUI أو واجهة المستخدم وطريقة الـRendering وتحمل البيانات وربط الكونترولر والتروفيز على بلايستيشن مثلاً. طبعاً هذه المعلومات موجودة على موقعهم وتقدرون تشوفونها. فهدفهم مو انهم يحسنون الألعاب القديمة أو يسوون ريماستر لهذه الألعاب، بل تركيزهم أكثر انهم يوفروون هذه الألعاب على الأجهزة الحالية، خصوصاً إذا كانت ألعاب منسية أو ألعاب سعرها الأصلي مرتفع بشكل غبي. يعني Tomba مثلاً اذا تبي تشتريها على بلايستيشن 1 بتحصلها تنباع بـ120 دولار وأكثر. فغرضهم الأساسي من هالمحرك انه يكون عندهم طريقة سهلة حق ياخذون اللعبة الأصلية من الناشر أو الشخص الي عنده الحقوق ويجيبونها على الأجهزة الجديدة بدون تعب من المطور الأصلي. وهذا الي قاعدين نشوفه، يعني أحس لو ان Limited Run ماعندهم هالمحرك وماعندهم طريقة يستعرضون سهولة تحويل هالألعاب عشان تشتغل على الأجهزة الحالية، ماكانت Square Enix بتفكر انها توفر ألعاب Gex. وعلى اسمهم المحرك ان اللعبة بتكون نسخة كاربونية مطابقة بالكامل للنسخة الأصلية…. وهذا الي مهم أوصله، يعني اللعبة بقلتشاتها وبمشاكلها وبنفس الغرافيكس والتحكم… طبعاً إلا اذا المطور نفسه يبي يعدل تحكم ويضيف إمكانية استخدام الانالوق للكاميرا مثلاً. بس هذا الشي يعتبر إضافي ومو إجباري بالنسبة لـ Limited Run. وليش أقول هالكلام؟؟ لأن Gex حق الي مايتذكر، اللعبة مافيها تحكم بالكاميرا، لازم توقف وتضغط L1 أو R1 عشان تحرك الكاميرا يمين ويسار.. وهالشي مابيعجيب اللاعبين الحاليين الي متعودين على الكاميرا في ألعاب الـ 3D platformers الجديدة… لكن بعيد كلامي، انه ممكن بمحركهم يضيفون تحكم بالكاميرا على حسب كلامهم عن الـ Carbon Engine، بس هالشي راجع للناشر اذا يبغي يضيف هالأشياء أو مجرد يبي يوفر الألعاب كما هي بقوائم جديدة ودعم للتروفيز.
بالنسبة لي، أنا لعبت Shantae الأصلية لما سوو نسخة السويتش، وهذه كانت تستخدم محرك كاربون، فاذا تبون تعرفون شلون بتكون هالألعاب جربوا Shantae أو حتى Trip World أو River City Girls Zero لأن هذه الثلاث الألعاب الي نزلت وتستخدم هالمحرك. فالحين نعرف ان صاروا يدعمون محاكاة بلايستيشن 1، سوبر نينتيندو لأن بنزلون لعبة ديزني Gargoyles، وقيمبوي، قيمبوي كولور، وقيمبوي أدفانس على حسب ماقالو، وبعد السيقا جينيسس، والسيقا CD، والقيم قير والماستر سيستم. هذه الأجهزة الي حالياً يدعمها 100%.
بالنسبة لي متحمس من الألعاب لأنها تبين انهم بحاولون يروحون يجيبون الأشياء المدفونة… يعني من كان يفكر ان بنقدر نلعب Tomba على بلايستيشن 4؟ اصلاً من وين حتى طلعوا حقوق Tomba وتواصلوا ويا من عشان يجيبون هاللعبة. الي مايعرف Tomba فأقرب تشبيه لها يمكن Klonoa، لانها لعبة 2.5D platformer، وفيها ميكانيكيات حق القفز وتمسك الأعداء وترميهم، فتقريباً صايرة نفس الشكل وأسلوب لعب مشابه. بس ماعرف ليش برجعون الجزء الأول وماقالوا شيء عن الجزء الثاني. فهذه لعبة فعلاً تستحق وتستاهل انها تتوفر حق الكل يجربها، لأن صار صعب ترجع للنسخة الأصلية بسبب سعرها. بالنسبة لي هذه اللعبة أقوى من إعلان ثلاثية Gex. فمن الحين بقولك أتمنى انكم تشترون Tomba وتلعبونها، وبالمرة اذا ماشريتوا حزمة Klonoa الي نزلت فروحوا اشتروها، لأن أتوقع مبيعاتها للأسف ماكانت قوية بس الصراحة لعبة تستاهل تلعبونها.
في شي بعد عن إعلان Gex ماعطوا تفاصيل عنه، بس أتوقع انها بتكون النسخة الأمريكية من الألعاب. بكون شي حلو لو الجزء الثاني والثالث يكون حق النسختين الأوروبية والأمريكية، لأن الي مايعرف ان الممثل الصوتي حق الشخصية كوميدي مختلف حق هالجزئين في أوروبا عن أمريكا. والصراحة بعض النكت الموجودة في هالألعاب كلها Reference قديم يمكن محد يفهمها من هالجيل، اصلاً حتى احنا العرب لما كنا نلعبها واحنا صغار ماكنا نفهمها، وكنا نلعب بس عشان انها لعبة بلاتفورمر. بس بالنسبة لي أحب لو انهم يضيفون النسختين، لأن هذه الفرصة الوحيدة انهم يسوون هالشي لأن ما أتوقع ان في أحد مهتم في Gex بشكل عام، وهالشي يلبي هدفهم من المحرك انهم يستخدمونه لغرض حفظ الألعاب وتاريخها على كلامهم… بطريقة رسمية على الأقل.
وهالكلام يرجعني حق Limited Run، لأن الصراحة هذه الشركة بالرغم انها قاعدة توفر ألعاب وايد، وهذا المحرك له ستقبل حلو اذا بقدرون يتواصلون ويا الناشريين لألعاب مثل Tomba،، إلا ان التعامل ويا Limited Run سيء. يعني بالنسبة للأشخاص الي بيشترون هالألعاب رقيماً ما بكون في مشكلة عندكم… لكن المشكلة تجي من النسخ الي على ديسك. أغلب إصدارات Limited Run تنزل بعد فترة طويلة وايد من نزول اللعبة رقمياً وهالشي مو حلو، لأن يخليك تضطر تشتري اللعبة رقمياً لأنك متحمس وتبي تلعبها، وتشتريها من موقعهم وتنتظر أشهر اذا مو سنة كاملة قبل ما توصلك النسخة الثانية. فالحين بما انهم هم مطورين هذه النسخ وهم الناشرين حق النسخ الرقمية ونسخ الديسكات، احس ان تلاعبهم بصير أكثر. يعني لو انهم ينزلون الألعاب رقمياً بنفس اليوم الي النسخ الثانية جاهزة للشحن، ما بكون عندي مشكلة. أما اذا حطوا كل هالألعاب رقمياً اليوم مثلاً، ونطلب نسخ محدودة منهم خلال أسبوعين وبعدين يجمعون عدد هالنسخ ويطلبون طباعتها وننتظر أشهر على ما يصير هالشي، فهالشي بكون سخافة الصراحة. في ألعاب وايد اشتريها من Limited Run لكن أغلبها من بعد ماتكون عندي النسخة الرقمية ولعبتها وخلصتها، لأنك اذا متحمس للعبة وتشتريها منهم فتوقع انك تنتظر بالأشهر أو حتى سنة كاملة مثل ماقلت لأن هذه مو مبالغة. فتحذير من هالشي، لأني أتذكر Streets of Rage 4 كانوا هم المكان الوحيد الي تقدر تشتري منهم اللعبة على ديسك، لكن على ما جهزوا نسختهم، نزلت نسخة كاملة ويا الـ DLC من مكان ثاني ومتوفرة في كل مكان، واحنا ماوصلتنا إلا بعدها فانظلمنا بسببهم.
فالمهم ما بطول عليكم هالحلقة الإضافية، فمتحمس أشوف كل هالألعاب، وحتى بتنزل Clock Tower وألعاب Jurrassic Park وغيرها وبتكون بعد نفس الشي محاكاة باستخدام هالمحرك. وكلها أخبار حلوة حق الأشخاص الي نفسي يحبون هالألعاب القديمة، لكن يلزم التحذير من Limited Run بخصوص نسخ الديسكات انه لا تتوقعون تستلمونها بوقت سريع من بعد ما ينشرونها بموقعهم، والأفضل انكم تشترونها رقمياً اذا تبون تلعبونها، وتخلون نسخة الديسك كشي جانبي يوصلكم بعدين.
كان وياكم علي الساهي ومع السلامة.
