السلام عليكم ويا هلا فيكم بحلقة جديدة من بودكاست خفايف ألعاب. وياكم علي الساهي وفي هذه الحلقة بكلمكم عن لعبة Beyond Good & Evil بنسخة ريماستر الاحتفالية العشرين على اللعبة. الي ما يعرف اللعبة فهي نزلت في الأصل على بلايستيشن 2 وهي لعبة تاخذك في مغامرة فضائية ممتعة كقصة فيها تشويق، وتلعب بـ Jade بطلة اللعبة والي هي عبارة عن صحفية تحب التصوير، وتاخذها الأحداث في مهمة عشان تحقق عن موضوع خطير يخص حكام الكوكب الي انتون عايشين فيه، وتصير أحداث بتكلم عنها بعدين خلال كلامي عن اللعبة.
كأساليب لعب فكون البطلة صحفية وعندها كاميرا فهذا جزء من نظام اللعب، لكن هي بالعموم لعبة أكشن ومغامرة وفيها شوية بلاتفورمينق على شوية حل ألغاز على شوية تسلل و Stealth. وكل شي بحسب الي تحتاجها اللعبة ويقدمونها بشكل حلو خلال اللعب على حسب المناطق الي انت فيها.
وقبل ما ابدأ الحلقة بتفصيل على اللعبة نفسها والمغامرة والشخصيات، أبي اتكلم عن نسخة الريماستر، حق الي يمكن يعرف اللعبة ومايبي يسمعني اتكلم عنها بس مهتم انه يعرف شنو توفره هالنسخة الجديدة. هي ريماستر تحسين بصري وشكلي فقط، يعني أخذ الفرق بين نسخة الـ PS2 وبعدين لما نزلت على PS3، والحين نفس الشي بس اخذ الي كان على PS3 وحسنه أكثر للأجهزة الجديدة. فالدقة أعلى وتقدر تختار بين طور الرسومات وطور الأداء. بس الصراحة لما غيرت بين الاثنين مالاحظت فرق كبير، فلعبتها على طور الرسومات، وهي طبيعة اللعبة نفسها ماتحتاج فريم ريت عالي بالنسبة لي وتنلعب بسلاسة على طور الرسومات. بس كان في أماكن ويا الانفجارات حسيت بهبوط الاطارات لكن ما أثر على اللعب. وإضاءة اللعبة مختلفة عن نسخة الـ PS2 وحتى عن ريماستر PS3 وهذا أكثر اختلاف بتلاحظه اذا لعبت النسخ السابقة… أما من ناحية الـ Character Models و الـ Geometry حق بيئة العالم، وحتى الـ Textures فما فيهم فرق ملحوظ، يمكن في تحسينات بسيطة اذا تقارنهم جنب بعض، بس الفكرة ماكانت انهم يبدلونها بتصاميم جديدة فيها Polygon Count أعلى أو أي شيء مشابه، فللحين يعني شكلياً ما زالت محافظة على كونها لعبة PS2 بمجرد طريقة تقديم أعلى بالدقة والإضاءة.
لكن بالرغم من هذا فهي مو نفسها نسخة الريماتسر القديمة، لأن فيها إضافات جديدة داخل اللعبة نفسها، وداخل القائمة الرئيسية للمستندات وغيرها. أكبر هذه الاختلافات داخل اللعبة انك بتحصل M Disks (الي اهي الاقراص الي تحصلها في اللعبة) وأدوات جديدة (أغلبها تغييرات شكلية مثل ملابس مختلفة للشخصيات أو لون مختلف للأسلحة). لكن هذه لها علاقة وتربطها ويا الجزء الثاني… أو بالأحرى تربطها ويا العرض التشويقي الي شفناه للجزء الثاني. لأن بصراحة مانعرف اذا Beyond Good & Evil 2 لعبة حقيقة ولا مجرد خيال، ولحد الحين هي مجرد خيال بالنسبة لي لحد نشوفها قدامنا، فهذه الأشياء الجديدة الي تحصلها لما تلعب الجزء الأول تربطها بشخصيات شفناها في عرض BGE2. فيعني اذا انت شخص يحب الجزء الأول أساساً، فعندك دافع تلعب هالنسخة لأن في مجموعة ألغاز جديدة ما كانت في اللعبة الأصلية، وبتعطيك فيديوات جديدة تربطها ويا الشخصيات الجديدة للي كشفوا عنها للجزء الثاني.
والإضافة الثانية هي شي انا أحبه لما يحطونها في ريماستر الألعاب القديمة أو الـ Collections الي تنزل، واذا تسمعون حلقات البودكاست باستمرار فسمعتوني اتكلم عنها أكثر من مرة وكل مرة امدحها. هني في قائمة جديدة فيها مستندات وفيديوات من عملية تطوير الجزء الأول، ومقسمينها على فقرات… ففي مراحل قبل الانتاج، وفيها مستندات للتصاميم والأفكار، وفي مرحلة تطوير الديمو، وفي فيديوات أسرار للأشياء الموجودة في اللعبة، ورسومات Concept Art حق اللعبة. وكل هالأشياء مكتوب عنها وصف تقراه وانت تشوفها.. وهذه إضافة حلوة بالنسبة لي وفي معلومات ممتعة داخلها لما تشوفها.
لاحظت خلل ازعجني شوي، لما تشغل الترجمة فتوقيتها مو مناسب ويا الصوت. فبتطلع لك الترجمة للحوار وبعدها بتسمع الحوار، ولما تتغير الترجمة فللحين الحوار الأول شغال.. ففي مشكلة بالتوقيت، وهالشيء ما توقعته يكون موجود والمفروض انه ما يكون موجود لريماستر حق ريماستر.. يعني دبل الريماستر وللحين في مشاكل بسيطة مثل هذه. وحتى الموسيقى في الـ Credits بنهاية اللعبة كانت تنقطع قبل ماتنتهي الموسيقى نفسها وتبدأ الي بعدها. وبعدين اختفت الموسيقى كلها.. فهذه اشياء اتوقع انها تنحل بتحديثات بس المفروض انها ماكانت موجودة من الأساس.
وهذا كل شيء بالنسبة للريماستر والإضافات الجديدة… ففي تحسينات كانت موجودة في ريماستر PS3 وجابوها هني مثل اعدادات الكاميرا والتحكم، وبعض التغييرات البسيطة للقيمبلاي الي تخليها مُحدثة شوي، لكنها مو تغييرات كبيرة، بس تخلي اللعب أحسن، يعني اعتبروها Patch للقيمبلاي بشكل بسيط.
فعلى كل كلامي لحد الحين، هل تستحق انك تشتري اللعبة؟ بالنسبة لي أي، لأن سعرها مناسب بالنسبة للي تقدمه، ولأن Beyond Good & Evil لعبة مغامرات ممتعة اساساً، وهذا الي بكلمكم عنه الحين.
فنرجع حق Beyond Good & Evil والحين حلقة بودكاست خفايف ألعاب طبيعية…
فكلعبة أكشن ومغامرات نزلت على جيل PS2، خل توقعاتك لحجم اللعبة مناسبة لذاك الجيل. انت تلعب بـ Jade واللعبة شبه عالم مفتوح، عبارة عن مناطق متوسطة بينها بحر، وتسوق مركبتك أو الـ Hoverboard عشان تتنقل بين هالمناطق. عندك سلاح واحد والكومبو للضرب حده بسيط، يعني بسيط لدرجة ان مافيه Light Attack و Heavy Attack، بل مجرد زر المربع لكومبو ضربات، ويتغير الكومبو لما تحرك عصا الآنالوق للاتجاهات فبتشوف الشخصية تسوي حركات مختلفة. وبالإضافة للسلاح فعندك كاميرا وهي الجزئية الثانية للعبة.
انت هويتك في هذا العالم ان Jade صحفية مغامِرة، فهي قادرة انها تروح لأماكن خطرة وتدافع عن نفسها، والي تجي بجزئية الكومبات، لكن بنفس الوقت مهمتها الرئيسية انها تاخذ صور للتقارير الي ترسلها… ففي بداية اللعبة يتواصل وياك شخص يبيك تصور له أحد مخلوقات الكوكب في منطقة خطيرة، وانت تروح عشان تؤدي هالمهمة لأنك اذا اخذت الصور فيندفع لك. لكن قبل حتى ما تبدأ أول مهمة بتلاحظ أهمية الكاميرا في اللعبة كشيء جانبي يساعدك في رحلتك… هي اللعبة مغامرة في كوكب ثاني ففي حيوانات ومخلوقات موجودة عليه، وفي عالمة أحياء تطلب منك تصور هذه المخلوقات وترسل لها الصور مقابل عملة اللعبة… فو انت تستكشف مراحل اللعبة بتواجه مخلوقات جديدة وبتستخدم الكاميرا لتصويرهم عشان تحصل العملة،، لكن الأهم انك لما تكمل 8 صور فبتحصل لؤلؤة. وهذه اللآلئ مفيدة للتقدم في القصة واكمال اللعبة. فيعني ربط الاستكشاف بطريقة غير مباشرة ويا هدفك الرئيسي يعزز من وجود هالنظام من الأساس.
هالشيء بالنسبة لي كان وايد حلو،، وكلامي عن اللعبة الأصلية.. هذه الأساليب في القيمبلاي يمكن تكون عادية ومتوقعة في ألعاب العالم المفتوح الحالية، بس مثل ماقلت بالبداية ان خلوا توقعاتك وارجعوا بالزمن لذاك الجيل عشان تحسون بجودة الأشياء الي تقدمها اللعبة. والحين لما رجعت ألعب وكملت هالريماستر فللحين هالجزئية كانت ممتعة بالنسبة لي.
فالمهم ان بتكتشف بسرعة، وهذا مو Spoiler لأن هذه بداية اللعبة وتعرف مهمتك الرئيسية. انك صرت مطلوب من قادة المقاومة على هذا الكوكب عشان تحقق في جرائم حاكم هالكوكب الي يشكون أنه له علاقة باختطافات تصير للشعب. فأنت كـ Jade بتشتغل ويا المقاومة وبتروح لأماكن مختلفة على حسب تطورات القصة.. وهني ما بعطي تفاصيل عشان انتوا تكتشفون وانتوا تلعبون.
فبطبيعة هذه الأماكن الموجودة في العالم فيها أعداء ووحوش، سواءً من المخلوقات المعادية أو من الحرس للحاكم. فهني بتستخدم سلاحك والكومبات البسيط الي توفره اللعبة.. هو الكومبات أضعف جوانبها لأنه حده بسيط، لكنه يؤدي الغرض الصراحة.. بس ما بنكر انها جزئية ضعيفة من اللعبة.. أو حطوا خط على الي قلته، لأن أضعف جزئية من اللعبة هي التسلل أو الـ Stealth.
في أماكن تدخلها وفيها الحرس، وهم صعبين في المواجهة المباشرة، فتبيك اللعبة تبتعد عن مواجهتهم مباشرة لأنك بتموت بسرعة، فتصميم المرحلة يشجع أو يبيك تتسلل. فتنتظر الحرس يدور للجهة الثانية عشان تمشي من وراه، او تختبأ ورى صندوق لحد يمر الحرس وبعدها تروح للمكان الي بعده.. وأقول ان هالجزئية ضعيفة لأنه Stealth بدائي حتى على أيام PS2. يعني العدو عنده خط روئية قدامه بس، حتى لو كنت سانتي واحد على يمينه فمايشوفك وتقدر تمشي عنده ولا يسمعك. وحتى لما ينتبهون عليك، فاركض مترين بعيداً عن مكانهم ومباشرة ينسون عنك ويرجعون لمكانهم. وهو صح انه سيء، بس شخصياً ما اعتقد انه يهم انه سيء. لأن اللعبة نفسها ما تبي تقدم نظام تسلل واقعي كـقيمبلاي، بس تبي أماكن تتسلل فيها Jade لغرض القصة ولغرض ألغاز تنقل تقدمها اللعبة. فيعني هو Stealth موجود مو لغرض انه يقدم لك محاكي Metal Gear، وانما عشان يخدم لغز بمكان حاطينه المطورين للاعب، كجزء من مكان خطير في القصة. فيعني في هالنقطة انا نص ونص بين اني اقول انها سلبية أو انها شيء عادي، بخليكم تحكمون عليها براحتكم.
بس الي اعتبره نقطة سلبية هو تعدد الخيارات للحلول… أو عدم وجوده. وعشان اشرح الي اقصده بعطيكم مثال من مكان في القصة موجود فيه هالتسلل. بعض الألغاز ممكن يكون لها حل أسهل بواااايد من الي تبيك اللعبة تسويه، لكن لأنها لعبة من الألفين فمافي تعدد حلول، وانما سكريبت واحد لشنو طريقة الحل الوحيدة. فالمثال في منطقة الـ Slaughter House… توصل لمكان فيه ليزر أحمر و Jade ماتقدر تمر خلال هالليزر، لكن دائماً في اللعبة وياك شخصية ثانية تساعدك واحياناً تسخدمها في حل بعض الألغاز. وهذه الشخصية لابسة نفس الدرع الي يلبسه الحرس، وهالدرع فيه شيء مميز انه يخلي اللي لابسه يمر خلال الليزر بدون مشكلة. فالمهم ان مهمة Jade انها تروح من الغرفة الي هي فيها حالياً إلى الغرفة في الجهة المقابلة الي يفصلها هالليزر، فاللعبة تبيك تروح من غرفة ثانية إلى ثالثة إلى رابعة إلى خامسة.. وكل هالغرف لازم تتسلل فيها لأن في حرس لازم تنتبه لتحركهم، وبنفس الوقت الغرف فيها ليزر لازم تحصل طريقة تغلقه فيها. وللأمانة فهذه الألغاز حلوة مو انها مملة. بس المهم ان بعد كل هالغرف توصل وين؟ للجهة المقابلة من الليزر الأحمر الي كان بالبداية ورحت لكل هاللف والدوران عشانه، وبتشوف ان في زر على الجهة الثانية من الجدار، تستخدم الـ Key card الي كان عندك عشان تغلق الليزر وتفتح اختصار جديد. فأتوقع الحين يمكن تكون عندكم فكرة عن الي ابي أوصله… اللعبة تخليك تنقل أغراض من الـ Inventory بين الشخصية الي انت تلعب فيها والـ AI للشخصية الثانية الي تساعدك،، فحل أسهل لو اني اعطي الـ Keycard للشخصية الثانية ويمر من الليزر ويضغط الزر وبعدها انا كـ Jade أقدر أمُر بدون ما أضيع الـ 10 دقايق الي اخذتها لكل التسلل في الغرف المجاورة. بس مثل ماقلت، ان المطور حاط لغز في باله ويبيك تمشي على حل واحد هو حاطه،،، وإلا ما بقول انهم مافكروا في هالشيء، لأن بعد نص ساعة تقريباً من هالمكان تعرفون شنو يصير؟؟ تدخل غرف فيها ليزر أحمر بكل مكان وماتقدر تمر، وتعرفون شنو الحل الي تبيه اللعبة؟ انك تعطي الـ Keycard للشخصية الثانية وهي تروح تضغط الأزرار وتغلق الليزر.. فبالضبط الشي الي انا فكرت فيه في غرفة سابقة لكن ماقدرت أسويه لأن مافي تعدد حلول للألغاز. فيعني في أماكن بتلاحظ فيها انت كلاعب هذه النواقص.
لكن بعد في أشياء ذكية تسويها اللعبة في أماكن ثانية. فمثلاً جزء من الأنشطة الجانبية في اللعبة هي لسباقات بالـ Hoverboards تسويها عشان تحصل عملة ولؤلؤ. هذه Side Activities لأن مثل ماقلت ان اللعبة شبه عالم مفتوح بمنطورنا الحالي لتصميم الألعاب. فتقدر انك ما تسوي السباقات اذا ماكنت مهتم فيها. بس، في مهمة رئيسية، عشان توصل لمنطقة الـ Slaughter House الي كنت اتكلم عنها قبل شوي. هي منطقة مغلقة ما تقدر تروح لها بسهولة لأنها بحراسة شديدة. لكن تقولك اللعبة أدخل السباق الجانبي لأن حلبة السباق قريبة من مكان الـ Slaughter House فلما انت بهالنشاط الجانبي وتسوي السباق على الحلبة بتحصل مدخل سري ولما تاخذه توصل للمكان المطلوب للمهمة الرئيسية. فيعني اللعبة فيها أشياء ذكية لحد اليوم، وفيها أشياء نشوفها غبية، وبالنسبة لي فالأفكار الحلوة تغطي على النواقص بصراحة لكن ما يعني انها مو موجودة.
ومن الأشياء الحلوة في اللعبة بالنسبة لي انه مافيها فقاعات حوار تقولك شنو تسويه بالضبط في المرحلة، فاللعبة تحترمك كلاعب انك تعرف تركز على المطلوب وتستكشف حولك وتعرف المطلوب وتوصل لطريقة الحل. فبتدخل غرف وبالبداية ما بكون واضح شنو المطلوب او وين تروح بالضبط، لكن تعرف انك لازم توصل للجهة الثانية، ومن الي تعلمته خلال اللعب لحد هذه اللحظة ومن قرائتك للبيئة من حولك بتعرف شنو الخطوات الي لازم تاخذها. يعني مافي سهم يأشر لك وين تروح، ولا دائرة للـ Objective موجودة بوسط شاشاتك توديك للمكان بالضبط. مجرد حوار واحد يعطيك فكرة عامة وانت تكتشف بنفسك، وهذا من الأشياء الموجودة في ألعاب الأكشن والمغامرة على PS2 وبعدين فقدناها ويا طريقة التصميم الجديدة من جيل PS3 و PS4، وحتى يوبيسوفت نفسهم من أكبر المتهمين بتوجيه اللاعب بهالطريقة الجديدة. لكن عموماً حلو انك ترجع لطبيعة التصميم في جيل PS2 ويمكن في وايد منكم حالياً يلعب Sly Cooper من لما حطوها على PS5 وبتعرفون الي أقصده ان عندك حرية تكتشف المطلوب بنفسك بدون دائرة او سهم على الشاشة، هالشيء أمتع بالنسبة لي. وحتى مثلاً تصوير المخلوقات يعتبر Collectable في Beyond Good & Evil لكنه مو تجميع لغرض التجميع وبس، إلا انه يعزز العالم الي انت فيه وله دور بالتقدم في اللعبة بشكل غير مباشر.
وفي مثال حلو ثاني، لما تكون في الـ Hoverboard وتوصل لمكان مغلق لأن في قنبلة تسد الطريق.. فلازم تروح لعدو موجود بالمنطقة الي قبلها، من يشوفك يرمي صاروخ تتبع، فانت تستغل هالشيء عشان تخلي الصاروخ يتتبعك إلى هذه القنبلة بدون ما تصيدك، وتخليها تفجرها وتفتح لك الطريق. في أمثلة حلوة تبين جودة التصميم في هاللعبة ومتأكد اذا بتلعبونها بتحسون فيها.
وبما اني تكلمت عن الـ Hoverboard، فهذه المركبة تستخدمها للتنقل في البحر وتروح للمناطق الي عبارة عن جزر مختلفة الي فيها المراحل الرئيسية، لكن في شواطئ وكهوف فيها أنشطة جانبية، وأماكن جديدة تستكشفها مالها علاقة بالمراحل الي في المهمات الرئيسية. وهني تجمع اللآليء الي للحين ماقلت لكم شنو فايدتها. اللؤلؤ عبارة عن العملة الي تستخدمها عشان تشتري تطويرات للـ Hoverboard وهذه لها علاقة مباشرة بالمهمات الرئيسية، فحدها ضرورية، وبتحتاجها لنهاية اللعبة بدون ما أقول ليش. فتحصلها من المهمات الرئيسية لكن بتحتاج تسوي بعض الأنشطة الجانبية عشان تحصل منها أكثر، واذا ماكنت تصور المخلوقات، وماكنت تبحث عنها في المراحل وانت تلعب المهام الرئيسية فبتوصل لنقطة تحتاج فيها انك تركز على الأشياء الجانبية عشان توصل للعدد المطلوب. بس حتى اذا ماوصلت للعدد المطلوب فاعتبر هالفترة من اللعبة تنفتح لك عشان تستكشف العالم وتزور الكهوف الجانبية وتكلم الـ NPCs.
فيعني باختصار Beyond Good & Evil تقدم لعبة أكشن ومغامرة تدفعها قصة مشوقة تعطيك الدافع انك تستكشف الأماكن، وبنفس الوقت تستخدم أسلوب القيمبلاي المتعلق بالكاميرا عشان تصور للتقارير، والحلو انك بعد كل مجموعة صور تنشرها بتشوف سكان المناطق على الكوكب يطلعون من بيوتهم ويمسكون لافتات بسبب الي شافوه في التقارير، ففي تغيير في عالم اللعبة من حولك ويا تقدمك. ومثل ما قلت انها اشياء يمكن متعودين عليها ويا الألعاب حالياً لكن لا ننسى ان هذه لعبة من اسم هالنسخة صار لها 20 سنة من نزلت، فكانت تقدم هالأفكار الحلوة في وقتها، لكنها للحين محافظة على متعتها بالنسبة لي وتستاهل التجربة اذا ماعمرك لعبتها. مرت فترة طويلة من لعبت Beyond Good & Evil فالحين لما لعبتها كانت تجربة منعشة بالنسبة لي للحين.
وهذا كل شيء عندي لحلقة اليوم. اذا عجبكم المحتوى فلا تنسون تسوون لايك اذا تسمعون على يوتيوب، وتقدرون تساعدوني بتقييم البودكاست على المنصات المختلفة للبودكاست ومشاركة الحلقات. واذا تحبون تدعموني بشكل مادي بأي مبلغ مهما كان بسيط فعندي صفحة باتريون وصفحة كوفي موجودة روابطهم في وصف الحلقة، وكل دعم بأي شكل راح يساعدني. فشكراً لكم على الاستماع للحلقة. كان وياكم علي الساهي ومع السلامة.
